عايزين نعمل موضوع على المصنعية اللى بياخدوها ميكانيكية الفورد فى مصر ومين احسنهم فى المصنعية بس بشرط يكون اداؤه جيد علشان بصراحة انا حاسس ان ميكانيكية الفورد حراقين شوية نبدأ بيا أنا وتجربتى مع أغلى واحد فيهم الاسطى قطب اللى ورشته فى الضاهر غيرت عنده فى عربية فوكاس 1 مو2004 مانيوال غيرت بليتين كاتينه + سير كاتينه+ سير دينامو +فلتر هواء +فلتر بنزين طلب فيهم 300 جنيه مصنعية الحقيقة استغربت انا قلت ممكن يطلب 200 جنيه بالكتير على اساس انه غالى حاولت انزل معاه ل200 جنيه مارضيش أبدا وبعد اخد ورد وكانت اول مرة اتعامل معاه فى تركيب قطع غيار نزلهم ل250 جنيه بالعافية وده بجميله علشان اول مره ولقيته بيقولى الدنيا غليت اشمعنى الميكانيكا مش ها تغلى ولقيتوا بيبرر بان مافيش حاجة بتنقص من العربية كل مسمار بيركب فى مطرحه وكأن ده مش المفروض انه يحصل من أى ميكانيكى وانه كفاية انه هو بيعملوا وده دليله على جودة صنعته حبيت اسأله على مصنعية تركيب جوز مساعدين أمامى لاقيته بيقولى 300 جنيه مصنعية تركيب جوز مساعدين امامى وكانه بيركبهم لمكوك الفضاء ديسكفرى علما بانه طبعا زيه زى الصنايعية الكبار مابيحطش ايده فى اى شغل ده حتى مابصش على الشغل ماشى ازاى ولا بيتعمل ازاى وحمدت ربنا انه ماشتغلشى بايده والا كان طلب اكثر الله يرحم ايام سيد عبده ميكانيكى الجولف اللى كان بيقوله بياخده علشان بيراعى ربنا فى طلب اجرته فياريت كل واحد يعرضلنا تجربته مع ميكانيكية الفورد علشان يبقى عندنا فكرة ولو بسيطة عن اسعارهم قبل مانتعامل معاهم