للأسف ده الحال دلوقتي
http://www.nilemotors.net/Nile/237624-1.html
و مفيش حد بيساعد حد ابسط مثل تخيلوا المطرية اللي هي المطرية اللي كانت مليانة جدعان اه كانت بقي
واحد كبير في السن عربيته وقفت في الخارجة و قفلت الدنيا كلها مفيش شاب اتنيل ع عينه حتي و فكر يتحرك و يساعده و الراجل مش قادر يعني تنزل تساعد الراجل و الناس واقفة تتفرج بردهو عجبي
عند الطريق الدائري المؤدي للقاهرة الجديدة عند كوبري الشهداء الجديد
واحد معاه 128 حمرا وقفت و مش قادر يزقها لقدام عشان يركنها لأنه مطلع عالي حتي العسكري مسعدش و الدنيا كلها واقفة فجأة العربية رجعت من الراجل جامد نزلت عشان الحقه للأسف ملحقتش و العربية كانت سريعة و كتر السرعة و هي نازلة بضهرها الرجال زي ما يكون لزق في العربية و طلعت كلها فوق الرصيف و اكيد طبعا اتدمرت من تحت و العفشة راحت و العسكري كمان مش عاجبه برده و غيره وغيره
عدم الوحدة بين الناس ده بقي و كله بيقول نفسي نفسي و مليش دعوة هو اللي ساعد ع وجود البلطجة في كل مكان وفي كل حاجة في حياتنا
حتي في الجيران تلاقيهم فاردين صدرهم و بتوع خناقات و بيشربوا و حالتهم حالة و مفيش اقرب من المطواة في ايديهم بيعملوا اللي عايزينه و مفيش حد من الجيران بيقول نتكاتف او نتحد قصادهم شوفت من الاشكال ديه كتيير عند قرايبي
فالطبيعي انك هتلاقي بلطجية و طبعا كل اللي كانوا مستخبيين في جحورهم طلعوا زي الحشرات في الصيف
و الله مش عارف اقول ايه و لا ايه لأني لو فكرت اقول هعمل كيك داوون في الرد فعلا
فموضوع البلطجية انساه لأن ليه اضرار كتيير الاعضاء ذكروها من خلال المشاركات بالاضافة لبلاوي تانية مش عايز اصدمك منها
فالحل حاجة من دول
يا تنقل لشقة تانية و تأجر شقتك لو موقعها يعني صعب يتساب لحد ما العالم ديه تغور ( و لو انهم لما بيعششوا في مكان بيبقوا عاملين زي الدبابير و الخفافيش و مش بيطلعوا و لا بالطبل البلدي )
يا تخليك و ترخص سلاح حي و يكون معاك واحد صوت للتهويش بس و الكتريك شوك
و اي حد من الاسرة يكون معاه الكتريك شوك راشق في جنبه او شنطته
و ترشق البيت شوم و سيلف ديفينس بانواعه
و يا ريت لو تتعلم الدفاع عن النفس و الرماية لاستخدام السلاح
و تبقي مستبيع هناك
يا اما الحل اللي فات بدون ترخيص سلاح حي
يا اما بقي تشوف حد تقيل تشتكي له تنزل حملة تشيل كل العالم ديه زي ما نزلت حملة في بداية نزول الشرطة الشوارع تاني شالت سوق العتبة اللي اتعمل في روكسي
و هتلاقي الكلام عن الحملة اللي مكتوب باللون الاخضر هنا
http://www.nilemotors.net/Nile/221939-a.html
هم بيرجعوا تاني اه لكن زي الفيران و مداريين مش بالبجاحة اللي كانوا فيها في الاول
و عشان تبقي عارف مش حضرتك لوحدك اللي بتعاني كلنا بنعاني للأسف وصلنا لمرحلة عمري ما تخيلت اننا نوصلها ابدا
الواحد كل نزولة بخناقة و شتيمة و ضرب سواء في الشوارع او حتي المحلات و كل نزلة مش اقل من مرتين تلاتة الواحد مش هيبقي فيه حتة سلمية من كتر الخناقات
يعني لسه اول امبارح روحت اشتري حاجة من محل فهي سعرها 3 جنيه لقيت اللي بيقولي 5 جنيه بقوله انا كنت بجيبها بـ3 جنيه بدل ما يقول غليت و لا حاجة لأ لقيت شتيمة و قلة ادب و شعب كذا و عالم كذا و دخلنا في بعض شمال و هو اساسا عربجي و فارد حصيرة ع الارض و قاعد و اللي حاشوني عنه اللي شغالين عنده و عمالين يتحايلوا عليا امشي و المشكلة انه راجل كبيير مش عيل كمان و مكنتش عايز اقل ادبي بس هو اللي اضطرني لكده و الشومة كانت جاهزة في العربية و النانشكو اقرب لايدي من عيني يعني لو خد ضرب هنيمه في الارض زي الترامكو المقلوب
كل ما اكلم حد من اصدقائي او زمايلي او قرايبي من اول مكالمة زي حالاتي خناقات و ضرب و محدش طايق نفسه
زي ما تكون الناس ما صدقت عشان يتخانقوا و يضربوا و يموتوا في بعض
بدل ما نحترم بعض و نقدر بعض في الوقت الحرج ده لأ خلاص كل حاجة دلوقتي بقت بالدراع و الدكر يوريني نفسه و اللي يتهور يتعور و تعويرة الوش مفيهاش معلش يا .......
للأسف هو ده الحال دلوقتي :(
و يا ريت بس محدش يقولي ابعد الثورة اه بقول كده بالرغم اني من المؤيدين لكن اقول لأن مهما حصل مش هنقدر ننكر انها سبب من الاسباب للحال ده و هو التفرق اللي حصل بينا لاتفه الاسباب و اثبات وجهات النظر و تفضيل شخص عن اخر.......الخ.....الخ
اعتذر عن الاطالة لكن فعلا بقت حاجة تنرفز
المفضلات