اولا تسمحلى اوجهلك الشكر على الفكرة و على المجهود العظيم المبذول فى الموضوع
بالفعل كلية الحقوق كلية مهمة جدا
و ليا زمايل كتير درسو حقوق بعد نهاية دراستهم
انا طبعا كنت عايز اتكلم عن كلية الصيدلة لكن الدنيا اتغيرت عن ايامنا
ممكن اللى لسة فى الكلية او حديث التخرج يفيد اكتر
لكن كنظرة عامة
الكلية من ضمن الكليات العملية داخل ما يعرف بالقطاع الطبى مع طب بشرى واسنان و علاج طبيعى
لكن كلية الصيدلة بتتميز انها اكثرهم عملية
تلاقى طالب صيدلة عنده اطول سكاشن
الاكثر تعامل مع المعامل
فمعامل الكيمياء بانوعها والعقاقير والصيدلانيات بتستهلك الكثير من عمر الدراسة بالكلية
هذا بالاضافة الى مع ما يشترك فيه مع الكليات الاخرى من دراسة الفارماكولجى و الميكروبيولوجى و الكيمياء الحيوية
طبعا هى مش دراسة بتعتمد على الكتب العملاقة و نظام تحفظ نصا كأنك بتدرس كتب مقدسة (holly books)
لكن الدراسة قد تحتوى قدر لا بأس به مما يحتاج الى حفظ مثل الكيمياء الصيدلانية
بالنسبة للدراسة فهى للامانة ممتعة بس متعبة
ممتعة لانك بتتعرف على مجالات متنوعة
فمن علم العقاقير التى تدرس فيه النباتات الطبية و استخداماتها و ما تحتويه من مواد فعالة وكيف تتعرف عليها
لعلم الصيدلانيات التى تختص بكيفية تحضير الاشكال المختلفة للدواء من اقراص لاشربة لكبسولات لكريمات
لعلوم الكيمياء المختلفة
من كيمياء عضوية
لكيمياء تحليلية
لكيمياء النباتات الطبية
لكيمياء المركبات الصيدلانية
للكيمياء الحيوية وده علم مشترك مع كثير من الكليات الطبية
بالضافة لعلمى الفارماكولجى اللى بيهتم بطريقة تأثير الادوية على الجسم وطريقة عمل المواد الفعالة واقسامها
و الميكروبيولوجى اللى بيهتم بدراسة البكتريا و ان كانو بيزودولنا عليه الفطريات وا لفيروسات فوق البيعة
طبعا فيه علم ظريف اسمه صحة عامة ده بقى مجمع ايشى طفيليات على حشرات على بكتريا على علم امراض
بعد احنا مسيبنا الكلية ظهرت الصيدلة السريرية clinical
طبعا احنا ايامينا كانو بيدونا قشور عن الموضوع ده
لكن الموضوع تطور دلوقتى وبقى فيه شهادة اسمها pharma D فى المجال ده
بالنسبة ليا انا اكتر حاجة كنت بحبها علم العقاقير على الرغم ان كان ليا زمايل كتير مبيطقوهوش
ده كنظرة عامة
اما عمليا فاعتقد ان اللى بيدخل صيدلة من القلائل اللى بيبقى عنده فرصة انه يتدرب على الشغل وهو لسة بيدرس
كما انه عند تخرجه بيبقى عنده فرص عمل اكتر من غيره
فيه عمل فى الصيدليات و شركات الادوية بشقيها كمصانع و كدعاية بالضافة انه ممكن يعمل فى معامل تحليل
او يسافر بره وان كان الوضع مبقاش زى الاول
او ممكن يعمل فى سلك الجامعة والبحوث زى العبدلله
يا رب اكون قدرت اقدم حاجة مفيدة
لكن لوعايز معلومات اضافية انا تحت امرك
تقبل تحياتى
المفضلات