الموضوع: قصة الغلبان وتوكيل نيسان .. وقدرة الرحمن

كان ياماكان ..في هذا العصر والزمان .. كان في واحد غلبان .. راح للتوكيل بتاع نيسان .. لمجرد لفحص والاطمئنان .. ومراحش لحد غير التوكيل عشان يبقى في الأمان .. لكن فجأة وبدون مقدمات ولا استئذان .. حصل اللي ماكنش في الحسبان

راح الغلبان اللي هو أنا طبعا بالعربية التيدا 2009 اللي لسه شاريها في شهر 5\2011 لتوكيل نيسان في طنطا أم الدنيا عشان أغير زيت احتياطي وأعمل فحص شامل للسوايل والفلاتر والسيور والعفشة والذي منه وكمان زرار الشنطة التاتش كان مش شغال قلتلهم عليه

وصلت الساعة 10 صباحا والعربية دخلت وانا طلعت عالاستراحة .. طبعا الصني كانت واكله الجو وماليه التوكيل .. لحد الساعة 12 زهقت وقلت اما انزل أغلس وأقف جنب العربية واتفرج

كنت طلبت يحطوا زيت شيل 10000 .. قلتلهم حطيتوا كام لتر زيت .. قالوا 4

قلتلهم أنا فاكر إني قرأت عالنت إنها بتاخد 3 بس

قالوا مين اللي قال كده .. اللي بيتكلم عالنت ده ملهوش مرجعية .. هي 4 لتر

استغربت .. بس قلت هو أنا هافهم أحسن من التوكيل .. وسكت

قالولي على فكرة العربية كان فيها زيت كتير قوي وراشح على فلتر الهوا والحمد لله انك جيت قبل مايبوظ أي حساس في العربية

المهم غيروا فلتر الزيت وفلتر الهوا وكانت الكارتيرة الفبر اللي تحت الموتور مكسورة قلتلهم يغيروها

سألتهم على سير المجموعة قالوا المفروض يتغير كل 40 ألف .. قلتلهم خلاص غيروه .. بعد ما جابوه وبصوا على القديم عشان يغيروه .. قالوا لأ مش محتاج يتغير .. قلت قشطة وفرتوا

بعد ما خلصوا كل حاجة وقفلوا العربية خدها الفني عشان يجربها .. طلع بيها ولف لفه ورجع تاني ووقفها في الشارع وقالي كله تمام

قلتلهم لسه زرار الشنطة .. قالوا ماشي

راح الفني ركب العربية عشان يدخلها جوه

وفجأة .. وبدون مقدمات .. العربية مش راضية تشتغل .. المارش شغال لكن العربية مابتقومش

يحاول تاني ..بردو مش راضية تشتغل

قالي هي كانت بتعمل معاك كده قبل كده .. قلتله أبدا .. العربية معايا من شهر زي الفل وماشتكتش من أي حاجة

حاول تالت ورابع وعاشر .. مفيش فايدة

جاب الجهاز ووصله بالعربية وقعد يجرب ويحاول يشغل

بدون أي تقدم

لحد مالبطارية نامت من كتر المحاولات

كان في واحدة صني عاملة حادثة ومعجونة من قدام شايفها من فترة طويلة مرمية قدام التوكيل .. راحوا وجابوا البطارية بتاعتها ووصلوها بعربيتي .. ويحاولوا .. ويحاولوا

وبعد محاولات ومداولات .. وتجارب ومشاورات .. وبعد الفحص والتمحيص .. والتدقيق والتشخيص ..

عرفوا إيه سبب المشكلة .. وحاولوا يفهموني المسألة .. وقالولي العيب مش عيبنا .. والتصليح مش هيكون من جيبنا .. وكل حاجة قدام عينيك .. وكل المصاريف طبعا عليك

أحكيلكم بقى على المشكلة

المشكلة كانت ................. عفوا لقد نفد رصيدكم

هاشحن واكلمكم

نلتقي بعد الفاصل