السلام عليكم ورحمة الله وبركاته

يا جماعة عندي مشكلة في الياريس انها بتصفر

بتطلع صوت صفارة هوا زي بالظبط صوت تنفيث الهوا نفس الصوت اللى بيطلع مثلا لما تبقى حاجة فيها هوا وتتخرم

الصوت بيطلع مع السرعة وبيزيد بزيادة السرعة ! وجاي من نحية الشمال

رحت عند ميكانيكي في المنطقة قلتله بيحصل عندي صوت صفارة هوا مع زيادة السرعة وبحس سعات ان العربية بتكلبش لما بسيب رجلي من على البنزين

قالي ده تيل الفرامل يا باشا << قلتله انا عارف صوت تزييق تيل الفرامل وده بيطلع مع الفرملة ومش زي الصوت اللى انا بسمعه

قالي هو التيل بس محتاج يتصنفر وحل عجلة وبص على التيل وقالي زي ماقلتلك محتاج يتصنفر وكل حاجة هتبقى تمام

قلتله يعني الصوت ده من تيل الفرامل ؟ ؟ قالي ايوة

قلتله طب والصنفرة دي هتكلف كام لقيته بيقولي 150 جنيه ! قلتله نعم ؟ كام ؟

قالي 150 جنيه وخلي عنك خالص قلتله ليه هو التيل بكام جديد اساسا ؟

قلتله طب ربنا يسهل وهبقى اعدي عليك تاني

طبعا حسيته بيفتي لان تيل الفرامل التزييق بتاعه صوته معروف والصوت اللى بسمعه مجرد صوت صفارة هوا فمقتنعتش بكلامه وكبرت دماغي منه

رحت لميكانيكي تاني معرفة كنت اتعاملت معاه قبل كدة

قلتله بيحصل معايا كذا كذا قالي تعالى نطلع نجرب العربية قلتله ماشي

جرب العربية وسمع الصوت قلتله سامع الصوت ؟ قالي اه قلتله من ايه ده ؟ سكت كدة وحسيت انه مش عارف الصوت من ايه وراح مغير الموضوع

في الاخر قالي بص يا باشا العربية محتاجة نغير سير الدينامو والبوجيهات وطقم تيل

قلتله كل ده ؟ بس الصوت من ايه بالظبط قالي هنغير الحجات دي والدنيا كلها هتتظبط والامور هتبقى تمام

قالي اشتريها من محلات قطع الغيار وهاتهملي اركبهملك والعربية هتبقى 10/10 ان شاء الله قلتله طب الحجات دي هتكلف كام تقريبا

قالي يمكن في حدود 600-700 جنيه

قلتله ماشي وقلت استنى لاول الشهر واشتري الحجات وامري لله

بعدها بحوالي كم يوم كان راكب معايا واحد زميلي عنده شركة صيانة تكييفات وغسلات وكلام من ده

سمع الصوت قالي ايه الصوت ده ؟ قلتله والله معرف وعاملي قلق وحاسس ان العربية فيها مشاكل

قالي ده صوت هوا قلتله مانا واخد بالي انا رحت عند ميكانيكي وقالي محتاج تغيير بوجيهات وطقم تيل وقصة

قالي طب خليني اجرب العربية كدة قلتله تعالى

وهو بيجرب العربية راح قافل الازجاج لقى الصوت بيقل قالي ده من برا قلتله اه وجاي من نحية الشمال قلتله اه مانا عارف

راح حط ايده على المرايا والقايم الشمال لقيت الصوت اختفى تقريبا !

قفل المرايا الشمال لقينا الصوت راح خالص

قالي الصوت من المرايا ! ! طبعا انا كنت مزهول ! قلتله من المرايا ؟ ؟ ؟ ازاي من المرايا ؟ قالي مانت شفت اهو اول ماقفلنا المرايا الصوت راح

قام فاتح المرايا الصوت رجع تاني

قالي يمكن مخرومة ولا فيها حاجة بيدخل فيها الهوا فبيعمل الصوت ده

طبعا انا قعدت ادعي على الميكانيكيا وقلت لا حول ولا قوة الا بالله كان هيكلفني 700 جنيه اغير حجات على الفاضي ! !

الحمد لله اطمنت واكتشفت ان الصوت اللى كان عاملي قلق طلع من المرايا

بس دلوقتي يا جماعة الصوت بقى فعلا عاملي ازعاج وبيعمل ازعاج ليا ولكل اللى راكبين في العربية خاصا لو الازجاج مفتوح وماشي على سرعة فوق 80 بيبقى الصوت جامد وياسلام لو فيه حبة هوا هتسمع احلى مزيكا ! !

فحد عنده اي خلفية ممكن يكون الصوت من المرايا ازاي ؟ انا لما بقفل المرايا الصوت بيختفي

والمرايا ماتخبطتش ولا حصل فيها حاجة وبصيت عليها سليمة مالاحظتش وجود اخرام او اي حاجة ! !

ياترى الصوت ده ايه سببه بالظبط ؟ ؟

وتاني مشكلة ان عندي بيحصل رجة في العربية لما بدوس على الفرامل وانا واقف

يعني لو كنت ماشي بالعربية ودوست فرامل مافيش اي مشاكل لكن واقف وخاصا لما بتكون العربية لسه باردة لسه مدورها وادوس فرامل وانا واقف بحس زي برجة او تخبيط

فده من ايه ؟