الموضوع: موقف طاريء تعرضت له والحمد لله ربنا ستر - الحلقة الأولي

المشاركة الأصلية كتبت بواسطة hossamm444

انا خبرتى قليله جدا بس هشارك يمكن تصيب

المشاركة الأصلية كتبت بواسطة hossamm444

1 يمكن فيه صامولة فى الاطارات مش مربوطه كويس
2 فى مسمار ماسك اى حاجه زى لمبه او مرايه مثلا مهوى شويه

حاول مرة آخري يمكن تكسب معانا

المشاركة الأصلية كتبت بواسطة hossamm444

يمكن فى مشكلة فى الرمان بلى بتلع العجل

حاول مرة آخري يمكن تكسب معانا

المشاركة الأصلية كتبت بواسطة sama_sama

الموضوع كام حلقة علشان بحب بس أتفرج على الحلقة الأخيرة؟

الحلقات ممكن تكون كتير بس أكيد الحلقة دي حاول مرة آخري يمكن تكسب معانا

المشاركة الأصلية كتبت بواسطة ashraf_ibrahim

الكارتيرة مثلا مش مربوطة كويس !

حاول مرة آخري يمكن تكسب معانا

المشاركة الأصلية كتبت بواسطة ozem

طيب في جائزه لو حليت الفزوره؟

بإذن الله وحاول مرة آخري يمكن تكسب معانا

المشاركة الأصلية كتبت بواسطة ziabassem

قصدك كارتيره الزيت .. كنت بفكر فيها بس استبعدتها لصعوبة حدوثها .. ممكن طبه الزيت بتاعة (سواء الموتور أو الفتيس) مكنتش راكبة كويس وبتسرب زيت وهي كانت السبب في الزنة دي .

حاول مرة آخري يمكن تكسب معانا

المشاركة الأصلية كتبت بواسطة aaaprd

اعتقد دى مشكلة شكمان

قربت كتير لكن لسة... حاول مرة آخري يمكن تكسب معانا


.................................................. ..............................................

كده الحل بقي سهل يلا يا شباب الجائزة تنتظر صاحب النصيب في لقاء عام بكارفور المعادي .... ياتري حتكون من نصيب ميييييين ؟؟!!

الحلقة الثانية

بعد إستمرار الصوت ده اللي ذكرته في الحلقة الأولي .... وللأسف فشلت إني أعرف سببه أو مصدره إيه...

قررت إني أستشير كبير مهندسي byd وهو المهندس/ أسامة .. مدير الصيانة بمركز خدمة الإسكندرية ... وفعلا اتصلت بيه وكعادته دائما بطريقته البشوشة وتواضعه رحب بيا وسأل علي العربية فحكيت له الموضوع .. وهو علي فكرة يستحق الجائزة المتواضعة بجدارة لأنه أول من عرف حل الفزورة لكنه فضل إنه يفحص العربية فحص عملي بدل الوصف بالتليفون علشان يقدر يجزم بالسبب والحل الأنسب له.

قلت له حاحاول أرفع العربية هنا في القاهرة وأدقق أكثر في سبب الصوت لأن لسة بدري شوية علي موعد الصيانة الجاية ده غير إن ظروف الشغل خلت موضوع السفر للأسكندرية صعب شوية هذه الأيام إلا أنه حذرني من إهمال هذا الصوت لأنه ممكن يؤدي لمشاكل أكثر.. وطلب مني أذهب لفرع القطامية إذا كنت مش حاقدر أجي فرع الإسكندرية قلت له حاحاول بإذن الله والله المستعان.. وأنهينا المكالمة علي وعد بسرعة التوجه لمركز صيانة وفحص هذه المشكلة

الجميل في الموضوع إنه اتصل بنفسه بيا بعدها كذا مرة يسألني عملت إيه؟! .. وكان مهتم جدا وقلقان يمكن أكتر مني كما لو كان العطل بسيارته الخاصة مش سيارتي... وده بالمسه دائما منذ أول صيانة عملتها في مركز صيانة الإسكندرية وكانت صيانة الـ 1000كم الأولي ومانساش إتصاله بيا وقتها تاني يوم علي طول بعد ما مشيت وده كان بدون سابق معرفة إطلاقا.. ومتابعته للسيارة وللمشاكل اللي كنت باشتكي منها ومسجلها في أمر الشغل رغم إنها كانت بسيطة جدا

ويمكن ده من الأسباب اللي خلتني من ساعتها (لما عملت صيانة أول 1000كم) ماعملتش ولا صيانة غير هناك في مركز الإسكندرية باسثناء صيانة واحدة كانت صيانة الـ 5000 كم عملتها في مركز العباسية - ماكنش فرع القطامية لسة فتح أصلا - والحمد لله باشعر بفارق بعد كل صيانة كما لو كانت العربية اتجددت

نسيبكم بقي تكملوا جهودكم في حل الفزورة.. علشان نسلمها للفائز بإذن الله في اللقاء القادم اللي حيكون بترتيبات مختلفة حاجة بسيطة إن شاء الله

المشاركة الأصلية كتبت بواسطة ziabassem

علبة البيئة في الشكمان .. ممكن تكون حصل ليها انسداد بعد كدة وتسببت في سخونة العربية وضعف السحب .

أو حوامل الشكمان (الأفايز) اللي بتشيل الشكمان ضعفت .. والشكمان وقع منك وأنت ماشي بالعربية .

إن مكنش كدة ذنبك على جنبك .. وده أخري معاك

هو الخسران يا باسم ....
بس تعرف انا مستعجل وعايز اعرف اية المشكلة بالظبط ... و المهم انها تكون اتحلت .... ويطمنا استاذ / وليد علية اولا وعلى الجميلة ...
بس بالله عليك لو الحالة مستعصية ... ابعتها لاحسن مستشفى على حسابى ... هو احنا عندنا كام جميلة

المشاركة الأصلية كتبت بواسطة ehabpopo

هو الخسران يا باسم ....

المشاركة الأصلية كتبت بواسطة ehabpopo

بس تعرف انا مستعجل وعايز اعرف اية المشكلة بالظبط ... و المهم انها تكون اتحلت .... ويطمنا استاذ / وليد علية اولا وعلى الجميلة ...
بس بالله عليك لو الحالة مستعصية ... ابعتها لاحسن مستشفى على حسابى ... هو احنا عندنا كام جميلة

ربنا يكرمك إيهاب باشا وأشكرك علي إهتمامك بالسؤال عني

الحمد لله ربنا أكرمني وعدت علي خير

أنا حصلت معايا في عربيتي و الصوت كان بينرفزني بس الحمدلله لما عرفت السبب ظبته


أنا عندي كان لما أكون مدور العربية و أدوس بنزين و أنا واقف و ال-RPM يطلع فوق 3 و اشيل رجلي كنت بسمع صوت زنة من عند الموتور ، جبت واحد صاحبي و خلته يدوس بنزين و يثبت رجله لم ال-RPM يوصل ل-3 أو قبلها سنة و كانت الزنة واضحة جداً و عرفت انها جية من ال-cover البلاستيك اللي مكتوب عليه ميتسوبيشي كل اللي عملته اني خبطت شوية عليه و الزنة راحت و قلت لو حصلت تاني حبقة أفكه و أحط كاوتش عند المسامير اللي رابطة بالموتور بس الحمدلله الظن ماحصلتش تاني من ساعتها


اه صحيح أنا عايز أقول إن ممكن أكون أنا السبب في إن الزنة ده تحصل عشان أنا كنت قبلها فاتح الكبوت و كان في زجاجة مية بلاستيك محطوطة على ال-cover و و مع دوران الموتور الزجاجة وقعت على ال-cover


بس أنا معتقدش إن دة اللي حصل مع أستاذ وليد عشان هو بيقول إن حصله ظرف طارق و على حسب معلوماتي دة cover في الاول و في الاخر يعني مش هيتسبب في ظرف طارق

المشاركة الأصلية كتبت بواسطة gad_fcis

أنا حصلت معايا في عربيتي و الصوت كان بينرفزني بس الحمدلله لما عرفت السبب ظبته


أنا عندي كان لما أكون مدور العربية و أدوس بنزين و أنا واقف و ال-rpm يطلع فوق 3 و اشيل رجلي كنت بسمع صوت زنة من عند الموتور ، جبت واحد صاحبي و خلته يدوس بنزين و يثبت رجله لم ال-rpm يوصل ل-3 أو قبلها سنة و كانت الزنة واضحة جداً و عرفت انها جية من ال-cover البلاستيك اللي مكتوب عليه ميتسوبيشي كل اللي عملته اني خبطت شوية عليه و الزنة راحت و قلت لو حصلت تاني حبقة أفكه و أحط كاوتش عند المسامير اللي رابطة بالموتور بس الحمدلله الظن ماحصلتش تاني من ساعتها


اه صحيح أنا عايز أقول إن ممكن أكون أنا السبب في إن الزنة ده تحصل عشان أنا كنت قبلها فاتح الكبوت و كان في زجاجة مية بلاستيك محطوطة على ال-cover و و مع دوران الموتور الزجاجة وقعت على ال-cover


بس أنا معتقدش إن دة اللي حصل مع أستاذ وليد عشان هو بيقول إن حصله ظرف طارق و على حسب معلوماتي دة cover في الاول و في الاخر يعني مش هيتسبب في ظرف طارق

مشكور ياباشا علي مداخلتك الجميلة

وبارك بقي للحاج باسم هو الفائز

الحلقة الثالثة والأخيرة

بعد مكالمة الباشمهندس/ أسامة وجدت إنه مافيش مفر من الإسراع بفحص العربية وقررت إني أروح مركز الصيانة بالإسكندرية علشان أطمن لأني قلقت جدا المهم قررت أطلع يوم السبت الصبح بدري وفعلا الساعة 5.30 ص نزلت وعديت علي صديق اتفقنا إننا نكون صحبة في المشوار وعدينا علي عربية الفول وجبنا فطار متين يعيننا علي المشوار ده... وكنت علي أول الطريق حوالي الساعة 6.30 ص علشان أوصل في حدود الساعة 9 ص أول ما التوكيل بيفتح وكمان صديقي كان معجب العربية وعاوز يجي يشوف التوكيل وبعدها نتفسح في عروس البحر الابيض شوية لأننا محتاجين نغير جو بعض ضغوط الشغل المستمرة يوميا من فترة كبيرة...



أنا متعود أني أمشي معظم الطريق علي 140 أو 160 وده ياجماعة بجد غصب عني لأن الجميلة هي اللي عاوزة تجري أعمل إيه وأنا ما بحبش أرفض لها طلب ... لكن المرة دي قلت أمشي بالراحة أحسن علشان المشكلة اللي موجودة دي ماتأثرش علي حاجة أو ماتزيدش وبعدين يبقي يحلها حلال بعد ما نصلح العطل...



فكنت ماشي علي 100 --- 120 أول 70 كيلو لحد ما حبيت أشد شوية فاكتشفت للأسف إن دي كانت أقصي سرعة بتجيبها العربية حاليا 120 !!! فجالي إحباط شديد وقلقت جدا ومكنتش عاوز أحسس صاحبي إن فيه مشكلة خصوصا إن الطريق لسة طويل ....


ففضلت ماشي ما بين 100 و 110 بالعافية لحد ما وصلت لماستر (الرست) وقلت أريح الموتور شوية وأكمل الطريق علي مهلي بعد كده وبعد ما ريحنا شوية وجبنا جرايد نتسلي بيها كملنا الطريق وهنا إكتشفت إن السحب قل جدا وأقصي سرعة بقت بالعافية 100 وعمالة بتقل لحد ما وصلت 90 وشوية كمان وبقت 80 وهكذا لحد ما بقت أقصي سرعة 60 وبالعافية كمان طبعا مابقاش ينفع صاحبي ما يخدش باله إن فيه حاجة غلط .... خصوصا إني بقيت ماشي والعربيات كلها عمالة تعدي جنبنا بسرعة وتزمر بتذمر وتقريبا كانوا عاوزين يتخانقو معانا مع اني كنت ماسك اليمين مش عارف ليه!!



فركنت علي جنب وحاولت أشوف إيه المشكلة ما عرفتش وكنت مضايق جدا جدا وقلقت إن يكون حصل حاجة في الموتور وطبعا في الحالة دي الواحد كانت دماغه عمالة تودي وتجيب ياتري إيه بالظبط المشكة مع التوتر الشديد خصوصا إني سامع إن الطريق غير آمن أوي الفترة دي وكل شوية عربية نقل تقف كتر خيرهم يعرضوا المساعدة إلا إني كنت باشكرهم وأعرفهم إن عربية الصيانة في الطريق...



ولما لقيت مافيش فايدة إني أعرف السبب أو حتي أحاول أحافظ علي سرعتها لحد التوكيل إتصلت بالتوكيل ووبمجرد ما قلت للمهندس أسامة علي الموضوع ده سألني عن زيت الفتيس؟ قلت له مغيره قبل معاده وكشفت عليه وهو علي التليفون معايا وإتكدت انه مظبوط وبحالة ممتازة وسألني عن الحرارة؟ قلت له عادية جدا قاللي طب فين مكاني؟ كنت قربت من بوابات إسكندرية قاللي إركن علي جنب وإنتظر سيارة المركز خلال دقائق وفعلا بعد 5 دقائق وجدت سيارة التوكيل وصلت والمهندس أسامة كلمني يطمئن إن العربية وصلت... وقطرتني لحد المركز اللي كان علي بعد حوالي 5 أو 7 كيلو .. وأول ما دخلت التوكيل لقيت المهندس أسامة منتظرني وكعادته رحب بي ببشاشة المعهودة وطمأنني إن الموضوع بسيط إن شاء الله



قلت يارب يكون فعلا كده وما يكونش بيطمني وخلاص وعلشان ممنوع تواجد الجمهور داخل هنجر الصيانة إستأذنت منه أني من آن لآخر أتابع المشكلة فسمح لي .. وقام خلي الفني (إسمه خالد تقريبا وهو محترم جدا وفاهم شغله أوي) طلع أول علبة شكمان بعد الفرن ودي تقريبا اسمها علبة محفز البيئة وقاللي دي هي السبب لأن المادة اللي جواها اللي المفروض بنقي العادم من المواد الضارة بالبيئة وتمنعها تخرج مع العادم.



والمادة دي أول مرة أشوفها شكلها يشبه الفخار لونها عاجي وكانت متكسرة ومتفتتة داخل العلبة وليها مسام تشبه خلايا النحل بس ضيقة جدا واللي المفروض إنها لما اتفتت كده الفتافيت دي سدت المسام ومنعت العادم من إنه يخرج بالكامل وده السبب الرئيسي لضعف السحب لكتمان العادم وعدم قدرته علي الخروج.... قلت سبحان الله



وبعد كده ركب العلبة تاني وعمل تجربة للموتور لقي إنه اتحسن كتير لكن مازال مكتوم شوية فقام قال للفني غير ماسورة الشكمان من بعد علبة محفز البيئة.. والماسورة دي فيها علبتين تانيين تحت العربية لأنهم إتسدو شوية كمان وبعد ما تغيرت بماسورة جديدة جرب العربية بقت حاجة تانية صوت الموتور ناعم ورنتة مميزة والمهم قاللي تعالي معانا نجرب العربية.



طبعا ما صدقت لأني كنت قلقان جدا وعاوز أطمن 100% إن المشكلة إتحلت تماما علشان ما تعملش معايا أي موقف تاني في الطريق وإن كانت ثقتي بالله أولا ثم في خبرة القائمين علي المركز كانت هي اللي مبيناني هاديء شوية




وأول ما طلعنا علي الطريق حسيت فعلا إن العربية اتبدلت 180 درجة من كل حاجة سواء صوت موتور أو سرعة أو تجميع أو عزم...إلخ يعني فرقت جامد جدا وده خلاني في قمة السعادة وحمدت ربنا إني كنت قررت أجي التوكيل النهاردة رغم إن العربية كان لسة موعد صيانتها لسة بدري عليه وإلا كان العطل ده حصل في القاهرة وكنت مش حاعرف أروح إسكندرية خالص كده وكمان المهندس أسامة قاللي الحمد لله إن العربية ما جابتش جوان وش السلندر في الموضوع ده فده كله درس يعلمني إن بمجرد ما أحس إن فيه أي حاجة مش مظبوطة مهما كانت بسيطة لا أتهاون في سرعة فحصها وحلها.




وبعد ما العربية خلصت وروحت الحسابات علشان أخلص حسابي فوجئت بإن الإصلاح ده داخل الضمان بقيت مش عارف أشكر الناس هناك إزاي علي إهتمامهم ولا جودة أدائهم ولا سرعتهم ولا ... إلخ



فشكرا لمركز صيانة الأمل - فرع الأسكندرية وخاصة الأستاذ أحمد محسن مدير المركز اللي أكيد لمسته واضحة جدا في كل أرجاءه واللي مش بيقعد علي مكتبه خالص ومتابع كل جزء في المركز وكذك أشكر المهندس الفاضل أسامة مبروك مدير الصيانة لأن مهما أقول مش حاعرف أوفيه حقه وخبرته وكفائته العالية ما يختلفش عليها اتنين سواء من العاملين بالمركز أو ملاك السيارت اللي بيعملوا صيانة ليهم هناك




بس وأخدت العربية وقلت أنزل إسكندرية شوية أتفسح وأتغدي مع صديقي وبالمرة أجرب العربية بعد الموضوع ده وكانت روعة بسم الله ما شاء الله




وإتغدينا في محل علي البحر بالشاطبي إسمه رقوده بتاع سمك بس ممتاز جدا وبعدين رحنا محطة الرمل جبنا هريسة واتفسحنا شوية في شوارع الإسكندرية ومشينا علي 7.30م تقريبا عائدين للقاهرة وكان الطريق زحمة شوية وغالبيته تريلات مجانين سرعة فطبعا ما قدرتش أحوش نفسي من الجري رغم إن الطريق بالليل مش حلو أوي زي النهار المهم إن مافيهوش رادار وكنت ماشي من 150إلي 170 في الطرق الطوالي غير التحويلات كنت باهدي علشان الزحمة والتريلات اللي بتغرز كما لو كانت فيورا





ووصلنا بحمد الله بالسلامة وكانت تجربة جديدة ومعلومة جديدة اتعلمتها وأتمني إني أكون أفدت كل من لم يكن يعرف هذه المشكلة من قبل زي حالاتي كده




وبهذه المناسبة أحب أهنيء الأستاذ/ باسم باشا

ziabassem







لأنه الفائز بالجائزة اللي وعدت بيها لأنه أول من عرف الحل






واللي حيتسلمها رسميا بإذن الله في اللقاء القادم بإذن الله واللي حنعلن عن نظام التجمع له قريب جدا علشان نحاول نجمع أكبر قدر من الزملاء بإذن الله ونشوف الناس الحلوة اللي بيوحشونا دول





خالص تحياتي لكم جميعا