ازاى اصالحها علشان عايز اخطبها؟؟

**stoon** · 20-08-2011 09:37 PM

اعضاءالمنتدى العزيز المحترم انا عضو جديد عندكم حتى مفيش عندى اى مشاركة بس دايما بحس بروح العائلة جواكم علشان مطولش عليكم عندى مشكلة صعبة مش لاقى لها الحل ؟؟

انا بحب زميلتى فى الشغل وصارحتها وكنا فى الفترة دى بندرس بعض علشان نقرب من بعض اكتر لان ناوى اخطبها وهى برده بترتاح تتكلم معايا وبرده بتحبنى مع ان زميلتى دى منصبها اعلى منى هى مهندسة فى الشركة اللى بشتغل فيها وابوها مهندس وامها دكتورة ومرتبها اعلى منى بمراحل وجميلة ومحترمة جدا جدا وعندها دين وفى الفترة اللى كانت معايا كانت بتقربنى من ربنا وسنها مش كبير 26 سنة وعندها عربية وكنا دايما فى كلامنا عن بيتنا فى المستقبل عامل ازاى واولادنا وحياتنا الجاية
المشكلة انى دايما بحس انى اقل منها علشان المركز انا مجرد ادارى وبالنسبة لمرتبى الاقل منها ودايما فى حساسية منى لاى كلمة تقولها وهى صارحتنى بالموضوع ده وقالت انها على استعداد انها تسيب الشغل علشان موضوع الحساسية ده وانها متمسكة بيا المهم انى دايما باجى عليها دايما متعمد انى اهنها ودايما اجرحها وغيرة عامية بدون سبب وهى تسامحنى المرة دى مش عايزة تسامحنى وطلبت منى انى ماقولش لها حتى اسف وكنت جايب لها هدية علشان عيد ميلادها رجعتها وحذرتنى من الكلام معاها وبصراحة عندها حق انا اللى غلطان

طالب منكم نصيحة اعمل ايه علشان اصالحها انا عايز اخطبها دى الانسانة الوحيدة اللى حسيت معاها
بالحب غير كل البنات التانية لانها مش زى اى بنت اعمل ايه؟؟؟ سامحونى لو طريقتى فى الكلام مش منسقة
متشكر ليكم

**lovely_love** · 20-08-2011 09:48 PM

السلام عليكم
انا اتشرفت انى اكون اول الى ردوا عليك وانا زيك مليش مشاركات كتير بس حاسس بحيرتك
الى هقولهولك حاجة واحدة لو متاكد من حبها بجد حاول تقابلها فى مكان لوحدكوا حتى لو من غير معاد يعنى مكان بتروحوا برا الشغل وانت عارف مواعيدها استناها بعد الشغل المهم تكونوا لوحدكوا بقدر المستطاع ومفيش مانع من اى تصرف عيالى شوية يعنى تستناها تحت بيتها حاجة زى كدة البنات مهما كانوا كبار فى السن والمركز بيحبوا الاسلوب دا اوى وكلمتين حلوين صدقنى كل حاجة هترجع زى الاول والمهم بعد كدة معاملتك ليها بعد كدة

**Ashraf_Ibrahim** · 20-08-2011 10:01 PM

اولا اهلا وسهلا بيك معانا على نايل موتورز بيتك الاول والاخير ان شاء الله
بص يا صديقي قبل ما اقلك تصالحها ازاي وايه الحل لازم تعرف المشكلة
المشكلة انك حاسس بنقص -معلش تقبل كلامي بس احنا بندردش مع بعض- نتيجة اختلاف المنصب بينك وبينها ونتيجة اختلاف المرتب واختلاف المستوى الاجتماعي بينكم انتوا الاتنين
بص يا صديقي
نتيجة احساسك دا بتتعمد انك تهينها وتقلل من وجودها وتحرجها علشان تشعر او تقضي على احساس النقص دا وتحس انك انت المسيطر وانت اللي احسن منها مش هي اللي احسن منك
قبل ما تفكر ازاي تصالحها فكر ليه انت بتفكر بالطريقة دي؟!
الحب يا صديقي مبيكونش فيه غيره !
يعني لما هيا تبقا كويسة دا شيء المفروض يفرحك ويسعدك لأنهم ساعتها هيقولوا عليها دي مراة فلان او حبيبة فلان او ما شابه
لو انت بتحبها فعلا يبقا المفروض تدفعها للأمام وللأمان
الحب اللي يخلي الواحد يرجع لورا دا مش حب دا دمار وهلاك
هي ايوة مستعدة انها تتخلى عن شغلها دا علشانك وانا طبعا بحترمها جدا على قرارها دا
بس اقف مع نفسك لحظة وفكر
انت عارف يعني ايه انها تتخلى عن الي وصلتله دا علشانك؟!
يعني بتراهن عليك بالدنيا وما فيها
يعني معتقدة وواثقة انها مش هتندم في اختيارها وقرارها دا
عارف لو انت جيت في يوم وخيبت ظنها وخليتها تشعر بالندم انها سابت شغلها علشانك ايه اللي هيحصل؟!
هيكون شرخ كبير جدا في العلاقة بينكم !
لازم تحترمها وتعرف انك لما بتحترمها وتدفعها للأمام وتشجعها انت كدة بتحترم نفسك وبتتحرك انت للأمام
مينفعش ابدا انك تكسرها علشان ترضي غرورك علشان تحس انك الأفضل
اللي فات دا كان أصل المشكلة
طيب نيجي للحل :-
الحل بينقسم لجزئين
الجزء الاول انك تعالج نفسك والجزء التاني انك تصالحها
ايه رايك ان الجزء التاني اسهل من الأول بكتير جدا !
هنبتدي من الجزء التاني علشان هو اسهل
ازاي تصالحها ؟!
البنات بتحب الحاجات المجنونة
هاتلها بوكيه ورد مثلا او انزل استناها من بدري جنب عربيتها قبل ما تنزل هي من الشغل او ابعتلها هدية مباشرة او ابعتلها ماسيدج حلوة او فكر في اي فكرة مجنونة تخليك تبتدي معاها كلام
ولما تبتدي معاها كلام قلها انا عارف اني غلطان
استخدم سلاح الاعتراف بالخطأ دا سلاح قوي جدا
وابتدي اتناقش معاها
قلها انا عرفت المشكلة فين وهي اني حاسس اني اقلك منك وانك كتيرة عليا وشوية كلام جميل كدة وانا عايزك تقفي جنبي وتساعديني -مفيش اي ضعف انك تقول الكلام دا - هي هتبقا انت بعد ما ترتبطوا ببعض
واستجديها
وقلها ان الحل السليم للقصة دي انكم ترتبطوا علشان تقربوا من بعض اكتر وبالتالي الحواجز تتشال اسرع وتقدروا انتوا الاتنين تساعدوا بعض بصورة اكبر

الحل للقسم الاول دا بقا هينبع منك انت
لو مقدرتش تفضلها على نفسك يبقا انت مش بتحبها يا صديقي !
لو حسيت بغيرة منها يبقا انت مش بتحبها!
احساسك بأنها كتير عليك وانك اقل منها او هي احسن منك دا دليل الحب مش حاجة المفروض تخوفك بس دا حاجة المفروض تخليك تحافظ عليها مش تخنقها وتقتلها
اتمنى يا رب اني اكون ساعدتك ويكون في كلامي علاج لمشكلتك يا رب ويارب ترتبطوا قريبا ومتنساش بقا تعزمني على الفرح يمكن آجي اشهد على كتب الكتاب بنفسي كمان :d

**A.Saad** · 20-08-2011 10:46 PM

الزواج لا بد فيه من التكافؤ الاجتماعى والعلمى والمادى

لو عايز تصالحها
ابعت لها ميل او رسالة فيها اعتذار رقيق

**SYD** · 20-08-2011 10:58 PM

بص يا صاح

بالنسبة للكلام الي الأخوة قالوه انا مش هضيف عليه كتير

موضوع المصالحة it's very easy
مع كامل احترامي للأخوات "الستات عقلهم صغير حبتين" احم احم ، حد سمع حاجة
وبكلمتين حلوين كل شئ انتهي ونفتح صفحة جديدة وانا هتغير وانتي لازم تستحمليني وانا اعصابي اليومين دوول مشدودة والهري دة كله

بالنسبة للموضوع الي بالك فيه
اوعي تخليها تسيب الشغل
انت الي لازم تحسن وضعك
سيب انت الشغل

ذاكر شوية ، خد شهادات ، خد كورسات ، اعمل دبلومة

اتصرف بأي شكل خلال فترة الخطوبة انشاء الله انك تحاول تحسن دخلك هتلاقي نفسك بقيت زي الفل انشاء الله

وماتنساناش في البونبوني والشربات

وربنا يتمم بخير انشاء الله

وكل عام وانتم بخير

والله المستعان
،
،

**Vet.Mera** · 20-08-2011 11:38 PM

المشاركة الأصلية كتبت بواسطة stoon

متشكر جداً ياجماعة لكل ردودكم الجميلة وانا فعلا متاكد ان مشكلة الحساسية دى فيا ونفسى اتخلص منها ولازم اتخلص منها علشان ماخسرش احسن انسانة فى الدنيا بس المشكلة فى انى اصالحها اخر مرة بعتت ليا رسالة طلبت منى انى اسبها وانى ماحولش اصالحها وابعد عنها ورجعت هديتى ليها وكان اسلوبها جامد اعمل ايه من فضلكم؟علشان عايز اطلبها للخطوبة؟

بص بقى بالرغم من ان SYD كلامه غايظني

بس بصراحة هو عنده حق

البنات و الله طيبين جدا و سهل اوي تصالحها
اقولك على حاجة؟
ابعتلها بوكيه ورد على مكتبها البنات بيعشقوا الورد
ابعتلها رسايل على الموبايل
حطلها sticky note على العربية بتاعتها فيها كلمتين انا اسف و هعمل المستحيل عشان تسامحيني
شوف هي ايه اكتر حاجة هي بتحبها و اعملها
حاول تحتويها بكل الطرق و صلي قضاء حاجة و ان شاء الله ربنا يعمل الخير

**SYD** · 20-08-2011 11:54 PM

المشاركة الأصلية كتبت بواسطة vet.mera

بص بقى بالرغم من ان syd كلامه غايظني

بس بصراحة هو عنده حق :m_yes[1]:
البنات و الله طيبين جدا و سهل اوي تصالحها
اقولك على حاجة؟
ابعتلها بوكيه ورد على مكتبها البنات بيعشقوا الورد
ابعتلها رسايل على الموبايل
حطلها sticky note على العربية بتاعتها فيها كلمتين انا اسف و هعمل المستحيل عشان تسامحيني
شوف هي ايه اكتر حاجة هي بتحبها و اعملها
حاول تحتويها بكل الطرق و صلي قضاء حاجة و ان شاء الله ربنا يعمل الخير

انا بعتذر ليكي ولكل الأخوات هنا في المنتدي
ارجوكي اقبلي اعتذاري

بس انا فعلا اقصد ان البنانيت قلبهم طيب وبيسامحوا وينسوا بسرعة لما بتلاقيك حسيت بغلطك وبتعتذر عنه
وممكن يكون دة كبر دماغ

اعمل بهذه النصائح وانشاء الله خير

وحاول مرة واتنين وتلاتة
ايه ياباشا احنا الي هنقولك ولا ايه ؟؟؟؟!!

شد حيلك

والله المستعان
،
،

-

الموضوع: ازاى اصالحها علشان عايز اخطبها؟؟

LinkBack

أدوات الموضوع

عرض

-

-

-

-

المواضيع المتشابهه

ازاى اقدر اعرف !!!! خش علشان تعرف !!!!

ازاى ادهن التابلوه الفبر علشان يرجع لأصله؟؟

عايز أسألكم عن اسم site علشان vin #

افك فرش الكراسي ازاى علشان اغسله

حط ثمن للعربيه دي.....علشان عايز اشتريها

الكلمات الدلالية لهذا الموضوع

المفضلات

المفضلات

ضوابط المشاركة