موضوع جميل جدا :16::16::16:
عرض للطباعة
موضوع جميل جدا :16::16::16:
الواحد بيتعب من كتر الاعلانات الى فى النص دى ياريت الحلقة تنزل كاملة لو سمحت
تسلم ياايهاب
بس الحلقه دي مش محسوبه
خش علي الي بعده علي طول
وربنا يحميك من العين بانواعها يارب
الحلقة الرابعة
الرفرف .. خلى القلب يرفرف
الحلقة دي تبدأ مع نهاية الحلقة اللي فاتت بالظبط
يعني مفيش فاصل بينهم نهائي .. إزاي؟؟؟
وأنا في آخر يوم من أيام التوكيل بتاع الحلقة اللي فاتت وبعد ما خلصت موضوع الزيت وراجع بقى وأنا فرحان
وأنا ماشي عند نزلة كوبري المعرض وقبل باب حديقة الطفل بشوية صغرين كان الطريق شبه واقف من الزحمة
وفجأة .. لقيت مكروباص كسر من الحارة بتاعته على الحارة بتاعتي وعايز يدخل قدامي
بس بدل مايدخل قدامي .. دخل فيا أنا ورشق في الرفرف اليمين اللي قدام
طبعا كأنه رشق في رفرف قلبى اللي قعد يدق يدق يدق .. لحد ما عداد الـ RPM بتاع قلبي كان هيفرقع
الصراحة أكتر حاجة كنت خايف عليها هي الفانوس أبو 1112 بدون ضريبة ومصنعية .. وخصوصا إنه فيه شرخ عندي في الفانوس اليمين يعني مش مستحمل لمسة
نزلت من العربية وهي في نص الشارع وأنا كل تركيزي في سؤال واحد
ياترى إيه اللي هشوفه؟؟؟
بصيت لقيت 3 حاجات مهمة جدا:
أولا: الفانوس سليم والحمد لله
ثانيا: الرفرف اليمين فيه حته صغيرة أتطبقت لجوه .. وفيها حتت بيضة كتير زي ماتكون خرابش في البوية
ثالثا: المكروباص منه لله .. هرب
طبعا قلنا الحمد لله على كل حال
رجعت على حمادة السمكري ووريتله الرفرف عشان يرده عالبارد .. وفعلا رده
وجاب كومباوند وحطه على الحتت البيضة اللي كنت مفكرها خرابيش
لقيتها طلعت كلها ما عدا حتة صغيرة
أتاريها كانت بوية من المكروباص لزقت في الرفرف
ورجع الرفرف زي ما كان .. والحمد لله الكريم المنان
بس هنا ممكن واحد من صقور منتدى نيسان يقوم فجأة ويسأل سؤال استراتيجي .. ويقول:
في المره الأولانية لما الإزاز الأصلي انشرخ من شوية ميه كانت حاجة عجيبة وقولنا يمكن بسبب العين
وفي المرة التانية لما طرمبة البنزين عطلت فجأة واتصلحت فجأة .. كانت حاجة أعجب من العجب .. وبردو قولنا يمكن عين
طيب المره دي حاجة طبيعة وممكن تحصل لأي حد فينا .. إيه العجيب فيها يعني يا عم الحج؟!!!
الإجابة على هذا الصقر تكون على النحو التالي:
أولا أحب أحييك يا إبني على هذا السؤال المحوري اللي انت فاجئتني بيه الصراحة
ثانيا الإجابة علي السؤال ده هتجرجرنا لقصة في عصر ما قبل التيدا
وبالتحديد يوم الإتنين اللي بعد جمعة الغضب على طول
كنت ماشي بالشاهين بتاعتي وبالتحديد عند نزلة كوبري المعرض وبردو قبل باب حديقة الطفل بشوية صغيرين عملت حادثة مع تروسيكل وبردو خبط الرفرف اليمين
والفانوس اليمين
والاكصدام
والكابوت
والصدر
والفانوس الشمال
والريداتير
والمروحة
وكفاية بقى
وإليكم فيديو بالواقعة القديمة
[youtube]http://www.youtube.com/watch?v=Oftqrd_FcZU[/youtube]
طبعا بعد ما حصل اللي حصل للتيدا في نفس المكان وفي نفس الإحداثيات وخطوط الطول ودوائر العرض بتاعة الحادثة اللي فاتت .. ده اللي خلاني أقول سبحان الله
وبردو أقول الحمد لله إنها ماكانتش زي الحادثة اللي فاتت
لأنها في الشاهين كلفتني حوالي 3 آلاف جنيه
أما لو كانت حصلت في التيدا لا قدر الله كنا حطينا صفر جنب التلاتة كمان
وقانا الله وإياكم شر الاصفار .. وأعاذنا وإياكم من كل مكروباص وتروسيكل وعربية بحمار
ونلتقي في الحلقة القادمة بإذن الله
واللي هتكون بعنوان
انفلوانزا الصقور
http://img194.imageshack.us/img194/4257/4zbi33scopy.jpg
.
لا لا لا يادوك.... انت كنت مستعجل وانت بتكتب الحلقة ديه ولا ايه???
ا
فين المخرج ااولاني.... شكلك نتفتله ريشه ولا اكلت عليه كوارعه;)
ربنا يستر طريقك ويعافينا من كل سواق غشيم.... الحمد لله علي كل حال
ههههههههههههههههههههههههه هه
جزاك الله كل الخير عنا يا دكتور ايهاب انا والله قاعد زهقان وعندي شغل كتير وقلت اخش كدا خطف يمكن الاقي الحلقه نزلت والحمد لله لقيتها وفرجت عني شويه ربنا يفك عنك كربه من كرب يوم القيامه ان شاء الله
اسلوبك اكتر من جميل بجد
ما أنا قلتلك .. من ساعة ما الحقنة بتاعة عاطف كلكعت وعرق الغلاسة حرّم ينقح عليا
بس عرق الرذالة بيشاور نفسه على فكرة
فرج الله همك .. وأسعدك في الدنيا والآخرة
دا من ذوقك يا جميل بجد
اسلوب مميز
ومعلومات مفيده
يبقي موضوع لاايهاب باشا
ربنا يحميك ويبعد عنك العين ويكرمك
السلام عليكم ورحمة الله وبركاته
الله يفتح عليك يا د. ايهاب
بجد الواحد حاسس انه في مجموعة كلها مواهب
ربنا يزيدك علما وفهما
بس ما تاخرش علينا ف الحلقات قوي
والله أنا نفسي ماتأخرش
بس بجد مش بإيدي
فياريت تسامحوني
كمل بقى يا دوك
ايه الحلاوة دى .. الواحد بيجيله شعور غريب معاك بصراحة .. بين الفرح والزعل
بفرح من اسلوبك اللى مالكش حل فيه .. وبزعل على اللى بيحصلك طبعا
ربنا يسترلك طريقك .. ويبعد عنك كل السواقين ولاد الحرام
ودايما خالى بالك يا دوك .. احنا محتاجينك
100 100 يا دكتور
أنا حبيت الطب كله بشري و بيطري بسببك
ردودكم الجميلة دي بتستفزني إني أحبكم أكتر وأكتر
مش عارف هروح فين بس بعد كده
ما تروحش في مكان أرجوك
خليك معانا ويا ريت ما تشوقناش أكتر من كده....
وكمل الحلقات بتاع المسلسل...
الله ينور عليك يادوكتور
هي دي الروح المطلوبه في القسم
وانت بسم الله ماشاء الله مش بقالك كتير معانا ورغم مسؤلياتك الكتير الا انك وضعت بصمتك في المنتدي كله والناس بقت بتيجي من اقسام تانيه وتقعد تتفرج عالمسلسل الجميل بتاعك
بالتوفيق ان شاء الله وربنا يبعد عنك الحسد والحاسدين
السلام عليكم
يا دكتور انا عرفت المشكلة فين .
أنت عملت حادثة بالشاهين و التيدا فى نفس المكان على الكوبرى , بس يبقى العيب فى الكوبرى بلاش بقى تمشى من هناك تانى .
ربنا يكفيك شر الطريق و منور المنتدى
الحلقة الخامسة
انفلوانزا الصقور
الحلقة دي من عصر ما قبل التيدا
ومن عصر ما قبل الشاهين
وبالتحديد في عصر الموتوسيكل الصيني
هي الحلقة ممكن في الأول تحسوا إنها مالهاش علاقة بالموضوع
بس في الآخر هتعرفوا العلاقة اللي بينهم
بداية الحلقة دي في يوم 2-1-2008
وبعد صلاة العصر بشوية .. فجأة .. بدأت أحس بصداع خفيف
وبعدين زاد شوية .. وبعدين زاد أكتر .. وبعدين بقى صداع تقيل .. وبعدين بقى صداع لا يطاق
لحد ما وصل لدجة إني مش شايف قدامي من شدة الألم .. والمسكنات مبتعملش أي تأثير
وكنت بجيب اللي في بطني كل شوية "أعزكم الله" لدرجة إني لو شربت ميه برجعها
خدوني وأنا مش حاسس بالدنيا من حواليا لدكتور عندنا في البلد
علقلي محلول وحطلي فيه 14 نوع دوا وروّحت
واحدة واحدة بدأ الأم يخف .. على بالليل لحد ما انتهى تماما
تاني يوم روحت الإعادة للدكتور وأنا فايق وكأني أول مره أشوف وشه
لأني المره اللي فاتت كنت فعلا مش حاسس بالدنيا مع إني كنت مفتح عينيا
سألته إيه اللي كان عندي؟
موصلتش لإجابة شافية
تالت يوم .. صحيت من النوم
وحسيت بصداع خيف
وبعدين زاد شوية .. وبعدين زاد أكتر .. وبعدين بقى صداع تقيل .. وبعدين بقى صداع لا يطاق
واتكرر نفس اللي حصل أول امبارح وبردو المسكنات معملتش أي تأثير
بس من غير ما اروح للدكتور
وعالعصر واحدة واحدة بدأ الأم يخف لحد ما انتهى تماما
بعدها بيوم صحيت من النوم
كنت كويس مفيش أي حاجة
بس قررت أروح لدكتور كبير ومشهور في طنطا عشان أعرف إيه احكاية
كشف عليا بالسماعة وقاس الحرارة .. كله تمام
كشف بالسونار وطلب تحاليل .. كله تمام
قالي مفيش حاجة .. والموضوع ده انتهى
وبعدها بيوم .. صحيت من النوم
وتكررت المأساه
على ما جا معاد الإعادة بعد العصر كان الألم راح
كشف عليا تاني .. مفيش أي حاجة
قلتله يا دكتور أنا والله مش من النوع اللي بيوهم نفسه بالعكس دا انا عمري ما بحط حاجة في دماغي
قالي متهكما: يبقى بسم الله الرحمن الرحيم يعني ولا إيه؟!!! ياعم قوم مفيش حاجة
قلت ياريت يكون فعلا مفيش حاجة وميحصلش حاجة تاني لأني فعلا بتعذب
تاني يوم .. صحيت من النوم
وبدأت أحس بصداع خفيف
عرفت إن المأساه هتشتغل تاني
وفعلا .. لحد العصر في العذاب لحد ما بدأ يختفي تدريجيا
وفضلت على كده .. يوم طبيعي ويوم عذاب .. ومش لاقي حد يعرفني إيه الحكاية؟؟؟؟؟؟؟
لحد ما جا يوم زاد التعب فيه جدا جدا جدا .. لدرجة إني كنت بخرف من شدة الألم
جا اصحابي وخدوني في عربية لانسر ومعاهم والدي وقعدوا يلفوا بيا عالمستشفيات
وبعدين راحوا لأكبر دكتور مخ وأعصاب في طنطا .. دخلوا يحجزوا لقوا قدامي 14 يوم لحد مايجي دوري
طب والمستعجل؟!! يبقى قدامي يومين
يعني المفروض الواحد يعمل حسابه ويروح يحجز قبل ما يفكر يتعب بـ 14 يوم
المهم اتصرفوا وجابوا واسطة ودخلوني
طبعا أنا كنت مفتح عينيا وبمشي على رجلي لكن حاسس إني في بلد تانية خالص .. لدرجة إن الدكتور ده كان في الدور الخامس وكان الأصانسير عطلان راح واحد صاحبي شايلني على كتفه وطلعني الخمس أدوار ونزلني وأنا مش حاسس بالدنيا .. وهواللى حكالي بعد كده .. ومكنتش بتكلم غير في حاجتين كل شوية أكررهم
الحاجة الأولانية : الحمد لله على كل حال
الحاجة التاني: هي الساعة كام؟
اشمعنى السؤال ده؟ مش عارف .. دا حتى اصحابي ماسكنهالي لحد انهارده
كان من ضمن اصحابي واحد في امتياز طب
لما سألوه عن حالتي قالهم في حاجة نادرة درسناها بتحصل فجأة وبتضرب جزء في المخ والمريض مبيخفش تاني
ساعتها اصحابي قعدوا يعيطوا على إيهاب اللي راح منهم في شربة ميه وبقى بيخرف ومش هيرجع تاني
المهم الأستاذ الدكتور الكبير ده قالهم لازم يروح مستشفى فورا
ودوني مستشفى خاصة وجا الدكتور ده وحقني حقنة منوم
وقالهم التشخيص بتاعه لحالتي اللي هو عبارة عن التهاب فيروسي حاد في المخ، وكتبلي على علاج مستورد غالي جدا وطلب أشعة مقطعية على المخ
تاني يوم .. صحيت من النوم
لقيت نفسي في المستشفي .. بس الحمد لله زي الفل
روحت عملت الأشعة عالمخ .. وبردو طلعت زي الفل
تاني يوم .. صحيت من النوم
بس المره دي
تمام ومفيش أي حاجة
روحت للدكتور في الإعادة
أول ما دخلت بصلي وابتسم وفرح بانتصاره وإنجازه وسألني متفشخرا: انت شوفتني قبل كده؟
طبعا المفروض إني شوفته وكلمته .. بس عشان كنت مش حاسس بالدنيا ساعتها فعلا كأني أول مره أشوفه في حياتي
قالي انت بقيت تمام وانسى موضوع الصداع والترجيع والكلام ده خالص
طلعت من عنده وأنا طاير من الفرحة .. أخيرا رجعت وبقيت طبيعي
تاني يوم .. صحيت من النوم
بس اللي صحاني المره دي
الصداع بذات نفسه
لأ بقى لأاااااااااا أنا استويت
خدوني اصحابي بنفس الانسر وكان الألم لا يطاق لدرجة إن الدموع كانت بتنزل من عيني بشده من غير ما اعيط .. بس المره دي فايق وحاسس باللى حواليا
طب يروحوا بيا فين؟ ولمين؟ مفيش حد عارف يشخص صح عشان يدي علاج صح
آخر ما غلبوا ودوني الحميات لأن والدي بيقتنع بيها جدا .. مع إني مسخنتش ولا مره
لقينا دكتور من ضمن اللي كشفوا عليا قبل كده
أول ما شافني قال: هو انت لسه؟
استدعى دكتور تاني وتالت ورابع وسألوا إيه الأعراض .. صداع شديد جدا وترجيع شديد جدا
في سخونية .. لأ
في كحة .. لأ
في عطس .. لأ
النظر فيه حاجة .. لأ
الأذن فيها حاجة .. لأ
وطبعا التحاليل كلها زي الفل
والسونار زي الفل
والأشعة المقطعية عالمخ .. زي الفل
احتاروا وبقوا مش عارفين يعملوا إيه
سألوني بتشتغل إيه؟ قلتلهم دكتور بيطري
ماصدقوا سمعوا الكلمة عشان يلاقوا حجة يقولوا إن التشخيص اشتباه في انفلوانزا الطيور "ميعرفوش إني في المستقبل هبقى صقر من صقور نيسان"
مع إن مفيش أي عرض من أعراض المرض ده .. وأنا عارف كده كويس
حجزوني في عنبر الإنفلوانزا قسم الديوك .. قصدي الرجال
وطبعا في قسم تاني للبرابر .. قصدي السيدات
وقالولي هناخد عينة نبعتها تتحلل في فرنسا .. لو طلعت سلبية هناخد عينة تاني نبعتها لندن
والموضوع ده هياخد أسبوع
وأنا عارف إنهم لو خدوا ميت عينة وبعتوها كوكب زحل هيلاقوها سلبية بردو
طبعا الصداع خد وقته المعتاد وراح .. وكانوا علقولي محاليل وأدوية واشتغالات
والدنيا اتقلبت عليا في المستشفى من اصحابي وحبايبي اللي جايين يزوروني
وكل يوم يدخل عليا دكتور شكل .. أقوله الأعراض .. يستغرب إيه اللي جابني هنا في عنبر الانفلوانزا
أسأله طب عندك حل؟ ميعرفش يرد
لحد ما بقيت مبسألش حد
وبعد كشوفات وكشوفات .. ودكاترة وعيادات .. ولف عالمستشفيات .. وأدوية وروشتات .. ومصاريف بالألوفات
عرفت أصل الحكاية .. ورسيت على كل الرواية
وفهمت أساس الموضوع .. وعالجت دماغي الموجوع
ودماغي بقى 100 100 .. والحل كان .. في جركن ميه
وبعد اعتزال عرق الغلاسة .. ظهر على أرض الملعب نجم جديد .. وهو عرق الرزالة .. اللي وصل لأعلى درجات النقح
والمسكنات ماكنتش نافعة معايا في أول الحلقة .. عايزينها تنفع في آخرها
أشوفكم في الحلقة الجاية
واللي هتكون بعنوان
كفارة يا معلم
http://img28.imageshack.us/img28/8317/31821393.jpg
تصدق عرق رخم فعلا ....
بس امري لله ... مضطر استنى الحلقة الجاية .......
الف سلامة يادوك ... بس ياتري انت لسه عايش؟
وروحك الشريرة ديه اللي بتكلمنا :)))
طيب ياريت بقي علشان شكل المسلسل ده هايدي علي عرق تركي
قبل كل حلقة تعملنا ملخص علشان نعرف احنا فين في المنهج :)))
السلام عليكم ورحمة الله وبركاته
الف سلامة عليك يا دكتور
وربنا يعافينا وإياك وكل السامعيين وكل القارئين ...
من خلال كلام حضرتك كده ممكن ده يكون احتمال " 1- حمى مالطية (علشان أخطار التعرض من خلال مهنتك
2- حمى تيفود بس في أولها لأن حمي التيفود في أول أسبوع بيبقي المريض في ذروة المرض وبيكون تحليل الدم سليييييييم 100 100 بالرغم من شدة الأعراض"
وفي النهاية الله أعلم نستنى بقي الحلقة الجاية وأمرنا إلى الله
جزاك الله خيرا يا دكتور جودة
بالنسبة للاحتمالين .. فهما منطقيين جدا
وعلى فكرة .. كانوا من أول الاحتمالات اللي فكرنا فيها وعملنالها تحاليل وطلعت سلبية
وكمان الحرارة مازادتش من أول يوم في التعب لحد آخر يوم ولا نص درجة .. وده يخلينا نستبعد الاحتمالين دول تماما
ألف سلامة عليك يا دكتور و ربنا ينعم عليك بنعمة الصحة و العافية .
أولا ألف سلامة يا دكترة
ثانيا
عروستي
أولا : الله يسلمكم جميعا
ثانيا : إيه؟؟؟ غلب حماركم ولا إيه؟؟؟
فكروا شوية كمان
واللي هيعرف الحل .. له جايزة
صعبة يا دكترة , الشعب يريد حل اللغز
دا............دا....................دا اكيد مرض
ههههههههههههههههههه
الله ينعم عليك بالصحه والعافيه والف مليون سلامه يا دكتور
وفعلا غلب حمارنا
ايه يا دكتور .. غلب حمارنا ايه .. هو انت داخل السلخانه ههههههههههههههههه .. اوعي تكون رابط الجمل بره ..
غالبا ده صداع بسبب حساسية معينه من قبل شغلك البيطري
و كمان في سبب تاني ممكن يعمل الصداع و هو الامساك ههههههه .. ده بجد مش هزار
بس تعرف يا دكتور الحلقة ديه كانت هتكون احلي جوا موضوع الكافيه و كنا نخلي مؤامرة التيدا زي ما هي علي العربية بس
علي العموم هنستني العلاقة بين كل دول ببعض بس علي فكرة انت شكلك كده محسود من زمان اوي .. يعني كده الموضوع مش موضوع التيدا ههههههه
خالى بالك يا دكتور ايهاب على صحتك .. وخالى بالك جدا وانت بتتعامل مع الحيوانات عشان اى امراض
وكفارة يا معلم
الحلقة السادسة
كفارة يا معلم
http://www.nileup.com//uploads/image...33a3c64ec1.gif
وأنا محجوز في قسم الانفلوانزا في مستشفى الحميات كان الناس بيزوروني أفواجا أفواجا .. في مواعيد الزيارة وفي غير مواعيد الزيارة
وكان بعض الناس بيقولولي الموضوع ده مش طبيعي .. أكيد في حاجة غلط
يقصدوا إنه يكون سحر أو عين أوحسد .. حاجة من كده يعني
طبعا أنا زي ما قلتلكم في الأول إني أؤمن بالحسد ولكن مبحطهوش في دماغي
لكن لما ناس كتير أشاروا بالموضوع ده .. قلت أفكر
وفعلا .. كان في موقف حصل يوم 2-1-2008 نفس اليوم اللي تعبت فيه أول مره
الموقف ده من واحدة ست عينيها صعبة شوية
كانت بتتكلم مع والدتي عني .. وبعدين قالت كلام خلى والدتي خافت عليا شويه من الكلام ده وقالت ربنا يستر
طبعا أنا مش في دماغي الموضوع ده خالص
بس بعد ما حصل اللي حصل .. والطب عجز عن مجرد حتى تشخيص الحالة مش علاجها كمان .. قلت يمكن !!!
وخصوصا أول تعب كان بدأ بعد العصر والكلام ده كان قبل العصر .. وبعد كده كان التعب دايما يبدأ الصبح مش العصر
طيب إيه الحل؟
أنا أعرف إن من علاج العين زي ما ورد في الحديث الصحيح عن رسول الله صلى الله عليه وسلم إن الحاسد يتوضأ ويعطي الميه للمحسود يصبها على جسمه فيشفى بإذن الله
وإليكم الحديث:
اغتسل سهل بن حنيف فنزع جبة كانت عليه ، وعامر بن ربيعة ينظر ، وكان سهل رجلا أبيض حسن الجلد ، قال : فقال له عامر بن ربيعة : ما رأيت كاليوم ولا جلد عذراء ، قال : فوعك سهل مكانه ، واشتد وعكه ، فأتى رسول الله صلى الله عليه وسلم فأخبر أن سهلا وعك ، وأنه غير رائح معك يا رسول الله ، فأتاه رسول الله صلى الله عليه وسلم فأخبر سهل بالذي كان من أمر عامر ، فقال رسول الله صلى الله عليه وسلم : علام يقتل أحدكم أخاه ؟ ألا برّكت ؟ إن العين حق ، توضأ له ، فتوضأ له عامر ، فراح سهل مع رسول الله صلى الله عليه وسلم ليس به بأس
وقول الرسول صلى الله عليه وسلم ألا برّكت؟ .. يعني المفروض لو الواحد شاف حاجة عجبته إنه يقول اللهم بارك أو ربنا يبارك .....
طيب أنا عمري ما اتعرضت لموقف زي ده قبل كده
وفي مشكلة عويصة .. إزاي هتروح للست دي وتقولها عايزينك تتوضي وتجيبي الميه عشان انتي حسدتي إيهاب؟
دي تعملك فضيحة وتقولك وأنا أحسده ليه .. هو كان عملي ايه .. واحنا ناس محترمة وملناش دعوة بحد و .. و .. و .. و ..
وهنقعد بقى نخبط في الحلل
كان من ضمن اللي زاروني واحدة ست محترمة ومتدينة من معارفنا
فتحت الموضوع ده مع والدتي وسألتها إن كانت تشك في حاجة؟
قالتلها عالحكاية .. والست دي تعرف الست التانية
قالتلها خلاص سيبي الموضوع ده عليا
أمي قالتلها هتعملي إيه؟
قالتلها هجيب الميه
قالتلها ازاي؟؟؟
قالتلها هتصرف
وفعلا تاني يوم جت ومعاها جركن ميه
طب جبتيها ازاي؟؟؟
قالت إنها راحتلها وقالتلها: عايزة منك خدمة
قالتلها: خير؟
قالتلها: في واحدة مبتخلفش وسألت ناس قالوها لازم تجيبي مية وضوء بتاعة سبعة من الناس الطاهرين وتستحمي بيها .. وأنا ملقيتش أطهر منك فقلت أبدأ بيكي
طبعا التانية على نياتها وبتعتقد أصلا في الكلام ده فقالتلها: وماله ياختي .. انتي تؤمري .. لو عايزة طشت بحاله أجيبهولك
قالتلها: لا كفاية الميه اللي هتتوضي بيها
وفعلا اتوضت وجمعت الميه في حاجة كبيرة وفضتها في جركن أربعة لتر
طيب دلوقتي في مشكلة تانية .. عايز أصب الميه على جسمي .. وحمامات المستشفى مش قد كده
قلت لازم أروح أعمل كده في البيت .. بس المشكلة إني محجوز وممنوع من الخروج من المستشفى لحد ما يتأكدوا إن العينات سلبية .. عشان ما أعديش حد بالانفلوانزا
وبما إني متأكد إني معنديش انفلوانزا .. قررت أهرب من السجن .. أخلص المهمة .. وارجع تاني .. ولا مين شاف ولا مين دري
وفعلا .. تمت عملية الهروب بنجاح .. ومعايا القنبلة .. قصدي جركن الميه
لما وصلت بلدنا كل واحد يقابلني يفكرني خرجت ويقولي: كفارة يا معلم .. ويقولي ... إيه الجركن ده؟؟؟
وصلت البيت .. وعصرت على نفسي لمونة .. وصبيت الميه على جسمي ..
وسبحان الله
عدى يوم .. واتنين .. وتلاتة .. واربعة
وأسبوع .. واتنين .. وتلاتة .. واربعة
وشهر .. واتنين .. وتلاتة .. واربعة
وسنة .. واتنين .. وتلاتة .. وفي نص السنة الرابعة ..... كتبتلكم الحلقة دي
والله من يومها لحد لحظة كتابة هذه السطور .. مشوفتش الصداع ده ولا نص مره
ومش وهم ولا حاجة .. أنا اللي كنت عايش الأيام الصعبة دي .. ومحدش حس بيها غيري
بعد موضوع الميه ده .. كل يوم كنت بصحى من النوم أقول ياترى في صداع انهارده كالعادة ولا ...... ؟؟؟
لكن بفضل الله محصلش حاجة تاني
فالحمد لله الذي هدانا لهذا وما كنا لنهتدي لولا أن هدانا الله
طبعا اللي خلاني أحكي القصة دي هنا .. إن الكلام في الحلقات اللي فاتت كان عن الحسد .. وده أكبر موقف عشته في حياتي عن الموضوع ده .. فحبيت أدردش مع حبايبي الصقور واحكيلهم تجربتي .. اللي لو كنت مش أنا اللي عيشتها كنت صعب هصدقها .. وكنت قلت إيه الفيلم الهندي ده .. أو كنت قلت هو كان بيوهم نفسه ولا إيه
بجد كانت من أصعب أيام حياتي .. بس الحمد لله إنها عدت على خير
ربنا يحفظنا وإياكم من كل شر .. ويبعد عنا الحسد والنّأ والأر
وعشان كلنا نطلع من المسلسل ده بفايدة
أشوفكم في الحلقة الجاية والأخيرة
اللي هتكون بعنوان
التطعيم والتحصين .. ضد الحسد والعين
http://img705.imageshack.us/img705/1...3817225040.jpg
السلام عليكم ورحمة الله وبركاته
جزاك الله خيرا يا د . إيهاب
والله الواحد ما بيشبع من كلامك أبدا ....
وعاوزك تفضل تحكي علطول.....
لأن الاستفادة بتكون كتيرة وفي نفس الوقت فيه استمتاع بالحديث.
بس الحديث االنبوي ده ربنا يباركلك أول مرة أسمعه عن الحسد وكنت عاوز أي حاجة للحسد لأن والله العربية كل ما أغسلها وانضفها أتحسد أنا أو هي : يا إما أنا أمرض .... يا إما العربية تتخبط أو تتحك....
مع إني والله بأقول الأذكار وتحديدا أذكار الحفاظة...
وربنا يسترها علينا جميعا .....
سبحان الله , الحمد الله على كل حال و ربنا يعافيك و يعافينا يا دكتور .
بس الواحد هيزعل لو القصة خلصت بدرى كدة
و الله يا دكتور جزك الله خير و فعلا الحمد لله على نعمة الاسلام و يا ريت الناس يكون عندها اليقين ده .. و ان كل اللى قاله الرسول عليه الصلاة و السلام هيحل لنا كل مشاكلنا .. و ان ديننا مش مجرد شعائر .. ده منهج للحياة و تحقيق أقصى السعادة فى الدنيا والاخره.
"فمَنِ اتَّبَعَ هُدَايَ فَلَا يَضِلُّ وَلَا يَشْقَى* وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا" سورة طه (الايه 123-124)
و الله اننا كسبنا جوهرة من جواهر الابداع ....
بتوصل اللي انت عاوزة باسهل الطرق ...
و بتجبر الناس كلها تقعد و تركز في الكلام ...
لانه مش اي كلام ...
كلام موزون و مدروس ... كلام كله عبر ....
اسمح لي ابدي اعجابي الشديد جدا ....
و ياريت بعد الحلقة الاخيرة ... تفكرلنا و احنا معاك ... في سلسلة مواضيع اجتماعية مفيدة للجميع ... لاني احسبك على خير و لا ازكي على الله احدا .... فبالتأكيد هتكون خطوة مهمة جدا في المنتدى و قسم النيسان ...
روح يا شيخ ... ربنا يبعد عنك كل عين حاسد ....