الموضوع: سؤال من مستجد

المشاركة الأصلية كتبت بواسطة syd

حضرتك كلامك دة متفصل علي كام عربية بالظبط مش هيخرج ترشيحي عن واحدة منهم

1- الأبيزا موديل 99 ال 1000 سي سي الكاملة
2- البولو 99 ال 1000 سي سي الكاملة
3- الفيات تمبرا موديل 97 الكاملة

اولا السعر من 35 لحد 40 :: نصيحتي ليك ما تزنقش نفسك، اوعي تحط كل الي معاك في العربية ، سيب ولو 3000 جنيه في ايدك لعدة اسباب
1- اول يوم هتجيب فيه العربية هتغرم مالا يقل عن 1000 جنيه سيرفيس (فلاتر وزيوت وسيور وانذار)
2- التراخيص لأنك غالبا هتجيب عربية وفاضل فيها شهر ولا 2 وكمان البلد مش مضمونة اليومين دوول وبالتالي لازم ترخص وتنقل ملكية في ساعتها
3- الله اعلم هتحتاج شحن تكييف ولا فردة كاوتش ولا اي حاجة ولازم تبقي جاهز

وعلي هذا فانت محتاج عربية بحد اقصي ب 35 او 37 لا اكثر
وبالتالي ارشحلك البولو والأبيزا والتمبرا

ثانيا استهلاك البنزين
الأبيزا او البولو ال 1000 سي سي متوسط استهلاكها بين 300 الي 330 كم في الصفيحة (20 لتر بنزين) ودة طبعا استهلاك خيالي مفيش عربية عملته غير الهوندا سيفيك ودي عربية خارقة للعادة دائماً

ثالثا الأعتمادية
مفيش عربيات اعتمادية قد الألماني وبالزات الفولكس

رابعا قطع الغيار
اكتر من الهم علي القلب سواء جديد او استيراد وباسعار منافسة جدا للعربيات الي في نفس الموديل وبتعيش لفترات طويلة جدا وما سمعتش عن حد غير نفس قطعة الغيار مرتين في حياة عربيته

خامسا الفنيين والميكانيكية
منتشرين جدا بتوع الفولكس والحمد لله

سادسا تسارع وثبات
اولا انت مش محتاج تسارع طالما علي طريق سريع وفي وجود الرادارات الذكية وطبعا الثبات لا يعلي علي الأبيزا وخصوصا بالجنوط ال14

الشنطة والوسع الداخلي
الشنطة صغيرة نوعا ما بحكم انها هاتشباك لكن كوسع داخلي فالعربية جميلة جدا

العفشة
مايختلفش عليها اتنين عفشة الفولكس وارتفاعها عن الأرض مهما ركب معاك حد ورا

الصاج والبودي
معروف طبعا صاج الألماني وكمان الأبيزا ، صاج بجد مش فيبر ولا صاج خفيف

اكتر عربية محققة معادلة صعبة جدا هي الأبيزا والبولو
السعر والأعتمادية والاقتصادية والموديل والكماليات
سعر مناسب للموديل والكماليات

بالنسبة للخيارات الأخري
انا شخصيا لا ارشح اللانوس لأنك عشان تجيب لانوس ب 35 هتبقي يا اما فاضية يا اما موديل 98
النوبيرا 1 حاجتها قليلة وغالية
سيتروين c3 حاجتها غالية جدا واساسا مش هتلاقيها ب35
نيسان صني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟ موديل كام ؟؟؟ 90 ولا 88 ؟؟؟

عارف

انا ممكن أرشحلك السيفيك موديل 91 بس بشرط الحالة لأن الموديل بعيد اوي
بس عربية تحفة وبتحقق كل مطلباتك من اعتمادية وكماليات وسعر بيع وقطع غيار ووسع وصاج

ربنا يوفقك

والله المستعان
،
،

شكرا جزيلا علي الرد... الحقيقة انا كنت اثناء رحلة البحث ميال جدا لابيزا بس ف الآخر كلة نصحني بلانوس.. كمان التمبرا هبقي محتاج حالة كويسة قوي لعربية موديل 97! صعبة شوية دي... وبعدين الابيزا شلتها من تفكيري بعد كدة لما الناس خوفتني من قطع غيارها وانها من جوة مش كويسة اوي يعني..

وشكرا تاني علي مشاركتك :)

يافندم اركب اكسنت 1500 ومش هتندم ومتشيلش هم لا قطع غيار ولا مصنعية ولا اى حاجة اصلا..انا معايا اكسيل وعارف يعنى ايه تشترى قطع غيار ببلاش وتكييف ممتاز وسحب كويس وبنزين 80 بكفاءة وشكل كويس ووسع مفيش زيه اصلا فى اى عربية الصالون والشنطة سوى التمبرا بس شكل تابلوه الاكسيل افضل بمراحل من التمبرا والعربيات الاكسيل فى مصر اكتر من التمبرا بمراحل..ده كله ينطبق على الاكسنت مع الاختلاف انها احدث من عندى فى الشكل وانسيابيه اكتر فى التصميم مع وسع اقل من الاكسيل بحاجة بسيطة جدا وثبات لحد 120 وجنط هتلاقى العربية ممتازة وبنزين استهلاكه ممتاز سواء ال 1300 او ال 1500 واللى معاك يجيبلك موديل 2000 او 2001 ولو قعدت معاك سنين ولو فكرت تبيعها هتتباع فلحظة لانها عربية اعتمادية فكل حاجة..ولو جبتها هتدعيلى ومش هتندم ابدا عليها وفوق كل ده انت مش محتاج تزود على 38 الف يعنى مش هتزنق نفسك وممكن تشترى باقل من كده وانت وشطارتك
وربنا يوفقك