الموضوع: مساعدة في تقييم ميجان 2006

السلام عليكم ورحمة الله يا وحوش الرينو كل سنة وانتم طيبين جميعاً

اخوكم اول مشاركة ليه في قسم الرينو بعد ما بعت عربيتى الدايو لانوس وبدور دلوقت على ميجان نضيفة تكون 2006 او 2007

دلوقتي انا لسه جاى من بره كنت بتفرج على عربية ميجان 2006 العربية هاي لاين بانورما صاحبها بيقول انها مش رشة بره وانا لاحظت انها فلاً نضيفة وواضح انها بويه الفابريقة وكمان الأنتريور بتاعها حالته ممتازة طبعاُ الفرش الجلد والشكل الخارجي بتاعها ممتاز اتفرجت كويس ولاحظت فيها التى :-
1- في خبطتين في الجانبين من الخلف خبطة فوق العجلة الخلفية شمال وخبطه قدام العجلة الخلفية يمين والأتنين معمولين على البارد بنضافة جداُ ومش باينين اساساَ
2- مراية الباب اليمين بتعمل صوت احتكاك تروس لما بتفتح وبيفضل الصوت شغال على طول لازم تتقفل وتتفتح باليد عشان الصوت ميظهرش
3- فتحة السقف بتعلق ومش بترضى تفتح
4- الجنطين المامين بهم عوجتين بساط في الشفف
5- اللباد الى ورا الموتور في صدر العربية شكله مخلوع وواقع على الثروتل بدى
6- صوت الموتور فيه نقره خفيفه كده مش عارف هوه كده ولا انا حساس زياده عن اللزوم
7- صوت الموتور بيعلى مع التكييف ولاحظت صوت رنه في الشكمان لما بكبس بنزين
8- العربية عاملة 99 الف كم وبتكتب سيرفيس سون

انا كده كده وبناء على نصايح الناس هنا ناوي اكشف في التوكيل بس قبل ما اروح التوكيل واغرم 550 جنيه كشف علوز اعرف رايكم فيها هل العيوب الى ذكرتها ديه تخليني اصرف نظر عنها ..
ولا اتغاضى عن الحاجات ديه واصلحها بعدين كالما مش في اساسيات العربية ..
وهل السعر كده مناسب ولا تنزل ولو هتنزل تنزل لحد كام

اسف لو كنت رغيت كتير بس ديه اول مره اتعامل في رينو وخايف اتدبس في عربية تعبانه مع ان الناس كلها مخوفاني منها بس انا مقتنع بيها برضه وإن شاء الله مش هجيب غير ميجان

اكشف كويس اوى اوى على البوية الاول يعنى هات معاك سمكرى بيفهم و خليه يكشف على بوية العربية لو فعلا فابريقة برة و جوة اكشف فى التوكيل لو فى لخبطة فى الكلام شوف غيرها و اوعى تتسرع و انت بتشترى ميجان براحتك خالص