الموضوع: ايه رأيكم في التريوس من جوا

اسف للتكرار ،ولكني تعديت 6 دقائق في أعادة التحرير


عزيزي

انا من ملاك التيريوس الخليجي حاليا
وصورتها بنفس اللون جنب اسمي

شوف صعب انك تقارن صالون مع جيب!!!

بالنسبة لي تجهيزاتها من جوة كويسة جدا
والتبلوة بتاعها برضة فية كل الأساسيات والأوبشنز
طبعا" حسب الموديل اللي انت بتشترية

بس في ملاحظة هامة جدا"
اذا كنت من اللي بيحبوا السرعة و(الحرق)
يعني السواقة الشبابي ، فلا أنصحك بها
لأنها لن تجاري الصالون في ذلك لأنها جيب
اساسا وجر ودفع علي 4 عجلات دائم

بس بالنسبة لي انا فهي السيارة المنطقية جدا
من حيث الآتي:
1- ياباني 100% وبأشراف تويوتا نفسها
(عندي قطع كتير في السيارة مكتوب عليها تويوتا)
2- جيب وليس صالون
3- 1500 سي سي (ضرايب + تراخيص + بنزين)
4- سيارة عالية وبتنط من فوق الأرصفة والطرقات العجيبة بسلاسة
5- شكل خارجي جميل جدا
6- العجيب بها انك عل 120 كم تحس انك مشي 80 بشهادة اكثر من شخص
7- مساحات تخزين متعددة منها مخفي (بجد مخفي جدا - للأشياء الثمينة)
8- كرسي السائق مريح جدا ولة عدة أوضاع للراحة
9- سي دي وليس كاسيت (رغم اني افضل الكاسيت)
الراديو من نوع Rds وهو يظهر معلومات من المحطة المرسلة
مثل أسم المحطة ، اسم اغنية ، أخبار معينة
10- بها وظيفة بيانات متعددة الرحلات وحساب أستهلاك البنزين ودرجة الحرارة الخارجية
11- عالية وانت جالس داخلها تري الطريق بصورة واضحة وعلي بعد

مالايعجبني فيها:
1- صوت الموتور عالي شوية (بينعم بعد كام الف)
2- عدد لفات موتور عالي (100 كم = 3000 لفة دقيقة)
3- مع التكييف بتبقي مكتومة شوية)
4- لايوجد مكان لعلبة كلينكس!!! رغم وجود مساحات متعددة
5- لايوجد مؤشر للحرارة ، ضوء فقط
6- لايوجد ولاعات سجائر (انا لاأدخن!!) ولكن هناك 2 مخرج أمامي وبالخلف

وربنا يوفقك في الأختيار

خير

ربنا يسهل

ok MR BOTY
انت الى حد ما طمنتني وريحتني
بما انك من ملاك العربيه
يعني اكتر واحد ممكن تفيدني
معلش هاتقل عليك شويه واستفسر منك عن:

انا ناوي اجيب العربيه اللي هي دفع ثنائي مش رباعي

ايه رأيك فيها؟؟

وحضرتك بتقول:
( سيارة عالية وبتنط من فوق الأرصفة والطرقات العجيبة بسلاسة)

هل ده يفرق في العربيه الدفع الثنائي؟؟

وسؤال هل السياره ناشفه في سواقتها؟؟
هل تحس بالمطبات والهزات اللي في الشارع بسهوله وتخليك غير مستريح في السواقه؟؟

هل التكيف بتاعها ضعيف ام متوسط ام قوي؟؟

ايه رأيك في مستوى الرفاهيه اللي في العربيه؟ ممكن تقييم العربيه من حيث الرفاهيه؟

عزيزي

علي فكرة انا عندي الأوتوماتيك وليس الجير العادي

- بالعكس الدفع الثنائي نظريا حايكون اخف علي الموتور

- لن تؤثر كثيرا طلوع المطبات ، انما بيأثر طبعا مع الرمل والغرز

- ليست ناشفة ابدا ، بالعكس كويسة جدا ومريحة

- التكييف مش ضعيف كويس جدا" - طبعا هنا بالكويت الحرارة فلة
لكن هناك حاجة مش عاجباني وهي ان الكمبريسور بيصل
اوتوماتيك (ليس لوجود عيوب) ولك بعد ان يبرد يبدأ في الفصل
علي مدد زمنية ، ودة مش مشكلة ، ولكن التحميل علي الموتور عند
اعادة التشغيل بعد الفصل بيبقي محسوس شوية علي السرعات العالية

- الرفاهية طبعا اقل من الصالون - مقارنة بسيارة ابنتي الأوبترا 2006
الخليجي برضة ، بس انت ممكن تروش نفسك لو حبيت بأضافات كدة واحدة واحدة
زي ما أنا عملت
- زودت كاميرا لاسلكي فوق النمرة الخلفبة وشاشة داخلية (طبعا في الجيب صعب تشوف وراك)
- انذار مع ريموت وغلق ابواب (لاتنزل عندنا بالكويت بريموت ،مانع سرقة فقط)
- اشتريت من بريطانيا دلايات خلف العجل الخلفي للحماية من طين الطريق
أصلي نفس لون العربية
- قطعة لاسلكي علي الأف ام مع التليفون سوني اريكسون لسماع الأغاني Mp3
علي الراديو مع أظهار اسم الأغنية علي شاشة الراديو وكمان اسم المتصل اذا جاء
أتصال وانت بتسمع الأغاني
- ركبت مشمع شفاف سميك علي كامل الشنطة الخلفية للحماية
- ركبت شبكة مطاطية للشنطة الخلفية لتثبيت اي أكياس مشتريات

وفية معاا هنا الأخ ابو عبد الله عندة فكرة كويسة جدا عن التيريوس لأنة من ملاكها

يا ترى ممكن الاخ عبدالله يقول لنا ازاي ممكن ندلع العربيه اكتر

وجزاكم الله خيرا
يا مستر بوتي

انت فعلا بترفع من روحب المعنويه تجاه التريوس

والله يا ابو عبدالله هي عاجباني جدا
بس من جوه حاسس انها اقل من اي عربيه تانيه

هي دي مشكلتي مش اكتر

عموما انا لسه في مرحلة التفكير

وربنا يسهل

انا بس منتظر لاخر الشهر ثم هاخد القرار ان شاء الله