الموضوع: هام الدخول للجميع

المشاركة الأصلية كتبت بواسطة zika9909

بلاش عرية زيرو من أولها، هات لك عربية مستعملة نضيفة و اتعلم عليها -بس لازم يكون حد معاك- و امتحن عليها، ممكن تجيب سوزوكي ماروتي عربية حلوة و صغيرة و مانيوال -دي أهم حاجة- و بعد ما تتعلم و تتقن السواقة في مصر بيعها -و مش هتخسر فيها كتير- و هات العربية إللي تعجبك.
لو عايز تجيب زيرو أنت حر بس اعمل حسابك إنها هتتخبط يعني هتتخبط حتى لو أنت ماشي صح، كفاية الشوارع الجانبية الضيقة دي بالنسبة للمبتدئين معاناة (أنا أول مرة سوقت عربيتنا في شارع جانبي ضيق خبطت الحيطة).


ده آخر مكاتب تعليم السواقة و مش هتتعلم منهم أكتر من كده، أنا من رأيي إنك تاخد خطوات جادة في استخراج الرخصة، الرخصة أهم حاجة في الموضوع، و ماتصدقش إللي يقول لك "أنا بسوق من غير رخصة عادي"، لو اتمسكت من غير رخصة احتمال تتحبس ده غير الغرامة (اقرأ المادة 75 النقطة رقم 3 في اللينك ده ظˆط²ط§ط±ط© ط§ظ„ط¯ط§ط®ظ„ظٹط© - ظ„ط§ط¦ط.ط© ط§ظ„ظ…ط®ط§ظ„ظپط§طھ ظˆط§ظ„ط¹ظ‚ظˆط¨ط§طھ ط§ظ„ظ…ط±ظˆط±ظٹط©) .


نصيحة أخوية: اتعلم على عربية مانيوال، المانيوال سهل بس محتاج فترة تعود، و كلنا بنسوق مانيوال و بنغير من غير مانبص و من غير مانفكر كمان،الموضوع في الأول صعب جدًا و بتلاقي نفسك بتبص على عصاية الفتيس عشان تغير و كمان تلاقي نفسك ناسي أنت على أنهي غيار ووووووووو ...... بس بعد كده بيبقى ممتع جدًا جدًا جدًا، ممكن تكون العربية إللي أنت بتتعلم عليها تعبانة و غياراتها تقيلة عشان كده أنت بتعاني معاها.
اتعلم على عربية مانيوال و ماتستسهلش.


بالنسبة للجملة إللي مكتوبة بخط كبير و تحتها خط المفروض تكون كده "أنا بعتمد على الله ثم عليكم"، لما تقول "أنا بعتمد على الله و عليكم" كده أنت بتخلينا مع ربنا في مستوى واحد و ده غلط، لكن لما تقول "أنا بعتمد على الله ثم عليكم" كده أنت بتعتمد على ربنا أولاً و بعد كده إحنا ثانيًا. أتمنى تكون وضحت.

أنا مش بحبذ تشتري عربية زيرو، بس لو أنت مصمم على زيرو يستحسن تكون صغيرة و مانيوال و مش مهم أوبشنز عشان السعر.
لو هتروح مكتب تعليم سواقة تاني ياريت تحاول تفرض سيطرتك على الحصة، يعني تخليه يعلمك الحاجات إللي ناقصاك و يكون عارف كده من الأول، و احجز أقل عدد من الحصص لأنهم دايمًا بيقولوا "الـ 10 حصص بكذا جنيه" ساعتها قوله "طب في 5 حصص؟" مش هيقدر يقول "لأ" لأنه محتاج فلوس.

شكرا ليك جدا عزيزي على النصائح الرائعة
انا بستفاد كل يوم منكم والحمد لله
انا شكلي حروح مكتب سواقة واخذ حصص زيادة واشوف اخرتها يارب بس اسوق كويس علشان خلاص الواحد زهق من المواصلات والبهدلة الي بتحصل كل يوم
شكرا مرة تانية ليك نصايحك ونصايح الشباب كلها بتفيدني والحمد لله
شكرا اعزائي مرة تانية

المشاركة الأصلية كتبت بواسطة mbx4e

السواقه زي ماقل وهاقول تاني وتالت ورابع و 5 و6 عدوا انتم بقى .......هههههههههههههههههههه
السواقه = خبره = مهاره تكتسب بالممارسه
تتعلمها على مرحلتين
1- مرحلة تعلم واتقان تشغيل الاله ( ازاي تعرف تغير تسوق تمسك طاره تدوس فرامل ودبرياج تسقط غيار تزود غيار وهاكذا ...........)
2-مرحلة تعلم استخدام الاله (يعني ازاي تعرف تمشي بالعربيه في الشارع وفي وسط عربيات وتحود يمين او شمال ازاي تعرف تحسب مسافات او تفرمل ازاي تقدر حركه المرور قدامك فاتهدي او تسرع ازاي تستخدم مراياتك وانت ماشي وانت بتركن ....................الخ)
طبعا مش هاتعرف توصل للمرحله التانيه وانت مستريح وتعرف تتعامل مع المواقف العجيبه الموجوده في الشارع ومرور الشوارع هنا في بلدنا غير لما تكون اتمكنت من المرحله الاولى بشكل كبير او بنسبه 60 او 70 % على الاقل
جرب ومش هاتندم
بالنسبه للعربيه دي حاجه تخصك ممكن تجبلك حاجه (غير 128 او 127 )مانصحكش بيها لو هاتجبها عشان تتعلم سواقه وبعدين تقلبها مش هاتستمتع بالسواقه او بالبلدي مش هاتريحك في عملية تعلم السواقه في مكاتب تعلم سواقه بتعلم على اكسنت وفيرنا ولانوس حاول تغير مكتب السواقه وتاخد لك حصتين مخصوص بعربيه ظريفه كدا وقلي ايه رايك ؟ انصحك تجرب الاكسنت

صحيح انا معاك في كل النقاط لكن انا علشان الوقت ضيق عندي ف هضطر اروح مكتب سواقة من تاني بس انا دلوقتي شفت مكتب محترم جداً على حسب تجربة كم واحد سألتهم واتعلموا عندو وكانو بيشكروا فيه قوي هجرب واقولكم الي يحصل معايا وان شاء الله خير يارب

بص يا جميل كل حاجه وليها بدايه محدش اتولد علي الدريكسيون السواقه محتاجه ممارسه ومفيش مانع تاخد خبرات عيرك لانها اكيد حتفيدك ونصيحتي ليك انك تمشي بالراحه ومتديش ودنك للكلاكسات اللي حتصدعك واهتم بالمرايات والتشييك كويس ابقل ما تغير الحاره وقبل ما تقف مره واحده بص في المرايه الداخليه عشان اللي وراك ويخبطكش وشوف لو سقت اتوماتك في الاول يبقي حتفضل تسوق اتوماتك وربنا يوفقك

السلام عليكم ورحمه الله و بركاته
بص أنا من رأيى ان السواقه ممارسه و مش عايزه زهق و عايزه شويه جرأه لأن مفيش حد بيستحمل حد ولا حد بيقدر ده لسه بيتعلم ده أنا اللى كان يدينى كلاكس كنت بشر ميه وأعرق و حالتى كانت بتبقادلوقتى اللى بيدينى كلاكس بعذبه بمعنى الكلمه
و موضوع خايف تخبط حد ده عادى جدا فى الأول بس بتقبقى قلقان شويه عشان مش حافظ العربيه و تقدير المسافات مش بيبقى مظبوط ود مع الوقت بيتظبط
و الركنه دى بتبقى أخر حاجه فى السواقه وفى رأيى أصعبها بس برضه بالوقت وانا الحمدلله ربنا رزقنى بجيران كويسين كانت بتصبر على فى الركنه و محدش كان بيرضى يركنهالى و يقولى أركن أنت عشان تتعلم
وفى أقلك أن كل اللى بتقوله ده عادى أى حد فى الأول بيبقى كده بس كله مع الوقت