المشاركة الأصلية كتبت بواسطة ehab_11_22
السلام عليكم ورحمة الله وبركاته
يا جماعة أنا بقالى مدة على النت بقرا عن اللوجان المغربى مميزات - عيوب بس للأسف أغلب الموضوعات تواريخها قديمة وأنا بإذن الله خلال 4 أو 5 شهور ناوى أن شاء الله أجيب العربية دى
بس فى عيوب أنا قريت عنها فى العربية دى فعايز أعرف مالكى السيارة قدرو يتعاملو مع العيوب دى أزاى وأية العيوب الى مقدروش يتعاملو معاها ورضو بها على كدا وكمان اية العيوب دى الى ممكن تكون فردية (( يعنى أنت وحظك )) وأية العيوب الى فعلا شائعة وموجودة بالسيارة عموماًُ
وياريت ياريت يا جماعة لو حد عندو مشكلة مع العربية دى ومش قادر يحلها يقول عليها عل وعسى حد من الأعضاء يشوفها ويقولنا أتعامل معاها أزاى
1- سخونية بتيجى من تحت القدم
انا عرببتى موديل 2010 و مفيهاش اى سخونة و محتاجتش اركب العازل ده الحمد لله .
2- دواسة البنزين فيها زنة وكأن دواسة البنزين مربوطة فى موتور السيارة وبتنقل زنة الموتور بالكامل للقدم
الكلام ده انا حسيته فى الاول خالص لكن دلوقتى العربية عاملة معايا 14000 و اختفى تماما موضوع رجة الدواسة ده.
3- أسعار قطع الغيال مرتفعة وبعضها غير موجود
بالنسبة لقطع الغيار الاستهلاكية زى تيل الفرامل البوجيهات او مثلا فوانيس مرايات اكصدامات رفارف .. اسعارها قريبة جدا من الفيرنا و بقت موجودة فى محلات كتير .. لكن القطع التانية المعمرة "ممكن تقعد بالعربية 10 سنين و اكتر و متحتجش تغيرها الا لو لا قدر الله حصلك حادثة او حاجة" زى الكبالن و باقى اجزاء العفشة او علبة الدريكسيون او طلمبة الباور .. دى فعلا سعرها غالى و مش بتبقى موجودة دايما فى التوكيل بس بيبعتوا يجيبوها من فرنسا و ده عن تجارب كتيرة جدا منى ومن اصدقائى .
4- مش أى ميكانيكى يقدر يشتغل فيها ولازم نفضل متابعين مع الوكيل للأبد
يا راجل مش اللوجان اللى يتقال عليها كده .. اللوجان عربية بسيطة جدا و اى ميكانيكى بيفهم هيعرف يشتغل فيها بس انتا خليك مع التوكيل خلال فترة الضمان عشان تحمى حقك..
5- التكيف مش قوى أوى بمعنى أنو لا يقارن بتكييف الفيرنا وبيأثر على أداء السيارة بشكل ملحوظ
التكييف مستواه فى وجهة نظرى "مقبول" .. انا مجربتش تكييف الفيرنا .. لكن انا جربت تكييف التيوتا و بصراحة كان افضل من تكييف اللوجان .. لكن تكييف اللوجان زى ما بقولك "مقبول" .. يعنى مش تلاجة و مش مروحة
6- الفتيس بيعض أحيانا وساعات بيعمل حاجات غريبة مثلاً ( ينقل على وضع المور مع نفسو )
كان بيحصل معايا الكلام ده و رحت التوكيل و عملوهولى على طول فى يوميها و من ساعتها ماشية تمام الحمد لله
7- تسارع السيارة ضعيف لحد ما
فعلا .. ده حقيقى من وجهة نظرى .. لأن العربية 8 صباب بس و لو كانت نزلت 16 صباب زى اللى بتنزل اوروبا كانت بقت وهم .. بس ال8 صباب دول حلوين اوى فى استهلاك البنزين يا معلم.. استهلاك العربية قليل فعلا و هتريحك جامد.. بس الموتور بيفوق جامد بعد 5000 كم لكن برضه انا شايف ان سحبها مش عالى .. و دى وجهة نظر
8- سعر أعادة البيع مش كويس (( ودا أنا مش بفكر فية أوى لأنى فعلا مش جايب عربية عشان أبيعها الا لو لقدر الله حصل أى شىء أضطرنى لبيعها ))
يا جماعة أنا والله ماجبت حاجة من عندى دى خلاصة قراية وتدوير على النت لما طلع عينى
بس أنا حبيت أعمل الموضوع دا فى قسم الرينو لأنى فعلا محتاج أراء الناس ال جابت العربية وأتعاملت معاها أنتو عارفين الواحد مش هايجيب عربية كل يوم
المفضلات