الموضوع: الحوادث ..الموقف القانونى

المشاركة الأصلية كتبت بواسطة MMamdouh

طيب دلوقتى انا ليا استفسارات

1- انا خبطت واحد و توفى... و معايا رخصة سارية و مكنتش بسابق ولا مخمور ولا متخطى السرعة القانونية و المتوفى كان بيعدى من مكان لا فيه اشارات ولا مكان عبور مشاه... و قرار النيابة نص صراحة ان خطاء المجنى عليه استغرق خطا الجانى... ما هو الموقف فى المحكمة؟

ياباشا الحمدلله ان الموقف في المحكمة عدى على خير خلاص وأكيد انت دلوقتي عرفت ;)

المشاركة الأصلية كتبت بواسطة MMamdouh

2- بالنسبة للشق المدنى... كدة تتحمل شركة التامين دفع تعويض لاهل المتوفى... صح؟ هل دة مرتبط بالحكم فى الشق الجنائى؟؟؟ يعنى لو اخدت براءة فى المحكمة فى الشق الجنائى هل ممكن شركة التامين تول لاهل المتوفى ان هو اللى كان غلطان و بالتالى ميدفعوش ليهم حاجة على اساس انهم بيدفعوا تعويض لو سائق السيارة هو اللى اخطاء و كونى طلعت براءة يبقى انا مش غلطان؟؟

بالظبط الكلام ده صح لأن التأمين بيكون ضد خطأ السائق (مافيش خطأ مافيش تعويض) الإ إذا نصت وثيقة التأمين على غير كده لأن في النهاية ده تعاقد يخضع للشروط الوارده فيه

المشاركة الأصلية كتبت بواسطة MMamdouh

3- حضرتك قولت ان "التلفيات التى تحدث للغير يتحملها المتسبب فيها كأصل عام" و بالتالى لو فى حالتى دى طلعت براءة و كان الخطاء بالكامل على المجنى عليه... هل من حقى اطلب تعويض عن التلفيات اللى حصلت فى عربيتى؟؟ (انا مش حطالب حد بحاجة... اهل المتوفى اغلبب من الغلب اساسا... انا بسال لمعرفة الموقف القانونى فى الحالات دى)

طبعا لو الحكم انتهى الى ان المصاب هوة اللى كان مخطئ يبقى ممكن ترجع عليه أو الورثة (حسب الأحوال) وتطالب بالتعويض عن الضرر اللى أصابك

المشاركة الأصلية كتبت بواسطة r A N A

كان ليا سؤال بقي احب اعرف اجابته.
انا كنت مرة ماشية بالعربية ووقفت في اشارة وكنت ناوية اخد يوتيرن شمال فإديت اشارة شمال وبعدين اتحركت ومسكت شمال وهديت عند اليوتيرن وفجأة لاقيت موتوسكيل دخل في الباب الشمال عندي والنتيجة كانت ان المتوسيكل بالاتنين اللي كانوا راكبينه اتنطروا كام متر قدام العربية (وده اعتقد نتيجة ان الموتوسكيل كان عايز يعديني وكان جاي على سرعة عشان كده الخبطة كانت شديدة) وحصل في عربيتي اصابات في الباب الشمال والمرايا. المهم واحد منهم قام سليم تماما والتاني كان بيتوجع جامد (لان المتوسكيل وقع علي رجله) وكان عنده جرح صغير في دراعه والناس تدخلت ووديته المستشفي بس ناس نصحوني مدخلش معاه وخلوني امشي بالعربية وخرجوني من الموقف ومعرفتش حصله ايه بعد كده.
طبعا الموقف زي ماحكيت انا مكنتش غلطانه فيه بس وانا بنقل المصاب اخدت بالي من ناس بتتكلم مع الشخص التاني اللي كان معاه علي الموتوسيكل وماسكين موبايلات فممكن يكون بيستعين بشهود مثلا وبايخد نمرتهم ولا حاجة.

السؤال هنا لو كانوا اخدوا رقم عربيتي وبلغوا وعملوا محضر في القسم المفروض كان يحصل ايه بالضبط؟
الحادثة دي كانت من اكتر من 3 او 4 شهور مثلا ومن وقتها محصلش اي حاجة ورحت طلعت شهادة مخالفات ومالقيتش غير مخالفة واحدة (طلعت من القانون القديم ياكسر اشارة ياموبايل ياحزام امان) وبيعت كمان ومالقيتش حاجة تاني على العربية هل ده معناه انهم مبلغوش ولا ممكن يكون البلاغ هايظهر في وقت تاني؟

أنا لسه شايف السؤال دلوقتى حالا
وأنا نازل رايح مشوار لكن أوعد حضرتك بالرد بكره إن شاء الله

المشاركة الأصلية كتبت بواسطة r A N A

السؤال هنا لو كانوا اخدوا رقم عربيتي وبلغوا وعملوا محضر في القسم المفروض كان يحصل ايه بالضبط؟
الحادثة دي كانت من اكتر من 3 او 4 شهور مثلا ومن وقتها محصلش اي حاجة ورحت طلعت شهادة مخالفات ومالقيتش غير مخالفة واحدة (طلعت من القانون القديم ياكسر اشارة ياموبايل ياحزام امان) وبيعت كمان ومالقيتش حاجة تاني على العربية هل ده معناه انهم مبلغوش ولا ممكن يكون البلاغ هايظهر في وقت تاني؟

فى الواقع وليس القانون
أى حادث تصادم فيه مصابين بيكون الطرف التانى غير المصاب هو الغلطان إلى أن يثبت العكس
وطالما لم يتم تحرير محضر فى الحال فالوضع يكون متروك للظروف بمعنى آخر حسب ضمير المصاب لأن الوضع لا يتم إثباته على حقيقته
ولكن الذى يحدث أن المصاب يذهب إلى قسم الشرطه ويدلى بأقواله من جانب واحد وبالطبع سيقول أن الجانب الآخر هو المخطىء مهما كان الوضع الحقيقى (لأنه لو كان عنده ضمير وعارف إن هو اللى غلطان فأكيد مش حيعمل محضر أصلا ) وقد يضيف أن السائق هرب من مكان الحادث
عموما بالنسبه للواقعه التى حدثت لك فإنه ما دام لم يتم إعلانك بالحضور لسماع أقوالك فإن مرور ( بمعنى مضى ) هذه الفتره دليل على عدم تحرير محضر بها
وذلك لأنه فى حالة تحرير محضر بالواقعه يتم استدعاء الطرف المشكو فى حقه لسؤاله فى الأوراق ومن ثم يتم عرض الطرف المشكو فى حقه على النيابه العامه ( وذلك فى الجرائم المعاقب عليها بالحبس مثل الإصابه الخطأ والقتل الخطأ والضرب و السرقه والنصب وأى جريمه معاقب عليها بالحبس )للتصرف فى شأنه
وجدير بالذكر أن عدم وجود ذكر لهذه الواقعه عند استخراج شهادة مخالفات ليس دليلا على عدم تحرير محضر بها
إذ أن شهادة المخالفات تكون صادره عن مخالفات المرورالصادره من نيابة المرور وليس حوادث التصادم لأن الأخيره تختص بالتصرف فيها النيابه العامه التابع لها القسم الواقع فى دائرته الحادث
وأتمنى أن أكون قد أجبت إجابه وافيه وأى استفسار أنا فى الخدمة

المشاركة الأصلية كتبت بواسطة R A N A

.

:.


أولا متشكرة جدا على اهتمام حضرتك وردك على استفساري.

هو انا وصلت الولد للمستشفي وناس كانوا واقفين وقت الحادثة جم معايا وهما اللي نصحوني اني امشي ومدخلش معاه المستشفي عشان ميلبسنيش تهمة.
هو الحمد لله مجاليش اي استدعاءات والموضوع فات عليه فترة لاتقل عن 5 شهور دلوقتي بس انا خايفة لايكونوا مستدلوش علي عنواني مثلا او العكسري استسهل ومدورش علي العنوان كويس
ولاني كمان شارية العربية بتوكيل من صاحبها ومسجلتهاش بإسمي ولحد لما بعتها فضلت الرخصة بإسم صاحبها واتسجلت بإسم الشخص الجديد ومعرفش اي حاجة عنها من ساعتها يعني انا تقريبا اسمي مش مدرج في المرور لحد دلوقتي اصلا .
ربنا يستر بقي لحسن ييجي بعد سنة ولا حاجة وانا بخلص اي مصلحة حكومية يطلعلي الموضوع ده ويعمللي مشكلة .
عموما انا مقداميش حل غير اني اكبر دماغي وخلاص
ولا حضرتك تقترح عليا طريقة اعرف بيها ان كان في محاضر مسجلة ضدي ولا لأ؟

أولا لا شكر على واجب
ثانيا ما دامت العربيه مش بإسمك فالجنحه حتتعمل بإسم مالك السيارة المسجلة بإسمه فى المرور ( ده إذا اتحرر محضر أصلا ) وعندما يعلن بالحكم سيقدم ما يفيد أنه باع السياره إليكى
ثالثا لو فيه صلة قرابه أو معرفه بأى حد من وكلاء النيابه أو الضباط ممكن يسأل لحضرتك فى مباحث التنفيذ فى القسم التابع له محل إقامتك ولو عايزه تطمئنى تماما ممكن تخليه يسأل بإسم مالك السياره فى القسم التابع له محل إقامته