الموضوع: فرش الصنى فى جينز كار

المشاركة الأصلية كتبت بواسطة ahmed.tv

مفيش مشكلة يا محمد .. انا فاهم كلامك .. بس اللى انت بتقوله ده كسوة يا محمد .. مش فرش تفصيل وخامات جودتها محترمة ولما تقعد عليه تحس براحة ومفيش اى تعب ابدا .. ولما بيتحط على كراسى الصنى حتحس بفرق كبيررررر جدا فى الراحة والسواقة .. واسال الناس اللى عملت عنده بغض النظر عن سعره .. واقعد فى عربيتهم وسوق لمسافات طويلة حتحس بفرق كبير فى الراحة

انا شايف من وجهة نظرك انك كدا كدا مش مقتنع حتى بعمل فرش ب1000 جنيه حتى لو عند واحد ارخص .. وانك مش حابب تدفع المبلغ ده فى حاجة زى كدا .. فده موضوع تانى وقصة تانية .. لكن بصراحة ما نقللش من شغل الراجل .. لان تفصيله عالى ومحترم وجودته عالية .. وفعلا الكرسى اللى بيعمله والتبطين اللى فيه وبيحطوا فى الفرش .. تيجى تقعد عليه بيفرق جامد من حيث الراحة كمان

بس يا سيدى ..وبعدين انوى انت بس وانا اكلم الحاج احمد صاحب محلات جينز كار واخليه يركبلك الفرش ب5000 جنيه عشان خاطر عيونك ههههههههههههه

مش حسنوا المرتبات فى شهر يوليو .. قابل بقااااااااااااااااا ياعم

بص يا احمد انا لا اقلل من شغل الراجل و لا حاجه
وطبعا انا فاهم الفرق بين الكسوه ام 80 جنيه والفرش
قبل كل شئ انا معرقش حااج احمد صاحب محلات جينز كار ولا يوجد بيني و بينه اي مشاكل نفسيه و لا اعرف اسم المحل ده الا عن طريق المنتدي و بسؤال ناس اصحابي لاقيت اسامي نضيفه مشكور فيها كتير بتتكرر بعيدا عن الحاج احمد وهما دول مصدر اسعاري انا مش بقارنه بالتوفيقيه يعني
انا بعلق علي موضوع مش اكتر
الراجل شغله زي الفل بس مش بالاسعار دي لانه غيره بيعمل زيه باسعار اقل ونبقي نزود شويه السفنج اللي بيحطهم مش مشكله علشان الصني كراسيها وحشه
نيجي للمبدأ نفسه
في مشكله في اي مهندس انه دايما بيطبق قاعده في الشغل انا هاستفيد قد ايه من اللي انا بدفعه - لان ده أ ب هندسه - وغصب عنه بتنتقل لحياته الشخصيه
علشان كده في قاعد كبيره من اللي راكبين صني مهندسين وده واضح في المنتدي والباقي ناس بتطبق الكلام بطريقه او باخري
يعني انا عايز اشتري حله ومش عايزها تبوظ ابدا قدامي حلين اشتريها دهب او اشتريها استانلس
هل تقدر تقول علي اللي شاريها استنلس انه استرخص و اللي شاريها دهب شاب لارج او خد بقيمه اللي دفعه حاجه زياده عن اللي اشتراها استانلس
الاجابه لا - بفرض انهم للاستخدام فقط مش هيتباعو ( زي الفرش ) -
بالنسبه لي انت عارف يا احمد كويس ان ال 1000 جنيه دي انا بصرفها في طلعه ويك اند بس مش هحطها في فرش
و الا ابقي اشتريت الحله الدهب
ولكني اؤكد ان اي حد اشتري حله دهب قصدي فرش غالي تنين ربنا يباركله وانه لم يفقد فلوسه بالتاكيد خد بقيمتها حاجه بس مدفونه شويه
و طالما مبسوط ميهمكش من اي حاجه دول شويه ورق في الاخر
يا احمد مشفناش حاجه غير العلاوه السنويه في شهر 7 الظاهر ضحكو علينا زي ما قالو في شهر 4 في زياده برده!!!!!!!!!
دي وجهه نظري الشخصيه وعلي راي المثل "الاختلاف في الراي لا يفسد للود قضيه"
انا مش عايز حد يتنشن . اوك -الجمله دي مش ليك يا احمد دي لفئه بدات تسرح في المنتدي مؤخرا فاهمني طبعا -

المشاركة الأصلية كتبت بواسطة ahmed_rahem

السلام عليكم

أحب اشرح تاريخ خبرتى مع الفرش:
العربية الاولى : افيو 2006 الفرش الاصلى قماش وبسبب ان أنا معايا اطفال فالفرش القماش مش هيعمر وعملت فرش جلد صناعى وارضية واتكلفت 750 جنية، الخامات عادية (جزء شقق حالياً) والخياطة عادية وكنت مخيط فيها علامة شيفورلية.
العربية التانية : دودج افنجر (فى الامارات) الفرش الاصلى جلد ودة سبتة زى مهو ولحد مبعتها بعد 3 سنين فضل محافظ على مظهرة.
العربية الثالثة : نيسان صنى الفرش الاصلى كويس بس لوجود اطفال معايا الفرش دة مش هيستحمل وهيتوسخ بسرعة وعلشان كدة ركبت فرش علية، جينز كار الخامات ممتازة والمعاملة كذلك

عموماً السعر دة مسألة نسبية الغالى لواحد ممكن ميكونش غالى بالنسبة لواحد تانى. واحد زميلى فى الشغل ومن احد ملاك الصنى والمدافعين عنها جامد جداً لما شاف الفرش تمنة على 2000 جنية على الاقل وفية ناس تانية افتكرتة الفرش الاصلى مش تركيب.

انا عرضت موضوعى لفايدة الاعضاء واتمنى لو فية حد تانى ركب فرش فى مكان تانى سواء ارخص او اغلى بردة يفدنا بموضع عنها والفايدة تعم الجميع والى عايز يركب فرش جديد يقدر يقارن الوضع (خامات، معاملة، شكل، سعر) فى اكتر من مكان.

والسلام ختام

استاذ احمد انا مش هكلم تاني لاني حسيت بالذنب لاني حسستك بالذنب
انت طبعا تشكر علي عرض موضوعك
بس بطبيعه الحال تبادل التجارب و الخبرات هيحصل هيحصل
ولو كل واحد قفل علي نفسه و مشاركش الناس مش هيعرف اذا كان ماشي صح و لا غلط
يعني مناقشتنا دي هتفتح الباب لفلان انه يوفر و بالتالي يستفيد واحنا نستفيد معاه ومنه
وارجع واقوا تاني طالما مبسوط خلاص مش مهم اي حاجه انت متعورتش في مليون جنيه يعني
بس مفيش مانع ان اللي وراك يعرف اذا كانت الحاجه دي غاليه و لا رخيصه و لا غاليه وتستاهل و لا غاليه علي الفاضي
هو ده هدف المنتدي الرئيسي