معلش يا جماعة.. بعيدا عن التفاصيل.. أنا مستاااااء جدا من الطريقة اللي بعض الأعضاء بينصحوا بيها أخونا! مستاء جدا من لغة (اهرررررب وانفد بجلدك) دي !! والأنكى اللي يقول لما البلد تتعدل ابقى ارجع !!! طيب ولما كل واحد يقول لما البلد تتعدل ارجع.. مين بقى اللي هيعدل البلد ؟ هنعمل للبلد زارجينة مثلا ونسيبها كلنا 5 سنين مثلا ولما نرجع تكون استعدلت لوحدها ؟؟ م حد يفهمني يعني ؟!!!!

هوة الـ800 واحد اللي مات علشان خاطري وخاطرك وخاطرنا كلنا .. ماتوا علشان كل واحد يشيل إيده م البلد في أكتر وقت البلد محتاجانا فيه ؟؟ يا جماعة دلوقتي كل واحد مصري حقيقي بعد الثورة بقت تقع عليه مسؤولية مباشرة تجاه بلدنا! أرجوكوا بلاش تقروا الكلام دة على إنه كلام شعارات! المشكلة إننا اتعودنا ع السلبية وأي كلام عن الإيجابية بقى كلام شعارات!! يا جماعة لازم فعلا كل واحد في مجاله يفكر إزاي يقدر يفيد البلد ؟ إزاي يقدر يوعي الناس؟ ازاي يقدر يطور من منطقته اللي عايش فيها ؟ ازاي يقدر يصلح الدايرة الضيقة اللي حواليه من أقارب وجيران وأصدقاء؟؟ دي مسؤوليتنا كلنا دلوقتي , مش تقوللي اهرررررب !!!!!!!!!!!!!!

انا مش ضد مبدأ السفر على فكرة.. لو واحد مش عارف يتجوز مثلا ومفيش حل غير إنه يسافر ف دة مضطر .. لو واحد مش عارف يحقق احتياجاته الضرورية في مصر غير لما يسافر ف ممكن يسافر.. بس متقولليش مثلا إن احتياجاتك الضرورية إنك عايز تركب أوبل بدل الفيرنا ! مش من احتياجاتك الضرورية إنك تقعد ف شقة 200 متر بدل 100 متر!! مش من احتياجاتك الضرورية إنك تصيف ف الغردقة وشرم بدل اسكندرية ومطروح !! لو انتة عايش في المستوى المقبول في مصر دلوقتي يبقى لو سمحت ضحي بالرفاهيات والكماليات علشان فعلا فيه مسؤولية كبيرة تقع علينا دلوقتي !!!!!!

بلاش حد يقول البلد دي مايتقعدش فيها ! البلد دي يتقعد فيها ف الفترة دي أكتر من أي وقت تاني على فكرة !!

الأعجب من دة كله إني اتوقعت إني ألاقي حد قبلي قال الكلام دة ! لاقيت أنا أول واحد أقول كلام كنت فاكره بديهي !!! ربنا يصلح حال الجميع ...