فعلا الواحد مش قادر يفهم اذا كانت العريات الصينى وحشة ولا حلوة وخصوصا ان الناس اللى بتقول كدة او كدة من اصحاب العربيات الصينى هنا

بس انا فعلا ملاحظ ان العربيات الصينى بقت كتيرة فى الشوارع هل دة لرخص سعرها مع كتر كمالياتها ؟ ولا علشان هى فعلا عربية حلوة ؟

انا بصراحة ماعرفش اى حاجة عن العربية دى غير الكلام اللى بشوفة هنا سواء ناس بتشكر فى العربيات دى او ناس تانية بتلعن فيها وانا عن نفسى ماكونتش رآى نهائى عنها لانى بصراحة شايف انى ماينفعش احكم على عربية فى فترة زمنية قليلة لازم على الاقل العربيات دى تمشيلها مش اقل من 4 سنين علشان الواحد يحكم عليها

طب انا لية كام سؤال وعايز الناس اصحاب العربيات دى يجاوبونى عليهم علشان يساعدونى انى افهم شوية حاجات بفكر فيها ؟؟؟

انا اللى اعرفة ان الواحد لما بيجى يغير اى قطع غيار فى اى عربية غير الصينى ما يرداش يشترى قطع غيار صينى علشان بتكون تعبانة وعلشان كدة رخيصة الواحد بيدور على الالمانى او الايطالى او البلدان اللى بتصنع جودة عالية ومعمرة او اى حاجة غير الصينى واكيد كلنا بنعمل كدة صح ؟؟ ولا اية ؟؟

طب اللى يخلى الواحد يخاف يشترى قطع غيار صينى اية اللى يخلية يجيب عربية كاملة صينى ؟؟
واذا كانت الناس دى مشهورة فى السوق ان قطع غيارها سيئة دة من قبل نزول العربيات الصينى اصلا فهل من المعقول اننا نجيب منهم عربيات وتكون معمرة ولا هتكون زى قطع الغيار الصينى ؟؟؟

بالامانة مش حاجة تخوف رغم ان اى حاجة جديدة لازم يكون فيها ريسك واللى بيعمل الريسك دة ياما شجاع اوى او مش فارقة معاة الفلوس وبيحب يجرب او حاجة تالتة ما ينفعش اقولها

بالنسبة للناس اللى معاها العربيات الصينى يا ترى لما بتيجى تغير قطع غيار بتغيرها بصينى ولا بتجيب حاجة تانية ودة نقطة يا ريت الناس تجاوبنا عليها علشان الغير يستفيد

على فكرة انا لا انقد هذة السيارات بس بصراحة لسة ماعنديش الثقة فى انى اديها رآى نهائى وخصوصا انى بحكم شغلى مع الصينين 8 سنين اعرف عنهم حاجة مهمة جدا جدا جدا وهى ان الناس دى بتديلك منتج على قد فلوسك
يعنى لو عاوز عربية تكلفتها 20 الف هتعملهالك وفى نفس الوقت ممكن تعملك نفس العربية ب 40 الف وهنا هيكون فرق كبير فى الخامات المستخدمة ومدى تحملها وجودتها رغم ان الاتنين هيكون ليهم نفس الشكل النهائى بس مع الاستخدام هتحس بالفرق


يا ريت نفيد ونستفيد