الموضوع: طالع عمرة خلال اسبوع ان شاء الله-وصيتكم المنتدى

تقبل الله منك يا كريم ان شاء الله
بس انا لسة راجعة من اقل من اسبوع
الجو حر بس سبحان الله محسيتش بيه اوى وحسيت بالحر فى القاهرة اكتر
اوقات كتير كنت بقفل التكييف فى الفندق
وفى المسجد النبوى الجو رائع ومش هتحس بحر التكييفات فى كل مكان وان شاء الله يكون الفندق قريب فمتمشيش فى الشارع كتير فى الذهاب والعودة
فى مكة الحر اشد وبيزيد مع زيادة اعداد الناس كل ما اقترب وقت الصلاة
الافضل تجلس من الظهر للعصر وتمشى بعد العصر عشان الجو بيكون بعد صلاة الظهر حر جدا بعد العصر بيكون افضل
كان نفسى اقولك زى شيخ خالد ما قال تروح تنام شوية بين الصلوات
بس الحقيقة ان الازدحام شديد ولو نمت وقومت قبل موعد الصلاة بنص ساعة مثلا هتلاقى نفسك بتصلى فى الساحة او داخل الحرم لكن هتتحرم من مكان ترى منه الكعبة وانت بتصلى
وبما اننا مش هناك كل يوم
انت تنزل قبل الفجر بساعتين على 2 مثلا وممكن 3 لان اماكن صلاة الرجال اكتر كتير وتستنى لما بعد الشروق لو قدرت طبعا ويارب تقدر.
وتنزل قبل الظهر بساعة على 11 مثلا وتقعد لما يعد العصر
تروح تتغدى وترتاح شوية وتنزل 6 او 6 ونص يعنى تقريبا قدامك ساعة او ساعة ونص بالكتير معتقدش هتلحق تنام
وتنزل تصلى المغرب والعشاء وطبعا قراءة القرءان والاذكار وتكثر من الصلاة على رسول الله صلى الله عليه وسلم
وبما ان تحية المسجد الحرام هى الطواف حاول تروح بدرى عشان تطوف ومش شرط 7 اشواط
طوف من غير ما تعد واكتر وقت هتقدر تطوف فيه هو وقت المغرب والعشا وما بعدها عشان الحر والضغط الواطى
انا طوفت فى يوم بعد العصر سبحان الله فى الطواف لا تستشعر باى حر
ربنا يتقبل منك ويكتبها لكل المسلمين ان شاء الله
افضل مكان تشرب منه ماء زمزم اكثر برودة عشان الحر هو مكان السعى بين الصفا والمروة
فى المدينة المزارات الصبح يعنى مش فى وقت صلاة عشان مش يفوتك صلوات فى المسجد النبوى
بس انا صليت عصر ومغرب فى مسجد قباء فى يومين مختلفين
ومرة مغرب فى مسجد القبلتين
فى قباء احساس رائع بالراحة النفسية والطمأنينة
وطبعا الصلاة فى الروضة والسلام على رسول الله صلى الله عليه وسلم وعلى صاحبيه ابو بكر وعمر ونسألك السلام على رسول الله صلى الله عليه وسلم وعلى صاحبيه

لا تنسى الدعاء لمصر يا كريم