أولا أنا آسف جدا لصاحب الموضوع إني مش بضيف ليه بخصوص استفساراته.. بس أنا بعلق بس على كلام بعض الأخوة اللي دفعني للرد ..
وبالنسبة لأخويا human12 اللي حسيت إنه فهم إني بزايد على وطنية حد.. أنا مش بزايد على وطنية حد يا جماعة.. أنا بس بقول رأيي في وجهة نظر شايفها منتشرة جدا اليومين دول , وبتتلخص في (اهرررررب) !!

أما أخويا ahmedfoun .. فطبعا أنا مبقولش للي برة إنه يرجع مصر إلا لو مثلا معاه فلوس وهيقدر يستثمرها كويس في مصر.. غير كدة المغترب بقى دة الواقع بتاعه .. أنا بتكلم على اللي في مصر.. وشغال.. ومتجوز أو قادر يتجوز وعايش في مستوى اجتماعي مقبول.. دة لازم يكون إيجابي ويغير من البلد دي لإن التغيير دلوقتي بقت مسؤولية تقع على كل فرد..

طبعا السؤال اللي بيدور حوله رد أخويا ahmedfoud ..

اعمل ايه يا باااااااشا طيب دلني ؟؟؟؟ لا حول و لا قوه الا بالله .. هوا حضرتك بتكلم اعضاء نادي روتاري و لا ايه مش فاهم .

يا أخي ليه فاهم التغيير عبارة عن إنك تعمل حملة دعائية وتطبع ملصقات وتلزق على الحيطان "ماترميش زبالة وماتكسرش إشارة" ؟؟؟؟
أبسط حاجة خااااالص.. لو كل واحد بس في مكانه شاف غلط أدامه ماسكتش .. واشتكى موظف مستهتر أو ظابط متجاوز أو حتى لو شاف عربية طامسة لوح وحاطة هيئة قضائية وصورها .. أو شوفت انتة مثلا المواطن اللي من بورسعيد اللي راح للعسكري اللي بيوصل ابن الظابط من المدرسة للبيت بعربية الشرطة اللي انا وانتة دافعين تمنها من الضرايب اللي بندفعها.. وسأله العربية دي بتاعت أنهي باشا ونزل الفيديو ع اليوتيوب واتعمل تحقيق في الواقعة ؟ أهو انتة كدة مجرد إنك لما تشوف الغلط قدامك ماتسكش عليه ساعتها هتكون بتغير من البلد !

أنا ماكنتش مستني من الثورة إنها تخللي الناس اللي بيغلطوا مايغلطوش.. ولا مستني منها إنها تحول الشخص الفاسد لمواطن صالح.. الثورة مش هتعمل كدة.. بس يكفي إنها خلتنا نبقى إيجابيين ومانسكتش عن الغلط لإننا حاسينا إنها بلدنا ...

بالنسبة للي تقدر تعمله في الدايرة الضيقة اللي حواليك ف حاجات كتير .. بسيطة بس مؤثرة.. قبل الاستفتاءات مثلا انا طبعت 20 ورقة بتقول للناس تشارك واديت أصحابي كل واحد ورقة وصورها 20 نسخة ووزعناها على الناس بعد صلاة الجمعة.. ممكن برده تتفق مع أهل المنطقة تقفوا ضد استغلال التجار مثلا - عملنا كدة لما تمن كارت الشحن رفعوه - .. في بعض المناطق فيه اللي منع بيع أنابيب البوتاجاز في السوق السودا..

وزي ما قلت قبل كدة.. يكفي بس إنك تعيش في البلد دي وتؤدي عملك بإخلاص.. ولما تشوف غلط ماتسكتش.. ساعتها هتكون بتقدم أكبر خدمة للبلد !!!