صعبة أوي الجملة دي ... أرجو التراجع عنها لاننا كلنا بني أدم ودي إهانة غير مقبولة
عرض للطباعة
الموضوع مختلف من عائلة لعائلة و من منطقة للتانية
ممكن عائلة تقولك احنا النص و انتم النص في كل حاجة
و ممكن عائلة تقولك العروسة عليها المطبخ و الستاير و السجاجيد و بس
و ممكن عائلة تقولك انت عليك الخشب و احنا علينا الاجهزة الكهربائية و النجف و السجاجيد و الستاير
و ممكن في بعض المناطق يقولولك العريس بيجيب كل حاجة و بياخد العروسة بالهدوم اللي عليها
كل الحاجات الاساسية دي عادي الاختلاف فيها و الخناقات و ده مش بيقلل من نظرتك ليهم في حاجة
اللي بيجيب مشاكل بقي هو انك تلاقي اشتراطات في
1- الشبكة ( في حدود امكانياتك مالهاش حد ادني ولا حد اقصي ).... ممكن يقولولك اصلها مش اقل من بنت عمتها ( الرد الطبيعي في الحالة دي خلاص جوزوها لجوز بنت عمتها ) الشبكة دي هدية مني ليها و محدش يشترط عليا اجيب هدية بكام
2- القايمة ... و دي بردو من الحاجات الي بتضايق انك تلاقيهم مهتمين اوي بموضوع القايمة .. ما علينا المهم ان القايمة مايتكتبش فيها :-
* الشبكة لانها هدية منك ليها
* دهب العروسة لانها هي الوحيدة المتصرفة فيه انت مش هاتلبس معاها دهبها يعني.
* و كمان مايتكتبش في القايمة الحاجات اللي بتتكسر ( اطقم كبيايات و صيني و الكلام الفاضي ده ) الحاجات دي من المستهلكات و طبيعي جدا انها تتكسر مع الاستخدام
هاتلاقيهم بيقولولك دا احنا جايبينلها طقم صيني بـ 5000 جنيه ولازم يتكتب في القايمة .. طبعا الرد الطبيعي بردو انك هاتقول لا مش هايتكتب و خلية عندكوا بقي في بيتكو انا مش عاوزة في بيتي
3- مؤخر الصداق .... و ده بقي ناس كتير جدا اذا مكانش معظم الناس فاهماه غلط
الناس طبعا فاكرة ان مؤخر الصداق ده حضرتك بتدفعة لما تيجي تطلق
ده غلط تماما تماما
مؤخر الصداق ده عبارة عن جزء من المهر مؤخر لما بعد اتمام الزواج
و ده لازم تدفعة لمراتك سواء هي علي ذمتك او لأ .. يعني مالوش علاقة بالطلاق
و بيكون دين في رقبة الزوج لزوجتة طول حياتة لحد ما يوفي الدين ده او الزوجة تسقطة عنه
لو لقدر الله حصل وفاه للزوج قبل ما يوفي الدين اللي عليه بيتخصم من التركة اللي سابها و الزوجة تاخد حقها و باقي التركة تبتدي تتوزع علي الورثة و الزوجة هاتاخد نصيبها في الميراث من الجزء المتبقي بعد الدين
يعني زي ما قولت مالوش علاقة بالطلاق لازم تدفعة لمراتك لانه دين عليك
الموضة دلوقتي بقي ان المؤخر يبقي 50,000 جنيه معظم الاهالي بتقول كده
طبعا تقوم حضرتك رازعلهم الكلمتين اللي انا قولتهم دول هاتلاقيهم سكتوا و احرجوا و قالولك شوف اللي انت عاوز تدفعة
طبعا حضرتك هاتتفق معاهم علي مؤخر تقدر تدفعة لزوجتك في حياتكم مع بعض و ممكن تقسطهولها طبعا
بس المهم مايبقاش مبالغ فيه عشان تقدر تدفعة
تصدق انا كنت مفكرك صعيدى
عموما انا من دمنهور يعنى بلديات بس انا لسه عايش فى دمنهور
مره حاولت اعرف ايه نظام الارياف علشان لو نويت اتجوز اشوف واحده تعليم جامعى وتكون من الفلاحين
لقيت الشبكه عندهم بالجرام
يقولك 200 جرام مثلا شوف انت بقى يعملوا كام دول
ياباشا الكلام اللى انت بتقوله ده معدشى يمشى دلوقتى
وعلى رائى اللى قال احنا اللى بقينا فلاحين
بصراحه انا عمري ماسمعت عن موضوع الجرام ده
سلو بلدنا بيبقي المهر بيندفع زي ماهو ماشي عند كل الناس او اذيد شويه لو العروسه متعلمه علام عالي او حلوه شويتين واهل العروسه بياخدو المهمر وبييجبو بيه الدهب وممكن يكملو عليهه كمان
في كفرالدوار المدينه نفسها ساعات بيعملو كده او مش بيدفع مههر وبيروح مع العروسه يجيبلها الدهب ويدفع هو
بإختصار كده وعن تجربة
ما فيش أي حاجة تقدر تضمن الست بيها إن اللي هتتجوزه ما يظلمهاش وحتى لو كاتبلها مائة قايمة فممكن يخليها تلف حوالين نفسها وتكتبله بدل القايمة عشرة
والراجل ما فيش حاجة تضمنله إن مراته تبقى كويسه وتريحه ولا ما تظلمهوش
كل اللي أقدر أقولهولكم حاجتين
الواحد يتقي ربنا ويخلي تكاله على الله وربنا إن شاء الله لن يضيع أجر من أحسن عملا وحتى لو رزقه بشريك حياة مش كويس فهيكون أجره على الله وحتى لو انفصلوا ( وإن يتفرقا يغني الله كلا من سعته )
الشئ التاني في مثل بسيط ( قبل ما تناسب حاسب )
أما بخصوص التفاصيل فأنا في رأيي إن المشكلة كلها تدور في كون رب الأسرة وولي أمر البنت راجل وواثق من نفسه ولا لأ
لو هو واثق من نفسه فهيختار الزوج المناسب لبنته بغض النظر عن مادياته المهم يكون معاه الحد الأدنى وتكون بنته مرتاحاله وإن يكون ملتزم دينيا وأن يكون شخصية مسئولة
وحط تحت كلمة مسئولة دي مليون خط
يعني واحد ما يباتش شبعان وزوجته وعياله جوعانين
وما يهداش ليه بال ولا يرتاح وأهل بيته تعبانين
ولا يرضى على نفسه إن مراته تشتغل وتصرف عليه وهو بصحته
وكمان كما قال سيدنا علي : إن أحبها أكرمها وإن كرهها لم يظلمها
ويعرف إن كرامة مراته من كرامته وحتى لو زعل معاها وحد سأله إيه سبب المشكلة وكان هو واثق إنه مش غلطان فهيرد ويقول ( مالكم وما بيني وبين زوجتي )
ولو لا قدر الله طلقها يطلقها بالمعروف ويديها كل حقوقها ومن غير ما يسئ لها ولو حد سأله عن سبب الطلاق وصفات طليقته يجاوبه ( مالي وزوجة غيري )
المهم إن يكون ولي الأمر قراره من نفسه وما يخافش من حد ولا من لوم ولا نظرة اللي حواليه
ويواجه العالم كله اللي حواليه ويقولهم : أنا رفضت ده رغم كل إمكانياته لأني مش مقتنع بيه ووافقت على ده رغم قلة إمكانياته لأني مش مهم عندي المادة وعمري ما بأقارن بنتي ببنت خالتها ولا بنت عمتها ولا أختها ولا مراة أخوها لأن كل واحد قيمته في نفسه مش في اللي معاه
وأخيرا
ما فيش مانع ان اللي عاوز يتجوز يدور على واحدة في مستواه أو أقل من مستواه المادي
وكل شريحة في المجتمع فيها الكويس والوحش
وكل شريحة هتلاقي فيها بنت الحلال اللي تناسبك ويمكن تكون واحدة أبوها موظف على قده لكن من أسرة تناسبك أكتر من واحدة أبوها جزار ( مع كامل إحترامي لهم ) لكن أسرتها ما تناسبكش لا إجتماعيا ولا فكريا رغم إن ممكن الأسرتين يوافقوا عليك ويفرحوا بيك
مش لازم تروح لواحدة من أسرة غنية قوي وتقول المفروض يقبلوا بي طالما أنا إنسان كويس
طيب والبنت الطيبة المحترمة الجميلة المؤدبة اللي من أسرة فقيرة مش من حقها إنك تبصلها بعين الرضا شوية
لأن على فكرة وعن تجربة وما ينبؤك مثل خبير
أسوأ عيشه هتمر بيها لو انت اتجوزت واحدة عايشه في مستوى مادي مرتفع وبعدين نزلتها لمستوي مادي منحدر أو نقلتها من العيشه في حي راقي للعيشه في حي عشوائي شعبي
ساعتها لا هي هترتاح ولا أنت أكيد هترتاح وفي الغالب لا هتتحملك ولا انت هتتحملها
أعذروني فقد أطلت عليكم
ورمضان كريييييييييم
[quote=yousef1978;3873726908][b][size="4"][color="navy"
ما فيش مانع ان اللي عاوز يتجوز يدور على واحدة في مستواه أو أقل من مستواه المادي
وكل شريحة في المجتمع فيها الكويس والوحش
quote
أسمحلى يا أخ يوسف ....
أختلف معاك فى النقطة دى بالذات ....
أنا كنت بفكر زيك كدة لحد ما مريت بتجربة صعبة أوى خلتنى أتغير 180 درجة ....
من غير ما أدخل فى تفاصيل الأفضل أن الواحد منا يرتبط بواحدة فى نفس مستواة الأجتماعى ....
أو أعلى حاجة بسيطة لكن مايخدش أبدآ واحدة أقل منة لأنة هيتعب معاها جدآ جدآ جدآ قبل و بعد الجواز ....
فعلا انا شايف ان التقارب فى المستوى الاجتماعى والثقافى والمادى مهم جدا
وعلى فكره ياجماعه لاتوجد علاقه بين المستوى الاجتماعى والفقر او الغنا او التعليم وخلافه
الموضوع ده بيعتمد على التربيه والبيئه اللى اتنشاء فيها الانسان والاختلاف فى هذا الموضوع احد اهم اسباب فشل الزواج