الموضوع: "السادة توكيل السبع لقد نفذ رصيدكم"

ما هو ده يا كريم .. اللي بنوصله للاعضاء .. ان توكيل نيسان .. محترم جدا عن باقى التوكيلات .. واننا كملاك لسيارات نيسان بنشوف منهم الكويس .. ووارد ان يكون فى مشاكل عندهم حتى لو بنسبة 30% او 40% بس بتتحل المشكلة وبيرضوا العميل كمان على عكس التوكيلات الاخرى اللى فيها مشاكل بنسبة 60% على الاقل او اكتر كمان ومش بيحلوا حاجة ولا مشكلة ولا ارضاء عميل .. وبيخلوا صاحب المشكلة ممكن يتجنن .. ويلف حوالين نفسه ..

وعمرى ما حمشى راي على حد ابدا .. وكلامى مش لفرد واحد .. انا كلامى لكل الاعضاء اللى فى القسم عندى .. فاهمين التوكيل .. واللى منهم ليه مشكلة بنوضحله وبنفهمه ايه اللى بيحصل معاه وبنطمنه .. وده بناء على وجودى فى قسم نيسان وكمنسق للقسم بيحل المشاكل جوة وبره القسم .. وبدورى لازم اهدى الامور .. واحل مشاكل الاعضاء بهدوء .. لان قسمنا القسم الوحيد اللى بيحل مشاكل الاعضاء فى التوكيل ولو بنسبة 50% .. ومن الاقسام اللى اصبحت خدمية .. ومينفعش اقول هجس .. وفى بعض الاعضاء بتقول دول ناس مثلا بهايم .. او ربنا ينتقم منهم .. او دول حرامية .. او او كلام من هذا القبيل .. وده بيكون كلام بعض الاعضاء فى نقد اى مشكلة عند طرحها .. او من الاعضاء اللى بيتعاطفوا مع صاحب المشكلة فى ردودهم .. ووالكل بيدخل يرخ الكلام بالطريقة دى سواء فى قسمنا .. وده مش من سياسة المنتدى ولا قوانينه .. وكمان مش من سياسة قسم نيسان .. وقسم نيسان جزء من نايل وقوانينه طبعا ..

وكلامى ده كله مش بقصد بيه واحد .. عشان محدش يقولى انا مقولتش كل ده .. وان ده بيحصل فى المنتدى عادى .. لان النقد اللى بالاسلوب ده وفيه كلام بالطريقة دى .. مش مظبوط ابدا .. واحنا مش بنمنع اى شخص ينقد وينقل تجربته ويقول رائيه .. ولكن بدون تجريح او استهزاء لحد

وحتى اى انسان بيحصل معاه مشكلة .. بنقوله اهدا وكل الامور حتتحل بالهدوء لانك معاك ربنا سبحانه وتعالى ومعاك نيسان وكمان معاك ضمان ومعاك حق ومعاك نايل موتورز ومعاك اعضائه ..

وبخصوص المشكلة الحالية لاخونا وصديقى العزيز اسامة .. ان حبيت اوضح ان فى توكيلات اخرى مش بيهتموا بالعميل ابدا حتى لو هو صاحب حق والعميل بيدخل معاهم فى مناهدات ومماطلات .. عشان يثبت حقه .. وده الحمد لله مش موجود فى نيسان .. وكل بياخد حقه .. حتى لو اخدت وقت

ولو فى مشكلة عدت من ايد توكيل نيسان .. بيعترفوا بالخطا .. وبيحلوا وبيرضوا العميل .. وحتى كمان بيعوضوه باى تعوضيات ان كان فى خطا كبير جدا

وانا معاكم ان المفروض ان الواحد يروح المكان الفلانى ويتعمل ليه كل حاجة بالمظبوط جداااا .... لكن فى مصر .. صعب جدا انه يتحقق .. ومش فى مجالات السيارات بس .. فى اى مجال

وفى اعضاء فى القسم وافدين جدد .. احيانا ممكن يشخصوا مشكلتهم غلط .. بهاجس الوسواس .. والعربية مفهاش حاجة .. والكل يدخل ويتعاطف مع العضو ويقوله اعمل شكوى واعمل قضية .. ويطلع العربية مفهاش حاجة ابدا .. وكلامى ده بناء على موضوعات فى القسم وتجارب .. مش على مشكلة اسامة تحديدا ..
وعشان كدا بنبه وبنعرف الاعضاء القدامى اللى فى اقسام اخرى .. ان وارد قبل ما ندخل ونتعاطف ان ممكن ميكنش فى حاجة .. عشان منقلقش صاحب المشكلة

هل بقا اللى بيدخل القسم بيقلب فى موضوعاته وعارف اللى بقوله !! مفيش غير الاعضاء القسم اللى متابعينه فقط .. فلازم نعرف الاعضاء بكدا

وقسم نيسان من الاقسام .. اللى الحمد لله بقا ليها سمعة طيبة مع توكيل نيسان .. وغير كدا متداخلين معاهم جدا فى حل اغلب المشاكل للاعضاء عن اى قسم اخر .. فمتداخلين فى الصورة .. ولينا عيون فى التوكيل .. بنقدر نحس ونعرف كل شى على الحقيقة وعلى الطبيعة وبنعرف الامور ماشية ازاى

وحضرتكم .. دوروا ورايا فى القسم كويس وتتاكدوا من كلامى ده ..

والحمد لله الواحد بيجرى ورا مصالح الناس لوجه الله .. وبتكلم بناء على اللى بشوفه من هنا وهناك ومن دخولى جوة الاماكن دى .. وده كان كلامى اللى نابع من وجودى الدائم فى القسم مع مشاكل الاعضاء ووجودى معاهم فى التوكيل

وبندور على المصلحة فى النهاية للاعضاء .. وان الامور تتحل على خير ويسر

ويا اسامة باشا انا اللى اجبلك العربية لغاية عندك فى دهب .. وفرصة اشوفك ونقعد مع بعض .. ولا نسيت وعدك !

وبخصوص ان محدش قالك مثلا متفتحش وتزود المية وتعمل ايه .. انا عن نفسى ماشى بقاعدة .. مفتحش الكابوت طالما العربية فى الضمان .. ولو حصل حاجة غلط .. يبقا هما اللى يتصرفوا طالما العربية فى الضمان .. وبكون ماشى حاطط فى بطنى بطيخة صيفى .. ولما الضمان يخلص .. ابتدى افتح وابص واتعامل
ويمكن حصل ده معاك لان كان فى مشكلة قديمة .. خلتك حبيت تتطمن فكنت قلقان .. فعملت الحكاية دى بسلامة نية .. ولو كنت مكانك بنفس تجربتك كنت حعمل كدا بتلقائية

وقدر الله ما شاء فعل .. وان شاء الله خير .. وباذن الله لو عايز اخد العربية اجربها بنفسى مفيش مشكلة .. انا عيونى ليك يا حبى .. عشان تكون مطمن .. واجرب بنفسى كمان عشان المصدقية


ومنورنا حقيقى والله يا شهدى باشا .. فى قسم نيسان .. وعايزينك معانا على طول ويارب يبقا معاك نيسان جوك جوهرة نيسان القادمة بقوة

تحياتى للجميع