محتار ومحتاج مساعدة من أهل الخبرة ( بولو 99- فيليشا 99 - رينبو 2000)

**amur1010** · 12-07-2011 03:54 PM

السلام عليكم

أنا عمر من اسكندرية

يا جماعة أنا عايز أشترى عربية ومحتار بين ثلاث عربيات ( بولو 99 ، فليشيا 99 ، رينبو 2000 )

فلو ممكن اى حد يعرف معلومة من الحاجات اللى عايز اعرفها دى يا ريت يقولى وأكون شاكر جدا لية

1. السعر الحقيقى فى السوق لكل عربية علشان انا معروض عليا اسعار ومش عارف دى اسعار اعلى ولا مساوية للسوق ؟
مع العلم أن حالات العربيات الثلاثة واحدة ( ماتور كويس وفبريكة جوة بس وراشه برة والاساسيات كلها بحالة الفبريكة )

2. الافضل من ناحية اسعار قطع الغيار ومدى توافرها فى السوق ؟

3.سعة الماتور الاستوك اللى بينزل مع كل عربية ؟

4. الثبات على الطريق والاعتمادية ؟

5. مين فى العربيات دى لما افكر ابيعه يتباع بسرعة وميغلبنيش ؟

وشكرا لاى حد هيقول معلومة ولو حتى صغيرة

تنبيه بمخالفة القاعدة 6 أ
ممنوع الكتابة باللون الأحمر حيث أنه مخصص للمداخلات الإدارية.
الرجاء مراجعة قوانين المنتدى.
مشرف عام 2

**SYD** · 12-07-2011 05:39 PM

بولو 99
فيلشيا 99
رينبو 2000

حضرتك الترتيب دة ترتيب منطقي جدا

اولا الرينبو 2000 رينج اسعارها من 28 لحد 34 علي حسب الكماليات وعموما هي تركي وكماليتها فقيرة جدا يعني بالعافية لو لقيت تكييف وزجاج بالكهرباء
عربية حلوة اوي في الجري بس قطع غيارها نار الله الموقدة وفي اعادة البيع مش بياعة يعني عايزة واحد يغلط ويشتريها منك

ثانيا الفيلشيا 99 رينج اسعارها بردو زي الرينبو وايضا فقيرة في الكماليات وعفشتها مش حلوة (علي حسب ما بسمع عنها) وتقيلة في البيع لأن ال2000 مغطي عليها بوش الأوكتافيا والكماليات زي الباور والتكييف والزجاج وكدة وهي تفتقر الي هذه الكماليات
قطع الغيار في منها الماني وفي منها تشيكي وايطالي والأسعار متفاوتة وقطع الغيار الاستيراد قليلة حبتين تلاتة

ثالثا البولو 99 عربية تحفة بجميع المقاييس رينج الأسعار بردو زي الرينبو والفيلشيا
والكماليات كالتالي
اعلي فئة فيها تكييف وزجاج ومرايات وسنتر وريموت في المفتاح وايموبلايزر (مفتاح مشفر)
الموتور 1000 سي سي (قوي لدرجة تخليك تتخيل انه 1300)
موفرة جدا في البنزين
جري وثبات واعتمادية تفوق كل السيارات الي في نفس الفئة ال1000 سي سي
سعر اعادة بيع حلو اوي ولو نزلت بيها السوق ترجع بفلوس في خلال ساعتين
قطع الغيار الاستيراد كتير
قطع الغيار الجديدة موجودة في حتت كتير وباسعار متفاوتة من الماني (اكثر من فئة) وايطالي وانجليزي

انا برشحلك البولو بقوة لأنها كاستعمال السيرفيس بتاعها قليل وبيعيش كتير اوي
وفي اعادة البيع مش بتخسر لو هتبيع اصلا

الي مخلي العربية دي قليلة في السوق ان الي معاه واحدة نظيفة مش بيفكر يبيع

ربنا يوفقك
والله المستعان
،
،

**amur1010** · 13-07-2011 11:54 AM

بشكرك جداً يا م/محمد سيد على المشاركة فى الموضوع والافادة الأكثر من رائعة التى تقدمت بيها فى الرد

وأنا فعلا هعمل بالنصيحة وهتوكل على الله واجيب البولو 99 ولونى كنت طماع وعايز اجيب بولو 2000
شكلها أجمل شوية :)

اة بالمناسبة البولو 99 معروضة عليا بـ 32500 أعتقد المبلغ دة مناسب على كلام حضرتك ؟ صح ؟
هى فيها تكيف وباور وسنتر وجنوط اسبور

=========================================

وبشكر الأستاذ M.Alaa92 جدا على الرد وتأيد المهندس محمد

رجالة بجد