الموضوع: كان نفسى الفرامل تسعفنى

الموضوع دا حصل معايا من حوالى 3 شهور ...

المكان ... طريق القبارى

سبب التواجد ... أجيب صاحبى اللى بيصلح عربيته فى الحرفيين

الخسائر ... تدمير وش العربية

السبب ... ميكروباص معفن + ميكروباص ابن حلال + أرض مزيتة

تكلفة التصليح ... 14000

مقاس خط الفرامل حتى احتضان الميكروباص .... 16 متر

عجائب الأرتطام ... القرأن أشتغل من نفسه - والدتى كانت نايمة وقامت مخدودة

حكمة ربنا ... نزلت أخويا وخالى عند كارفور ... واخويا دا مش بيفكر فى حزام الأمان اطلاقا . كان زمانه طار من على الكرسى

النصيحة ... حزام الأمان للأمان + عدم الأعتماد على فرامل الانسر بومة

قطع الغيار الجديده :

اكصدام - ريداتير - سربنتينة - حامل اكصدام - شبكة - صدر - كشافات - كبوت - قربة ريداتير - طبلة كبوت - المراوح - 4 قواعد الوتور - عمة فلتر الهواء - ترس كاتينة - وش التاكيهات - الشنب - سير الكاتينة - طاره الدركسيون - مشط الجير بوكس

واليكم التفاصيل ...

صاحبى عنده مشكلة فى عربيته . قلتله نروح نصلحها ... قالى خلاص أعدى عليك ونروح ... قلتله لأ روح انتا وانا جى وراك عشان لو العربية هتتأخر أوصلك ..

السرعة كانت 110 .. ماشى فى الحارة اللى فى النص كعادتى ... مشروع ترامكو قذر على الشمال وميكروباص على اليمين راكن ...

الترامكو مسك نص الحارة اللى فى النص والشمال ... جيت انا يمين على أساس انى اغرز بين الأتنين ... راح الترامكو شاديد وقفل الغرزة ... مفيش قدامى غير الفرامل

قبل ما اكمل احب اوضح ان الحادثة كانت فى 10 ثوانى حد اقصى

المهم دوست فرامل ... مفيش غير صوت فى الأرض وبس ... على فكرة الكاوتش والتيل جداد أوى ... ولما أدركت انها مش ممكن تقف حاولت اتفاداه بس كان الوقت فات ...

سواق الميكروباص اللى كان راكن سمع صوت الفرامل راح كابس بنزين عشان يقلل عزم الخبطة " ربنا يباركله " كان زمانى فى الموتور عنده ...

تفاصيل لحظة الأرتطام ...

العربية رشقت فى الجنب الشمال من الميكروباص ... واثناء الخبطة ... ايدى ضربت الكاسيت والقرأن اشتغل ... الوسادة الحنونه كانت فى وشى وصدرى ... بطلت الموتور وجريت بره العربية ...

الأيرباج ضربته كانت قوية جدا وعمرى ما كنت اتخيل انها تكون بالقوة دى ... حتى كل الناس كانت عايزة تطلب الأسعاف عشان انا فضلت اتألم جدا من منطقة الصدر وكانوا فاكرين ان عندى كسر فى القفص الصدرى ...

بعد ما خرجت من العربية فضلت اتأمل شكلها كده وكأنى بعاتبها .. لما فقت من الصدمة كلمت أخويا وصاحبى ... وصلوا بسرعة الحمدلله ... وكلمت صاحبى اللى كنت رايح معاه أصلا ...

الناس بتعدى وتتفرج كعادة المصريين ودا سبب شلل فى حركة الطريق ... وبعد دقايق العربية كانت على الكساحة ... وانا كنت مع صاحبى اللى مرداش يروحنى البيت عشان أخرج من الموووود ...

كان عندى وجع جامد فى رجلى الشمال ومنطقة الصدر حوالى 3 أيام وراح لوحده ...

نفاصيل التصليح ...

كرهت دنيتى + احباط + عرفت مكونات العربية اللى مكنتش اعرف عنها اى حاجة + استغلال تجار قطع الغيار + مشاكل كتير كنت هموت بسببها أصعبها ان الجير بوكس مكنش بيخلى العربية تمشى ولمبة التابلوه مش ثابتة بس الحمد لله طلع سليم وكانت المشكلة فى المشط " اللى لما انتا تحرك ال joy stick هوا يقوم محرك الجير بوكس "


كفايه كده عشان جالى احباط

الصور انا مش عارف احملها ازاى

قدر الله وما شاء فعل
الحمد لله على كل شيء
المهم ان حضرتك ووالدتك بخير وانها جت في حتة حديدة
وفي الاول وفي الاخر الفلوس بتروح وبتيجي