شهادة احد اصدقائي بخصوص أمس
الكلام اللى بقوله دا هو شهادتى على اللى حصل امبارح فى التحرير وكل اللى بقوله دا شفته بعينى وحوارات حصلت مع ناس هحكيهالكم برضه عشان نشيل اى لغط او كلام غلط بيتقال الاول انا رحت الميدان بعد صلاة الجمعه ولاقيت الميدان زحمه جدا جدا جدا زحمه فكرتنى بايام الثورة من حيث العدد ولاقيت فى 4 مناصات فى الميدان الاولى قدام المكان اللى بيعتصم فيه ائتلاف فنانى الثورة والتانيه بتاعت ممدوح حمزة والثالثه عند هارديز والرابعه عند كنتاكى المهم لاقيت ناس بتهتف ارفع راسك فوق انت مسلم والهتاف دا كرروة كتير والغريب ان وانا مروح باليل لقيت جريده اسمها التحرير بتاعت ابراهيم المعلم مخليه المنشت بتاعها ان الناس كانت بتقول ارفع راسك فوق انت سلفى رغم ان دا محصلش واللى حصل انت مسلم مش سلفى المهم شويه ولاقينا مجموعه شباب من المسيحين جم فى الصنيه ورفعوا الصلبان فى قلب الصنيه وقعدوا يهتفوا كنت انا على مقربه منهم الى حد ما فبصراحه رحت ليهم عشان خفت يحصل اى اشتباكات او ان يكون اى حد باعتهم يستفذوا السلفيين ولا حاجه رحت ليهم ولاقيت هتافاتهم ان ثورتنا ثورة شعبيه وان الكل مشارك فيها وكدا ولاقيت السلفيين واقفين معاهم ومفيش اى نوع من انواع المشاكل ولاقيت فى حوار مع بعض المسيحين اللى مع الشباب دول والموجودين حواليهم ومع بعض الشيوخ ولاقيت الشيوخ بيحاولو يطمنوهم وقاعدين بيشرحو ليهم حقوق اهل الذمه فى الاسلام وبالذات النصارى لدرجه انهم عرفونى معلومه مكنتش اعرفها قبل كدا الصراحه وهى ان الرسول صلى الله عليه وسلم اوصى خصيصا على نصارى مصر واتطمنت ان مش هيحصلاى نوع من انواع المشاكل لانى لاقيت ناس واعيه اوى ومثقفه بشكل عالى والمنظر العام ان لا يمكن يكون فى مشكله ولاقيت ان النصارى بيقولوا انهم جم مش عشان يعملوا مشاكل لكن جم عشان يعرفوا الناس انهم مع السلفيين فى الميدان رافعين الصلبان ومحصلش مشاكل وعجبونى الصراحه بفكرهم ورسالتهم الغريب بقى لقيت واحده اجنبيه تتقن العربيه لما شافت المنظر جت وقعدت تسال السلفيين الى واقفين حوالين الناس اللى بتهتف دى وواضح انها كانت بتسال اسئله تعمل فتنه او مشاكل للمسيحين اللى بيهتفوا اسئله من قبيل هل عقيدتكم والسؤال للمسلمين طبعا بتسمح برفع الصليب وما رمزيه الصليب للمسلمين وغيرة بس لاقيت الشيوخ فى الاول راحوا مكلمينها عن حقوق النصارى فى الاسلام وهى مصرة تاخد منهم اجابه على اسئلتها فالراجل قالها انتى ليه بتسالى السؤال دا دلوقتى وليه فى المكان دا وقالها انا هقولك رساله وصليها للى بعتينك ان لا يمكن حد هيعرف يفرق بين المسلمين والمسحين فى مصر وقالها معلومه تانيه كمان مكنتش اعرفها ان فى بنا نسب تاريخى بين المسحين والمسلمين ومحدش هيقدر يفرقنا او يعمل فتنه بنا والكلام دا قالهولها طبعا بسبب نوعيه الاسئله اللى كانت بتتعمد تاخد عليها ايجابه وهى تتقن العربيه بطلاقه لما لقت نفسها اتكشفت اوى كدا قدامهم قالتله انا جيت هنا بالصدفه وانا اصلا راحه خيمه حزب الغد قالها مفيش اى مشكله شرفتينا وخلى الناس توسع لها عشان تعرف تمشى براحتا فى طريقها بعدها بشويه صغيرين رحت اتجول فى باقى الصنيه لاقيت ناس 6 ابريل قاعدين جوة الخيمه منسحبوش ولا حاجه زى ما ماهر قال وبعض المعتصمين التانين فضلوا برضوا يفضلوا داخل الخيم بتاعتهم مشيت شويه كمان لاقيت على الطرف التانى من الصنيه عند المكان بتاع ائتلاف فنانى الثورة مجموعه شباب ولاد وبنات واقفين رافعين رايه مكتوب عليها الشعب يريد البرادعى رئيس ويافطه تانيه كل المصريين يريدوا البرادعى رئيس ولاقيت واحد من السلفين راح للمجموعه دى وقال للبنت المتزعماهم لو سمحت غيرى اليافطه وقولى انا اريد البرادعى رئيس وبلاش كلنا دى لانى مش موافق عليها لاقيتها قامت داخله فيه شمال وقالتله انا حرة اكتب اللى انا عوزاه واقول اللى انا عوزاه وفضلت مصرة وتهتف ويهتف معاها ال 5 اللى رافعين رايات البرادعى رئيس والغريب بقى ان فضلوا الخمسه دول يحاولوا يستفذوا الناس بالموضوع دا ويحاولوا يهتفوا اوى عن البرادعى ولاقيت السلفيين بداوا ميعبروهمش خصوصا ان فى ناس من السلفيين قالوا احنا مش جايين نحتك بحد بعدها لقيت الخمسه دول اموا مغيرين الشعار وقعدوا يهتفوا ضد الدوله الدينيه وحاجات من قبيل مش عاوزينها ايران ومدنيه مدنيه وكدا حاول بعض الناس السلفيين يدخلوا يفهموهم وجهت نظرهم عن الدوله الاسلاميه وقالو لهم ان الدوله الاسلاميه فى الاصل مدنيه بس مكنشو راضين يسمعوا حد وبصراحه انا شكيت انه فخ عشان يحدث اى نوع من انواع الاشتباك ودا اللى اتاكدلى فى اخر اليوم باليل فعلا بعد ما اتكلمت مع البنت دى بعد ما نضفت الصنيه وهحكيلكم الحوار فى وقته والبنت دى واللى معاها بهتفوا هتافاتهم اللى كانت مستفزة فى حينها من حيث اختيار توقيت قولها لاقيت واحد ملوش اى وصف يتقال عنه غير ان شكله بلطجى فعلا لدرجه ان الواحد بخاف يتكلم معاه لاقيته داخل بقوة عاوز يضرب واحد من بتوع البرادعى ولما السلفين شافوة وهو بيهجم عليهم مسكوة جامد وكتفوة وخلوا الناس تاخده بعيد وطلبوا منى لانى كنت قريب من الاحداث اوى انى اشترك معاهم فى عمل درع بشرى يحمى انصار البرادعى وبالفعل اشتركت معاهم فى الدرع وعملنا شبه نصف قوس عليهم كدا عشان نحميههم من اى اعمال بلطجه ممكن تحصلوجه راجل كبير كدا عجوز سلفى فضل يطلب من الناس انهم يمشوا ويذكرهم ان اهم شئ ميحصلش اى نوع من انواع الاشتباك وغيرة لان الاعلام كله بيقول عنهم دلوقتى انهم راحوا الميدان ووسخوة والميدان مش نضيف وان التلفزيون المصرى اللى بيقول دا واخد الناس وحاول قدر المستطاع يبعدهم عنهم وتطوع عدد من الشباب اللى كان موجودين معاه لحد كدا كان وقت مظاهرة السلفيين خلصت ولاقيت ناس مروحه فى الباصات اللى جم بيها المظاهرة ولاقيتهم بيقولوا يا شباب عاوزين فريق يتطوع بانه ينضف الميدان عشان محدش يقول علينا حاجه ولان التلفزيون بيقول اننا نزلنا وسخنا الميدان وبالفعل لاقيت منهم مجموعه قعدت تنضف الشوارع اللى حوالين الصنيه كلها ولاقيت واحد بيقولى ممكن تساعد معايا فى اننا ننضف الصنيه والشخص دا طلع مش من القاهرة اساسا قلتله اوى اوى قالى حاول تشوف حته خشب او كرتونه وعاوزين نلم كل اللى فى الصنيه دا قتله تمام وانا بدور على حاجه كدا لقيت مشهد عجبنى اوى لاقيت السلفيين اللى بينضفوا الشوارع اللى حوالين الميدان بينضفوها بضمير شديد اوى لدرجه انهم بينضفوا الشارع من التراب كمان ساعتها قلت انا لازم انضف بضمير عشان اساعد الناس دى من اللى شفته من وعى عندهم رغم ان كان فى منصه كانت بتقول كلام مش كويس المنصه اللى قدام خيمه ائتلاف فنانى الثورة زى مثلا اى كلب عاوز يخرج مصر من هويتها الاسلاميه احنا بنقوله انت بتحلم وكدا واللى لاحظت ان المعتصمين كانوا شايفين ان كلام المنصه دا بيمسهم المهم نرجع لموضوع التنضيف تانى فلاقيت حته خشبه ينفع استعملها واخدتها وبدات انضف الصنيه اللى غاطنى اوى بقى انى وانا بنضف الزباله لاقيت المعتصمين رافضين يساعدونى فى النضافه بانى بس كنت بقول لهم ياريت لو تنقلوا قعدتكم بس فى حته من اللى اتنضوا على ما ننضف المكان اللى انتوا قاعدين فيه ولاقيت ناس عماله تشاور لبعض لا لا لا وكدا لدرجه انى كررت كلامى عليهم كتير محدش كان راضى يتحرك ولاقيت واحده بتقول لواحد قله شكرا هنبقى ننضفها احنا بالليل وكانى الزبال اللى رايح ياخد الزباله من على باب بيتهم الحركه دى غاظتنى اوى الصراحه رحت قايل للولد اللى قالى دا انت شايفنى سلفى ولا حاجه وطبعا انا مش سلفى بالمفهوم الشكلى يعنى لا مربى دقنى ولا بقصر ولا غيرة المهم قلتله انت شايفنى سلفى ولا حاجه وقلتله انا شاب مصرى زى زيكم وزى السلفيين دول اتطوعت عشان انضف ميدان فى بلدى فمن فضلك يا تساعدنى يا متعطلنيش لان احنا كلنا مش ضد بعض ومينفعش يكون دا اسلوبنا لان الخاسر الاخير فى دا مش هيكون حد غير مصر لاقيتهم قالوا حاضر يعنى عاوزنا نقوم طيب قلتلهم اه ياريت قالولى حاضر ومنهم مجموعه قامت ومجموعه فضلت مصرة انها تفضل قاعده بعدها لاقيت واحد من المعتصمين واللى منضمين جديد لحركه 6 ابريل ويوم الجمعه كان تانى بوم ليه معاهم بس هو كان معتصم معاهم راح جاب اكياس زباله وجونتى وجه يساعدنى فلاقيت اللى قاعدين دول ندهوله وقالوله انت هتعمل ايه قالهم عادى عادى عادى مفيش مشكله احنا بننضف الميدان وبصراحه فضل يساعدنى لدرجه ان انا وهو فعلا نعتبر عملنا لوحدنا تلات ارباع الصنيه وبصراحه لاقيت الوقت كان اتاخر والسلفين مش موجودين المهم فضلنا ننضف سوا انا وهو وهم مش راضين يساعدونا واللى بيقوم بيقوم بتافف شديد وبعضهم مبرضاش يتحرك نسيت اقول حاجه عن الصحفيه اللى كانت بتكلم السلفيين عند المسحين اللى رافعين الصلبان فى الميدان وانا بدور على خشبه او كرتونه لاقيتها قاعده جوة خيمه مع ناس ومعاهم اجانب تانين وقاعدين بيشربوا سجاير بس بصراحه منظرهم قلقنى لانى محستهاش خيمه مصريين اساسا بعد ما نضفنا الصنيه وكانت الساعه حوالى 10 ونصف او 11 لاقيت نفس البنت اللى كانت مع البرادعى واقفه بتتكلم مع ناس فقلتلها لو سمحت اسمحيلى اقولك ملاحظه عليكم النهارده وياريت تتقبليها منى بصدر رحب قلتلها انا شايف ان اللى عملتوة النهاره بخصوص رفع يفط البرادعى فى التوقيت دا امر مش صح وكان ممكن يؤدى لاشتباك بينكم وبين اى تيار ضد قالتلى اعتقد يا استاذ فى حريه فى البلد وانا حرة اقول راى زى ما انتم قلتوا رايكم قلتلها مين انتم انا مش سلفى بالمفهوم اللى فى دامغك وانا لا انتمى لاى تيار لكن بنزل مع اى تيار فى الحاجه اللى بقتنع فيها انها لمصلحه مصر وانا شايف ان اللى عملتيه النهارده كان غلط عشان كان ممكن يؤدى لاحتكاك ملوش لازمه قالتى طيب طالما انت مش سلفى بقى هقولك على حاجه انت عارف ان انا مش مايده البرادعى بالدرجه دى ولا حاجه انا بحترمه فكريا اه وكل شئ بس انا شايفه انه سورى يعنى لا هو ولا اى حد من المرشحين الحاليين يستاهل وانا عملت موضوع البرادعى دا درس ليهم قلتلها درس بممعنى ايه قالتلى درس ليهم عشان المنصه اللى قدامنا كانت حاطه صورة الشيخ حازم صلاح ابو اسماعيل عشان كدا تعمدت اعمل كدا للبرادعى واعتقد اننا فى حريه والمفروض اعمل اللى انا عوزاه قلتلها بس فى الدول المتقدمه لو فى مظاهرتين متضادتين بيشترط ان ميكنش فى احتكاك بنهم لا فى المكان ولا غيرة عشان متحصلش مشكله ولاقيت لغه حوارها لغه حوار مش هتقتنع بيها غير باللى فى دماغها لانها قالتلى دول نازيلين يسرقوا الثورة دول كانوا فين من زمان وانا والله ما عملتش دا غير عشان افضحهم قلتلها انا استغرب من كلمه افضحهم دى وعموما انا وصلتلك رسالتى وفعلا اللى عملتيه دا غلط قالتى طيب تمام متشكرة جدا لحضرتك طبعا العدد كان كتر تانى فى الميدان وكان فى ناس نازله تتفرج واللى ملوش فى حاجه واللى خارج هو وخطيبته وكدا ووانا ماشى لاقيت الصحفيه اللى اتكلمت عنها بتتكلم مع واحد من 6 ابريل وبتقوله هم بيتهموكوا ان انتوا واخدين تمويل من برة هى مش السلفيين دول واخدين تمويل من برة برضه ولا ايه ولاقيت واحد واقف قالها اه بياخدوا تمويل من برة رحت قاطع حوارهم وقلتلهم يا جماعه اللى قال السلفيين واخدين تمويل عندك دليل؟ طالما مفيش دليل على 6 ابريل حتى اللحظه انها مش واخده تمويل يبقى هى مش بتتمول من برة الى ان يثبت العكس وطالما مفيش ما يثبت ان السلفين واخدين تمويل يبقوا مش واخدين الى ان يثبت العكس قالتلى انا كنت بسال بس مش اكتر ولاقيت واحد طلع منصه ممدوح اسماعيل بيقول انا صحفى مسيحى وانا حابب اشكر شباب 6 ابريل احسن شباب فى مصر لانهم هم اللى حمونا النهارده من السلفيين لما لاقيت الموضوع وصل لكدا قلت دا كل واحد بقى هيطلع يغنى شويه وحسيت انى لو قعدت اكتر من كدا هفقد الثقه فى كتير من القوى الوطنيه اللى مش عاوز افقد الثقه فيهم اصلا فمشيت دى شهادتى عن اليوم كله حبيت انقلها لانى اعتقد ان فيها حاجات مهم اوى ان الكل يعرفها
المفضلات