انت خلصت الكلام اللي يتقال كله يا دوك
في انتظار الحلقة القادمة وامري لله
وربنا يكفيك شر الطريق
عرض للطباعة
انت خلصت الكلام اللي يتقال كله يا دوك
في انتظار الحلقة القادمة وامري لله
وربنا يكفيك شر الطريق
حلوة قوى صورة ملك ملوك افريقيا معمر ايهاب
الواضح ان الكمبيوتر الجديد والفوتوشوب عاملين شغل جامد
خد بالك لو مشاكل العربية انتهت والحلقات خلصت حتلاقى الجرذان والقلة المندسة حيخربوا فى العربية علشان تكمل حكاوى .
الى الامام يا ريس
حبيبي حبيبي الدكتور جودة .. فينك يا راجل غايب ليه
أقسم بالله إنك وحشني جدا وكان نفسي إني أشوفك في المقابلة اللي كانت أكثر من رائعة وماكنش ينقصها غير رؤيتك إنت وبقيت الأعضاء المحترمين
حتى أنا هناك كنت بسأل عليك إنت بالاسم
كنت قلقان عليك جدا بسبب عدم وجودك من فترة .. لكن الحمد لله إنك بخير
أخي في الله .. والله أحبك في الله
لا حول ولا قوة الا بالله , ربنا يباركلك فى العربية و الحمد الله على كل شئ .
حقولك ايه واعيدلك ايه ..خصلت كل الكلام
انت ملكش حل فى سرد الاحداث بجد .. يا هوبا والله .. وجامدة الصورة دى اصلىىىىىىىىىى
مش حتقول انك ليك فى الفوتوشوب ومحترف .. انا نفسى اتعمق فيه .. وبا لاخص فى الافتر ايفكت
على فكرة انا خمنت موضوع 550 جنيه دول .. بس مش قول
الى الامام الى الامام
السلام عليكم ورحمة الله وبركاته
ايه يا دكتور
اتأخرت بالحقنه علينا
عايزين نعرف ننام ..هههههه
ينفع كده يا دكتور
يعني تبقى دكتور وانت اللي تعلمنا الادمان
لأ وكمان مش عايز تدينا الجرعه..هههههه
نحن في الانتظار
ربنا يحفظنا جميعا من شر الادمان...
الحلقة الرابعة
زنجة زنجة
لو تفتكروا في أول حلقة من الجزء التاني لما كنت رايح مطروح .. قلتلكم إن وأنا في الطريق حصلتلي شوية حاجات غريبة
وقلت منها موضوع الفتيس .. ومخالفة السرعة .. والحدفة اليمين
في حاجة كمان حصلت .. وهي إني كنت مشغل الكاسيت اللي بيشغل 6 اسطوانات وحاطط فيه اسطوانتين اتنين
وبعد 5 ساعات شغل طول الطريق .. فجأة لقيت الصوت وقف ومكتوب eject
ضغطت على eject عشان يطلع الاسطوانة بس معرفش وكتبلي mechanism error
أعدت المحاولة مره واتنين وعشرة ومفيش فايدة .. الاسطوانة مزنوقة جوه وحلفت ماهي طالعة
ياستي اطلعي .. والله مانا طالعة
يا حاجة اطلعي .. والله مانا طالعة
هجيبلك علبة جديدة واحطك فيها بس اطلعي .. للللللللللللللللللأ
يهديكي يرضيكي .. بردو مفيش فايدة
دخلت عالمنتدي وسألت يمكن ألاقي حل
بعض الشباب قالولي بعض الآراء .. بس على مين .. دي زنقة متكلفة
واحد قالى إعمل ريستارت وجرب
عملت ريستارت للعربية .. وفكيت الكابل من البطارية نص ساعة وركبته تاني
وسبحان الله .. شوف الحركة البسيطة دي ..هي اللي عملت المفاجأة
جيت أطلع الاسطوانة بعد ما عملت الريستارت .. وضغطت عالزرار
وبردو الاسطوانة مطلعتش :)
حاولت كل المحاولات .. مكنش ناقص غير إني أجيب زمارة طويلة وأقعد أزمر قدام الكاسيت زي الهنود اللي بيطلعوا الأفعى من الأفه
بس طبعا ماكنش ينفع إني أعمل كده
لييييييييييييييه ؟؟؟
لسبب بسيط جدا .. وهو إني معنديش عمة كبيرة زي اللي بيلبسوها على دماغهم
http://www.nileup.com//uploads/image...3f1dd656c7.jpg
وبصراحة بردو خفت لو طلعتها بالطريقة دي إنها تقلب عليا بعد كده وتقرصني :)
المهم .. وأنا في توكيل السبع بتاع المنصورة سألت المهندس مصطفى عالموضوع ده
وقلتله هو انتوا اللي بتفكوا زنقة الاسطوانات ولا الكاسيت له توكيل تاني
قالي توكيل الكاسيت في القاهرة واسكندرية بس .. وهحاول أشوفهولك كده
جرب معاه .. وعرف يفك زنقة اسطوانة واحدة بس .. وعرفنا سبب الزنقة إيه
وهقولكم عليه عشان محدش يتزنق زنقتي .. ربنا مايزنقكم في أي زنقة .. قادر يا كريم
السبب كان إن الورقة اللي بتبقى ملزوقة على ضهر الاسطوانة اتفكت من كتر الشغل واتفركت حتت صغيرة واتحشرت في الكاسيت من جوه وزنقت الاسطوانة وحبستها جوه ومنعتها من الخروج وتنفس الهواء الطلق واستنشاق عبق الحرية
حلوة عبق الحرية دي .. مش عارف سمعتها فين قبل كده
فياريت أي حد يشتري أي اسطوانة عليها ورقة على ضهرها يشيل الورقة دي الأول عشان مايقعش وقعتي .. ويضطر يشتري الزمارة الطويلة .. وبردو مش هيلاقي العمة الكبيرة .. إلا لو كان ليه واحد معرفة في الهند
سألت المهندس مصطفي على عناوين توكيل الكاسيت وخدتها منه وقالي شوف هتتكلف كام وهات فاتورة وأنا هدفعلك تمنها
مش بقولكم راجل محترم .. وكنز من الكنوز
الكلام ده كان أول يوم رمضان وماكنش ينفع أروح عشان الوقت مايسمحش
انتهى رمضان والعيد واسبوعين بعد العيد
لغاية ماعرفت موضوع المقابلة بتاعة المنتدى
قلت أضرب عصفورين بحجر .. واتصلت بتوكيل الكاسيت في مصر الجديدة
قالي هتجيب العربية نفك الكاسيت ونبعته المصنع وبعد 48 ساعة تيجي تستلمه
يعني لازم مشوارين للقاهرة عشان الكاسيت .. ده غير المقابلة .. وغير إني كنت عايز أنزل سوق العصر أشتري لاب توب
قلت خلاص أضرب 4 عصافير بحجرين
أروح قبل المقابلة بتلات أربع أيام أودي الكاسيت وأشتري اللاب توب
وبعد كده أروح يوم المقابلة بدري شوية أجيب الكاسيت وأحضر المقابلة
يا سلام عالفكاكة
وقد كان
روحت يوم الاتنين وبعد ما لطشت شوية تلطيش محترمين في مصر الجديدة لحد ما وصلت للتوكيل .. وده بسبب إن نادرا جدا لما تلاقي مواطن مصري في الشارع تسأله عن الطريق ويقولك "معرفش"
الحاجة الواحيدة اللي ميعرفش يعملها إنه يقول معرفش
لازم يفتي ويبعتك ويدوخك السبع دوخات
المهم وصلت التوكيل .. وحكيتله قصة "الاسطوانة الأسيرة" .. وكمان كان في 4 زراير مش شغالين في الكاسيت
قالي تعالى بعد يومين استلمه عشان الصيانة بتبقى في المصنع مش عندنا .. أحنا بنسلم وبنستلم
وبعد كده روحت سوق العصر في مصر الجديدة بردو .. أشتري اللاب توب اللي أنا باكتب عليه الكلام ده دلوقتي في مكان شغلي اللي ملك الموت مابيفارقهوش .. " في السلخانة"
الحمد لله اشتريت لاب توب جميل بفضل الله ثم بمشورة أخويا الكبير .. كبير المقام وكبير القدر .. الكابتن سامي .. اللي كان معايا عالتليفون وأنا بشتري اللاب واستفدت جدا من خبرته في الموضوع ده
وبعدين يوم الجمعة روحت تاني بدري وصليت الجمعة جنب التوكيل
قالي تكلفة الصيانة 475 جنيه .. قلتله عايز فاتورة قالي هتىدفع 10% كمان لو عايز فاتورة يعني 522.5
قلتله ماشي
ركب الكاسيت وخدت الفاتورة اللي كان ليها حكاية هي كمان وكان المفروض أستلمها الساعة 7 بالليل وبعد فيلم هندي قصير استلمتها بعد ساعة واحدة وده اللي أخرني شوية عالمقابلة
ووصلت لحبايبي الصقور .. اللي كان نفسي أشوفهم من شهور
وقضيت معاهم يوم من أحلى الأيام .. وعشت فيلم هندي طويل من أحلى الأفلام
وأكلنا مع بعض أحلى وليمة .. وحانت ساعة الفراق الأليمة
وروّحت البيت يومها وأنا طاير من الفرحة .. وأخدت لمراتي معايا حته من الفرخة
وعدى السبت والحد والاتنين والتلات والأربع كمان .. وفي يوم الخميس صحيت مالنوم على صوت الأذان
صليت الفجر ونمت كمان ساعتين .. وروحت الشغل وكشفت عالعجلين
وغسلت إيدي من الدم وقعدت عالمكتب .. وعشت معاكوا حياتي وكتبت عاللاب توب
وقعدت أكتب ليكم هذه الكلمات .. عشان تعيشوا معايا كل اللحظات
طبعا أكيد فكرتوا إن المسلسل انتهى عند النقطة دي .............. بس دا بُعدكم
إنتوا يعني تعرفوا إن في حاجة بتنتهي معايا بالساهل كده
دا التيدا عاملة معكم عقد احتراف
والعين عاملة معايا عقد انحراف
يعني لما روحت توكيل طنطا أول مرة والعربية زي الفل .. طلعلتلي مفاجئة طرمبة البنزين
ولما الإزاز اتشرخ وصلحته .. رجعت للراجل تاني بعد يومين
ولما روحت مطروح وقفوني في الكمين .. وبعدها بشوية العربية حدفت يمين
ولما المقص اتغير وروحت لأبو رقبة بتاع الزوايا
نسي يربط الصامولة كويس .. عشان يوجب معايا
تعرفوا دلوقتي ياناس يا عسل .. بعد كل ده إيه اللي حصل
لما ركّبت الكاسيت والاسطوانة طلعت وجربت كل الزراير اللي كانت مش شغالة .. وكله كان تمام
لما روّحت البيت قلت أظبط الساعة الموجودة في الكاسيت .. لقيت التوكيل اللي صلح الزراير اللي كانت مش شغالة .. بوظ زرار الساعة السليم اللي عمره ما اشتكي قبل كده
يادي الحووووووووووووسة .. اتصلت بيهم قالولي احنا مسؤولين عنه .. بس لازم تجيبه في يوم نفكه عشان نبعته المصنع وتيجي تاني ... بعد أدإيه؟
شاطرين يا ولاد .. بعد 48 ساعة عشان استلمه
يعني فيها كمان مشوارين للقاهرة .. يعني عصفور واحد بحجرين اتنين .. حاجة ماكنش ليها أي لازمة
وكمان مش عارف هل فعلا هاخد تمن فاتورة التصليح من التوكيل ولا لأ؟
دا غير إيه كمان .. صوت النقرة اللي في المقص رجع من تاني
اللهم لك الحمد
إنتوا عارفين .. بصراحة وأنا بعمل أول حلقة في أول جزء في المسلسل ماكنتش مقتنع بنسبة 100% إن اللي بيحصلي ده عين وحسد
لكن دلوقتي بابصم بالـ19 إنها عين .. وعين عقر كمان
ملحوظة:
طبعا هيطلعلي واحد يعملي فيها ناصح ويقولي تبصم بالـ19 إزاي .. المفروض تبصم بالعشرة بس
أقوله ماهو اللي بيحصلي يخليني أبصم بصوابع إيدي ورجلي كمان
هيطلع بردو واحد أنصح من الأولاني ويقولي طب يبقى تبصم بالعشرين ولا انت ناقص صابع يا عم الحاج؟
أقوله: ماهو في صابع في رجلي مينفعش أبصم بيه .. عشان فيه كالو يا عم الحدق
كل ده كوم .. وفي حاجة تانية خالص حصلت معايا .. أحكيهالكم في الحلقة الجاية ..
اللي اتاخدت فيها على خوانة
وكانت عبارة عن
طعنة من الخلف
http://www.nileup.com//uploads/image...852544b539.jpg
مش معقوووووووووولة
كميه عسل متشاله في بلاص دهب منقوع في طشت مسك ... وملفوفة في ورقة حرير :)))
انت بتجيب الصور ديه منين يا دوك ههههههههههه :))
ربنا يعينك علي كمية المصاريف ديه كلها ويباركلك في رزقك
احبك في الله .... وربنا يديم المعروف :))
السلام عليكم ورحمة الله وبركاته
رائع يا دكتور ...
ومش عارف هتضايق مني لو قلتلك انا عايزك تكتب على طول
لاني كده اعتبر بتمنى لك الاذى ولا ايه بالظبط
ويارب يكفيك شر الطريق ويهدي الاُززه بتاعتك
ويبعد عنك العين والحسد والحقد الدفين (وغالبا ده اللي انت بتعاني بسببه)
ربنا يكرمك يا باشا
تصدق إن إحساسي بردو هو نفسه إحساسك إني نفسي أكتب على طول
بس بردو بسأل الله إنه يعافيني ويعافيك ويعافي الجميع
وربنا يسترها معانا ومعاكم
حبيبي يا سونه .. حلوة حكاية البلاص الدهب دي
والله بحبك من نخاشيش قلبي من جوه
ايهاب بجد انت مش معقول .. ايه يا عم المربي اللي معانا و بتلزق في المخ في القسم ده .. انا قعدت اضحك بجد مش قادر ابطل من المسلسل الرائع ده و بصراحة يا ايهاب انت تستاهل اكتر من التكريم كمان علي الملحمة الجامدة ديه .. :)
و علي العموم انت ممكن تبصم بالواحد و عشرين .. هتقولي ازاي هقولك 20 صابع و قالو ههههههههههههههههههههههههه هه
عسل يا هوبا
قشطة يا بيشو
عارف قشطة ليه ؟
عشان نحطها عالمربة بتاعتك وندلق عليهم شوية عسل من البلاص بتاع سونا .. ويبقى أحلى سكلانس
يا جماعه انتوا ناسين حاجه مهمه محدش جاب اى سيره عن الفطير اللى حيلم العسل والقشطه والمربهوكل الحاجات الحلوه دى
انا فى رأى ان الفطير ده هو المنتدى الجميل اللى جمعكوا كللكوا على ترابيزة النيسان علشان تكون احلا تشكيله على تربيزه
وكفايه كده لحسن انا جوعت:049::hot_dog:
الحلقة الخامسة
طعنة من الخلف
قبل ما أدخل في تفاصيل الحلقة أحب أوضح نقطة مهمة جدا
ممكن حضراتكم لما اتفرجتوا على الحلقات اللى فاتت تفكروا إني اتعقدت من العربية من كتر ما شفت معاها وإني ندمان إني اشتريتها وإني أخدت فيها مقلب محترم وكل ما أطلع من نقرة أقع في دحديرة .. ولو كنت جيبت حاجة زيرو كان أحسن
لكن على فكرة الحقيقة عكس كده تماما .. دا أنا كل يوم باقتنع بالعربية دي أكتر من اللي قبله
ومتتصوروش فرحتي بيها أد إيه
ولو دققتوا كويس في الحلقات اللي فاتت هتلاقوا العربية ملهاش أي ذنب في اللي بيحصل .. وإن اللي حصل ده كان ممكن يحصل في أي عربية زيرو أو مستعملة
يعني مثلا موضوع الزيت اللي حطوه بزيادة في التوكيل وقعدت أروح وآجي للتوكيل كذا مره لحد ماتظبط .. إيه ذنب العربية فيه؟!!!
وموضوع طرمبة البنزين اللي طلعت سليمة في الآخر والمرجح إنه كان إجراء وقائي من نظام NAST .. إيه ذنب العربية فيه؟!!!
وموضوع الإزاز اللي اتشرخ بسبب الميه اللي نزلت عليه في عز الحر والتكييف شغال .. والراجل اللي صلحه ماعرفش يظبطه .. إيه ذنب العربية فيه؟!!!
وسواق المكروباص اللي رشق في الرفرف بسبب الاستعجال والغشومية .. إيه ذنب العربية فيه؟!!!
والجلبة بتاعة المقص اللي باظت بسبب خبطة من تحت وروحت وجيت كذا مره بسبب أبو رقبة بتاع ضبط الزوايا .. إيه ذنب العربية فيه؟!!!
والدوخة بتاعة زنقة الاسطوانة في الكاسيت اللي طلع سببها إني ماشيلتش الورقة الملزوقة على ضهر الاسطوانة .. وبعد التصليح التوكيل بوظ زرار الساعة ومحتاج مشوارين تاني .. إيه ذنب العربية فيه؟!!!
كل اللي حصل ده العربية ملهاش أي ذنب فيه ومش بسبب عيب فيها ولو كانت زيرو كل ده كان ممكن يحصل فيها بردو
هو بس في حاجة مش طبيعية ورا كل اللي بيحصل ده .. وأكيد إنتوا عارفين هي إيه الحاجة دي
وبردو الحمد لله على كل حال .. وراضيين بأي شيء ربنا يكتبه علينا .. ومفيش أي مشاكل
وكل اللي فات ده كان ممكن أختصره في حلقتين أو تلاتة .. بس أنا اللي بطوّل في الحلقات عشان بصراحة مش عايز أسيبكم
يعني أنا مش كل يوم في مشكلة .. بالعكس يعني ممكن أحتاج مشوار أو مشوارين كل شهر أو شهرين وباقي الأيام الوضع طبيعي جدا ومستمتع بالعروسة بتاعتي والحمد لله
واقتناعي بالعربية بيزيد أكتر لما بجرب عربيات تانية .. باعرف إن ربنا أنعم عليا بجوهرة والله
يعني قبل كده جربت أكسنت RB 2011 وحسيت بالفرق الكبير في صالح التيدا
ولسه امبارح مجرب سيراتو 2011 وبردو حسيت بالفرق الكبير لصالح حبيبتي
فرق السحب الكبير وخصوصا لما تعمل كيك داون اللي الصراحة بيمزجني قوي .. مع إني مش بعمله كتير
وفرق الخامات وفرق العزل وفرق الوسع الداخلي .. و .. و .. و ......
اللهم لك الحمد
ندخل بقى في الحلقة بتاعتنا .. واللي هتلاحظوا فيها بردو إنها من نفس الماركة بتاعة الحلقات اللي فاتت وإن العربية بردو ملهاش فيها أي ذنب
وعلى فكرة أنا كنت ناسي ومفكر إن الطعنة كانت من الخلف .. لكن لما ركزت شوية افتكرت إنها كانت من الأمام
الرك عالذاكرة اللي بقت في الضياع .. يلا بقى .. هناخد زمنا وزمن غيرنا
اللي حصل إني في يوم بعد ما رجعت من رحلة مطروح "مش عارف إيه حكاية الرحلة دي بالظبط" ولو تفتكروا زي ما قلتلكم قبل كده إن العربية كان فيها فردتين ممسوحين عايزين يتغيروا .. وفردتين جداد لانج
عشان كده مارضيتش أزود السرعة عن 170 وأنا على طريق مطروح خوفا من الفردتين الممسوحين .. وقلت لما أرجع هاغير الممسوحين بفردتين جداد
ولما رجعت وقبل رمضان بيومين اتنين كنت بركن جنب رصيف سمعت فجأة صوت هوا بيتفرغ ولقيت العربية نزلت شوية لتحت من قدام يمين
نزلت أشوف في إيه .. لقيت الفردة عالأرض .. ولقيتها مقطوعة ومشروطة من الجنب بسيخ حديد صغير بارز من الرصيف اللي كنت بركن جنبه .. عمل طعنة في الفرده اللي قدام
طبعا لو كانت الفردة دي واحدة من الممسوحين .. ماكانش هيبقى في أي مشكلة .. دا حتى تبقى مصلحة إني أنجز وأغير بالجديد
لكن عيييييييييييييب .. مش مع هوبا الكلام ده .. أمال العين قاعدة بتعمل إيييييييييييييه ؟!!!
لازم تعمل دور واجب ومتفوتش الفرصة العظيمة دي ..
طبعا الفرده اللي باظت كانت واحدة من الجداد .. لانج
والأعجب من كده إن الفردة اللي قدام يمين اللي باظت كانت في الأصل واحدة من الممسوحين .. وأنا اللي نقلتها ورا وجبت الجديدة قدام قبل الموضوع ده بحاجة بسيطة ..... لييييييييييييييه ؟!!!
عشان اللي ربنا كتبه لازم يكون
وطبعا بردو هنقول إيه ؟
اللهم لك الحمد
يعني كده عايزين نشتري 3 فرد بدل اتنين
والواحدة البريدجستون بـ550 جنيه .. والهانكوك بـ475 جنيه
روحت في الحال اشتريت 2 بس وأجلت التالتة شوية عشان في فرده من الممسوحين ممكن تستحمل شوية
ولوبصيت عالسبب ورا اللي بيحصل ده بنظرة متأنية بعين متفحصة ومتمحصة .. هتلاقي إن السبب الحقيقي هو ...
أنا
أيوه أنا .. إيهاب العواني
لأني فعلا مقصر جدا في العمل بالتحصينات اللي ذكرتها قبل كده واللي بتكون سبب في الوقاية من الحسد والعين
وكمان ممكن تكون العين اللي ورا الموضوع ده هي عيني أنا .. مش قلنا قبل كده إن في فرق بين الحسد والعين
عموما سواء كانت العين مني أو من غيري من الناس الكويسين أو الأشرار
هانعمل اللي علينا ونبطل تقصير ونحاول نحافظ على الأذكار
ربنا يحفظنا ويحفظكم .. ويعافينا وإياكم من عذاب النار
ونكمل بإذن الله في الحلقة القادمة
واللي هتكون بعنوان
ليلة الدخلة
http://img43.imageshack.us/img43/9571/23121607.jpg
والله حبيبي يا دكتووووووور ..... شوفلك حل بقي :))
يا اما تشوفلنا فيلا كده 3 ادوار هاخد انا الارضي واحمد التاني وانت الدور التالت
وده راجع لسبب علمي اختلاف الاوزان والجاذبية الارضيه :))
وانا مش هادفع حاجة ياعم ..... انت علشان حبيبي بس ... لا وايه هاتجيبلي عروسه شبهك كده
بس شبهك في الحقيقة مش الصورة اللي انت حاططها ...... ههههههههههههههه
هاتفرق كتييييييييييير :))
ربنا يبارك في عمرك ويعزك يا هوبا ويباركلك في تيدتك حبيبتك وتشوف خلفها الصالح ان شاء الله :)))))
والحلقة اللي جايه ديه اتوصي بيا شويه ...... ديه ليلة الدخلـــــــــــــة هههههههههه
اقعد بالعافية يا دوك :)
حلقاتك ممتعة جدا، والله أنا ما عارف أقولك إيه أكثر من اللي الأعضاء بيقولوهولك، ربنا يبارك فيك
يا ايهاب انا حقولك مثل بما انك مش مغرم بالامثال الشعبية
ما يحسد المال الا اصحابه
سمعت المثل دا قبل كده
عييييييييييييب يا ولاد
إلعبوا مع بعض ومتتخانقوش
وبخصوص الفيلا التلات أدوار يا سحس .. فأنا بأيّدك جدا في الموضوع ده
لكن مع تعديل بسيط وهو إنك تبقى انت في الدور التالت وأنا في الأول عشان سمعت إن طلوع السلالم بيخسس .. وأنا كده هاختفي
ولا انت إيه رأيك؟
دا انا على كده اخد الدور الخامس ( مش مهم الرابع بقى ..... اطلع م التالت للخامس بحبل زي الصاعقة ) علشان الواحد يخس شويتين .... الأوزان تقلت في المنتدى
انا كان عندي نفس موضوعك ده يا د. ايهاب ... بس كان بطريقة مختلفة شوية : كل اما افتكر حاجة ( أكون ما فكرتش فيها من زمان ) بعديها علطول بتبوظ أويحصل فيها حاجة مش كويسة .... عارف عالجتها ازاي ... كل ما ابدا افتكر اي حاجةناسيها من فترة احاول اجهد دماغي بحاجة تانية ... بمعني تاني باشتت انتباهي .... هههههه ...... تهتو مني مش كده .... بس الواحد يعمل ايه بقي
الحمد لله على كل حال
موضوع رااااائع
و ربنا يبارك لك في عربيتك و عربياتنا
بصراحة أنا لو مكانه هانزل أصلي العصر وأقعد في الجامع لحد العشاء
أنا مش مستغني عن نفسي ياعم الحاج
الحلقة السادسة
ليلة الدخلة
وحشتوني واللهأنا عارف إن الحلقة دي إتأخرت تأخير غير طبيعي عن ميعاد إعلانها .. بس كان في سبب قوي هو اللي أخّر الحلقة .. وبإذن الله هبقى أقولكم عليه عشان تعذرونيفي يوم الأحد الموافق للخامس والعشرين من شهر سبتمر لعام ألفين وأحد عشروبالتحديد في الساعة الحادية عشر صباحا ..تم بالصلاة عالنبي الاتصال بالمهندس الخلوق المحترم مصطفى المحلاويوذلك لتحديد موعد لصيانة الــ55 ألف في مركز السبع بالمنصورةوللتخلص من صوت النقرة المسموعة من الجانب الأيمن الأمامي .. من ناحية المساعدينوتم تحديد الميعاد في اليوم التالي الإثنين الساعة التاسعة صباحاوفي صبيحة اليوم التالي .. استيقظت مبكرا كالعادة .. وواجهتني مشكلة بسيطة .. وهي .. آخد معايا فلوس أد إيه؟أصلي بصراحة الصيانة الوحيدة اللي روحت فيها للتوكيل قبل كده كانت صيانة الخمسين في توكيل طنطا .. وكنت هاحتاج فيها أكتر من 3 ألاف جنيه لما حصلت حكاية طرمبة البنزين لولا إن ربنا سترفقلت آخد بزيادة إحتياطي .. ماهو على رأي المثل .. اللي يتلسع من الطرمبة .. ينفخ في المساعدينأخدت معايا 3145 جنيه فقط لا غيروبعد مانزلت وشغلت العربية .. رجعت تاني وجبت البطاقة بتاعة بنك فيصل احتياطي بردو عشان لو احتجت فلوس تاني -لا قدر الله- وأنا في المنصورة ماحتاجش أرجع مشوار مره تانيةقابلت الراجل اللي حبيته في الله المهندس مصطفى .. وسألني صلحت الكاسيت ؟قلتله أيوه .. قالي اتكلف كام ؟قلتله 475 جنيه + 10% ضريبة عشان الفاتورة .. يبقى كله 522.5استغرب جدا من المبلغ .. اللي فعلا أنا كنت مستغرب منهسألته: هو المبلغ كده مش كبير شوية؟قالي فعلا .. قلتله طب هو المفروض الواحد يفاصل ولا الحاجات دي مافيهاش فصال؟قالي لا مفيش فصال في الحاجات ديقلتله طب هما بيحطوا السعر ده إزاي .. اجتهادا يعني ولا بيبقى متحدد؟قالي المفروض إنه متحددقلتله أصلي كنت متوقع أقل من كده بكتير .. هو كل التوكيلات مفترية كده؟ :)قالي أنا أكتر مبلغ قابلني قبل كده كان 80 - 90 - 100 أو 120 بالكتيرعالعموم أنا هاعمل اتصال واللي هاقدر أعمله مش هتأخر فيهقلت في نفسي زي ماتيجي .. المبلغ فعلا كبير .. لو قدر يدفعهولي أو يدفع منه 100 أو 80 أو حتى مفيش خالص مش مشكلة .. اللي ربنا كاتبه هيكونكتب أمر الشغل وقلتله على الصوت اللي جاي من ناحية المقص اليمين قدام .. وكان في صوت بردو من ناحية الباب اليمين وراطبعا أنا ماعرفش أسعار الصيانات كام .. الحاجة الوحيدة اللي أعرفها .. إن التوكيلات مفترية في الفلوس .. وخصوصا بعد اللي شوفته في توكيل طنطا وفي توكيل الكاسيتفقلت الصيانة الطبيعة لو ماحصلش أي مفاجآت أكيد هتدخلها في بتاع 300 جنيه ولا حاجةالمهم .. لقيت المهندس مصطفى بيقولي الصيانة هتتكلف 75 جنيه وكان عايز يعمل خصم كمانروحت مطلع الكوبون بتاع حبيبي أبو حميد اللي أعطاهولي هدية في المقابلة .. وسبحان الله كان مركز وعارف إني هاعمل صيانة الـ55 والكوبون كان خصم خمسين جنيه لصيانة الـ55لما المهندس شافه قالي دا الأستاذ أحمد عمل كده معاك الواجب .. كده هتبقى 25 جنيهقلت في نفسي بسسسسسسسسسسسسسس .. يعني أنا جاي من آخر الدنيا عشان أدفع 25 جنيه بسزي المريض اللي بيروح لدكتور كبير ويدفع 100 جنيه كشف وفي الآخر يقوله انت سليم ومعندكش حاجة ويكتبله على فيتامين بتلاتة جنيه .. نفس الشعوروبعدين دخل العربية وطلعت الاستراحةوبعد حوالي ساعة تقريبا قالى خلاص كله تمامقلتله الصوت راح ؟قالي بإذن الله مش هتسمعه تانيقلتله والمشكلة كانت فين ؟قالي العفشة كانت عايزة تتربط بسقلت الحمد للهوجيت عشان أدفع الحساب وبحط إيدي في جيبي عشان أطلع المبلغ المهول "25جنيه"لا ده بالظبط كان مكتوب 27.75المهم جيت أدفع لقيت الأستاذ بتاع الحسابات بيقولي معاك 5 جنيهطلعتها وأنا مستغرب واديتهاله من غير ما أتكلمتتوقعوا إيه اللي حصل ؟!!!!
خد الخمسة جنيه ورجعلى 500 جنيهخصم الـ27.75 من الـ522.5 بتوع الكاسيت اللي أنا كنت نسيتهم أصلا ودفعلى الفرقبصراحة مكنتش مصدق إن ده ممكن يحصل في مصرأروح أعمل صيانة وآخد فلوس كمان وأنا مروح .. قشطة باللوز"السؤال اللي بيطرح نفسه بإلحاح وفي جايزة للي يجاوبه صح: أنا روحت يومها ومعايا كااااااام؟"المهمخدت المفتاح .. ودخلت عالعربية وأنا فرحان .. زي العريس اللي داخل على عروسته في ليلة دخلتهوجربنا العربية .. على أرض ترابيةوكله بقى تمام .. وآخر انسجاموكنت فرحان بيها زي فرحتي أول يوم اشتريتها فيه .. أخيرا الصوت اللي كان بينقر في قلبي بقى في الباي بايياااااااااااااه .. هم راح وانزاح .. وأخيرا هاقدر ارتاحواحتفالا بتحقيق هذا النجاح .. ضربت واحد فانتا تفاح
آه صحيح ... كنت هانسى أقولكم على سبب تأخر الحلقةالسبب وبكل بساطة .. إني لما روحت بلدنا لقيت ............
لقيت صوت النقرة رجع من تانيبصراحة .. اتقفلتومكتبتش الحلقة غير لما حصلت تطورات يوم
الاتنين الماضي فقطوحصلت شوية حاجات تانية .. هتعرفوها الحلقة الجاية
اللي هتكون بإذن الله بعنوان
يوضع سره في ......... حتة وردة
موضوع جامد جداا ياباشا ... والله مصر فيها ناس كويسة ومحترمة كتير
بصراحة انت محترم يا دوك وربنا بيوقفلك ولاد الحلال دايما .. وبصراحة المهندس مصطفى من الناس الغاية فى الاحترام جداا .. ومن الناس اللى بتحب شغلها وعنده ضمير واخلاق نادرة فى الزمن ده .. وياريت مراكز الخدمة يكون فيها ناس من نوعية مصطفى
ومستنين الحلقات الجديدة .. ومتحرمناش من شوفتك يوم 25 /11
منتظرينك
المال الحلال لا يتحرق و لا يتسرق اهو جيه اهو ظبنهاا بقا بيه و هتلها حاجه دلع كده
قشطة باللوز يا دوك .... بس قولي ... اشمعنى اسم الموضوع ( ليلة الدخلة :))))) )
ربنا يبارك لك يا رب
الحمد لله مصر لسه بخير
تسلم يابو حميد .. ادعيلي ربنا ييسرلي الحال
بإذن الله شاشة وكاميرا .. أو باركينج سينسور .. لسه محتار
لأني فعلا:
بس يعني محدش جاوب عالسؤال .. أجاوب وآخد الجايزة أنا ولا إيه !!!
ايه ده ....... ديه حلقة جديدة ؟؟؟
ولا علنت عنها ولا حاجة يا دكتور يعني ......لالالالالالالالا انا زعلان
وصالحني بالجايزة من غير ما اجوب بقي علي السؤال اللي معرفوش ده :))
السلام عليكم ورحمة الله
انا جديد هنا في المنتدي ولكن الحمد لله انني تعرفت علي اخوان لي في الله مثلكم
ولكن لي سؤال لانني مقدم علي شراء سيارة ولكن ستكون مستعملة ان شاء الله بأن تفيدونا هل التيدا مناسبة ام لا من حيث الصيانه وقطع الغيار؟
جزاكم الله خيرا
يا خبر أبيض يا سحس .. هو أنا أقدر على زعلك
ولو عالجايزة انت تؤمر.. بس ابقى فكرني أول الشهر .. لما أقبض :)
أهلا بك أخي الكريم بين إخوانك في هذا المنتدي الجميل
أما بالنسبة للسؤال فأنصحك بقراءة بعض المواضيع التي ستجدها في هذا الفهرس
http://www.nilemotors.net/Nile/163656-a.html
وبالتوفيق بإذن الله