الموضوع: تجربتي في شراء وتركيب طقم مساعدين لسيارتي

السلام عليكم ورحمة الله وبركاته
في البداية بدأت احس ان العفشة قدام فيها تخبيط جامد والمساعدين ناشفين جدا يعني لو ضغط على المساعد الامامي مش بيهبط خالص.
الحمد لله ربنا اكرمنا بعفشجي اقل ما يقال عنه انه راجل عنده ضميييييير وبيفهم
العفشجي اسمه مدحت وموجود في منيل شيحة على الطريق.
راح اخويا وكشفله على العربية قال له المساعدين اللي قدام بايظين تماما وقافشي ومحتاجين يتغيروا ونصحنا نجيب المونرو. طبعا هنا في نايل موتورز الكل بينصح بالمونرو وانا كدة كدة كنت ناوي اجيبه

راح اخويا لهشام لهيطة (موزع معتمد لمونرو) المحل اللي في التوفيقية في شارع زكي
في البداية قالوا لاخويا المساعدين الامامي 750 والخلفي 650 وعليهم ضمان سنة
اخويا حاول ينزل معاهم في السعر ما رضيوش
بعد كدة اخويا وافق
دخل جابله المساعدين في كراتين مفتحة (مش مشكلة). المصيبة انه مارضيش يديله عليهم الضمان
اخويا اتصل بيا. قولتله رجعهم له على طول. الناس دول شكلهم غير امناء
وبالفعل رجعهم واخد الفلوس
المصيبة اللي عرفناها بعد كدة كمان انه كان جايبله مساعدين غلط بارقام خاطئة ومش بتاعة العربية (مصيييييييبة)

رحتله انا على التوفيقية اخدته وطلعنا على شارع دمشق محل اسمه طوكيو (موزع معتمد لمونرو)
محل محترم جدا ورجل اكثر من محترم.
طلبنا منه المساعدين راح مطلع ملزمة ورق كدة عليها اللوجو بتاع مونرو وفيها كل انواع السيارات بارقام واسعار المساعدين وقال لينا ان ديه اللستة اللي بتجيله من الشركة.
طلع فعلا رقم المساعدين وقال لينا على السعر اللي موجود في اللستة اللي هو 750 امامي و 600 خلفي يعني الخلفي ارخص من هشام لهيطة 50 جنيه كمان

رحنا لمدحت العفشجي الساعة 8 بالليل وبدأو الشغل في العربية. عنده واد صنايعي ما شاء الله اسمه فضل هو اللي اشتغلنا في العربية. وهو بيفك لاحظ ان بارات الدركسيون مبوشة شوية راح فاككها وقال لنا هكبسها بالمرة. انا فعلا كنت بحس لما امشي في طريق مكسر شوية على السلانسيه بحس ان في حاجة زي ما تكون بتلق في العفشة.

فك المساعدين القديمة وركب الجديدة وفك بارات الدركسيون وكبسهم وركبهم تاني (مقرفين جدا في شغلهم ومزنوقين). فضل شغال في العربية لغاية الساعة 11 بالليل يعني 3 ساعات. وطلعت جربت العربية ما شاء الله المساعدين ممتازين جدا واللقة اللي في العفشة اختفت تماما
طبعا الساعة بقت 11 وبتوع الزوايا قفلو وانا كنت مسافر الصبح راح مظبطلي زوايا بالنظر وبالفعل العربية كانت ماشي معايا مسطرة وانا مسافر

المفاجأة الاولى
اخد مصنعية فقط 50 جنيه عدا ونقدا على كل الشغل (مساعدين وبارات دركسيون وظبط زوايا)

المفاجأة الثانية
وانا بحكي لطناني باشا طلع قريبه من بعيد وعارف اصله وفصله وكل عيلته واسماءهم وشغلتهم. انا ما كنتش مصدق نفسي صراحة

بالنسبة للمساعدين الخلفي هما عندي كويسين الحمد لله ومش محتاجين يتغيروا. فا انا هحتفظ بالجداد لغاية ما يبوظو الموجودين واغيرهم ان شاء الله. المشكلة فقط في موضوع الضمان انه بدأ من يوم 15 يوليو. بس مش مشكلة في مقابل اني ضامن ان المساعدين اللي معايا مش مضروبين

دي صورة الضمان