الموضوع: انت معاك لوجان .. مش سيراتو ولا مرسيدس !

قبل ما حد يتكلم ويقول انا داخل شمال في القسم
انا في المنتدي من قبل ما قسم لوجان يتعمل
وكنت بدافع عن اللوجان وناس كتير هنا في القسم يشهدوا علي كدة
من أوائل الملاك للعربية

العربية عربية ممتازة
أحسن من الفيرنا واللانوس والساجا و و و

انا مجرب كل العربيات ده ومجرب أعلي منهم وكمان أحسن من الأكسنت

بس مش في المطلق
العربية ده مش قلم !
يعني ممكن نقول قلم أحسن من قلم .. خطه أحسن / أنعم في الكتابة / أي كلام بقي

انما العربية حاجة تانية .. مفيش عربية أحسن من غيرها في المطلق
ممكن نقارن المرسيدس باللوجان ... فرق أستهلاك بقي .. اللوجان ده أحسن من المرسيدس !

همسك كذا حاجة كدة
الأستهلاك .. اللوجان متفوقة علي كله
التسارع .. سوري ... فيرنا
التكييف .. جيد جدا
الثبات ... نقطة خلاف .. اللي ركبتهم كلهم كانوا كويسين جدا لغاية 160 بحمولة 2
بس ثبات عن ثبات يفرق ! .. يعني لاااااااااااااااااااااااا اااا يقارن بثبات المرسيدس ولا البي أم
ولا السيراتو .. ولو اني مش بيعجبي ثبات السيراتو قوي .. يمكن عشان بتتننطط شوية
الوسع .. متفوقة جدا جدا جدا عن أي منافس ليها أو منافسين كتير أعلي منها
الباور .. أقل باور جربته
الأمان ... أحسن من كتير لغاية الأكسنت
تقفيل .. عادي
أعطال .. ماشفتش منها غير حاجات هبلة جدا .. أغلبها تقفيل أو عيب صناعة بسيط
قطع غيار .. أعلي منهم وأقل في الأنتشار
فرامل .. أحسن من اللانوس والفيرنا

انا مش بحط مقارنة عشان محدش يفهمني غلط ... ده بس كلام علي مية بيضة
وبوضح انها مش الأفضل علي الأطلاق
يعني العربية واسعة جدا وأوسع من الفيرنا مثلا .. بس الفيرنا أسرع وباور أفضل بكتير
بس باكدج ! .. ممكن نقول اللوجان تتفوق
بس في واحد تهمه قوي التسارع من 0/100 ومش عايز يزيد عن ال 100 ومش محتاج وسع وعايز باور ممتاز وتكييف تلاجة وقطع غيار منتشرة .. أقدر أقوله الفيرنا لأ !!!!

مش كل حاجة هتبقي وسع أو أي حاجة تنجح عربية عن عربية
بلاش نغمي عنينا
لما نحط مقارنة تبقي عادلة وبلاش التحيز .. ربنا هيحاسبك علي كلامك ده .. والتحيز مش من العدل حتي لو متحيز لحاجة أفضل

أعتقد كلامي واضح الغرض منه أيه .. وانا كاتب الموضوع ده عشان لقيت في مواضيع الحقيقة مأفورة قوي قوي قوي

انا متحفظ شوية في الرد علي كذا موضوع
يا ريت محدش يزعل مني