مش هقدر أستمر علي الوضع ده .. انا ابتدت تجيلي حاجات عضوية من كتر الكبت النفسي من الفوضي اللي عايشها كل يوم
و الله ما بهزر و بتعالج منها
من كام يوم واحد كان هيقلبني من فوق كوبري الدائري بغرزة عملها ادامي خلت كل اللي معايا في العربية و كان فيهم والدتي صرخوا .. و مدريتش بنفسي غير و انا بجري وراه و بوقفه و نازل فيه ضرب !و دي يمكن اول مرة في حياتي افقد السيطرة علي نفسي و اتخانق و امد ايدي علي حد

الموضوع مش موضوع شوية زحمة و ناس اغبية .. الموضوع ان النظام بالكامل منهار ..
الموضوع ان شعب كامل فهلوي مفكر انه بروفيشنال في كل حاجة .. لو ركب عربية يبقي احسن سواق في العالم .. لو مسك كاميرا بقي سكورازي .. ان هو احسن واحد و احق واحد بأي حاجة .. و مش مهم الناس اللي حواليه .. انا عارف ان فيه ظروف هي اللي خلقت الشخصية الفهلوية دي .. بس انا مش هقدر اتعامل مع الوضع ده و مش مستعد اضيع حياتي في الفوضي دي

و الله اما بيبقي فيه ماتش ببص لعلم مصر و احس اني بكرهه .. لأنه بقي بالنسبة لي السيرك اللي فيه كل يوم .. المهم عشان مطولش

انا مش عارف ازاي ممكن اطلع برة مصر ؟!
انا عندي 21 سنة .. هتخرج السنة الجاية من كلية الإعلام .. بعرف اتكلم انجليزي كويس .. معنديش قرايب برة مصر

ايه البلد اللي ممكن اروحها .. و ايه اجراءات المطلوبة .. و الموضوع بياخد اد ايه .. و تكالفيه اد ايه ؟
و ايه الحاجة اللي ممكن اشتغلها برة .. انا مش عايز ابقي مليونير انا بس عايز اعيش في مكان اكون حاسس ان فيه نظام و اكون مستريح نفسيا
اخرج من البيت اللي ساكن فيه و انا مش خايف اركب العربية .. او مش كاره اركبها مع اني بحب اركبها !

يعني عايز اعيش في مستوي متوسط او اقل من اللي عايشه في مصر حتي بس ابقي مستريح
لو حد يقدر يساعدني بالمعلومات يبقي افادني جدا