الموضوع: الكربراتير بيشرق

المشاركة الأصلية كتبت بواسطة zegzaag

لا استنى افضل لحد ما تعرف العيب فين لسبب اننا في مصر يعني مش هيقولك لو الكربراتير سليم لا لازم ياخد فلوس ويشتغل

سؤال بأه يا اخي العزيز طقم الكهربا اخبارو ايه ؟ يعني الوجيهات والابلاتين والكوندنسر ؟

انا هكلمك عن نفسي لما بتبطل بيبقى فيه مشكلتين اما الكربراتير او طقم كهربا
تبطيلت الكربراتير بتحس العربيه بتتخنق يعني البنزين بتحسو بيعافر عشان يوصل لحد ما تحسها بتتخنق وبتغرغر وتكركر والكلام ده وتروح مبطله

اما تبطيلت طقم الكهربا فهيا تبطيله عاديه وناعمه ومبتحسش ان الموتور او الكربراتير بيتخنق او في دربكه لا تبطيله زي الحرير

سامحني اخوك ماشي بالبركه فقلت انتقلك تجربتي يمكن تفيد ولا حاجه اصل الصنايعيه دول اعوذ بالله

انا شاكر ليك جدا
الاول ... الاسبراتير عندى اوتوماتيك .. يعنى ما فيش ابلاتين و لا كوندنسر .. بس فيه حاجة اسمها المشط او الموديول ... و هو باظ منى مرة قبل كدة ... الاول العربية كانت بتطفى منى و هى ماشية و ترجع تدور تانى لوحدها .. لغاية ما يوم اسود بعيد عنك ... طفت منى و انا بجرى على 100 كم و حلفت براس ابوها ما هى دايرة تانى ... لغاية لما ربنا كرمنى ب ميكانيكى و عرف يغيرلى الموديول ده بواحد من ماركة تانية و شغال كويس

المشكلة ان دى المرة التانية الى تبطل بنفس الطريقة ... و انا بهدى علشان اخد مطب .. بس العربية بطلت بهدوء جدا .. و بطلت مرة واحدة... و رجعت دارت تانى بعد حوالى ربع ساعة .. ولا كان فيه حاجة .. مشيت عادى خالص
انا كمان ماشى بالبركة و كله على الله :)

المشاركة الأصلية كتبت بواسطة mohamed desoky

السلام عليكم ورحمة الله وبركاته وكل عام وانتم بخير من حكم خبرتى المشكله الاولى من العوامه وفوق العوامه الابره هيا الابره دى باستمرار فى كل الكربراتير ات بتعلق والسبب فى التعليقه البنزين الوسخ مع مرور الوقت بيتجمع عند البليه المهم لما العربيه تشرق هتفك العمه وتنفخ لحد البنزين الزياده مايتبخر دى نقطه لكن فى حاجه بنعمله بنخبط خبطه بسيطه على مسمار العوامه النحاس اللى جواه الابره المعلقه من التراب الناعم والمشكله هتروح بلاش تفك الابره لان ظبطتها صعبه حتى على الميكانيكى اهم حاجه بعدالكلام ده فلتر البنزين كل شهر بلكتير تغيره طالما بنزين 80 لازم فلتر باستمرار يتغير ولو الموضوع استمر روح بلعربيه لبتاع كربراتير وسيبه هو يفك الكربراتير والموتور بارد دى نصيحتى وربنا يوفقك ؟

كل عام و حضرتك بالصحة و السلامة ....
يااااااه فكرتنى بالذى مضى :)

بص يا باشا .... فى عجالة ... الكربراتير كان بيعمل الحركة دى على فترات متباعدة .... مرة كل شهرين تقريبا .... و جه على اواخر 2014 .. فضل يعمل الموضوع ده كل اسبوع تقريبا ... و بعد كدة يوميا ....
انا وديته لابراهيم بتاع الكربراتيرات الى فى شبرا ... عملوا اكس و باب و ظبطه .. و غير مسامير الهواء ... و فضلت المشكلة
و ديته بعد شهرين تقريبا لواحد تانى متخخصص كربراتير .. فضل يظبط فى الابرة و العوامة .... و اول ما خرجت من عنده ... برضوا العربية شرقت

ده كله .. بعد تغير جوانات و تغير الابرة
النهاية كانت عند ميكانيكى معرفة .. فك الكربراتير مرتين .. و فضل يظبط فيه طول اليوم .... و فى اخر الليل ... لاحظ التالى ...

خرطوم البنزين الى جاى من اللطرمبة فيه رعشة !!!! الكربراتير مش بيستجيب لظبط مسامير الهواء !!!!
و الملاحظة الاخيرة .... طرمبة البنزين مفيهاش خط راجع !!!!!!!

و كان القرار باستخدام طرمبة بنزين كهربا خارجية ..... و قد كان هذا هو الحل

طرمبة الينزين الميكانيكية ... لما قدمت ... بقت بتضح بنزين اكتر من الى بيستوعبها الكربراتير .. و احيانا بتزيد لدرجة ان الكربراتير بيشرق و يفصل

انا اشتريت طرمبة ميكانيكية جديدة بخط راجع ... و عملتلها خط راجع للتانك .. و مخلى الطرمبة الكهربا احتياطى ...
و الكربراتير شغال افضل كتير من الاول بالطبع

بمناسبة الفلاتر .... انا مركب فلترين ... اوحد عادى .. و التانى فلتر بنزين خارجى بتاع عربية فيها حقن اليكترونى ... زى الفيرنا .. او اللانوس .. او البى واى دى ... و بغيرهم باستمرار