الموضوع: مصنعية ميكانيكية الفورد

بص انا ليا تجربه مع قطب ده بس اعتقد انه موش كفئ ولا حاجه وفيه صنايعيه احسن منه واقل بكتيير في الحساب زي علي سبيل المثال احمد فرج والحج رمضان بس المشكله ان قطب ده معرووف قوي بس في الحقيقه ان فيه ناس احسن منه كتيير قوي
نصيحه شخصيه مني ان الناس هنا تخلي قطب ده اخر واحد ممكن يروحو له لانه لا علميا ولا ماليا ولا سمسريا كويس
وده رأي
اللي عاوز ياخد بيه هوا حر
واللي عجبو ربنا يوفقه

اول ماأشتريت العربية روحت بيها لقطب علشان يشيك عليها وده كان دلع مني لأني كنت كاشف عليها كويس وماشاء الله مكنش فيها الهوا ... ركب وساق وانا جنبه لف حوالي 3 دقائق بالعربية ولقيته بيقول لي العربية محتاجة عفشة كاملة قدام وورا برغم ان العفشة ماشاء الله لاقوة الا بالله وخليته كتب لي طلباته علشان اعرف على الاقل يعملوا كام فلوس ... لقيتهم هيعملوا حوالي 3000 جنيه ومش كل الطلبات كانت اصلية كمان. وطبعا كان هيرزعله 1000 جنيه مصنعية مثلا !!!! حسبي الله ونعم الوكيل. سيد خليل اللي جنب محطة مترو انفاق حلمية الزيتون ممتاز في تشخيص الأعطال وبيشتغل في العربية بالشوكة والسكينة من كتر ماهو محسوك ونضيف في شغله ومصنعيته تعتبر غالية نوعا ما لكن شايف انه يستاهلها بصراحة

http://www.nilemotors.net/Nile/177966-a.html
http://www.nilemotors.net/Nile/86532-a.html

نفس الموضوع بالسنتي حصل معايا بردو
رحتله بعربيه علشان اشتريها
طلعلي القطط الفطسانه فيها ( ونفس الكلام علي العفشه - تقريبا دي سبوبه كويسه بالنسبه له)
حسبي الله ونعم الوكيل
مع انه رايح جاي من الجامع
لو سمحتو يا جماعه اي حد له تجربه مريره مع اللي اسمه قطب ده
يا ريت يكتبها
علشان الناس تتعلم وتفهم وتعم الفائده

طيب واضح ان التجارب كتير هنا
اولا تجربتي مع السيد احمد فرج
تغير جوان انتيك المنافولد و ظبط تكيهات
المصنعية 150 جنيه
الصنعة الانتيك كان مشروخ اتلحم بالمادتين ماشي
التكيهات طبعا ظبطها و العربية بارده و ظبطها غلط و العربية بقت تفصل في السلانسيه و رجعت تاني يوم و اعد يلعب في البوابة و وظبط التكيهات تاني بعد ما اتظربنت و اصريت انه يفتح التكيهات و ميعدش يفتي
لما سالتة عن العفشة قالي محتاج تغير جلب مقصات و بارات داخلي و خارجي و مصنعية 250 جنيه
بس طبعا مكنتش ناوي اخليه يلمس العربية تاني
اه صحيح لعبة في بوابة المنافولد خلى العربية فضلت متعفرتة ما يقرب من سنة و هو و غيرة فضلوا يقولوا ده ايدلر و تي بي و طبعا انا شارح الحل للموضوع ده بالتفصيل في الموضوع ده و لحد النهارده مغيرتش لا الايدلر و لا التي بي اس و الحمد لله
(تظبيط الفيستا على الكمبيوتر)http://www.nilemotors.net/Nile/80947-a.html
المعلم رمضان
طبعا اعترف اني اتخميت في صنعتة في الاول
اولا تظبيط تكيهات و تنظيف بوابة المنافولد و الايدلر العربية ظبطت نسبيا بعد العك الاول لكن مرجعتش زي ما كانت
طبعا في الاول اخد مصنيعة 50 جنيه
ثانيا تغير جوز مقصات امامي و بارتين خارجي
و كاوتش كوبلن
مصنيعة 150 جنيه و بالعافية
الصنعة روحت اظبط زوايا تاني يوم لقيتة مركب بارة خارجية غلط و مش معشقة مكانها طبعا روحت و غيرها
المقصات بقي خلاني اجيب من عند الخليل و راح اختارهم و قالى دول الايطالى و كان مكتوب كدة على العلبة بس محدش شافهم بعد كدة غير و قال انهم تركي
بس الحمد لله
سالتة على مصنعية تغير اسكاترا قالى 250 جنيه و هو مش بيختارها و لو مجتش كويسة و هاتتغير تاني يبقي مصنعية تانية
رغم اني في الوقت ده كنت بتعامل معاه بقالي فترة
و بعد كدة العربية رجعت تتعفرت تاني ( نتيجة العك الاول ) و قالى هات بوابة استيراد بالتي بي اس و ادلر جديد ما علينا النكتة بقي ان تغيرهم مصنيعتة 50 جنيه
الاسطى حمدي
تغير ماستر دواسة و ماستر دبرياج داخلى
مصنعية 160 جنيه
الصنعة طبعا مكنش فيه مشكلة من القطع المتغيرة لكن معرفش يظبط العصايا زي ما كانت و روحت تاني يوم ظبطها عند قطب في 5 دقائق

بص يا عم جو صوابع ايدك موش زي بعضها
وبعديين ممكن واحد يكون خبرته في عربيه وتمكنه منها اكتر من عربيات تاني
واللي اعرفو ان عربيتك فيستا وانا اما بتكلم عن احمد فرج بتكلم علي شغله في المونديو
وبعديين سيييبك
واضح من معظم اراء الناس اللي اتعاملو مع قطب انه فيه حاجه موش مظبوطه سواء في الكوميسيون اللي بيعملو في قطع الغيار علي قفا الزبون
او في تفتيح شغل وقطع غيار
صدقني قطب والله ماهو مظبوط وانا قابلتو كذا مره
وبعدين الوحيد اللي بيشكر في قطب هوا انتا بس يا جوزيف
جايز معاك انتا بس علشان انتا بتتعامل معاه من زمان
ياريت نقفل موضوع قطب ده علشان انتا بتزعل مني وانا موش عاوز ازعلك

تجربتى مع قطب
اولا العربية كان الار بى ام بيعلى اوى مع صوت عالى جدا من الموتور لما اهدى السرعة كذا واحد كشف وقالى ايدلر غيرته العيب اتظبط بعدبها بيومين رجع تانى المهم روحت لقطب علشان يظبطها راح اول ما روحتله راح سايقها بعدين رجع الورشة شال فيشة حساس الكيلومتر بعدين قال جرب كده المهم الصوت راح فعلا بس السحب بقى ميت اكنى راكب كارو مش عربية المهم قالى الحساس ده مش مهم انك تشيل الفيشة والعيب عندك اسطوانة دبرياج !!!!!

اسطوانة دبرياج ايه دى جديدة اه العيب من اسطوانة دبرياج روحت قلتله السلام عليكم

روحت بعديها تكنو وان بعد ما ركبت الفيشة والسحب رجع روعة اللى فى الحرفيين حطيت الجهاز عليها راح قالى العيب تى بى اس المهم غيرته والعيب فضل هو هو بعديها بيوم روحت لميكانيكى فورد والدى بيتعامل معاه على طول فى صقر قريش ساق العربية مرة راح باصص كده لقا خرطوم بايظ اول ما غيره العيب راح والخرطوم ده حد مننا فيه 20 جنيه

وانا مش بلوم اسطى قطب لانه ممكن يكون خانه التوفيق فى تشخيص العيب بس انه يقولى اسطوانة دبرياج بايظة دى مش سهلة برضوا و تكنو وان برضوا خلونى اشترى تى بى اس من غير فايدة وراميه عندى اهو لان العيب مش منه وكذلك الايدلر " بس الايدلر تكنو وان مش هما اللى قالولى غيره"

المهم بقى من الحكاية دى ان انا بتعامل مع ميكانيكى قدام بيتنا مش متخصص فى الفورد لكن فاهم كل جزء فيها وحافظها وبيجيله فورد كتير ,,, يعنى الىل انا عايز اقوله الفورد عربية عادية فى التصليح فى حالة ان الميكانيكى حافظها وبيفهم مش شرط يكون متخصص لان انا لسه عامل عنده شغل كبير فى الموتور ناس كانوا بيقولوا الشغل ده عمره ما هيرجعلك الموتور تانى بحالته واشترى موتور وريح دماغك لكن الحمد لله رجع احسن مما كان الحمد لله

انا شايف ان احمد فرج احسنهم و أسرعهم فى الشغل لكن مش افضل ميكانيكى فورد
ليا تجربه مع قطب و فشلت زى معظمكوا و حمدى بتاع مدينة نصر و ماحبتش انى اكمل التجربه
فيه ميكانيكى اسمه مهندس احمد فى المعادى و ده كان شغال فى توكيل فورد ايام رجب و شغال معاه ميكانيكى اسمه وليد
انا شايف انهم معقولين بس برضه ممكن بيخونهم تشخيص العربيه كويس
و فيهم ميزه و عيب فى نفس الوقت ان كل حاجه انت هتغيرها فى العربيه من عندهم جديده او مستعمله و ده ممكن يبقى عندهم فرصه انهم يشتغلوك
انا رحت مره واحده و ظبطولى العربيه كويس قوى بس اتكلفت برضه كتير
غير ان وليد ده بيشتغل لوحده و احمد ده باشا مش بيحط ايده فى حاجه فالموضوع بطئ جدآ جدآ عندهم
فعلشان كده رجعت لأحمد فرج علشان بيخلص بسرعه