الموضوع: كيف تصبح مديرا مفتريا !!! نصايحكم !!!

ابدا الحاجات اللي كنت بتعمليها قبل ماتترقي حتلاقيهم بيعملوها معاكي لما اترقيتي ههههههههههه كله سلف ودين
مبروك اول سلمة في المفرمة الادارية

أول حاجة تبصي ليهم من تحت لفوق، ولما تدخلى لازم يقفوا، وشوفي مين اللي هايجيبلك الخضار ومين اللي هايقشر البطاطس، وشوفي واحد صغير شوية عشان يجيبلك الأولاد من المدرسة، وفي الآخر اخصمي من كل واحد يومين كل شهر. والله الموفق

الف مبروك على الترقية وان شاء الله تببقى صاحبة الشركة كمان

المشاركة الأصلية كتبت بواسطة fepsceasar

احسن حاجة ماحدش يحس بيكي، بدل ما تثييرى حفيظة اللى تحتك واللى فوقك
وتذكرى القاعدة الذهبية اى حد ممكن يضايقك حتى لو عامل البوفيه ويجيبلك القهوة رخامة من غير وش
واحيانا الادارة الوسطى ده بيبقى منصب هلامى بحيث الصغيرين يبلطجوا عليكي والكبار يستفيدوا بنجاحك والله اعلم من خبرة قصيرة ويا ريت تكلمينا عن خبرة حضرتك
كمان نصيحة أخيرة اوعى تحسسى اللى بتدريهم ان انتى مديرتهم بل زمايل فى فريق وكل واحد بيؤدى مهمة

المشاركة الأصلية كتبت بواسطة fepsceasar

يا سلام بقى لو الاصغر منك عرفوا نقط ضعفك اللى بتضايقك وانتى طبعا مش كل شوية هتطلعى للاكبر منك علشان ما تديش انطباع انك مش مسيطرة، ساعتها هتحسي بجحيم
ما تفرحيس قوى ولا تكتابيش قوى الا لما الامور تظهر

الله يطمن بالك :) والله كلامك أغلبه صحيح وبيحصل ...

أنا مهندسة ولما اتسكن إن شاء الله هيكون معايا 3 فنيين والشغل أغلبه متابعة لباقى الفروع وإعداد تقارير

المشاركة الأصلية كتبت بواسطة Ghosts

أمسكى العصاية من النص ....
يعنى لا تبقى حازمة و مفترية جدآ ولا متساهلة جدآ ....
اللى يغلط علمية وأدى لة فرصة قبل ما تكتبى فية تقرير لرئيسك المباشر ....
حاولى أنك تساعدى كل الناس ولا تعثرى أحد عشان ربنا يبارك حياتك ....
ومتخليش المنصب يخليكى متعالية فى تعاملك مع الأخرين ....
هتلاقى حب الناس هو اللى وصلك لمنصب أعلى ....
ربنا يوفقك ....

لازم أكون متساهلة لأن المدير الأعلى مسيطر وغالبا مش هيسمح بسلطة أخرى بسهولة ولو أقل منه :) مشكلة الزعيم الأوحد

الف مبروك طبعا

راعى ربنا فى اى قرار بتخديه وفى معامله الموظفين اللى تحتك

عشان ربنا يرضى عنك

المشاركة الأصلية كتبت بواسطة Axel

الف مبروك الترقية بس محدش شاف جاتوه و لا حاجة ساقعة هههههه
انا مش عارف في اي مجال لكن دول نصايح عامة من مجرب و يعتبر برده اصغر مدير نظرا لأني لسه طالب بكلية حقوق هههههه

1- المهم بما انك قولتي انك اترقيتي و انك اصغر مديرة و ده يعني ان اكيد في ناس اقدم منك فهقولك خلي بالك كويس جداا من اللي حواليك لأن البعض مستعد يعمل اي حاجة للانتقام او للازحتك عن الطريق ليتولي المنصب

2-الالتزام تكوني اول شخص يجي و اخر شخص يمشي ( امشي عدل يحتار عدوك فيك ) و بالتالي لما تكوني اول شخص يجي و اخر شخص يمشي كله هيجي في ميعاده بالثانية و محدش هيقدر يمشي قبل ميعاده
لأن مينفعش تطلبي منهم يجوا بدري و انتي بتيجي متأخر فلازم تكوني قدوة ليهم بما انك المديرة
و يا سلام لو طلبتي من الادارة العليا ان يكون فيه دفتر بالبصمة و ده جهاز بيتتسجل فيه بصمة كل شخص و لما يحضر بيروح يدوس ع الجهاز بصباعه فالكومبيوتر يسجل هو جيه بالظبط الساعة كام بالثانية و طبعا التأخير كل يوم بيتجمع ع بعضه لحد اخر الشهر بيترتب عليه خصومات ع حسب عدد الساعات يعني يوم - نص يوم و هكذا

3- الصبر و ضبط النفس هيكون مفيد جدااا سواء لمواجهة الاشخاص اللي قولنا عليهم في اول نقطة او في انجاز العمل

4- اسمعي اكتر ما تتكلمي لأن اللي بيتكلم لو ناقشتيه سواء موافقة ع الكلام او غيرر موافقة هيتوجه ليكي النقد و ناس ممكن تكون معاكي او ضدك

5- قبل اتخاذ اي قرار فكري فيه كويس من كل الجوانب و شوفي النتائج المترتبة عليه من ايجابيات و سلبيات و ما قد يترتب عليهم كمان

6- متخليش اي شخص يحاول يستفزك و متخليش حد يأثر ع قرارتك

7 - خليكي حازمة لكن مش عنيفة

8- الانسان مش معصوم من الخطأ عشان كده حاولي تسامحي الموظف اذا اخطأ لكن الاخطاء البسيطة اللي لا تؤدي لضرر كبيير بالنسبة للمجال و اللي يخطئ تحذريه مش عالطول الانذارات و الخصومات تنزل فوق دماغه

9- لازم تخلي بالك من كل كبيرة و صغيرة متفوتيش حاجة لازم تدققي متمشيش ورا كلام اللي يقولك كبري و مش كبري لأن في الأول و الاخر انتي اللي هتبقي في وش المدفع
و متخديش الامور من شكلها الخارجي بل ابحثي وراها و خلي عندك زي ما بيقولوا نظرة ثاقبة

10- خليكي نشيطة في العمل دايما بلاش كسل و من وقت للتاني تطلعي تمري بصورة غير مباشرة ع المكان كأنك رايحة اي حتة في المكان مش تطلعي كأنك بتفتشي عليهم و هنا لما ميكونوش متوقعين هتيجي امتي هيبقي فيه حذر و لشغل يبقي بذمة
او تبصي عليهم من ورا الستارة من غير ما يشوفوكي و تشوفي مين اللي بيشتغل صح و مين اللي نايم

11- في مواقف ساعات بتحصل متحطيهاش في دماغك يعني زي ما بنقول عديها بمزاجك لكن مش كله يعني الحاجات البسيطة

12- لازم تكوني ع اطلاع دائم بكل جديد و تقري كتيير يعني المعرفة اهم حاجة نظرا لمنصبك

13- لازم تكوني فاهمة كل الموجودين و طريقة تفكيرهم لأن ده مهم في التكليفات لأنك بتدي كل شخص المهمة اللي يقدر ينفذها
بالاضافة زي ما الشيخ خالد قالك لازم تكوني اخصائية اجتماعية برده لأن ده هيكون ليه تأثير كويس ع الموظفيين لكن محدش يتعدي حدوده فالشغل شغل برده

14- طبعا الاجتماعات تكون دائمة و متابعة الشغل و اي مشاكل و زي مقولت تسمعي اكتر ما تتكلمي و تشوفي اقتراحاتهم و تكتبيها لكن مجرد اقتراح مش امر واجب التنفيذ منهم يعني و الموضوع يتدرس و اللي في المصلحة العامة هو اللي هيتنفذ

15- التقارير شئ اساسي لازم يكون فيه تقرير يومي عن جميع العاملين
بتقدم يوميا او اسبوعيا لكن متعتمديش ع التقارير بنسبة 100 في المية لازم برده تكوني متابعة بنفسك و من المتابعة هتقدري تعرفي اذا كان التقرير صح و لا لأ

16- مكافاة او طلب مكافأة للشايف شغله ع اكمل وجه و ده بيحمس الاخرين انهم يشتغلوا عشان يقدروا ياخدوا المكافأة

17- اي قرار تاخديه لازم تكتبيه في اجندة خاصة بيكي تبقي في شنطتك باليوم و الساعة و بكده متنسيش حاجة و لو في اي ملاحظات ع القرار تكتبيها في الاجندة يعين اتلغي حصله تعديل كده يعني و متبينيهاش لأي حد في ساعات البعض هيحاول يشكك في نفسك لكن تردي بكل ثقة عشان ساعتا محدش هيفكر يعملها تاني و مطلعش الاجندة قصاد اي حد

18- اهم حاجة بقي العدل كلهم في الشغل سواسية حتي لو صديقتك او حتي اختك وسطهم التعامل يكون واحد في الشغل المخطئ يعاقب و اللي شايف شغله يتم مكافأته

و متنسيش ان خير الامور الوسط

دول حاجة كده بسيطة

اتمني مكونش نسيت حاجة

و بالتوفيق ان شاء الله

ينصر دينك يا أستاذ خليفة :) قصدى يا أكسل هههههههههههه

دول كلهم حاجة بسيطة .. دى ولا مذكرة أجدع محامى هههههه

جزاك الله كل خير

المشاركة الأصلية كتبت بواسطة phantom0xx0

أنا كنت رئيس قطاع اقليمي لمجموعه شركات من كام سنه ، و كان فيه 4 مديرين تحتية و حوالي 35 فرد في كل الادارات ، أنا كنت 30 سنة و معظم الناس كانو أكبر مني

فيه نصايح كتير بس أهم حاجات فرقت معاية من وقع خبرتي

لما أي شخص يكون عنده مشكلة حتي لو officeboy لازم تحطي نفسك مكانه علشان تفهميه ، متحاوليش تفهميه من مكانك أبداً

فيه حاجة اسمها situational leadership.... ده مهمة أوي أوي أوي

لازم تفهمي الشخص و تعرفي هو في أنهي مرحلة

بداية من

Directing
coaching
supporting
delegating

حسب ال-job أو situation ممكن يكون واحد عنده خبرة كويسة بس محتاج directing في شغلانه جديدة و ماينفعش تعملي directing لواحد فاهم كويس علشان دة هيجبله احباط .... ده حاجة هتيجي بالخبرة ، خلي بالك ، اداره الأفراد مش بس كتب ... انتي هتتعلمي فيهم



مش لازم لما تكوني عاوزة حاجة ، دايماً هم ألي يروحو لكي .... لازم انتي كمان تروحي لهم ........... بلاش حكاية أنا المدير

كل فترة اطلبي غداء للأدارة ..... ده حاجة كويسة ،،، و بتكون أحسن لما انتي إلي تدفعي من مالك الخاص ، بتفرق جداً

لو جالك email غلس و دة عادي م متحاولش تردي و انتي متضايقة ، خدي وقتك و بعد كدة ردي ،، و دايماً دايماً دايماً facts

أخر حاجة ،،، دايماً اسمعي أكتر م تتكلمي

شكرا على المعلومات والخبرات المفيدة والقيمة ... جزاك الله كل خير

أنا كدا بقى المفروض أقرا فى ادارة الموارد البشرية ؟؟

( أنا كنت بعمل دبلوم ادارة عامة ومشروعات حكومية لكنها بتركز على العمليات الرئيسية للادارة ( تخطيط - تنظيم - توجية - رقابة ) )

المشاركة الأصلية كتبت بواسطة waelfarid

ابدا الحاجات اللي كنت بتعمليها قبل ماتترقي حتلاقيهم بيعملوها معاكي لما اترقيتي ههههههههههه كله سلف ودين
مبروك اول سلمة في المفرمة الادارية

ههههههه والله أنا كنت مجتهدة فى شغلى :) بس لما كنت بحس بالظلم .. أوعى وشك .. عينك ما تشوف الا النور

والله يبارك فى حضرتك .. هى فعلا مفرمة .. ربنا ينجينا