عاوز أشتغل

**inspiron** · 10-08-2011 05:44 AM

أنا عندي 24 سنة.مجند في الجيش بس يعتبر مش في جيش.يعني نظام أجازاتي حلو.أسبوع وأسبوع...والأسبوع اللي بروح فيه بخلص الساعة 2 وأروح البيت.يعني كأني موظف حكومة بياخد أسبوع أجازة وشغال بدون مرتب

المهم..أنا عاوز أشتغل أي شغلانة أحوش منها فلوس عشان لا أخفيكم سرا ( عاوز أتجوز ) وأهلي مش هيساعدوني في أييييييي حاجة. فمحتاج أشتغل أي حاجة تجيبلي قرشين أحوشهم لحد ما أخلص جيش.
معنديش مشكلة إني أشتغل حتي في الأسبوع اللي بروح فيه الجيش.يعني ممكن أخلص اليوم بتاع الجيش وأبدأ شغل الساعة 4 مثلا...والأسبوع اللي باخده أجازة ممكن أشتغل من 7 الصبح لبليل ..يعني..تقدروا تقولوا كده مساعدة لشاب عاوز يعتمد علي نفسه.

أنا ساكن في الهرم.مهاراتي في الكمبيوتر ممتازة الحمدلله واللغة برده الحمد لله..أنا خريج تجارة إنجليزي.
لو أي حد عنده فرصة وشايف إنها تساعدني في تحقيق غرضي ده.يا ريت ميبخلش عليا بيها.
ويبعتلي علي الخاص.

شكرا.

**yahiahelaly** · 10-08-2011 09:34 AM

ربنا يوفقك

**inspiron** · 10-08-2011 04:41 PM

المشاركة الأصلية كتبت بواسطة mr_vampire

للاسف مش هقدر افيدك اوي في حوار الشغل بس ان شا الله ربنا هيكرمك وتلاقي فرصة شغل مادام ناويت تعف نفسك وتتجوز. بس عايزين نطمن عملت ايه مع والدتك في حوارك. الارتباط ده بالبنت اللي كنت هكيت عنها وان البيت عندك مش موافق ولا خلاص الحمد لله وصلت معاهم لحل واخيرا وافقو ؟؟؟؟؟؟؟

الموضوع وصل لحارة سد من ناحية الأهل...لكن قررت أنا والبنت مطاطيش للظلم ده.وهي بتشتغل بحكم إنها مخلصة دراسة ومعاها شهادتها..لكن أنا ظروفي بتحكم إني مقدرش أتعين في شركة بشهادتي لإني عسكري في الجيش.فكان أملي إني ألاقي أي شغلانة تساعدني لحد ما أخلص الجيش.يعني حوالي 7 شهور.وشقتي موجودة.كل اللي عاوزه شغلانة تساعدني أجهزها واحدة واحدة.

لأن اللي قررته إني هعتمد علي نفسي وهجهز نفسي والبنت بتجهز نفسها برده. وبعد ما أخلص الجيش هقول لأهلي إني مسئول عن نفسي ومش عاوز مساعدة منكم في حاجة.أنا هتجوز البنت اللي إختارتها واللي عاوز يجي معايا يبقي عمل معايا خير وراعي ربنا فيا وفي بنت الناس اللي إتظلمت دي.واللي مش هيجي ربنا يسامحه.وأنا عارف إن أنا صح.من ناحية الشرع والدين أنا صح.حتي دار الإفتاء سألتهم وأكدولي إني صح.

**inspiron** · 11-08-2011 02:20 AM

المشاركة الأصلية كتبت بواسطة mr_vampire

الله ينور والله يامعلم انتا كدة بجد عداك العيب. دلوقتي مفيش بنت بتتجوز غصب عنها يبقي الولاد هما اللي هيتجوزو غصب عنهم . مش فاهم الاهالي بيفكرو ازاي والله !!!!!!!!!!!!!!!!!!

وزي ماقولتلك ان شاء الله ربنا هيكرمك ويساعدك وهيوقفلك ولاد الحلال اللي هيكونو سبب لرزق ليك عشان انتا عايز تعف نفسك وتتجوز.

- بس نصيحة اخوية حاول تنيم الموضوع لحد ماتخلص الجيش عشان منها ميكونش استفزاز ليهم ومنها ممكن مع الوقت ويشوفو مرمطة الجيش يقولو اقل حاجة يستاهلها انه يرتاح بعد التعب و انه يختار عروسته بنفسه ويكون ربنا حلها من عنده.

ان شاء الله لو لقيت اي مصلحة هلاغيك علي طول بس ادخل هنا اكتب موضوع علي الله وعسي تكون فيه فرصة متاحة.
:: قسم خاص بالإعلان عن وظائف خالية:: - :: نــايــل مــوتــورز:: - :: Nilemotors.net ::

تحياتي وبشدة.

إنت راجل محترم ومشجعني من البداية والله...الله المستعان.وبرجوك لو لقيت أي مصلحة قولي.أشكرك يا باشا

**egyptiandiver** · 11-08-2011 02:46 AM

Why don't you work in a call center? like the ones that make out sourcing calls - you can take the night shift - May Allah help you

**inspiron** · 11-08-2011 08:19 AM

المشاركة الأصلية كتبت بواسطة egyptiandiver

why don't you work in a call center? Like the ones that make out sourcing calls - you can take the night shift - may allah help you

يا ريت والله بس حضرتك قولي ودلني علي الطريق.ومعنديش مشكلة في الشيفت بتاع بالليل.يعني أكلم مين أو أسأل في الموضوع ده إزاي..وهل هيرضوا بيا وأنا مجند في الجيش؟