رجاء خاص من الاستاذ احمد منسق القسم الاهتمام بمشكلة الاخ صاحب الصنى المنحوسه

**needforspeed** · 16-07-2011 11:45 PM

رجاء خاص من الاستاذ احمد منسق القسم الاهتمام بمشكلة الاخ صاحب الصنى المنحوسه
ثقتنا فيك كبيرة يا استاذ احمد
وحرام اللى بيحصل فى الراجل من نيسان ايجيبت

**SonaSteel** · 17-07-2011 12:01 AM

المشاركة الأصلية كتبت بواسطة needforspeed

السلام عليكم ورحمة الله
اخى الفاضل ربنا يفرجها عليك وتتحل المشكلة لكن اتأكد ان انا عن نفسى هطلب من اى شخص اعرفه بيفكر يجيب نسان صنى يدخل يقراء مشكلتك علشان يعرف الشركة اللى هيشترى منها بتعمل ايه مع عملاءها
وللأسف حاجة تحزن انا كان عندى امل ان نيسان ايجيبت تكون دائما هى الافضل لخدمة العملاء لكن طلعت زيها زى غيرها نفس السياسة والاسلوب
كل اللى بطلبه منك انك تحاول متجيش على صحتك وتقول
أفوض أمرى الى الله إن الله بصيرا بالعباد
حسبنا الله ونعم الوكيل

السلام عليكم
اخي الكريم .... واخي ابو حميد صاحب الموضوع
انا عارف الكلام اللي هاقوله ده ممكن يزعل مني ناس ولو الموضوع ده حصل معايا _ الله اعلم كان ممكن اعمل ايه_
بس الحق يقال وديه امانة ومن حق الناس علينا
اي توكيل تاااني غير نيسان وكان الفتيس باايظ او بيرشح زيت كان ممكن يغير الفتيس من غير مشاكل ولا وقت كتير زي ما ابو حميد غيره
تخيل الموضوع ده لو في هيونداي ولا اوبترا (غبور ولا منصور( كان عملوا ايه والعربية برده في الضمان وهما حتي معترفين بالعيب
كانوا غيره بسهوله
بصراحة مشوفتش ولا هاشوف توكيل زي توكيل نيسان ... ربنا يديمه علينا نعمة
انا اتعاملت مع اغلب التوكيلات وليا اصدقائي معاهم هيونداي وابنرا و تويوتا ... وبيصينوا في التوكيل ومنهم اتعامل مع نيسان
مش عايز اقلك الكلام اللي بيقولوه علي التوكيل بتاع ننيسان
واللي منجح نيسان في مصر التوكيل وحرصه ديما انه يحسن من العربية
وحضرتك لو قريت الموضوع ده تاني بس بدل توكيل نيسان .. خليه غبور مثلا
شوف المدة الزمنية اللي ابو حميد هاياخدها علشان يكتب مشاركتين ورا بعض فيهم حاجة جديده حصلت
لا يمكن طبعا
وده دليل ان في حد متجاوب معاه ووفي حاجة بتحصل ... مش بيسمعوا الكلام من هنا وبيخرجوا من هنا.
ومعلش برده لما عربية واحده من 1000 عربية مثلا من اصل 100000 عربية تنتج سنويا ... ده برده ميعيبش توكيل بيحاول يغير الاجزاء المعيوبة ديه من غير حتي ادني مجهود من العميل انه يزعه ولا يناهد معاهم .... وده قصاد عيني
شوفت حاجات بتتغير من العربيات .. لو في توكيل تاني ... والله لو العميل وقف علي راسه محدش هايعبره
فرجاءا بس ... ان احنا منساويش كله ببعضه
ده حتي من حقه علينا .... واذا كان ده قدر ... يبقي ده ابتلاء من الله وقدر الله وماشاء فعل
غير كده .... انا مشوفتش منه حاجة وحشة
تقبلوا مروري ... واقعدوا بالعافية

**Bishoy.Girgis** · 17-07-2011 01:45 AM

حضرة صاحب الموضوع العزيز :

طبعا دي لافتة جميلة منك انك خوفك علي صاحب العربية FBIAHMED و علي اللي بيمر بيه من ظروف عربيته لكن ..

رغم انك بتطلب من احمد انه يساعد صاحب العربية و طبعا المعروف ان احمد بيساعد من غير ما حد يطلب منه حتي صاحب العربية ميعرفش ان احمد عمل اتصالاته و كمان التوكيل بيقوله التقارير اول بأول لكن بصراحة اللي انا شايفه انه غير مستفيد بأي حاجه رغم خدماته الغير عاديه للاعضاء داخل قسم نيسان و خارجه و انا لو مكانه مش هخدم لما الاقي مثلا حضرتك كاتب المشاركة ديه :

اقتباسالمشاركة الأصلية كتبت بواسطة needforspeedالسلام عليكم ورحمة الله
اخى الفاضل ربنا يفرجها عليك وتتحل المشكلة لكن اتأكد ان انا عن نفسى هطلب من اى شخص اعرفه بيفكر يجيب نسان صنى يدخل يقراء مشكلتك علشان يعرف الشركة اللى هيشترى منها بتعمل ايه مع عملاءها
وللأسف حاجة تحزن انا كان عندى امل ان نيسان ايجيبت تكون دائما هى الافضل لخدمة العملاء لكن طلعت زيها زى غيرها نفس السياسة والاسلوب
كل اللى بطلبه منك انك تحاول متجيش على صحتك وتقول
أفوض أمرى الى الله إن الله بصيرا بالعباد
حسبنا الله ونعم الوكيل
تفتكر لما احمد يتصل بالتوكيل عشان يطمئن و يوصي علي عربية العضو FBIAHMED و التوكيل نلاقيه يخش القسم بتاعنا و يلاقي المشاركة بتاعة حضرتك ديه .. يبقي تفتكر اننا ممكن بعد كده نوصي علي حد داخل التوكيل .. معتقدتش ان هيبقي لينا وش بعد كده

علي فكرة عايز اقول حاجه ان التوكيل عمره ما بيقصر مع عميل بتاتا و بالذات مع العضو FBIAHMED بدليل انه غير له الفتيس بعد اسبوع زي ما وعده و لما ظهر مشكلة الموتور رغم اني مش عارف لغاية دلوقتي هي مشكلة و لا لأ لأني انا مش بقتنع بكلام حد غير لما التوكيل يعطي لي تقرير عن المشكلة و حلها او عدم وجودها اصلا

لازم نثق في التوكيل و نصبر عليه شوية و منكونش متسرعين عشان ناخد شغلنا صح .

الحاجه الاخيرة اللي عايز اقولها لحضرتك ان معني دخولك في القسم يبقي انت طيبعي بتفكر في شراء النيسان صني خصوصا انك مش كاتب موديل عربية في بياناتك قدامنا .. فلو بتفكر يبقي مش معني ان في مشكلة فردية في القسم يبقي نعممها.

تقبل مروري الكريم

**needforspeed** · 19-07-2011 04:23 PM

السلام عليكم ورحمة الله وبركاته
فى البداية احب ان اشكر الاخوة الكرام اللى قاموا بوضع رد على مشاركتى
وواضح ان حضراتكم شايفين ان طالما نيسان غيرت الفتيس للارجل يبقى هيا كده شركة عداها العيب وفيه فرق بينها وبين الشركات التانية ودية الامنية اللى بنتمناها واللى نيسان ايجيبت مشكورة حققتها
وان انا لما ادخل واقول مشاركتى اللى ممكن بتوع نيسان يقروها ويزعلوا من الموقع تبقى دية مشكلة وانى بزود المشاكل
وان استاذ احمد اللى وجهت ليه المشاركة دية بيتصرف من غير ما حد يطلب منه رغم ان مشاركتى اساسها اعترافى بأهميته ومساعدته للناس

والاخ الفاضل goudamahdy
هاحاول المره الجاية انى لو عندى كلمة حلوة أو مفيدة اقولها زى ما حضرتك بتطلب لانى للاسف مكنتش اعرف انى كلامى وحش للدرجة دية او ملوش فايدة

واضح انى اتكلمت غلط واتصرفت غلط
وكل اللى اقدر اقوله
لحضراتكم جزاكم الله خيرا على ظنكم بى
وأعتذر مره أخرى لتوكيل نيسان ايجيبت ولكل الاخوة الكرام فى منتدى نسيان وجزاكم الله خيرا
وحسبى الله ونعم الوكيل

----------
الكتابة باللون الاحمر مخالف لقواعد المنتدى .. لانه مخصص للمداخلات الادارية
يرجى مراجعة قوانين وقاعد المنتدى

مشرف القسم 15ب

**EhabVet** · 19-07-2011 05:51 PM

يا عم انت واخد الموضوع بحساسية جامدة ليه كده
انت عشان عضو جديد زي حلاتي متعرفش الناس هنا روحهم حلوة أد إيه
الناس هنا كلهم اخوة بيحبوا بعض وبيحبوا أي عضو جديد وبيحاولوا يساعدوه بكل إمكانياتهم
بدليل المشكلة اللي حصلت لأخونا صاحب الصني شوف عدد الردود والمشاهدات وصل لكام
دا كل عضو بيدخل كل يوم على موضوع الصني المنحوسة أربع خمس مرات عشان يطمن في جديد ولا لأ .. كأنها عربيتهم
وهتشوف لما المشكلة هتتحل بإذن الله هيفرحوا ازاي وهيباركوله ازاي
ومفيش حد فيهم قصده يزعلك .. وبردو انت تشكر لحرصك على مساعدة أخوك
بس بردو مشاركتك عن نيسان ايجيبت كانت شديدة شوية .. مع إن الموضوع محتاج لشوية صبر عشان نقدر نحكم .. وبإذن الله هتتحل على خير
فياريت توسع صدرك شويه .. وتتعرف أكتر على أعضاء المنتدى .. وبإذن الله هتلاقيهم أخوة ليك وبيحبوك ويتمنوا يخدموك بدون مقابل

**Ahmed.TV** · 20-07-2011 02:01 AM

ياراجل رايح فين بس .. حتسبنا ورايح فين .. بقا ده كلام

احنا عارفين انك شاركت من باب المساعدة والخوف على العضو صاحب المشكلة .. وجزاك الله خيرا على روحك الجميلة دى

ولكن ...

دلوقتى انت زعلان مننا .. وواضح انك داخل القسم عشان بتفكر تجيب الصنى .. وعايز تكون صقر من صقور نيسان .. وطبعا بنرحب بيك

ولينا الشرف وجودك معانا .. بس لازم تعرفنا وتكون عارف مبادئ القسم عندنا والروح اللى ماشين بيها .. طالما ناويت تشارك وتكون مستمر معانا .. فقبل ما تزعل .. يبقا لازم تعرفنا

الاعضاء اللى ردوا عليك .. سواء القدامى .. اللى قلبهم على القسم وعلى اعضائه .. او الاعضاء الجدد اللى بيكملوا معانا المشوار .. وسعداء بروحهم معانا جدا .. وهما مكسب لينا فى الحياة عموما .. هما مش قصدهم يهاجموك او يزعلوك بالعكس هما حابين يوضحوا لك الصورة بكل حيادية من غير تحيز لتوكيل بالعكس احنا قلبنا ع الاعضاء لانه ممكن اي واحد فينا يتعرض لنفس الموقف

ودلوقتى احنا بنحاول نشوف الاول نيسان حتعمل ايه .. حتتصرف ازاى .. حيحلوا المشكلة ولالا ..

سهل ان صاحب الموضوع يتبع مليون اجراء لاثبات حقه اللى مثبوت اصلا .. بس احنا بنقول نشوف حيعلموا ايه

وبعدين الناس اللى بتدخل ومش عايشة مع نيسان زينا .. وبيتعاملوا مع توكيلات اخرى تبعهم .. او اعضاء لسه عاوزين يجيبوا العربية وخايفين من التوكيل وبيقولوا لصاحب الموضوع اعمل وسوى .. مش عملاء زينا مع نيسان .. ومش بيروحوا يعملوا صيانات زينا ومش بيواجهوا مشاكل زينا .. واحنا بناء على ا لمشاكل اللى بنواجها وبتتحل .. بننقل الصورة
وعمر ما مشكلة فردية او مشكلتين حتاثر ع سمعة توكيل والا كان توكيل المرسيدس والبي ام قفلوا من زماااان

وبعدين ولا عضو عندنا بياخد حاجة من نيسان .. حتى انا اللى بخدم اعضاء كتير فى القسم وبعمل مصالح لنيسان كتير .. مش باخد حاجة والله من حد ابداااااااا ولا حتى ميدالية هدية او حاجة على عمل بعمله وخدمة لنيسان .. او للاعضاء .. فمش عندنا موضوع التحيز ده ابدااااا

وكل الاعضاء عندنا والحمد لله اللى بايده بيساعد بيساعد لوجه الله .. والناس مش بتصدق اللى بنعمله كلنا هنا فى القسم .. لانه نادر تلاقيه فى اى مكان ومع اى اعضاء حلوين ومحترمين وجدعان زى الناس اللى عندنا

مش معنى ان الناس بتناقشك ويتوضحلك القصة .. يبقا كلنا زعلانين من مشاركاتك ومش عايزينك معانا

ودى مشاركتى فى موضوع العضو ارجوا قرائتها حرف حرف وسطر سطر

المشاركة الأصلية كتبت بواسطة ahmed.tv

والله انا لو بايدى حاجة حعملها وحساعد من نفسى .. ومش محتاج لحد يقولى .. وانتو عارفين الكلام ده كويس

وبعدين مقدرش ولا من سلطتى ان اقولهم غيروا الماتور لفلان .. حتى لو الماتور عاوز يتغير فعلا

وانا بتحرك بالعقل فى الموضوع .. عشان اتاكد من تحركاتهم .. عشان اعرف هل فى تقصير ولالا فى الموضوع .. عشان اقول لصاحب الموضوع يقدم شكوى لو المشكلة متحلتش وحصل تقصير منهم

وبعدين انا سالت فى مركز صيانة اخر .. غير السبع .. على موضوع جوان وش السلندر .. مهندس قالى مين قالك انه حيتفك كل الكلام ده
قولتله فى الكتالوج .. فقالى سيبك من الشرح المكتوب ده .. قالى سهل فكه ومش بيتفك كل الكلام ده كله .. وبيتغير عادى

فقولتله مش كدا فى قلق على الماتور ومفروض يتغير .. قالى فك الاجزاء اللى عشان يتغير منها الجوان .. بعيدة عن البساتم والشنابر وعمود الكرنك .. ودول اهم نقطة .. ولو اتفكوا مشكلة .. ودول طبعا مش حيتفكوا .. ولو فيهم حاجة او العربية بتدخن وفيه مشكلة كبيرة .. يبقا هنا بيتغير الماتور

لان عشان تغير الماتور لازم يكون فى مشاكل فى نصه بالكامل يعنى اكنك بتعمل نص عمرة .. ودى مصيبة ولازم يتغير الماتور .. وانت بتقول انه جوان وش سلندر وده امره سهل

بس المهم اللى يشتغل فى العربية يكون صنايعى شاطر .. ويقفل كل حاجة تمام .. والعميل يثبت ان كل حاجة اتعملت فى الضمان .. عشان لقدر الله لو حصل حاجة بعد كدا

وقالى اطمن

وبعدين لغاية دلوقتى انا مش شايف ان التوكيل قصر مع حد بصراحة .. ويعتبر افضل التوكيلات فى مصر وبشهادة الناس .. مش شهادتى

بس الحاجة بتاخد وقت لان نيسان مالهاش توكيل واحد بتعها زى مثلا هيونداى او كيا .. نيسان ليها مراكز خدمة
واى مركز خدمة لازم يبلغ المصنع .. والمصنع يجى يشوف ويفحص الشكاوى الكبيرة

وقبل كدا فى الفتيس .. اتغير فى خلال اسبوع .. يعنى ده حاجة كويسة جدا

معلش حظك جه كدا .. ومتعرفش الخير فين .. ده انت وارد لو جبت عربية مرسيدس يطلع فيها نفس العيب
وبيحصل فى اتخن توكيلات العالم مش فى نيسان بس

وعمر مشكلة فردية حتقصر فى مبيعات اى عربية .. ما العربيات الكورى فيهم بلاوى .. اغلب الشكاوى فى حماية المستهلك من العربيات الكورى .. ومع ذلك مبيعات العربيات الكورى فى السماءءءءءءءء

صدقونى فى مشاكل كتير محتاجة لعقل فى التصرفات وهدوء فى التعامل معها .. وبردوا محتاجة صبر مش زن .. وهدوء لان كتر كلامنا وتعاطفنا ممكن يقلب بصورة عكسية ويسخن الدنيا

ودلوقتى كلنا داخلين نسخن فى الراجل واعمل وسوى .. هو احنا شوفنا هما عمله ايه لسه .. ولا ايه القرار اللى حصل ..

خالينا نشوف فى الاخر هما حيعملوا ايه ولو ماصلحوش المشكلة خلاص نشوف الف مليون تصرف .. عشان نثبت حقنا

ولا انا غلطان !!!!!

فعليك بالتقرب الى الله كثيرا .. واكثر من الدعاء .. وان شاء الله خير والله

تحياتى

ده كان ردى فى موضوع صاحب المشكلة .. وكمان فى السبع بلغوه قبل كدا ان فى حد من المصنع حيجى ويفحص ويشوف الوضع ايه

واعطوله معاد على الاربعاء

والله المستعان

واهلا بيك معانا .. ولو سبتنا حنروح وراك ..هههههههههه

اهلا بيك معانا