انا هعجز وانا قاعد ف البيت

**yahyanaabil** · 10-10-2011 03:36 PM

المشاركة الأصلية كتبت بواسطة akramlail

المشكلة يا جماعة ان حال البلد بقى زى الزفت وبعد مكان الواحد قبل الثورة عندة امل 40% انة يلاقى حاجة كويسة
جت الثورة قلنا الحال هيتعدل ونفسنا تتفتح عالحياة من تانى
اسودت وطينت اكتر واكتر وكل يوم بتطين اكتر من اللى قبلة
واذ فوجئت ان كل الناس بعد الثورة بتتكلم فى كل حاجة ماعدا البطالة
زى ميكون مفيش اى مشكلة اصلا

بص يا معلم الموضوع مش موضوع ثوره العمليه عرض وطلب وللأسف العرض اكتر بكتييييير من الطلب و عاوز اقولك حاجه من الاخر متعرضهاش عشان البلد كلها ماشيه بالتعريض يا وديع :))

**mody_halawa** · 10-10-2011 04:04 PM

والله يا باشا كلنا عندنا المشكلة دى
انا زيك على فكرة انا برضة خريج حقوق وجايب تقدير عالى فى الكلية ومقدم فى النيابة العامة ومجلس الدولة والمفروض ان الطبيعى لدفعتى انها كانت تظهر فى شهر 12 اللى جاى وكنت مش عاوز اعمل كارنية النقابة علشان سمعت انها بتاثر فى التعيين .. فا قلت استنى السنة دى لحد لما اشوف النتيجة بتاعت النيابة .. المهم الثورة قامت والحمد لله البلد وقفت وكان عندى مقابلة تفتيش قضائى يوم 10/2/2011 وطبعا المقابلة اتاجلت لاجل غير مسمى ولحد دلوقتى الدفعة اللى قبلى ما اتعينتش (2009 ) وانا دفعتى هيطبقو عليها قانون جديد الله واعلم اية هوة .. وطبعا فى دفعة تانية اتخرجت بعدى .. المهم دورت فى كل حتة على شغل مناسب مفييييييييييييش
قولت انزل اتدرب فى المحاماة علشان مضيعش سنتين من عمرى من غير ما اكون عملت اى حاجة نزلت اتدربت مع محامى بالظبط اسبوعين وعرفت انى مستحييييييييييييييييييل هكون محامى لان فعلا المحامى دة لازم يكون فيه مواصفات خاصة (( مواصفات عمرهااا ما كانت فيا ولا هتكون فيا )) وطبعا قدمت فى المحكمة وبرضة موضوع المحكمة دة شكله حوار من حوارات الحكومة ولا هتعين ولا اى حاجة
وطبعا فكرت فى السفر واهلى رفضو لانى الولد الوحيد ومينفعش اسافر واسيبهم
وفكرت اعمل مشروع وبرضة مش لاقى مشروع اعملة

**ALshahba** · 23-10-2011 08:57 PM

انا ما قراتش كل الصفحات
لكن فى المختصر .... اخوك اكبر منك وعديت التلاتين وعندي اولاد ومدارس ........ ومفيش شغل
وعمال ابعت وابعت ...... وعندي اصحاب وعلاقات ..... لكن مفيش وسطه جديه

وبالنسبة للمشاريع ... دخلت مشروع اهبل ........ وماجبش حتي راس ماله (900ج) ومستني حتي الان اجيب حقه وربنا يسهل , انا مش بعقدك ولا بدايقك ...ابدا,,, انا بنقل تجربتي
وعمال ابعت تاني وان شاء الله مش حيأس حتي الاقي عمل محترم او غير محترم (بس حلال)

**WINRAR** · 24-10-2011 07:44 PM

ياجماعه عادى طيب ما انا كنت بعمل انتر فيو فى شركه وبعد الراجل ما شلفطنى من كتر الاسئله , ولما لاقانى صامد قدامو , راح باصص فى cv وقالى ايه ده انت خريج 2010 وما اشتغلتش خالص . قلتله حضرتك شايف ايه اللى مكتوب عندك , قالى طيب وانت ايه اللى قاعدك من غير شغل , عموما هانبقى نكلمك بعدين . وشكرا !!!!!!!!!!!

**Lord of the flies** · 24-10-2011 09:28 PM

يا شباب تفائلوا بالخير تجدوه ان شاء الله.
نصيحتى هى نفس نصيحه الاستاذ مزاجنجى و ناتجه عن تجربتى الشخصيه و هى اشتغل اى حاجة و ربك بيسهل.

على فكرة شركه لينك طلبه ناس كتير والى يحب يقدم
LINKdotNET - Careers

**calipha3** · 24-10-2011 10:02 PM

الصبر حلو انا مثلا بقالي 6 سنين من غير شغل عادي خالص :)) لا ياس مع الحياه و محدش واخد منها حاجه اهم يومين بنقضيهم و نرتاح خالص :(

**akramlail** · 29-10-2011 07:36 PM

الصبرر يا جماعة وان شاء الله مش هيأس طول ما الرزق بايد ربنا مش اى حد تانى يبقى مفيش يأس
قوووووووووووووول يارب على طول وادعى
انا مكنتش ان هيبقى فى كم التجارب دى اللى شبهى بس وجودكم قوانى اكتر وخلانى انى مش لوحدى
وعموما انا لما بدعى بدعى لينا كلنا مش انا بس

**حماده المصري** · 19-11-2011 05:17 AM

الرزق بايد ربنا ومحدش يعرف هيجي امت ولا ازاي

بس مش عارف حاسس ان الواحد مهما دور لو ملوش نصيب في حاجه اكيد مش هتبقى ليه بس برضو قلقان جدا من نصيبي

انا خريج اعلام قسم تسويق واعلان مجالي كله وسايط فعلا زي ممكن اي مجال في مصر كله وسايط

شوفت بالهبل وسايط وازاي ان في اماكن محدش يقدر يدخلها وحتى لو اتقبل ممكن تلاقي على الويتنج ليست سنين وازاي ممكن بسهوله شديده بواسطه تدخل وتشتغل في مكان زي ده ومرتب متحلمش بيه

بصراحه الشغل الي موجود في البلد دلوقتي ياما مبيعات يا اما خدمه عملاء كول سنتر

بالنسبه للكول سنتر وجع دماغ كان زمان فلوسه كويسه لانه في تثبيت دلوقتي عقود مؤقته ووجع دماغ

**AutoTycoon** · 30-11-2011 12:08 AM

بصراحه الشغل الي موجود في البلد دلوقتي ياما مبيعات يا اما خدمه عملاء كول سنتر

يا اما صيادلة...

**elgdawy2007** · 12-01-2012 03:11 AM

المشاركة الأصلية كتبت بواسطة yahyanaabil

فعلا اسكندريه الشغل فيها قليل فحت رغم ان فيها 55 % من الصناعات البتروليه بس شركات البترول ديه لناس معينه او على الاقل محتاج واحد ليك جوه الشركه يدخل الcv بتاعك جوه عشان يتبص فيه
انا شايف مشاركه بتقول ان الشركات الكبيره مش بتقبل القرايب الكلام ده فعلا موجود بس حبر على ورق و الوسايط بتكسر اى قانون فى الدنيا بس الواحد لازم يكون ايجابى ويحاول فى كل حته
يا جدعان الشركات اللى موجوده فى مدينه نصر بس قد اللى موجوده فى اسكندريه اربع مرات

كلامك صح جدا وعلى فكره انا عندى 44 سنه ومن اسكندريه ومشتغلتش اى شغل عدل لغايه دلوئت وكنت فاتح محل بيع مستلزمات كمبيوتر ومع الاسف مش عاوز اقولك جو السوق شكله ايه وخصوصا بعد الثوره الحال نايم اوى وناس كتير بتدفع ايجار كل شهر من جيبها لاصحاب المحلات ومش عاوز اقولك مبلغ الايجار الشهرى كام عشان متتخضش ولما زهقت قولت اشترى سياره نيسان واشغلها وناس كتير كلمونى بخصوص الموضوع ده وقالولى هاتها انت بس وحنشغلك بيها لانى كنت رافض اصلا انى اجيب سياره واعطيها لحد تانى يسوقها لانى مطمئنش للعمل ده لان مع الاسف سيارتى فى الاخر حترجع توكتوك وبعد مجبتها اهى مركونه فى الشارع منتظره فرج ربنا يعنى حطيت 93000 جنيه مركونه فى الشارع اهى وحتى الناس اليى كانوا بيقولوا هات سياره ونشغلهالك فى شركه بترول او اى شركه اجنبيه دلوئت بيقولوا اصل الحال نايم كتير وخصوصا بعد الثوره وهما الاول كانوا مشجعنى جدا على المشروع وقالولى بس المهم لازم السياره تكون موجوده الاول عشان مينفعش تعمل عقد مع شركه من غير السياره وادينى حطيت كل تحويشه عمرى فيها ومرميه فى الشارع ومع الاسف ناس كتير فاكره ان اسكندريه بلد مليانه شغل وهما مع الاسف مش عارفين حاجه خالص اسكندريه شغل شهرين وبس شهر 7 و 8 وشكرا باقى السنه والله المستعان بقى ادينا بنعمل اليى علينا وربنا يوفق الجميع بأذن الله حسبى الله ونعم الوكيل فى احوال البلد بجد