حضرتك لما بيبقي في محاولة اقتحام لقسم الناس مش بتبقي واقفة صفين...البلطجية شمال و الناس العادية يمين...بتبقي زحمة و ضرب نار من الطرفيين و ماحدش يقولي ان الاقسام مانضربش عليها نار...يعني في وسط الزحمة في ناس بتضرب نار و مولوتوف علي القسم و حواليهم ناس مغطيين عليهم عن جهل او عمد
يعني حضرتك شايف ان المأمور او الظابط لما يجيله أمر عادي ما ينفذهوش و يتحول لمحاكمة عسكرية...و كأن المحاكمة العسكرية دي حاجة بسيطة و هايتخصم له 3 ايام عشان مانفذش الأمر
طب و هم يضمنوا منين انهم ما ينفذوش الاوامر و بعدين الثورة تفشل و ساعتها المأمور اللي ساب قسمه و سلاحه يتسرق هايبقي متهم و يترمي في السجن...لما الاوامر وصلت لهم كانت جاية من النظام الشرعي القائم في الوقت ده (حتي لو فاسد و بنكرهه) بس كان هو السلطة الي بتصدر اوامر و تحاسب في حالة عدم تنفيذها...بعد كده النظام ده فقد شرعيته بنجاح الثورة و دلوقتي اللي من حقه يصدر اوامر و يحاكم في حالة عدم تنفيذها هو المجلس العسكري
لو كانت الثورة فشلت كان المأمور اللي هايدافع عن قسمه و يحافظ عليه هايبقي بطل و المأمور اللي يسيب قسمه و يهرب هايتحاكم و يتسجن
لكن لأن الثورة نجحت بقي المأمور الي ساب قسمه و هرب في السليم و اللي دافع عن قسمه متهم و مدان حتي من غير محاكمة
انا مع محاكمة القيادات اللي كانت أمامها الصورة كاملة و بتحمي النظام رغم فساده (وزير الداخلية و مساعديه) لكن محاكمة الظباط اللي علي الارض و بينفذوا اوامر هي مجرد نوع من التشفي و الرغبة في الانتقام
و بعدين لو افترضنا ان في ناس بتتهم ظابط بعينه ان مجنون و طلع ضربهم بالنار من غير سبب...الناس دي تروح تشتكي و تجيب شهودها و الظابط برده يجيب شهوده و القاضي يحكم و لو حكم بالبراءة ماحدش يعترض لكن تلاقي القاضي جوة قاعة المحكمة و بره مظاهرات و هتافات و محاولات اقتحام للمحكمة ...بقي اسمه قضاء و محاكمة عادلة؟؟؟؟؟ قاضي ايه ده اللي هايحكم حكم عادل و فيه ناس واقفة بره المحكمة حالفة تولع فيها لو الحكم مش علي هواها
المفضلات