الموضوع: هل الاسبراتير الاكترونى يفرق فى السحب عن الاسبراتير العادى

السلام عليكم و رحمة الله و بركاته

بص, يا باشا, أنا هأقولك عن تجربتى مع الموضوع ده, أنا عربيتى بيجو 505 مو 1980 و طبعا اسبراتير عادى, أبلاتين و كوندنسر عاديين بيركبوا جوه الاسبراتير و كنت دايما بلاحظ أن العربية استجابتها بطيئة بالذات فى السلانسيه, يعنى, لما أدوس بنزين, ألاقى استجابة العربية بطيئة و ممكن ترجرج شوية قبل ما تجمع و كده و كنت دايما بروح للميكانيكى يقعد يظبط فيها و مرة يغير الأبلاتين و مرة نغير طقم البوجيهات, لدرجة أنى مرة و الله العظيم, جبتلها بوجيهات Champion من محل اسمه Canadian tire فى كندا, لأنى كنت شاكك أن كل البوجيهات اللى هنا فى مصر بايظة !!!!!!!!!!!, لحد ماربنا سبحانه وتعالى, من عليا و عرفت أن فيه حاجة بتركب جوه الاسبراتير العادى اللى نازل فى العربية بدل الأبلاتين و الكوندنسر العاديين اللى عندى, اسمه الأبلاتين الالكترونى أو طقم الكترونى عرفت مكان بيعه فى القاهرة -أنا من المنصورة- و تمنه بتاع 175 جنيه, و فعلا اشتريته و ركبته فى القاهرة عند ميكانيكى ورا المحل اللى أنا جايبه منه, الكلام ده كان فى فبراير-2011 اللى فات, و الحمد لله, من ساعتها ماحتجتش أنى أروح للميكانيكى خااااااااااالص و تجميع العربية ممتاز جدا و الحمد لله.

خلى بالك, أنا اتكلمت عن أبلاتين الكترونى مش اسبراتير الكترونى, المشكلة عندى, أن لما الأبلاتين الالكترونى ده يبوظ بعد ألأف شر و بعد عمر طوييييييييييييييييل, ماحدش هنا فى المنصورة بيبيعه و بالتالى, لازم أركب ابلاتين و كوندنسر عاديين لحد مانزل القاهرة و أجيب واحد و ده فى حد ذاته عيب, عشان كده, أنا قررت, أنى هفضل ماشى بيه, لحد مايضرب و أقوم شارى اسبراتير الكترونى بالموبينة بتاعته بالأسلاك بتاعته -اللى بينزل فى ال505 الموديلات الأعلى- بحوالى 500 جنيه من هنا من المنصورة و ده بيبقاله مشط, كل مايضرب, أجيبله مشط جديد من هنا من المنصورة و أركبه.

الفرق اللى أنا حسيت بيه فى تجميع العربية -مش زيادة فى قوة الموتور- بالذات فى السلانسية كان فرق وهمى جدا, زى الفرق فى التجميع -مش قوة الموتور- بين السيات 133 و الألفاروميو 159 مثلا, لأن الأبلاتين و الكوندسر العاديين, كانوا مخليينى كاره العربية فعلا, لأنها عربية كبيرة و طويلة و عريضة و لما أدوس بنزين لازم تكح الأول قبل ماتنطلق !!!!!!!!!!!!

تخيل الفرق ده أنا حسيت بيه لمجرد أنى ركبت أبلاتين الكترونى مكان الأبلاتين و الكوندنسر العاديين اللى كانوا عندى, رغم أنه ركب على الاسبراتير القديم و كل حاجة زى ماهى, فمابالك, لما تغير الاسبراتير العادى كله و تركب الالكترونى .

تسلموا يا رجالة على الرد انا انشاء الله نازل بكرة الحرفيين اشترى اسبراتير الكترونى وفتيس لعربية واحد صاحبى كمااان بلمرة وربنا يكرم ويجى بسعر حلو انا نازل معايا 170 جنية مش عارف بقى هيجبوة ولا لاء بس ربنا يكرم وشكرااا تانى لاهتمااامكم