الصوت اللي من المرايا معناه ان في زي "خلوص" او فرق او خرم او اي فروقات مابين أجزاء المرايا والعربية في أي مكان (محتاج تبص عليها كويس) ممكن الموضوع محتاج ان المرايا تتربط كويس لأنها مع الوقت والقفل والفتح في حاجة ريحت او سيبت، أو مع حرارة الصيف أجزاء المرايا برضة ريحت وعملت فروق ، أو ممكن في حاجة اتحشرت في مكان مش واضح فا مع الجري بسرعة بتعمل الصوت ده (هي فكرة الصفارة ايه بشكل عام ؟ انك تخلي الهوا يمشي في مسار ضيق وليه شكل معين هايعمل صوت الصفارة ) وعلى فكرة ممكن يكون الموضوع حتة فرق تافه يدوب يتشاف بالعين بالعافية يعمل الصوت ده ، فبص عليها كويس
بالنسبة لموضوع الفرامل ، الموتور وهو واقف بيلف على سرعة بيسموها السلانسية أو idling speed السرعة دي يدوب بتكون عشان الموتور يتغلب على قوة الاحتكاك في أجزاءه وعمود الكامات ويدي قدرة كافية للتكييف لو شغال و للدينمو و power steering ، تمام كده
فبالتالي اي احتكاك يحصل زيادة عن اللزوم او اي قوة مقاومة لحركة المحرك هاتسبب في ان الموتور سرعة دورانه تقل عن ال idling speed اللي متصمم عليها ، يعني مش هايبقى قادر يتغلب على القوة اللي بتقاوم دورانه ، وبالتالي هايبتدي يبرجل ويبقى عايز يبطل ويقف ، بس طبعا أجهزة التحكم هاتحس بالبرجلة دي و بتحاول انها تزدو سرعة ال idling شوية وقتها عشان الموتور مايبطلش ولما يرجع يتظبط تاني ، ترجع أجهزة التحكم تهدي سرعة ال idling عشان ماتسحبش وقود زيادة عن اللزوم لأن العربية أصلا واقفة، فلو مصدر المقاومة لسه موجود ترجع العربية تبرجل تاني وهكذا ...
وبالتالي ، المحرك وهو لسه بارد مقاومة الاحتكاك بتكون عالية عن لو كان سخن ، لأن الزيت بيكون لسه تقيل وبارد ومالحقش يسخن عشان يخف و يجري في كل أجزاء المحرك ، وبالتالي المحرك بيبقى عايز يتغلب على المقاومة دي فممكن مايقدرش ويبتدي يبرجل
تاني حاجة ، لما حضرتك بتدوس فرامل والعربية واقفة ، حضرتك غالبا بتدوس الفرامل وانت معشق صندوق الترووس، او لو هي مانيوال بتكون مش دايس دبرياج كفاية ففي نسبة تعشيق واصلة مع المحرك دي طبعا مصدر مقاومة لحركة المحرك ، لأن التعشيق معناه ان العربية عايزة تتحرك والفرامل منعاها ، فالموتور بيحاول يتغلب على قوة الفرامل وياخد العربية ويتحرك بيها لكن طبعا مش بيقدر فيبتدي يبرجل ،
انما لو حضرتك متأكد انك بتكون فاصل تماما التعشيق مع صندوق الترووس ، يبقى غالبا دورة الفرامل مرتبطة بحركة الموتور وبتالي لما بتدوس فرامل بتعمل حمل زيادة عليه بتأدي لنفس الفكرة والنتيجة
غالبا حضرتك محتاج تظبيط وتنضيف بوابة فتحة الخانق وتظبيط وتنضيف حساسات الخانق throttle & throttle sensor for idling speed ، وحاول تستنى 5 دقايق على العربية قبل ماتتحرك بيها عشان الموتور والزيت يلحقوا يسخنوا
ولما تيجي تغير زيت المحرك ، هات زيت يكون مكتوب عليه 5w-XX أو 10w-xx
يعني الرقم اللي على شمال حرف ال w كل مايكون قليل يكون أحسن ، لأن دمعناه ان الزيت بيقدر يجري ويقوم بأدائه كويس مع درجات حرارة منخفضة جدا
والرقم اللي على يمين ال w كل مايزيد يكون أحسن لأن معناه انه بيقدر يأدي كويس ويستحمل مع درجات الحرارة العالية
أرجوا أكون أفدت حضرتك
المفضلات