الله ينور عليك
والله انى احبك فى الله
عرض للطباعة
الله ينور عليك
والله انى احبك فى الله
بجد أنا حبيتك في الله يا دكتور جودة
وبالنسبة للحديث فهو حديث صحيح ذكره الشيخ الألباني في السلسلة الصحيحة
أما بقيت طرق الوقاية فبإذن الله هذكرها الحلقة الجاية
يا عم حرام عليك .. كفاية كده .. دا انا استويت
انت بتحرجني يا عم محمد بالكلام الكبير ده
كفاية بقى عشان بتكسف
بمناسبة كلامك ده .. وخصوصا موضوع اليقين .. فكرتني بقصة حصلت معايا في آخر سنة في الكلية
كنت في البيت لوحدي وكان في شيكارة غلة تقيلة عايز أشيلها ومفيش حد يرفعها عليا
قمت اتعافيت عليها وقعدت اتلوى عشان أشيلها لوحدي
وطبعا بما إني بطل العالم في رفع الشكاير –الفاضية طبعا- وأثناء رفع الشيكارة بطريقة غلط .. فجأة ضهري طرقع ووقعت الشيكارة وحسيت بألم شديد في العمود الفقري
لدرجة إني بقيت مش عارف أوطي أو أشيل أي حاجة وكنت بصلي بالعافية وبالتصوير البطيء .. حتى النوم مكنتش عارف أنام على أي جنب
قلت شكلي حصلي انزلاق غضروفي وهدخل في عمليات وموال كبير
وبعدين قلت الحمد لله .. يمكن يكون خير .. يمكن يكون سبب في إني مادخلش الجيش
بس بيني وبينكم كنت خايف من حاجة واحدة بس .. هاكتبها بس محدش يقرأها عشان عيب ..... "هتجوز ازاي؟"
فضلت كده عدة أيام لحد ماروحت أصلي الجمعة في مسجد قباء عندنا في طنطا
وسبحان الله كان الموضوع عن العلاج بالآيات القرآنية والأدعية النبوية
وذكر الشيخ أهمية الأخذ بالأسباب والذهاب للأطباء لكن بردو ماننساش العلاج بالكتاب والسنة في الأمراض الروحية والعضوية أيضا
وأكد على نقطة مهمة جدا .. وهي اللي انت ذكرتها "اليقين"
يعني مينفعش نعالج نفسنا بالآيات والأحاديث عن طريق التجريب .. يعني أدينا بنجرب ومش هنخسر حاجة يمكن تنفع .. لأ لازم يكون عندنا يقين بالله .. حتى ولو لم يتم الشفاء من أول مره
روحت البيت بعد الصلاة .. دورت في الكتب عندي .. لقيت كتيب صغير اسمه "الرقية الشرعية من الكتاب والسنة" على ما أذكر
وكان فيه حديث صحيح رواه الامام مسلم بيقول:
عن عثمان بن أبي العاص الثقفي ؛ أنه شكا إلى رسول الله صلى الله عليه وسلم وجعا ، يجده في جسده منذ أسلم . فقال له رسول الله صلى الله عليه وسلم " ضع يدك على الذي تألم من جسدك . وقل : باسم الله ، ثلاثا . وقل ، سبع مرات : أعوذ بالله وقدرته من شر ما أجد وأحاذر "
قمت قايم متوضي وصليت ركعتين حاولت أخشع فيهم على قد ما اقدر
وبعدين حطيت إيدي على ضهري وركزت كويس وحاولت أجمع أكبر قدر من الخشوع واليقين .. وبعدين قلت الدعاء بتركيز وحضور قلب
وسبحان الملك .. والله قبل ما أرفع إيدي من على ضهري كان الألم اختفى تماما
بصراحة مصدقتش وقلت يمكن بيتهيألي
وقفت بسهولة غير المعتاد من ساعة ما تعبت .. قعدت اتنطط على الأرض عشان أشوف الألم هيرجع تاني ولا إيه؟
لدرجة إني نزلت ألعب ضغط .. اللي كان مستحيل أفكر أعمله وانا تعبان
لكن سبحان الله .. ولا الهوا .. ولحد انهارده
طبعا زمانكم بتقولوا عليا ولي من أولياء الله الصالحين .. أو راجل بركة
لا والله ربنا اللي يعلم بحالي .. وإني والله وبدون تواضع ماستحقش أي حاجة .. وهو بس اللي ساترنا
لكن الحمد لله إنه بيعاملنا بما هو أهله .. وليس بما نحن أهله
أحبكم الله الذي أحببتموني فيه
وأسأل الله أن يجمعنا مع نبيه صلى الله عليه وسلم في الجنة .. وإن كنت لا أستحق
ولكن الكريم عودنا أن يعاملنا بما هو أهله .. وليس بما نحن أهله
الحلقة السابعة والأخيرة
التطعيم والتحصين ضد الحسد والعين
قبل ما نعرف طرق الوقاية عايزين نعرف الأول الفرق بين الحسد والعين
أولا: الحسد يتأتى عن الحقد والبغض وتمنى زوال النعمة، أما العين فيكون سببها الإعجاب والاستحسان
ثانيا: الحاسد يمكن أن يحسد في الأمر المتوقع قبل وقوعه بينما العائن لا يعين إلا الموجود بالفعل
ثالثا: لا يقع الحسد إلا من نفس خبيثة حاقدة، ولكن العين قد تقع من رجل صالح من جهة إعجابه بالشئ دون إرادة منه إلى زواله
رابعا: "وده مهم جدا" لا يحسد الإنسان نفسه ولا ماله ولكنه قد يعينهما .. يعني ممكن الواحد يكون جايب عربية جديدة مثلا ومن شدة إعجابه بيها يصيبها هو نفسه بالعين .. عشان كده يستحب للإنسان لو شاف أي حاجة عجبته إنه يبرك .. يعني يدعو بالبركة .. لأن ده من أهم الأسباب لمنع العين
من أسباب الوقاية من الحسد والعين:
السبب الأول: التعوذ بالله واللجوء إليه، والتحصن به، وما تعوذ المسلم بأفضل من المعوذتين: قل أعوذ برب الفلق ، وقل أعوذ برب الناس.
السبب الثاني: تقوى الله وحفظه عند أمره ونهيه، فمن اتقى الله تولى الله حفظه، ولم يكله إلى غيره، قال تعالى: وَإِنْ تَصْبِرُوا وَتَتَّقُوا لا يَضُرُّكُمْ كَيْدُهُمْ شَيْئاً إِنَّ اللَّهَ بِمَا يَعْمَلُونَ مُحِيطٌ[آل عمران:120].
وقال النبي صلى الله عليه وسلم: احفظ الله يحفظك.
السبب الثالث: الصبر على الحاسد، فمن أسباب النصر على الحاسد الصبر عليه
السبب الرابع: التوكل على الله، والتوكل أقوى الأسباب التي يدفع بها العبد مالا يطيق من أذى الخلق
السبب الخامس: عدم الانشغال بالحسد والتفكير فيه والالتفات إليه والخوف منه .. وهذا من أقوى الأدوية
السب السادس: تجريد التوبة إلى الله من الذنوب التي سلطت عليه أعداءه .. قال تعالى "وما أصابكم من مصيبة فبما كسبت أيديكم"
السبب السابع: الصدقة والإحسان فإن لذلك تأثيراً عجيباً في دفع البلاء ودفع العين وشر الحاسد
السبب الثامن: إطفاء شر الحاسد بالإحسان إليه، قال تعالي "ولا تستوي الحسنة ولا السيئة ادفع بالتي هي أحسن فإذا الذي بينك وبينه عداوة كأنه ولي حميم"
السبب التاسع: وهو الأساس .. عدم الانشغال بالأسباب والتفكير في مسبب الأسباب والعلم أن كل ذلك بيد الله يحركه كيف شاء، ولا ينفع إلا بإذنه، قال تعالى: وَإِنْ يَمْسَسْكَ اللَّهُ بِضُرٍّ فَلا كَاشِفَ لَهُ إِلَّا هُو
وقول النبي صلى الله عليه وسلم: واعلم أن الأمة لو اجتمعت على أن ينفعوك بشئ لن ينفعوك إلا بشيء قد كتبه الله لك ولو اجتمعوا على أن يضروك بشيء لن يضروك إلا بشيء قد كتبه الله عليك
السبب العاشر : الأذكار والأدعية:
يجب على المسلم أن يحصن نفسه من الشياطين من مردة الجن والإنس بقوة الإيمان بالله واعتماده وتوكله عليه ولجئه وضراعته إليه ، والتعوذات النبوية وكثرة قراءة المعوذتين وسورة الإخلاص وفاتحة الكتاب وآية الكرسي ، ومن التعوذات : " أعوذ بكلمات الله التامات من شر ما خلق " و " أعوذ بكلمات الله التامة من غضبه وعقابه ، ومن شر عباده ومن همزات الشياطين وأن يحضرون " ، وقوله تعالى { حسبي الله لا إله إلا هو عليه توكلت وهو رب العرش العظيم } ونحو ذلك من الأدعية الشرعية
ولاشك أن الإنسان متى كان قريباً من الله عز وجل مداوماً على ذكره ، وقراءة القرآن ، كان أبعد عن الإصابة بالعين ، وغيرها من الآفات وأذى شياطين الإنس والجن ، وكذلك فإن النبي صلى الله عليه وسلم كان يعوِّذ نفسه ، وأعظم ما يتعوذ به المسلم قراءة كتاب الله وعلى رأس ذلك :
المعوذتان وفاتحة الكتاب وآية الكرسي
ومن التعوذات الصحيحة الواردة عن النبي صلى الله عليه وسلم ومنها :
( أعوذ بكلمات الله التامات من شر ما خلق ) رواه مسلم
وعَنْ ابْنِ عَبَّاسٍ رَضِيَ اللَّهُ عَنْهُمَا قَالَ كَانَ النَّبِيُّ صَلَّى اللَّهُ عَلَيْهِ وَسَلَّمَ يُعَوِّذُ الْحَسَنَ وَالْحُسَيْنَ وَيَقُولُ إِنَّ أَبَاكُمَا كَانَ يُعَوِّذُ بِهَا إِسْمَاعِيلَ وَإِسْحَاقَ أَعُوذُ بِكَلِمَاتِ اللَّهِ التَّامَّةِ مِنْ كُلِّ شَيْطَانٍ وَهَامَّةٍ وَمِنْ كُلِّ عَيْنٍ لامَّةٍ ) رواه البخاري، ومعنى الَّلامة : قال الخطابي : المراد به كلُّ داء وآفة تُلمُّ بالإنسان
وعَنْ أَبِي سَعِيدٍ أَنَّ جِبْرِيلَ أَتَى النَّبِيَّ صَلَّى اللَّهُ عَلَيْهِ وَسَلَّمَ فَقَالَ : " يَا مُحَمَّدُ اشْتَكَيْتَ؟ فَقَالَ نَعَمْ قَالَ بِاسْمِ اللَّهِ أَرْقِيكَ مِنْ كُلِّ شَيْءٍ يُؤْذِيكَ مِنْ شَرِّ كُلِّ نَفْسٍ أَوْ عَيْنِ حَاسِدٍ اللَّهُ يَشْفِيكَ بِاسْمِ اللَّهِ أَرْقِيكَ " رواه مسلم
ولا شك أن مداومة الإنسان على أذكار الصباح والمساء ، وأذكار النوم ، وغيرها من الأذكار له أثر عظيم في حفظ الإنسان من العين فإنها حصن له بإذن الله فينبغي الحرص عليها ، ومن أهم العلاجات أن رسول الله صلى الله عليه وسلم رخَّصَ في الرُّقية من العين وأمر بها
عَنْ عَائِشَةَ رَضِيَ اللَّهُ عَنْهَا قَالَتْ : " أَمَرَنِي رَسُولُ اللَّهِ صَلَّى اللَّهُ عَلَيْهِ وَسَلَّمَ أَوْ أَمَرَ أَنْ يُسْتَرْقَى مِنْ الْعَيْنِ " رواه البخاري ، وما جاء عَنْ عَائِشَةَ رَضِيَ اللَّهُ عَنْهَا قَالَتْ : " كَانَ يُؤْمَرُ الْعَائِنُ فَيَتَوَضَّأُ ثُمَّ يَغْتَسِلُ مِنْهُ الْمَعِينُ " رواه أبو داود وقال الألباني في صحيح سنن أبي داود صحيح الإسناد برقم 3286 .
أسأل الله عز وجل أن يحفظنا ويحفظ كل إخواننا في هذا المنتدى الجميل من شر كل ذي شر
وأن يديم روح المحبة والأخوة بيننا
http://img687.imageshack.us/img687/6739/j0284916.jpg
ربنا يعزك يا دوك ويرزقك خيري الدنيا والاخرة
ويعاملك بما هو أهله ويأخذ بيدك اليه أخذ الكرام عليه
وربنا يجعلك من أولياؤه ... ويجعلك ممكن يذكرونه ليلا نهار ويجعلك تذكرة لمن هم اصحاب الذنوب والمعاصي مثلي و يجمعك مع النبي محمد صلي اللع عليه وسلم في الجنة ويسقيك من يديه شربة هنيئة مريئة لا تظمأ بعدها أبدا
ويرزقك رؤية وجهه الكريم وينعم عليك بالرضا
اسألك الدعاء :))
الله يفتح عليك
احسن حاجة انك ذاكر اسناد اى حديث
بارك الله فيك وجزاك خيرا عن هذا الموضوع الرائع والإفادة الجميلة وجعله فى ميزان حسناتك
السلام عليكم ورحمة الله وبركاته
فتح الله عليك وزادك علما ويقينا وزادك تقوى وورعا .....
وربنا يجمعنا جميعا في أعلى جنان الخلد .... اللهم آمين
وجزاك الله خيرا
والله انا حفظت الصفحة عندي وأدعو كل إخواني في المنتدى انهم يحفظوها عندهم في الكومبيوتركمرجع سريع ليهم عند حصول أي ظرف مشابه .... دي زي الحقنة المركزة في الوريد والله .
تصدق أنا بادي عين لحاجتي علطول وافتكر نفسي وحش لدرجة والله اني افتكرت اني باحسد وقولت للدرجادي انا وحش وحقود على الناس .... لحاد ما قرأت موضوعك ده وعرفت ان فيه حاجة اسمها العين ..... وده اللي كان بيحصل معايا ...لدرجة انها وصلت اني بادي " عين " لبنتي وافتكر اني باحسدها .
ربنا يزيدك فقها وعلما وعملا ....
اللهم فقهنا في امور ديننا واحفظنا وكل المسلمين من كل شر وسوء ....اللهم آمين
ربنا يبارك فيك ولك ان شاء الله .
ويجازيك كل خير ويفتح عليك.
أما انتوا دعيتولي شوية دعوات .. لو ربنا يستجيبهم بس
والله يبقى الواحد فاز في الدنيا والآخرة
فاللهم آمين ولكم جميعا بمثل
السلام عليكم ورحمة الله وبركاته
حبايبي الصقور .. بعد انتهاء الجزء الأول من مسلسل التيدا والمؤامرة يشاء ربنا إن يحصل شوية حاجات تخلينا نعمل الجزء التاني من المسلسل عشان نتقابل مره تانية في نفس الموضوع ده
العين المره دي جابت جون إنما إيه .. في المقص .. جون يدخلني في سكة 1500 جنيه بالمستريح .. ويخليني أتعقد من العربية اللي لسه ملحقتش أتهنى بيها ويشككني في امكانياتها ويخليني أحس إني اخدت فيها مقلب إنما إيه .. على كيف كيفك
بس بردو المشكلة اللي حصلت دي كانت سبب في إني وقعت على كنزين اتنين أغلى من العربية نفسها وأغلى من الدهب كمان
مش هطول عليكم في المقدمات .. عشان مانضيعش الأوقات
ونخش على طول في الموضوع .. إللي حصل من كام أسبوع
ومعرفتش أحكيه عشان رمضان .. مكنش فيه وقت ونت كمان
ونبدأ أول حلقة جديدة .. مع عم الحاج إيهاب والتيدا
انتظرونا في الحلقة الأولي من الجزء التاني واللي هتكون بعنوان
في المقص
http://www.nileup.com//uploads/image...448da7e10f.png
ونلتقي بعد الفاصل
والله وحشتنا مواضيعك وقصصك يادوك
في انتظاااااااااااااااارك ان شاء الله
السلام عليكم ورحمة الله وبركاته
والله يا دكتور ايهاب انت خلتنا مدمنين للحلقات بتاعتك
وشكلنا احنا اللي هنحتاج حقن عشان نعالج الحاله اللي عندنا
(شغف الاسلوب الادبي الخاص بيك)
فتح الله لك ابواب رحمته وزادك علما تفيد به اخوتك
هدانا الله واياكم لما يحب ويرضى وجعلنا واياكم من المتقين ومن المحسنين
جزاك الله خيرا عنا ونتمنى نشوفك في المقابله ان شاء الله عشان تثريها بحضورك
waiting ....
الجزء الثاني
الحلقة الأولى
### في المقص ###
هبدأ الرواية من البداية .. عشان تعرفوا أصل الحكاية
فكرت في يوم إني أروح .. واطلع طلعة على مطروح
قلت أقضّي هناك كام يوم .. أغير جو وانط واعوم
مع إني عمري ما روحت مطروح قبل كده .. ومعرفش الطريق .. ومبحبش أصلا أروح المصايف عشان زحمة الناس والمناظر اللي بتكون هناك وقلة الحياء عند كتير من الناس
بس سمعت إن البحر هناك فاضي والواحد بياخد راحته
بصراحة الفكرة نطت في دماغي فجأة بالليل .. قمت واخد العيال ومسافر الفجر "أحلى حاجة فيا .. التأني في اتخاذ القرارات"
المهم وأنا في الطريق حصلت شوية حاجات غريبة "كالعادة"
أول حاجة حصل معايا موضوع الفتيس اللي حصل مع بيشوي .. نقلت من على الـd الى الـr عن طريق الخطأ وأنا على سرعة 80 تقريبا
بس الحمد لله لحقت نفسي قبل ماشيل إيدي من على زرار الأمان اللى في الفتيس
بس ساعتها كأنك عملت كيك داون لقلبي .. معدل تسارع نبضاته حطمت الرقم القياسي .. والـrpm بتاعه كان متقفل
وقعدت سرحان بعدها .. قلت لو مكنتش لحقت نفسي ياترى كان إيه اللي ممكن يحصل
دا كان زمان الفتيس ضرب .. طب كنت هسيب العربية فين؟؟؟
طب أقرب توكيل فين؟؟؟
طب هانقل العربية ازاي؟؟؟
طب دا أنا رايح اتفسح ولا رايح أتنكد؟؟؟
وأنا سرحان مع أحلام اليقظة دي .. فوقت على كمين من بعيد قبل مارينا
أنا الحمد لله عمري ما حد طلب مني الرخصة في حياتي قبل كده .. غير مره واحدة كنت سايق فزبة من غير خوذة
قربت على الكمين لقيت ظابط بيبتسم ابتسامة جميلة وبيقولي: حمدا لله على سلامة حضرتك
استغربت وقلت في نفسي هي الثورة عملت شغل ولا إيه .. المهم قلتله: الله يسلمك
قالي: ممكن تركن بعد إذنك
قلت: ماشي
بعد ما ركنت قالي: حمدا لله على السلامة مره تانية
قلت : الله يسلمك مره تانية
قالي: ممكن الرخصة لو سمحت
طلعت الرخصة واديتهاله
بص فيها وبعدين بصلي وابتسم تاني وقالي: حضرتك متصور يا دكتور
قلتله هي السرعة المسموحة كام
قالي 100
قلتله وأنا متصور على كام
قالي 116
استغربت جدا وقلت في نفسي: إزاااي؟!!!
116 إزاااي؟!!!
بقى أنا كنت ماشي على 116 ... بس !!!
المهم دفعت وخدت الوصل ومشيت
بصراحة كان نفسي أقرأ الوصل .. بس للأسف وقع في إيد أحمد إبني اللي عنده 10 شهور .. واكله
يلا .. بالهنا والشفا
كل اللي فات ده ولسه مدخلناش في الموضوع .. مش عارف ساعات بحس إن أنا رغاي قوي .. لكن مع اللي بحبهم بس
بس مش مشكلة .. أدينا بنتسلى مع بعض .. أصل الرحلة كانت طويلة قوي
المهم .. بعد المخالفة احترمت نفسي ومشيت على 100
لكن العربية سحبها مغري ويخدع .. وسرعة 100 دي كأني واقف مكاني والطريق طويل
بعد ما احترمت نفسي فترة .. قررت إركن احترامي ده على جنب
وخصوصا إن من أسباب سفري مطروح إني أجرب العربية في طريق مفتوح زي طريق الساحل الشمالي
فتحت لحد 170 والعربية ماشاء الله .. ومرضيتش أزود بس عشان العيال
بردو كل اللي فات ملهوش علاقة بالموضوع
شكلكم اتخنقتوا مني
نخش في الموضوع
وأنا على السرعات العالية لاحظت إن العربية بتحدف يمين
كل ما أسيب إيدي من على الدريكسيون ألاقي الحاجة تيدا رايحة يمين
ياستي تعالي الناحية دي .. مصمصمة تروح يمين
ياحاجة ربنا يجعلنا من أهل اليمين .. بس انتي كده هتضيعينا
بردو مفيش فايدة .. اللي في دماغها في دماغها .. يمين يعني يمين
قلت ياترى في إيه؟
ضغط الهوا في الكاويتش متظبط
بس افتكرت إني كنت ساعات بسمع صوت نقرة من ناحية اليمين قدام
بس الصوت ده ماكانش قالقني قوي لسبب
إني كنت راكب قبلها شاهين لمدة سنتين وكانت بتطلع أصوات إنما إيه .. مزيكة حسب الله
بصراحة كانت بتسليني وبتصحصحني طول السكة .. خصوصا إن الكاسيت كان بايظ وكانت المزيكة دي قايمة بالواجب
فلما أسمع صوت النقرة دي في التيدا مش هحس بيه
وعلى فكرة الشاهين كانت بتحدف يمين بردو ... بس حدفة عن حدفة تفرق
الشاهين كانت عندها زمة في الموضوع ده
الله يرحمها .. ربتلي عضلات في دراعي اليمن
ده غير الواجب اللي عمله الدبرياج مع عضلات رجلي الشمال
بصراحة أنا لو كنت ذاكرت شوية في الثانوية ودخلت علاج طبيعي كنت وصيت المرضى بتوعي إنهم يركبوها نص ساعة 3 مرات يوميا قبل الأكل
المهم
قضيت المشوار .. وانبسطت
وغيرت الجو .. وزقططت
ونزلت البحر .. وبلبطت
وبعد يومين اتنين .. روحت
وبعد ما لفيت هنا كام لفة .. قلت اشوف موضوع الحدفة
روحت لواحد بتاع ضبط زوايا .. وقلتله على اللي حصل معايا
راح مدخل العربية دقيقيتن .. وطلعها ولف بيها لفتين
وقالي خلاص
قلتله عايز كام
قالي عشرين جنيه
اديتهاله ومشيت بالعربية .. لقيتها زي ما هي بالظبط ومفيش أي تغيير
رجعتله تاني .. راح منادي لواحد يفك العجلة كلها
وهو لسه بيفكها .. لقاها بتتحرك مع المفتاح الصليبة زي مايكون فيه شوية بوش
قالي دي بسبب جلب المقص عايزة تتغير
قلتله مالها؟
قالي بايظة .. هاتها وأنا أركبهالك
قلت في نفسي خلاص أروح التوكيل ومش مشكلة 200 أو 300 جنيه في موضوع الجلب ده
مع إني متوقع إني لو عملتها بره مش هتتكلف 50 أو 100 جنيه بس عشان أبقى مطمئن
إتصلت بالراجل بلدياتي اللي في التوكيل وقلتله أنا جايلك دلوقتي
روحت وبص عالعربية
قالي فعلا الجلب بايظة
قلتله ماشي غيرها
قالي بس في مشكلة
قلتله خير؟
قالي الجلب مبتتباعش وحدها .. لازم المقص بحاله
قلتله بكام يعني؟
قالي650 جنيه
قلت هاعمل إيه يعني .. ماشي
قالي بس في مشكله
قلته إيه تاني؟
قالي لو غيرت المقص اليمين لازم تغير معاه المقص الشمال كمان
قلتله ليه بس ياعم الحاج؟
قالي عشان المقص القديم هيبوظ المقص الجديد .. وعلى فكره المقصات مش تبع الضمان
قلت يعني 1300 غير الضريبة والمصنعية عشان جلبة كاويتش باظت
طبعا حاجة تعقد .. واللي يعقد أكتر إنه شككني في العربية اللي المفروض إنها عاملة 50 ألف كيلو بس
شكيت إني خدت فيها مقلب وإن العداد ممكن يكون ملعوب فيه
قلتله يعني مفيش حل تاني بيني وبينك كده بعيد عن التوكيل
قالي ممكن أجيبلك مقصات من بره التوكيل من القاهرة وهتكون أرخص
قلتله أنا بخاف من الحاجات اللى مش أصلية
قالي لا أنا هجيب أصلي بردو بس مش من التوكيل
قلتله إزاي؟
قالي ليا سكتي بقى
قلتله خلاص هتسافر إمتى؟
قالي لسه شويه .. بس لما هسافر هقولك قبل ما اشتري أي حاجة إنها تمنها كذا .. أجيب ولا لأ؟
قلتله ماشي اتفقنا .. ومنتظر مكالمتك
في الوقت ده فكرت في فكرة .. فتحت عليا باب الكنز الأول
الكنز اللي كسبني كتير .. كتير قوي
طبعا بعد الفترة الطويلة اللي قعدتها بعد الجزء الأول من المسلسل .. تأثير السكنات بتاعة د.عاطف بقت في الطراوة
وعرق الغلاسة إياه رجع للعمل تاني .. وبغلاسة
ولغاية ماحد يشوفلنا نوع مسكن تاني .. هنتظركم في الحلقة التانية .. اللي هتكون بعنوان:
### الكنز ###
http://img705.imageshack.us/img705/717/4ck94971.jpg
.
حمد لله علي سلامتك يا دوك
وعود حميد ..... بس زعلتني ...... في انتظار الكنز علشان اطمن
اقغد بالعافية :))
أنا مش عارف أفول لحضرتك إيه ولا إيه على أسلوبك الجميل في السرد ولا تدينك ولا احترامك وهدوئك .. والله أنا حاسس إني أعرفك من زمان مع إني عضو لسه جديد .. وربنا يجازيك خير
السلام عليكم
الله ينور عليك يا دكتور والله
انا لسه مشترك فى المنتدى جديد
وانا من النوع اللى مبعرفش اقرا موضوع او اتابع موضوع على بعضه
ولكن قصصك مع التيدا خلتنى اقرا الموضوع للاخر وابحث عن كل قصصك
وذلك لظرف اسلوبك وحلاوة كلامك وربنا يفتح عليك وتكتب كمان و كمان
متفهمنيش غلط ارجوك مش قصدى ان يحصل معاك قصص ومواقف وحشه
انت ممكن تكتب برده عن الايام الحلوه مع التيدا
وربنا يباركلك فيها.
واحب اشكر استاذ سونا لان هوا اللى رد على بوست بتاعى فى بيج المنتدى على الفيس بوك ووجهنى لانى افتح المنتدى وابص على الموضوعات اللى كان حاطط الينك بتاعها واشوف الدكتور والناس الحلوه اللى هنا دى.
انا يمكن مش معايا تمن التيدا دلوقتى ولكن انا قررت ان شاء ان هى دى حتكون السياره اللى حجبها لما ربنا يأذن , ومتقلقش يا استاذ سونا انا حفتكر اصلى استخاره و حفتكرك وانا بصلى الاستخاره
وحفتكر المنتدى كله وانا ان شاء الله بجيب العربيه
اسف على طول الكلام بس دول كانوا كلمتين فى نفسى مقدرتش اكتمهم.
السلام عليكم
اهلا بيك اخي وحبييي في الله
والله فرحت لما شوفت المشاركة بتاعتك ...... ولما تقرا المواضيع هاتعرف ان معظم الناس وانا منهم اشتريت العربية علشان الناس المحترمة اللي هنا .. وان شاء الله العربية لو نويت عليها هاتبسطك
ولما تنوي قلنا انك ناوي تجيب وربنايكرم ان شاء الله
ومتحرمناش من مشاركاتك بقي :))
اقعد بالعافية :d:d
تسلم يا أخي وربنا يرضى عنا وعنك
وإحساسك ده هو نفسه إحساسي لما انضميت لقسم نيسان بالنسبة لكل الأعضاء وهو اللي بيشجع الواحد إنه يتفاعل مع حبايبه اللي في القسم واللي انت بقيت واحد منهم
وياريت نشوفك معانا في المقابلة الجاية
أهلا بيك معانا
وطول في الكلام براحتك ولا يهمك
هو احنا داخلين هنا إلا عشان نتكلم ونفضفض مع بعض
وياريت تشرفنا في المقابلة .. أهو حتى تشوف التيدا عالطبيعة عشان تعرف تقرر أحسن
هو يا دكتور المقابله دى حتكون امتى ان شاء الله؟و فين؟
وفى انتظار الحكايه القادمه منك على احر من الجمر
بالنسبة للمقابلة أدخل هنا
http://www.nilemotors.net/Nile/243365-16-9-a.html
وبالنسبة للحلقة الجاية .. والله ربنا اللي عالم أنا بجاهد أد إيه عشان ألاقي وقت عشان أكتبها
بس بإذن الله أنا نازل بكره سوق العصر في مصر الجديدة عشان اشتري لاب توب عشان ألاقي وقت بره البيت أكتب فيه الحلقات
فمعلش استحملوني شويه
يا دكتور القاهرة حتنور والله .. لو محتاج اى خدمة قولى وانا تحت امرك ..
الحلقة الثانية
### الكنز ###
طبعا كلكم عايزين تعرفوا الكنز ده عبارة عن إيه؟
وطبعا أنا مش هريحكم بالساهل كده .. لازم أدوخكم شوية
أمال العرق إياه لزمته إيه ؟
وعشان كده حطيت صورة الكنز وهو مقفول .. هتقول إيه .. غلاسة بقى
بص يا عم الحاج
الكنز ده كنز عجيب
وهو متاح ليكم كلكم . وكتير منكم وقع عليه واستفاد منه كتير
الكنز ده أحسن من الدهب .. لأن الدهب لمعته بتنطفي بعد فترة .. إنما ده عمره ما بينطفي
والكنوز كلها إنت اللي بتدور عليها أو تلاقيها بالصدفة .. أما الكنز ده فأوقات كتير هو اللي بيدور عليك عشان ينفعك ويفيدك
الكنز ده غالي قوي عشان هو مش معدن .. لأ ده بني آدم
واحد كلكم تعرفوه .. ومعظمكم شايل جمايل كتير منه
واحد عجيب بيضحي بكل ما يستطيع من وقت وجهد ومال أيضا في سبيل خدمة جميع أعضاء نيسان نايل موتورز .. وبدون قابل .. والأعجب إنه بيخدمك في أوقات كتير من غير ما تطلب منه ومن غير مايعرفك
طبعا الفزورة دي بقت صعبة جدا .. لدرجة إنكم كلكم عرفتوا الحل
بس مش هقولكم إلا على أول حرف من اسمه عشان متعرفهوش واسيبكم محتارين
أول حرف من اسمه "أحمد مصطفى منسق القسم وأفضل منسق قسم في الدنيا ويعمل في التليفزيون والشهير بـahmed.tv"
طبعا مش هقول عالحرف التاني لحسن كده هتبقى سهلة قوي
على فكرة أنا مش ببالغ في وصفه أو بجامله
الراجل ده أنا محتار فيه والله
الراجل ده مش لاقي وصف ليه غير إنه راجل مش طبيعي
أيوه فعلا مش طبيعي
مش طبيعي في مجهوده .. مش طبيعي في خدماته .. مش طبيعي في حبه لأعضاء القسم
هنيئا له قول رسول الله صلى الله عليه وسلم: "من نفّس عن مؤمن كربة من كرب الدنيا نفّس الله عنه كربة من كرب يوم القيامة، ومن يسر عن معسر يسر الله عليه في الدنيا والآخرة، ومن ستر مسلما ستره الله في الدنيا والآخرة، والله في عون العبد ما كان العبد في عون أخيه"
مش معنى كده إنه ملوش عيوب .. لا طبعا كل واحد فيه مميزات وعيوب
يعني أكتر عيب أنا شايفه فيه الصراحة .. إنه تعبنا كلنا
بجد خلانا نتعب واحنا بندور على الكلمات اللي نقدر نشكره بيها في كل موقف وفي كل موضوع وفي كل مشاركة
خلاص بقينا مش عارفين نقول إيه تاني .. وهو بردو مش راضي يبطل ابداع
يعني مثلا شوف آخر مشاركة ليه في المسلسل ده
من غير ما أطلب أي حاجة هو دور عليا عشان يخدمني مع إنه ملخوم في موضوع المقابلة
وأنا عارف إنه بيتكلم جد ولو كنت طلبت منه مثلا إنه يقابلني عشان أنا معرفش الطريق كان هيسيب اللي قدامه واللي وراه وهيجي جري .. وهيكون مبسوط كمان
بس أنا حبيت أغلس عليه واحرمه من الانبساط ده
هو الانبساط ده ببلاش ولا إيه .. دا احنا بعد كده هنطلب منه فلوس عشان نرضى إنه يخدمنا
طبعا أنا أعرفه من أول ما جيبت التيدا .. بس عالنت بس .. لكن المره دي كانت أول مره أكلمه في التليفون
إزاااااااي؟
لما الراجل قالي هجيبلك المقصات من القاهرة من بره التوكيل وأصلي وبسعر مستريح
طبعا الراجل ده من بلدي وقريتي
يعني لازم أثق فيه واحط في بطني بطيخة صيفي ومتهرمنة كمان .. ومينفعش طبعا أسأل وراه
أصل انتوا لسه متعرفوش بلدنا دي رجالة أد إيه
أول ما سيبت الراجل قلت أتصل بأبو حميد أكيد هو عارف المقصات دي تتجاب منين وبكام وأصلي ولا لأ .. عشان ماتسكش على قفايا ولا مؤاخذة
آه أمال .. ماهو على رأي المثل حرّص ولا تخوّنش
وعلى رأي المثل التاني إن كنتوا اخوات اتقاسموا
وعلى رأي المثل التالت إقلب القدرة على فمها تطلع البت لامها "هتسألني إيه علاقة المثل التالت بالموضوع .. أقولك ماتركزش أهو اللى جه على بالي وخلاص"
كنت عايز أعرف منه معلومات عشان لما الراجل يكلمني
لكن هو حول مسار تفكيري تماما
قالي ماشي هاسألك .. بس هحاول أخليك تغيره في التوكيل تبع الضمان
قلتله عربيتي بره الضمان عشان أنا عملت صيانة الخمسين وصاحبها كان آخر حاجة عاملها صيانة الخمسة وتلاتين .. يعني الأربعين والخمسة وأربعين ساقطين وده يلغي الضمان
قالي هما ممكن يعدوا المسألة دي في بعض الأحيان
أهم حاجة متعديش صيانتين رئيسيتن ورا بعض
قلتله حتى لو العربية في الضمان .. الراجل قالي إن المقصات مش تبع الضمان
قالي يا عم أنا هاتصل ونعمل محاولة ومش هنخسر حاجة
تاني يوم رد عليا وقالى إنه كلمهم في السبع وقالي أكلم السبع بتاع المنصورة عشان هو قريب مني وهما هيشوفوا العربية ويعملوا الي يقدروا عليه
وأعطاني مفتاح الكنز التاني
قالي كلم المهندس مصطفى المحلاوي في السبع بتاع المنصورة وهو هيقوم بالواجب بإذن الله
مجرد ما كلمته في التليفون حسيت إنه راجل محترم جدا وهستريح معاه .. وكمان طلع من أحلى بلد في الدنيا .. من طنطا أم الدنيا
وعلى رأي المثل .. لو لم أكن طنطاويا .. لوددت أن أكون ..... من أي حته تانية
ما كلها بلاد ربنا يا عم الحاج
حددت معاه معاد تاني يوم وكان أول يوم في رمضان
روحت الساعة تسعة وكنت أول واحد وكان هو أول واحد بردو موجود هناك أول ما شوفته عرفته مع إنها أول مره أشوفه وحسيت إني أعرفه من زمان
قابلني بكل ذوق واحترام وقالي هندخل العربية ونرفعها ونشوف فيها إيه .. واللي هاقدر أعمله مش هتأخر فيه
قلتله يعني لو المقص عايز يتغير ممكن تغيره في الضمان؟
قالي أشوف الأول بس ومش هاعمل أي حاجة غير لما أقولك الأول وربنا يهيأ اللي فيه الخير ويمكن يطلع حاجة تانية غير المقص
بجد والله أنا قلت في نفسي سواء العربية اتصلحت أو حتى متصلحتش .. ولو اتغير على حساب الضمان أو حتى على حسابي .. كفاية إني اتعرفت على راجل زي ده
ماهو معرفة الرجال .. كنوز
بس بردو نفسي تتغير في الضمان بردو
وأهم حاجة ميكونش العربية ملعوب فيها
المهم
خدنا العربية وجربناها .. ورجعنا التوكيل ودخلناها
وشالني على كفوف الراحة .. وطلعت انتظره في الاستراحة
قعدت انتظره وأنا قلقان .. وقلت ياربي دا أنا غلبان
قلت لنفسي يا راجل إجمد .. بتحسسني إن مراتك بتولد
وبعد فترة طلع عالسلم .. وفتح بؤه وبدأ يتكلم
وقالي:
يا سلام عليكم .. عفاريت .. خلاص حفظتوني .. عرفتوا إني هاقطع الحلقة وأكمل الحلقة الجاية
مع إني كنت عايز أكمل دلوقتي .. بس مش هاكسفكم
ماهو على رأي المثل اللى بردو ملوش أي علاقة بالموضوع " يا جارحنى بلقمه ناشفه والعيش عندك طرى تقلان عليا ليه ارحمني يا مفترى"
نكمل الحلقة الجاية .. اللي هتكون بإذن الله بعنوان:
سبع .. ولا ضبع
http://img707.imageshack.us/img707/4091/29369677f6.jpg
هههههههههههههههههههههه
يعني انا مش عارف اتكلم علي احمد ولا اتكلم عليك
احمد ..... لا تعليق فعلا لا تعليق
هاتقول ايه مثلا عليه ؟؟ ......... مش عارف
ممكن نقول أخر الرجال المحترمين :)) ........ تمشي برده
ربنا يجعله في ميزان حسناته
وانت يادوك ربنا ييسرلك كل خير ويحبب فيك خلقه وفعلا كلامك جميل ولا اروع وان شاء الله اشوفك في المقابلة بكل خير ان شاء الله
يا دكتور انت خالتنى عايز اتعرف على استاذ احمد واحبه من قبل ما اشوفه
وكلامك صحيح انه هوا كنز لان الناس معادن فيه منهم معادن غاليه زى الدهب(زى استاذ احمد وحضرتك و سونا طبعا)ودول قليلين شويه.
وفيه منهم معادن رخيصه وده ممكن تشوفه كتير فى اى حته.
لتاني مره على التوالي تغلط نفس الغلطة
بس المره دي أشد شوية
بتحطني في مقارنة مع سونا ومع أحمد كمان .. وسعت منك قوي المره دي
دا انت حتى زنقتني في وسطهم ما بين قوسين
يا سلام .. دي أحلى زنجة زنجة
وعلى رأي المثل بردو
"يا زانقني وجنبك فاضي .. إزنقني كمان أنا راضي"
والله انا مش عارف اقولك ايه يا دكتور .. تقديرك وكلامك ده كبير عندى جدااااااااااااااااااا .. وبصراحة الواحد بيعتز بصداقه حضرتك جدا .. وبخدمتك .. لانك تستاهل كل خير والله
وفعلا الواحد بيتعامل مع الاعضاء كلهم لمصلحة الجميع.. ومصلحتهم ولله فى لله وبحب كبير جدا.
ومش محتاجين الا دعواتكم الكريمة
والحمد لله ان الحاجة اتعملت فى الضمان .. وانا معملتش غير الواجب تجاه اخ فاضل مثل حضرتك ..
وانت كمان خالتنى والله مش عارف اقولك ايه وعاجز عن الكتابة فى وصف وتقدير حضرتك .. اللى ربنا يعلم ان غالى جدا عندى.
وربنا يديم المحبة والود بينا
وسعيد بظهوري فى حلقاتك الممتعة
إيه ياعم أحمد
حضرتك .. حضرتك .. حضرتك
بقى أنا عمال أدلعك واقولك يا أبو حميد .. وانت بتقولي حضرتك
أنا عارف إن ده من ذوقك
بس متحسسنيش إن في فرق كبير كده
أقولك
قولي يا هوبا
والله كانت مقابلة زي العسل
واتعرفنا أكتر على ناس زي العسل
ومكنش مزعلني غير الناس اللي ماجتش وكان نفسي أشوفهم
بس متعوضة بإذن الله في مقابلة جاية
انت موهوب بجد يا ايهاب
كلنا فى انتظار باقى الحكاية
يا سلام لو كنت كملت قراءة الحكاية قبل المقابلة كنت عرفت النتيجة من الكنترول
قصدى منك
وحرقت عليك اللغز
طالما معرفتهاش في المقابلة معاك تليفوني
كلمني وأنا مش هقولك على طول
الحلقة الثالثة
سبع .. ولا ضبع
لما كنت قاعد منتظر النتيجة في الاستراحة
طلع المهندس مصطفى المحلاوي
وقالي: فعلا جلب المقص اليمين بايظة .. وهاغيرلك المقص كله في الضمان
فرحت أولا لأن العربية لسه في الضمان وأنا اللي كنت مفكرها بره الضمان
وفرحت ثانيا لأن المقص هيتغير في الضمان
سألته طب إيه السبب .. دا العربية لسه عاملة خمسين ألف كيلو بس .. لحقت تبوظ
قالي: العربية اتخبطت من تحت من الناحية اليمين وده اللي قطع الجلبة الكاويتش وخلى المقص يسيب وده اللي كان بيعمل صوت النقرة
فرحت ثالثا جدا لأني اتطمنت عالعربية وإنها مش ملعوب فيها وإن السبب خبطة عادية من تحت ولما المقص هيتغير كله هيبقى تمام
يعني العربية الحمد لله طلعت سبع مش ضبع
وتوكيل السبع بردو .. طلع سبع مش ضبع
قلت يااااااااااااه دا ربنا ده كريم قوي .. الحمد لله إنه استجاب دعايا وأنا صايم في ول يوم في رمضان
نزل المهندس وغير المقص وقالي عايزة بس ضبط زوايا لأني معنديش ضبط زوايا
قلتله دا انت تشكر قوي على كده
نزلنا مع بعض نجرب العربية في شوارع ترابية معضعضة عشان نشوف الصوت اختفى ولا لأ
والحمد لله كله بقى تمام
وقالي سلملي سلام جامد قوي على الاستاذ أحمد مصطفى
وبعد ما غيرت المقص .. اللي كان عاملي مغص
روّحت البيت وأنا فرحان .. في أول يوم من رمضان
ومشيت وأنا مبسوط بالتيدا .. وحسيت إنها عربية شديدة
ومبسوط أكتر وأكتر كمان .. بالعمدة بتاعنا منسق نيسان
روح ياراجل ربنا يقويك .. ومن كل خير يارب اعطيك
أيها المشاهدون الكرام .. مع هذه اللحظة السعيدة .. في قصة إيهاب والتيدا .. أحب أن أوجه عناية حضراتكم إلى أن الحلقات .. لسه مخلصتش ..
والمؤامرات .. بردو مانتهتش
وقبل ما أوصل لحد البيت .. رجعت تاني واتغميت
شكلي كده زي ماحبيتكم ومش عايز أسيبكم .. التيدا بردو حبتكم ومش عايزه تفارقكم
اللي حصل إني وأنا راجع من المنصورة على الطريق الأسفلت كله كان تمام
ماعدا موضوع الحدفة اليمين لسه موجود
قلت يبقى عشان ضبط الزوايا زي ما المهندس مصطفى قال
قبل ما أروّح قلت أعدي على الراجل بتاع ضبط الزوايا اللي روحتله الأول خالص .. أصلي بصراحة كنت محروق قوي على العشرين جنيه اللي خدها من غير ما يعمل أي حاجة .. يعني لو كنت دفعت الألف ونص في تغيير المقصات يمكن ماكنتش حرقتني قوي زي العشرين جنيه دي .. لسبب بسيط لأني حاسس إني إتنصب عليا فيها
لأني عمري ما اتنصب عليا في حياتي
أبدا
غير مره واحدة
أو مرتين
أو 15 مره
مش فاكر الصراحة
المهم قلت أروحله عشان أحس إنه عمل حاجة بالعشرين جنيه
لما روحت لقيت واحد صنايعي تاني غير اللي شوفته أول مره
صنايعي بس إيه .. فهلوي
قالي أنا شغال هنا عند صاحب الورشة .. وأنا كنت شغال في توكيل غبور لمدة 18 سنة .. وأنا هظبطهالك .. وأنا .. وأنا .. وأنا
وقعد يشتم في الصنايعي الأولاني
حسيت إنه من النوع الهمبكاوي درجة أولى .. بس شكله شاطر
قعد يظبط في العربية من تحت .. ويروح ويجي .. ويجي ويروح
كل ده عشان ازرفه بأي حاجة كده
وبعد ما خلص قالي بكل ثقة: بص يا باشا أنا عايزك تقفل عداد السرعة وإن حدفت يمن ولا شمال سنتي واحد حط رقبتي تحت الفردة
وعمال يصدرلي رقبته وهو بيتكلم كأني هاخدها معايا رهن
قلتله خلي رقبتك معاك ياعم الحاج أنا عندي واحدة والحمد لله .. وزرفته باللي فيه النصيب وقلت إما أجرب العربية عشان أشوف الهمبكاوي أبو رقبة ده عمل إيه
تتوقعوا لقيت إيه ؟؟؟
بصراحة وأنا ماشي على الأسفلت لقيت العربية مظبوطة عالشعرة .. لا بتروح يمين ولا شمال
قلت: يااااااه .. أخيرا ..
روحت على العيادة ودخلت في شارع ترابي عمري ما دخلته من يوم مابعت الشاهين .. مش عارف دخلت منه ليه المره دي
أول ما مشيت في الطريق المتكسر .. كنت الأول بسمع صوت نقرة .. دلوقتي سمعت صوت نقرة ونقرور ونقرات ونقارير ونواقير .. وكل اللي إنت عايز تقول قول
قلت: اللهم صلي عالنبي .. إيه الحلاوة دي .. بقى أنا بخاف من الكلب يطلعلي أسد
بس ياتري من السبب .. التوكيل ولا .. أبو رقبة
طول ما أنا عالأسفلت ماكنش في مشكلة سواء وأنا جاي من التوكيل أو من عند أبو رقبة
اتصلت بالمهندس مصطفي وقلتله على اللى حصل .. استغرب جدا وقالي ممكن تجيلي التوكيل
قلتله تااااني .. ده مشوار طويل والوقت مش مساعدني
وبعدين قلتله طيب ممكن نتقابل في طنطا لما ترجع بالسلامة عشان تسمع الصوت الأول ولو لازم التوكيل أبقى أروح؟
قالي بكل ذوق تحت أمرك مفيش مشكلة
قابلته عند الموقف ومشينا بالعربية لحد البيت عنده واستغرب جدا من الصوت .. قصدي من الأصوات .. وقالي لازم تروح التوكيل عشان نرفعها ونبص عليها من تحت يمكن بتاع الزوايا يكون عمل حاجة
اتفقنا على تالت يوم رمضان وروحنا من طنطا للمنصورة مع بعض واتعرفت عليه أكتر طول الطريق
طلعت الاستراحة وكانت يوم أول محاكمة للريس .. وعدى الوقت مع المحاكمة بسرعة وبعدين طلعلي وقالي: لقينا صامولة سايبة في الناحية اليمين اللي بتاع الزوايا كان شغال فيها .. والحاجات اللي كانت مربوطة بالصامولة دي عمالة تخبط في بعض
طبعا هو قالي على الحاجات دي بس أنا مش فاكرها بالظبط .. أصلي بصراحة كنت مركز مع الريس وهو بيلعب في مناخيره
وطلعنا تاني بالعربية .. ومشينا عالأرض الترابية
وكل شيء بقى مية مية .. وزي الفل وأكتر شوية
ولما رجعنا للتوكيل قلت للمهندس مصطفى: أؤمرني يا هندسة
قالي ولا حاجة خالص
قلتله إزاي ولا حاجة .. المره اللي فاتت ماشي لكن المره دي لأ
قالي لا والله ولا حاجة
وبردو رفض .. حتى بعد الاصرار والإلحاح .. وحسيت إن الهم انزاح .. وبقيت عال وآخر إنشكاح .. وفكرت إني خلاص هرتاح ..
لكن عيب .. مش بالسهولة دي ..
التيدا لازم تعمل معاكم أحلى واجب ..
والعين المدورة لازم تعمل بردو أحلى واجب ..
أمال .. أصل أنا راجل بركة
لدرجة إن في حاجة بخمسة جنيه إتزنقت في العربية .. عشان أفك زنقتها وأطلعها كلفتني 522.5 جنيه .. ومشوارين إتنين من طنطا للقاهرة
إزااااااااي ؟؟؟؟؟
نكمل الحكاية .. في الحلقة الجاية
اللي هتكون بعنوان
زنجة .. زنجة
http://www.nileup.com//uploads/image...ae8c54a648.jpg
السلام عليكم ورحمة الله وبركاته
والله مش عارف اقولك ايه يا دكتور
انا بشكر العربيه اللي مخلياك تبدع معانا هنا في المنتدى
وبالنسبه لموضوع الزنقه ده حصل معايا قبل كده
وكانت علبه زيت باكم حطيتها تحت الكبوت عند المساحات وقولت مش هيحصلها حاجه
اتزنقت في المساحات وفوتت موتور المساحات وخلتني اجيب موتور جديد
وفي انتظار الحلقه القادمه ان شاء الله
هدانا الله واياكم لصالح الاعمال
والله يا دكتور الله ينور عليك
على قد مانا بكون متضايق على ان العربيه بتعمل حاجات مش اللى هيا على قد مانا بكون سعيد وانا قاعد اقراء القصص بتاعت حضرتك وربنا يبعد عنك العين بس متبطلش تكتب قصص