الموضوع: فيلم عسل أسود وفيها حاجة حلوة !!!

و اسمحلي بدوري ارد ع مشاركتك نقطة نقطة

المشاركة الأصلية كتبت بواسطة Ghosts

أولآ مصر بلد غنية بس معظم اللى حكموها شوية حرامية ....
المشكلة مش فى ظروف البلد المشكلة فى اللى ماسكين البلد ....

فعلا مصر بلد غنية لكن مينفش تقارنها بدولة زي ما وضحت مركزها الاقتصادي عامل ازاي
و فعلا العيب في الناس مش في البلد نفسها ده اللي والله عامل احاول اوضحه
و المفروض الناس تتغير لأن لو الناس متغيرتش هنفضل زي ما احنا


ثانيآ مين اللى قال أن المصرى مش عايز يشتغل بجد ؟؟؟
المصرى اللى بيسافر برة بيتفوق جدآ فى شغلة لأنة بيلاقى التقدير المادى المناسب جدآ ....
لكن الموظف فى مصر مش لاقى مرتب محترم يكفية ....
وبيضطر يشتغل شغلتين وتلاتة عشان يقدر يلبى أبسط أحتياجاتة ....

ديه الحقيقة المرة اكيد مش كله بس كتيير كده
و هو بيسافر يشتغل بره بضمير مع ان برده مش كلهم
لكن لو كله فكر هنا يشتغل بجد هتفرق كتييير
و موضوع الشغلة و الاتنين ده مش هنا بس بل في دول من اغني دول العالم عشان يقدروا يعيشوا برده
و ع فكرة انا ابتديت الاحظ في اواخر 2010 ان موظفيين في مصالح حكومية ابتدوا يشتغلوا بهمة اكتر من الأول و بيبقوا عايزين يخلصوا الورق و الحاجة من غير وش كتيير
بس اتمني ان موضوع الدوخة ده يخلص و يبقي اكتر من شباك بيقوم بمهمة تجمع كل اللفة السودا ديه و باستخدام الكومبيوتر


ثالثآ مش كل البنات فى أوروبا بيمشوا فى السكة دى ....
التعميم غلط وصوابعك مش زى بعضها ....

زي ما كان كلامي واضح انا مقولتش كله انا قولت كتيير لكن معممتش
في منهم بيشتغل في اي وظيفة عادية زي مثلا مطعم او او او عشان يغطي المصاريف و في اغنياء العائلة اساسا و في اللي بياخدها من قصيره و مش بيكمل

رابعآ بالنسبة للتعليم أكيد هفضل التعليم اللى مستواة أحسن طبعآ ....
أنت فرحان أنك بتدفع 200 جنية عشان تتعلم ....
بس بصراحة بقى ... هل أنت راضى عن مستوى التعليم فى مصر ؟؟؟!!!
اكيد المستوي مش اوي لكن مش في الحضيض اوي برده
هو محتاج تعديلات مش اكتر

هل أستفدت حاجة من اللى أتعلمتة فى أبتدائى وأعدادى وثانوى ؟؟؟!!
ايوة يا ريس استفدت و استفدت كتيير من اول ابتدائي لحد الكلية
بس في فرق بين اللي بيحفظ عشان يدخل الامتحان و خلاص
و بين اللي بيفهم المنهج بيقول ايه و يتعلم منه
هديك مثل بسييييط جدا انا ذكرته عن الوحدة كان في 3 ابتدائي عندنا درس في التربية الدينية اللي محدش عنده استعداد يهتم بيها و هو اب كان بيعلم اولاده الــ3 ازاي يتوحده و مينقسموش ده بالنسبة الشرح للصغير
اللي يفهمها لما يكبر
اننا المفروض مننقسمش احزاب و لا مجموعات و فرق و نحارب بعض لأن لو اتحدنا عدونا مش هيقدر علينا انما لو فضلنا في انقسامات عدونا مش محتاج اساسا يجي ناحيتنا لأننا هنخلص ع نفسنا بنفسنا
اخدت بالك من الفكرة ؟؟
ده مثل بسيط جدااا غير بقي اعدادي و ثانوي و الكلية حتي عندي لو دخلت حقوق هتتعلم في الدراسة حاجات كتيير اول مرة تعرف عنها
و هتلاقي نفسك بتجمع و تستنج انظمة لو طبقتها فعلا و تطبيق صح هتخلي الحياة بمبي
بس اللي يبقي عايز يفهم بقي
مش اللي عايز ينجز عشان يلعب كورة و بلاستيشن و يقعد يلعب ع النت و لا يرغي ع الفاضي و المليان و في حاجات هايفة

دة معظم خريجى الجامعات المصرية حالهم ما يعلم بية الا ربنا ....
أنا مرة تعبت ورحت مستشفى بدران اللى فى شارع الثورة فى الدقى ....
كشف عليا دكتور حديث التخرج وشخص مرضى غلط ....
وأدانى أدوية غلط كانت هتموتنى ....
دكتور حمار زى دة ... أتعلم حاجة فى كلية الطب ؟؟؟!!!

ده العيب ع الشخص نفسه مينفعش تعمم ع ان اللي بيتعلموه ولا حاجة في الكلية و ده لأنهم مش كلية لأ عملي
و انا اتعاملت مع دكاترة لسه متخرجين بس شاطرين جداا و بيثقفوا نفسهم في مجالهم طول الوقت
مش زي مقولت دكاترة داخلين الكلية بالعافية او من بتوع يصم المقرر في ثانوي و جامعة عشان يعدي و خلاص دول اكيد هيبقوا فشلة في اي مجال علمي و بيحتاج للفهم

خامسآ بالنسبة لموضوع الأنتماء أزاى الأنسان ميحسش بأنتماء للبلد اللى أعتنت بية من أول ثانية فى حياتة ؟؟؟!!!
فى مصريين كتير بيحسوا بأنتماء طبعآ بس مش بشكل قوى ....
ودى نتيجة طبيعية جدآ لأنهم شافوا من البلد كتيييييييييييييير ....
أية رأى حضرتك فى الدكتور أحمد زويل ؟
لية مش عايز يعيش فى مصر بدل أمريكا ؟
لأنة مش عاجبة حاجات كتير أوى فى مصر ....
وأتعرض علية كتير البقاء فى مصر وهو رفض ....
و على فكرة أخر ورقة فى ملف أحمد زويل فى ملفة فى جامعة أسكندرية ....
هى ورقة تفيد أنة مفصول من الجامعة لأنة المفروض كان رايح أمريكا فى بعثة وراجع تانى ....
لكنة راح ومرجعش و مش عايز يرجع بشكل دائم ....
هتقول علية أنة واحد من المرتزقة اللى بيدوا أنتمائهم لليدفع لهم و يعيشهم أحسن ؟؟؟!!!

و في علماء كتيير طلعوا و رجعوا و رفضوا يسيبوا هنا عشان فلوس و فضلوا يفيدوا برده هنا
و اتكرموا هنا كتيير لو سالت اي حد بيتابع مجالات كتيير او متابع للعلم هيقولك
اه انا معاك ان مفيش تقدير علمي اللي احنا عايزينه و كتيير بيبقي جوة الدرج بس فيه ناس مش بتستسلم و لا تدور ع الطريق السهل
و اكيد طبعا انا مش عاجبني ان التقدير العلمي مش اوي و اتمني يكون افضل
و عايز اسألك سؤال تفضل ايه ؟
تكون عالم مشهور و لا عالم مغمور لكن تفيد برده ؟؟

سادسآ أعتقد أن أنت ماشى بالمبدأ اللى بيقول :
متقولش أديتنا أية مصر ....
قول هاندى أية لمصر ....
حب الوطن مش كلام وبس ....
لازم أحس أن الوطن اللى عايش فية بيعتنى بيا و بيوفر لى :
الأمن ....
الحرية ....
العدالة ....
الديموقراطية ....
الغذاء الجيد ....
تأمين صحى شامل ....
التعليم اللى أستفيد منة ....
الشوارع النظيفة المنظمة ....
فرص عمل جيدة و مرتبات مجزية ....
متنزهات ونوادى تساعد الولاد أنهم يخرجوا الطاقة اللى جواهم بدل اللعب فى الشارع ....
لما أحس أن الوطن قدم لى كل الحاجات دى ....
لازم هاحبة و هاحس بأنتماء قوى لة ....
ولو أنا غلطان يا جماعة قولوا لى ...

لا ماشي بيه بس مش المعني اللي تقصده
انا بقول ان مش معني ان مش باخد فلوس او او يبقي محبش بلدي
اكيد كلنا عايزين كل اللي قولته
لكن لو مش متوافرين نقول مش عايزين البلد و نكبر دماغنا ؟؟
اكيد لأ
بص يا جوستس انا هقولها للمرة المليون او يمكن للمرة 5 مليون هههههه

انا بتكلم عن الارض نفسها مين قالك اني مش قرفان من اللي بيحصل زيي زي غيري
لكن الفرق ان انا بحب البلد و عايز اغيرها للافضل مش اقعد اتحسر اللي احنا فيه