الموضوع: مطلوب رأيكم ياجماعة فى النيسان قاشقاى؟

المشاركة الأصلية كتبت بواسطة eng/muhamad

تصدق بالله انت كده بتحب سواقه العربيات
عشان اللى بيحب المانيوال يبقى بيحب سواقى العربيات زى حالاتى كده

المشاركة الأصلية كتبت بواسطة sonasteel

هههههههههههههههه ....... المنتدي هنا كله مهندسين ومدني
الا مارحم ربي هتلاقيهم ميكانيكا مثلا
اخوكم حسين جمال ..... مدني عين شمس 2008 :))
---------------------------------------
بالنسبة للقشقاي ... احسن حد تسأله عن تجربة العربية هما مهندسين اوتو ايجيبت نفسهم
لانهم عملوا عليها تيست درايف وخدوا فيها كورسات علشان يشرحوها للعميل
بس بصراحة انا قعدت فيها
انطباعاتي
1- الكراسي ... كنت خايف لتكون علي مية :)) ... هو في نعومية كده :)) ماشاء الله
2- الارتفاع .... عالية جدا او بنسبة كافية انك متحكش في المطبات
3- الرؤية حلوة وانت كاشف العربية كلها
4- السقف .... البانوراما ده جميل اووووووي بس كان نفسي بيتفتح :))
5-التكييف .. محترم جداااااااااااا ماشاء الله
6- التابلوه ...شيك جدا
7-الفتيس .. انا حاسيته تقيل وفي تكة كده علي كل غيار ... ولما سألأته قالي علشان عزم العربية عالي والتكة ديه علشان تتأكد انك اخدت الغيار صح
8- الزينون بالعدسات تحفة ماشاء الله
9- الكمبيوتر ... فكرة جميلة جدا ويفي حاجات محترمة
10- المفتاح .... شكله حلو اوي هههههههههههه شنطة سفر صغنونة كده
كل ده وانا واقف ... ممشيتش بيها ... كان نفسي اجربها بس محصلش نصيب
وربنا ييسرلك الخير .... ومتنساش الاستخارة
----------------------------------------------
بالنسبة لسواقة المانيوال ... هي ديه اللي بتهون عليا الزحمة
ماشاء الله .... المانيوال مانيوال برده :))))
واقعدوا بالعافية :)))

أهلا وسهلا بيك يابشمهندس حسين - واضح فعلا ان منتدى نيسان مليان مهندسين - ربنا يزيد ويبارك
الله يطمنك - ان شاء الله أنا ناوى أحجزها من أوتو ايجيبت فرع التامن فى مدينة نصر - ويمكن الاستلام هيكون على أول سبتمبر ان شاء الله - بس أنا مخبيش عليكم انا خايف من حاجة واحدة مش هتيجى فى بالكم - السقف البانوراما - مش ممكن العربية تكون سهل سرقتها عن طريق كسر زجاج السقف خصوصا انه مساحته كبيرة وسهل أى حد يخش منه - خصوصا مع اللى احنا بنسمعه عن انتشار سرقة السيارات اليومين دول - طبعا كله نصيب بس الواحد بيعقلها ويتوكل - غير كده أنا مقتنع بالسيارة جدا ان شاء الله وهية فعلا سعرها مناسب جدا بالنسبة لأنها صناعة يابانى وتقفيل انجليزى وكل الامكانيات الموجودة بها - خصوصا موضوع انها عالية عن الأرض بحوالى 20 سم وده بيكون مناسب جدا لشوارع مصر المحروسة - بس الواحد برضه نفسه يعرف أسعار قطع الغيار ومدى توافرها؟ عموما كله هيبان اليومين الجايين دول - والله المستعان

المشاركة الأصلية كتبت بواسطة y2y1500

بصراحة قرار صائب وعربية شكلها تحفة وامكانياتها ما شاء الله
لكن ينقصها فتيس اتوماتيك عشان تبيع وتنتشر اكتر
بس للأسف اغلب العربيات فى اوروبا مانيوال وديزل عشان كده نازلة مانيوال بس لأنها تقفيل انجلترا
بس على تمنها ده وكمالياتها حلو اوى السعر ده
ومبروك مقدما ومستنيين لما تستلمها وتعملنا اول تقرير سواقة وصيانة عنها باذن الله

الله يبارك فيك يادكتور - طبعا ليا الشرف أكون أول واحد يستلمها على المنتدى الجميل ده - وان شاء الله أعملكوا تقرير وافى عنها وعن تفاصيل الصيانة بالكامل - وان شاء الله تكون بداية انتشار السيارة فى السوق المصرى - وشكرا لمرورك الكريم

أيه ياشباب؟ مفيش حد جرب السيارة دى خالص ولا ايه؟

المشاركة الأصلية كتبت بواسطة ahmed.tv

لسه محدش جرب العربية خالص واشتراها

واعتقد اول عضو عندنا فى القسم اسمه اسامه وهو صديق شخصى كمان ليه .. لسه ما اسلتمش وحيستلم فى شهر 7 اللى احنا فيه .. لان العربية بالحجز

العربية بسم الله ما شاء الله تحفة بمعنى الكلمة .. ويمكن انا عملت عليها تقريرين مفسرين عن العربية وجودتها موجودين فى القسم عندنا

ومتخفش الزجاج البانوراما زجاج مقوى جدا فصعب كسره .. وحتى لو الكسر .. العربية مش حتتسرق لان فيها ايموبليزر ضدد السرقة

وبيتفعل فى حالة فتح العربية باسلوب غير شرعى

فاطمن .. وبعدين العربية لو حنفكر بتفكير السرقة .. لو اللى عايز يسرقها وهى سقفها صاج .. ما ممكن يكسر زجاج السائق ويدخل منه

وبردوا مش حيعرف يدورها هههههههههه

متقلقش

اختيار موفق جدا

حجزت عند مين فى فرع مدينة نصر

منورنا ياباشا - الله يطمنك - بس معلهش سؤال ساذج - ايه الايموبليزر ده؟ وبيشتغل ازاى؟ يعنى زى جهاز الانذار العادى اللى موجود فى أغلب العربيات ولا حاجة تانيه؟ أنا لسة هنزل مصر ان شاء الله اخر الشهر ده - وناوى أحجزها من فرع التامن فى مدينة نصر - على فكرة أنا أول معرفتى بالعربية التقرير اللى انتا عامله هنا - تسلم الأيادى - وشكرا يابوحميد