الموضوع: الموبينه بتاعت عربيتي قطعت مرة واحدة

السلام عليكم يا شباب

اول أمس وانا راجع من شغلي أخدت نقرة كان فيها شوية مياة وبعدها بحوالي 300 متر لقيت العربية بتبطل لوحدها فوقفت يمين (عند منطقة تسمي الفسطاط) و نزلت اشوف فيه ايه بالنظر كده لم اجد شيء ولا حتي فيه مياة جت علي مكونات الكهرباء ولا اي حاجه

حاولت ادور مش بتدور مرة و اتنين و ثلاثة و ...... و في الأخر بدأت اشوف فيه ايه
فكيت فلتر البنزين و نظفته و بيطلع ينزين و فكيت الخرطوم عن المحرك برضه جواه ضغط بنزين كويس
البوابة و الهواء تمام
بصيت لقيت فيه حرق خفيف كده عن خروج الكهرباء في البوبينه و بيقول ان عمرها انتهي
وكان جنبي ميكانيكي فجه لواحده من غير ما ابعتله ولا اكلمه وحتي بعتلي اكتر من عيل يقولولي ان فيه ميكانيكي اهه قلتلهم مش عايزه
المهم جه قلتله المشكلة ان البوبينه قطعت كهرباء وفيه زميل جاي دلوقتي و هنروح نشتري واحده
فقعد يقلي طيب نجرب و نبص قلتله ماشي المهم جربنا مع بعض و التجربة في الأخر انتجت نفس كلامي فقعد يقول هي العربية دي كمبيوتر قلتله ايوه المهم عرفته اني فاهم و بفضل الله بتشتغل ازاي المحركات دي و عارف اطلع العيب ازاي المهم وانا شغال طلعت افوميتر و طقم النكيه من الشنطة و بدأت أقيس شوية حاجات قام قلي طيب تأمرني بحاجه قلتله لأ شكرا و قام ماشي ههههههههههههههه لواحده من غير كلام هههههههههههه

المهم جه زميلي و زقينا العربية ركناها و قفلتها و نزلت اقرب مكان للمنطقة دي وهو التوفيقية و اشتريت بوبينه أخري و ركبتها و كله تمام و الحمد لله

نيجي بقه لنوع البوبينه :-
اللي لقيته كله نوعين الأول صيني و ده ب 200 جنيه و الثاني يقال انه ألماني ولكن بأنواع مختلفه ( مايلي - في بي - ... ) لقيتهم كهم من 330 الي 390 و للأسف مكتوب بره انها ألماني و علي البوبينه نفسها مكتوب بارت نمبر ليها و اسم المصنع ( مايلي او ...) بس و لكنها أنظف بكتير شكلا و موضوعا عن الصيني التانيه و اكتشفت ان الألماني دول كلهم نوع واحد و اعتقد انه يا تركي يا صيني و هما عملين ليها العلبة هنا وبيطبعو عليها اسم الشركة اللي علي العلبة و كل واحد بيبيعها بسعر مختلف علي حسب مزاجه

المهم اني اشتريتها في الأخر مايلي ب 330 جنيه و الحمد لله شغالة زي الفل ولكن انا شايف ان الأفضل تشتريها استيراد ألماني أصلي و علي التجربة و هتكون أرخض من كده ولكن انا كنت مضطر لأن كنا بقينا المغرب و المنطقة دي مقطوعه أساسا و مشبوهه ولو اتأخرت علي العربية كان ممكن بنسبة كبيرة ارج ملقيهاش فاشتريت الأقرب لي و خلاص و الله المستعان

من التجربة دي أحب اقول ان لما العربية تبطل منك تماما وانت ماشي فجأة فده حاجه من اتنين يا كهرباء يا بنزين تدور في سكة دي و دي لحد متوصل للعيب و ربنا يستر طريقنا جيمعا

وبالمناسبة احب أشكر الأخ الفاضل و العضو (windofchange)ايهاب باشا علي مساعدته لي في معرفة أسعار البوبينة و انواعها قبل ما أشتري جزاه الله خيرا لأني كنت كلمته عشان لو عنده بوبينه موتوره القديم أشتريها منه ولكنه كان ركبها مع الموتور الجديد
وعرض ايضا انه يشتريها و يجيلي ولكنه كان زميلي في العمل هو الأقرب مسافة مني و الأسرع في انهاء المشكلة و الحمد لله علي كل شيء