الموضوع: التكييف و ما أدراك ما التكييف

السلام عليكم و رحمة الله و بركاته
أنا عايز أعرف رأيكم كده في حاجة صغيرة و إن شاء الله بسيطة
أنا لما استلمت العربية (نيسان صنى 2011 ) و بعد أول 1000 جربت التكييف و كان تلااااااجة بجد تلاجة لدرجة إني ماكنتش بستحمله و أنا عامله على 1
المهم لما كنت بشغله شويه كده كان في ريحة وحشة زي الكمكمة كدة قلت يا واد طنش خالص و أنا مش من النوع اللي كل صوت أدور بتاع إيه و بسمي الحاجات دي أصدقاء البيئة يعني صوت صديق للبيئة و ريحة صديقة للبيئة و هكذا و بكبر دماغي (طبعا الموضوع ده ممكن يكون خطير )
و بعدين شركتنا حبيبتنا نيسان أم الدنيا -زي طنطا كده - عملت موضوع الفلتر المجاني و بالفعل ركبته و بعد ما ركبته التكييف ضعف شوية رحت قايل يا واد طنش خالص ده أكيد من الفلتر و دي حاجة منطقية و بصراحة جت على هوايا عشان أنا كنت حاسس إن 1 جامد قوي صحيح بعد الفلتر 1 بقت مابتعملش حاجة خالص و بقيت دايما عامله على 2 بس قلت يا واد طنش خالص
المهم ريحة التكييف المكمكمة دي قلت قوي أو بمعنى تاني راحت قلت يبقى الفلتر شغااااااال يونيفرسال
و في يوم من زاك الأيام الحر إياها و أنا مشغل التكييف بعد حوالي 10 أيام من تركيب الفلتر الموعود لقيت التكييف ضعف قلت يا واد طنش خالص و رحت عامل المروحة على 3 و كملت مشواري لقيت التكييف ضعف أكتر قلت يا واد طنش خالصو عملته على 4 و بعدين بدأت ريحة سيئة جدا بين قوسين ريحة قميئة تطلع من التكييف كمكمة برده و بس
و من ساعتها التكييف دايما فيه ريحة و بقى ضعيف جدا جدا جدا مابيشتغلش معقول و بكرر معقول إلا لما أزود السرعة على 65 كم في الساعة تقريبا

قولولي بقى برده أطنش خالص ولا كفاية طناش لحد كده
أنا العربية أوتوماتيك عاملة حوالي 6700 كم لحد دلوقتي
في حاجة صغيرة كده لاحظتها و هما بيركبوا الفلتر إنهم كانوا مشغلين التكييف جامد و البابين الأماميين مفتوحين على أخرهم أنا قلت أقولكم يمكن المعلومة دي تفرق مع صقر من صقور نيسان إياهم اللي احنا عارفينهم و بنعزهم

أشيروا علي أيها الناس