الموضوع: ان كنت ترى اننا على الطريق الصحيح فهذا الموضوع لا يهمك

المشاركة الأصلية كتبت بواسطة a.saad

ازيك يا استاذ تامر
منقدرش نقول ايه سبب تأجيل القضايا
وبعدين مش منطق ان قضية تتأجل يقوم الناس مكسرة عربيات وتهاجم الجيش والشرطة زى اللى حصل عند مجمع محاكم التجمع الصبح
وموضوع التحرير بعيد عن الجزء ده
التحرير مالوش سبب منطقى اصلا
هسألك سؤال
محاكمة قتلة السادات قعدت اد ايه
محاكمة الجماعات الاسلامية كانت بتقعد اد ايه

ازيك يا استاذ احمد
هو احنا لحد دلوقت ما نقدرش نقول التحرير له سبب او مالوش لأننا للأسف مش عارفين بالتأكيد الشرارة الأولى كانت ايه و كل اللي عندنا اقاويل و شهادات بعضها متضارب
لكن بصراحة اللي باين و مؤكد اللي شفناه , التعامل الأمني هو هو بتاع زمان , و زيادة , و ده ماعادش ينفع ولا يصح تاني, اكبر اثبات ان لما الأمن انسحب عند الفجر المواجهات توقفت و الدنيا بقت كويسة , و طبعا الأمن جاب امدادات و هجم تاني , كأنه بيخوض حرب مش أمن وظيفته تأمين المنشآت و بس
الأمن المركزي محطوط في معركة مش بتاعته و جريمة بترتكب في حقه لأنه هايكتسب كراهية الشعب تاني بالطريقة دي

بخصوص المحاكمات
لو شفت تقارير الشهداء , او قريت مقالات حسن نافعة , عن المحاكمات هاتكتشف انها كانت مهازل, و ان القاضي كان بيشغل الجلسة 5 دقايق و يأجل من غير ما يسمع الدفاع ولا الادعاء , يعني التأجيل بيبقى نية مبيتة, و الأظرف ان القاضي اللي بتسند له كل القضايا دي راجل سيء السمعة و معروف من ايام مبارك

للأسف , الناس لازم تشوف العدالة على الاقل بتتحرك , و الا يبقى الوضع اللي احنا شايفينه ده