m11 ومحتار

**huss2000** · 12-08-2011 06:32 PM

الام 11 مفيهاش عيوب في السحب لا في الاول ولا التاني ... لما تشغل التكيف خصوصا وانت بتغير من الاول للتاني ادي الغيار حقه بس مش حتشعر بأي تأخير في الاستجابة ... وعلى فكرة نفس الموضوع ده موجود في اللانوس الكوري وده في رأيي شئ طبيعي
ثانيا : شئ معروف ولا جدال فيه ان الكوري يكسب الكل في قطع الغيار والتصليح وسرعة اعادة البيع حتى يكسب الالماني واليباني
ثالثا :مفيش عربية بدون مشاكل وبدون عيوب ..يعني مثلا الاكسنت الار بي الجديدة لا يوجد بها الفرامل ال ايه بي اس وده عيب خطير من وجهة نظري ... . المهم العيوب دي بعيدا عن اداء السيارة على الطريق وسلامة راكبيها
رابعا : معظم السيارات الجديدة مش سهل الحصول على قطع غيارها الا في التوكيل ...وانا عن نفسي حتى لو قطع الغيار موجودة بره مش حشتري غير من التوكيل
خامسا : ده السؤال اللي دايما بنسأله لاي حد حيشتري عربية ... ايه احتياجاتك منها ...لو عايز يعملها تاكسي يبقى يجيب ال 516 ..لو عايز عربية يعرف يبيعها بسرعه لو اتزنق في فلوس زي معظم التجار يبقى خليك في الكوري ..لو عايز عربية تجري بيها على الطريق وتجيب ال 180 وانت مستريح ومعكش غير 70 الف وتشعر بشياكتها من الداخل والخارج هات الام 11 ... بالمناسبة التسارع بتاع العربية مش عالي لكنه افضل من اللانوس لكن اقل من النيو اكسنت ويمكن الفيرنا لكن على السرعات العالية هي اثبت منهم الاتنين بشكل ملحوظ ....
سادسا : من رأيي المتواضع ان الصيني اثبت نفسه خلاص ومش المفروض ان نرفض السيارة فقط لانها صيني ... واعتقد ان ال 516 هي ال 504 بتاعت الزمن ده ...... البرليانس والاسبرانزا والبي واي دي سيارتهم الافضل في فئتهم .... خالي عنده الجالينا وكان ندمان بعد ما اشتراها لكن بمرور الوقت تأكد انه دفع فلوسه في عربية محترمة افضل من يباني وكوري بنفس السعر بعد ما جرب اليباني وشاف الفرق

**huss2000** · 12-08-2011 06:43 PM

على الاول السرعة 40 كم والار بي ام حيكون على 4 يعني مش حرق عالي ... الطبيعي ... فلو مشغل التكيف ونقلت مثلا وانت على 10 او اقل حتشعر ببطئ استجابة زي اي early shift في الدنيا
التاني بيوصل ل 60 والاربي ام على 4 عشان كده اي حد يكون راكب عربية زي اللانوس مثلا ويسوق الام 11 متعود ينقل عند 40 كم وده مش افضل وقت للنقل
التالت بيوصل 80 والاربي ام على 3ونص عشان كده مش حتحس انك عايز تجيب الرابع الا بعد ال 80 وانت على التالت
الرابع بيوصل 100 والار بي ام على 3 يعني معاك ل 140 كم مستريح

**katoba** · 12-08-2011 08:43 PM

الاخ العزيز والعضو الفاضل (Raedegypt) ياريت حضرتك تقولى اجيب ايه ب72 الف جنية ؟؟

**ahmedmoh** · 12-08-2011 09:08 PM

انا مع الاخوة الافاضل اللي اتكلموا على موضوع السحب
ماتيجش تغير على 2 وللا 2.5 ار بي ام و بعدين تيجي تقول السحب تعبان
ادي الغيار حقه زي ما الاخوة الافاضل قالوا و هتلاقي ان سحب العربية اكتر من ممتاز
انا واحد من الناس بحب احس بالسحب و مش بغير على اقل من 5 ار بي ام الا في الغيار الاول بس
صحيح صوت الموتور بيعلى زي البروتون خصوصا بعد ال 4 ار بي ام بس هي دي انظمة المحركات الجديدة
البروتون الناس كلها بتقول عليها اسد في السحب
انا اخويا معاه بيرسونا اوتوماتيك و العربية مهما كان الضغط على دواسة البنزين خفيف مش بتغير على اقل من 5 ار بي ام و ساعات بتوصل لل 6 و نص عشان كدة الناس منبهرة بالسحب بتاعها
كل عربية و ليها اسلوبها في السواقة بغض النظر بقى عن نوع العربية او الطيارة اللي كان الشخص بيسوقها قبل كدة .. الm11 بالذات و انا املكها و من ضمن كل العربيات اللي ركبتها اتعامل معاها و سوقها صح تستمتع بيها

**hima77** · 12-08-2011 09:21 PM

المشاركة الأصلية كتبت بواسطة huss2000

على الاول السرعة 40 كم والار بي ام حيكون على 4 يعني مش حرق عالي ... الطبيعي ... فلو مشغل التكيف ونقلت مثلا وانت على 10 او اقل حتشعر ببطئ استجابة زي اي early shift في الدنيا
التاني بيوصل ل 60 والاربي ام على 4 عشان كده اي حد يكون راكب عربية زي اللانوس مثلا ويسوق الام 11 متعود ينقل عند 40 كم وده مش افضل وقت للنقل
التالت بيوصل 80 والاربي ام على 3ونص عشان كده مش حتحس انك عايز تجيب الرابع الا بعد ال 80 وانت على التالت
الرابع بيوصل 100 والار بي ام على 3 يعني معاك ل 140 كم مستريح

ولا كلمة تتقال تاني علي موضوع السحب بعد كلام حضرتك... بالنسبة لعدم توافر وانتشار قطع الغيار وارتفاع سعر بعضها ده طبيعي جدا لاي عربية جديدة بقالها 3 سنين بس في السوق واللي مش مصدق يسال علي سعر فانوس امامي لنيو اكسنت موديل 2010 علي سبيل المثال

**khaled_Saga** · 12-08-2011 11:46 PM

المشاركة الأصلية كتبت بواسطة katoba

الm11 عربية محترمة ومن افضل السيارات فى فئتها وده عن تجربة ناس كتير من ملاكها بحكم متابعتى ليها بقالى اكثر من 7 شهور .. لكن يعيبها التوكيل وسوء المعامله وندرة قطع غيارها حسب راى ملاك الاسبرانزا عموما .. وبالنسبة لفئتها ومقارنة بنفس سعرها فهى الافضل بلا منازع وبالتوفيق ان شاء الله

رمضان كريم يا احمد وحشتنى بجد وكل سنة وانت وكل اللى فى المنتدى طيبين

انا أؤيدك الرأى كمستخدم للام 11 بقالى 4 شهور .. العربية كعربية جميلة جدا بصراحة ولكن عيبها التوكيل اللى مسوأ سمعتها نظرا لسوء التقفيل الى حد ما اللى بينتج عنه بعض العيوب اللى بتضايق الواحد حتى لو كانت صغيرة وسهلة الحل ده غير عدم توافر قطع الغيار بشكل مثير للجدل!!

انا كنت زيك فى حيرة ولكن اتكلت على الله واستفتيت قلبى واستخرت وحسيت انى مرتاح ليها وجبتها .. ربنا يقدملك اللى فيه الخير

**venus** · 13-08-2011 02:12 AM

انا شاريها 10 /2009 والعداد عامل حتي الان 42500 تقريبا
العربيه بالنسبه للسعر و امكانيتها هي افضل اختيار بلا جدال و بالنسبه للمشاكل زيها زي اي عربيه تانيه نفس المشاكل -- قابلتني بعض المشاكل زي قربه المياة والطنابير الاماميه بس ملفتشي مش كله مع التوكيل خالص انا شايف التوكيل محترم و لما بيلاقي اي عيب بغيرة علي طول .... وبالنسبه لقطع الغيار فأكيد مش متوفرة إلا في التوكيل بس عشان العربيه جديدة ...
المختصر العربيه محترمه جدا جدا مقارنه بأي عربيه في نفس السعر ... ولو الزمن رجع بيا تاني حشتريها بدون أي تردد وأنصح الناس بشرائها ...
و كل عام وانتم بخير

**drahmedsaleh** · 13-08-2011 02:19 AM

أنا النهارده بعد صلاة التراويح قابلت واحد معاه ال m11 و عامل بيها 44000 ك و الراجل شغله فى القريه الذكيه يعنى كل يوم 55 ك و مفيش شكوى منها غير التأخير فى التوكيل ان ماكينة الازاز الخلفى واقفه من قبل الثوره ولسه قطع غيار الماكنه مجتش لكن بيقول أن العربيه ثابته جدا على الطريق والتكيف زى الفل حتى عند سرعه 160

**katoba** · 13-08-2011 01:46 PM

خالد حبيب قلبى .. رمضان كريم ياغالى واحشني كتير والله يانجم .. انا بمشيئة الله فى اقل من 10 ايام هجيب الm11 وهبقى اعرفك قبلها فى التليفون بمشيئة الله .. وكل سنة وانت طيب

**khaled_Saga** · 13-08-2011 11:13 PM

المشاركة الأصلية كتبت بواسطة katoba

خالد حبيب قلبى .. رمضان كريم ياغالى واحشني كتير والله يانجم .. انا بمشيئة الله فى اقل من 10 ايام هجيب الm11 وهبقى اعرفك قبلها فى التليفون بمشيئة الله .. وكل سنة وانت طيب

لولولولولولولوى
الف مليون مبروك يا حبيب قلبى مقدما ولازم اعرف طبعا .. مليون مبروك عليك وربنا يديلك خيرها ويكفيك شرها