الموضوع: هى الخطوبة أتفشكلت لية ؟

المشاركة الأصلية كتبت بواسطة i_Boy

بسم الله الرحمن الرحيم
استعنا على الشقى بالله
:)

ايها الاخوه والاخوات ....
لا بلاش دي
نخش في المفيد
هم حكايتين ورا بعض للأسف
الاولانيه صداقه واعجاب وحب
والتانيه خطوبه علشان كنت اتلسعت من الشوربه روحت دلقتها :)

الاولى في الجامعه
البنت كانت بسم الله ماشاء الله ( صاروخ جو ارض ) معتقدش اني شوفت احلى منها
طبعا كانت محجبه انا اقصد جمال الوجه ياض منك له
وتربيه وبنت ناس والكلام ده كله
وكان فيه توافق مش طبيعي
والحمد لله كنت بسهر اعد النجوم واحلم بيها وكل حاجه
لدرجه اني كنت مستني الجامعه تخلص باي شكل علشان اتنيل على عيني واتقدملها
لان على كلامها ( بابا مش حيوافق عليك وانت طالب ) مع ملاحظه اني كنت بشتغل من 2 ثانوي :)
المهم بعد قصه حب بكل سلطاتها وبابا غنوجها ومعاها بيبسي وبطاطس كبير
لمده سنتين
اولى وتانيه جامعه
مره واحده اكتشفت ان انا مش قد مقامها العالي
ليه بقى ؟
اولا هي والدها ظابط شرطه
وانا والدي مقاول
( مع ملاحظه ان اللي ابوها بياخده في شهر ابويا بيصرفه في اسبوع )
هي عمامها كلهم ظباط
وانا معنديش غير عم واحد مش ظابط
هي ولادها عايزه تدخلم شرطه
وانا ولادي ( لما ييجوا يعني ) مش حينفع يدخلوا شرطه لاني مش مصري ( لكن معايا الجنسيه )
فجت مره واحده قالت الكلام ده ( بنبره يعلوها الغرور والتكبر )
في اول يوم لقاء في بدايه 3 جامعه
وكانت الاجابه بتاعتي
( كلامك صح انا فعلا منفعلكيش )
والسلام عليكم وخلعت
طبعا بعديها تليفونات ومردتش ورسايل ومردتش برضو
وصحباتها ييجوا يصالحوا ... لكن كنت خلاص بعتها
ليه بقى ؟
قولولي ليه ؟
اقولكم
لان اللي يشتريك تشتريه واللي يبيعك طظ فيه
طبعا زعلت عليها فتره مش قليله وبعدين خلاص نسيت و سيبتها بحسرتها
مش موضوع اني متعوضش ولا اني مغرور وشايف نفسي
الموضوع ببساطه اني مكنش عندي استعداد ارتبط بواحده انا مش مالي عينيها

وكان شعار المرحله لا تراجع ولا استسلام بين قوسين ... ياللي وريتي الفؤاد ايام أليمه ..
انتي والفؤاد على الجزمه القديمه

بالسلامه

:)



الأفتراء التاني :)

بعد الجامعه وبسبب اني ابويا وامي عايزين يخلصوا مني ويجوزوني
ليه مش عارف !!
مع اني طيب
زي محمود الجندي وكمال ابو ريه :))

قرروا يجوزوني بنت خالتي اللي هي من يوم ما اتولدت مقررين ان دي مراتي
هي اصغر مني ب 4 سنوات
يعني انا اتخرجت وهي كانت لسه اولى جامعه ( انا اتخرجت في 5 سنين مش اربعه لان في سنه مجاليش مزاج اروح امتحن )

المهم بنت خالتي دي ملهاش اي عيب نهائي
على الفرازه زي ما بيقولو
ده غير اني ابن خالتها ودي اكبر ميزه فيها هههههههه
المهم العائله كلها كانت في المصيف فقلت لبابا كلمه السر ( وزه )
فقالي لما نرجع
رجعنا البيت
ماما كلمت خالتي
وكلمت البنت ( بنت خالتي يعني )
واتفقنا حنروحلهم يوم الجمعه
علشان نقرا الفاتحه وكده
نسيت اقول حاجه مهمه ...
بنت خالتي دي من اول ما وعت للدنيا حتموت عليا والعائله كلها عارفه كده ( بجد والله مش بمدح يعني في نفسي ولا حاجه )
المهم جينا يوم الجمعه صحيت
لقيت ان ماما وخالتي متخانقين على التليفون لاسباب هبله وعبيطه تتعلق بنعزم مين ومنعزمش مين
على الفراح اللي حيكون لما ربنا يسهل
اه والله
لسه مقرتش الفاتحه واتخانقوا على معازيم الفرح
بعدين الوضع حصل فيه تصعيد وطلعوا لبعض القطط الفطسانه
( للأسف كانوا حوالي خمستلاف قطه )
وفي الاخر روحنا رينا الفاتحه انا ووالدي ووالدتي وخالي الكبير بس ( اللي هو خالها هي كمان )

الكلام ده كان يوم الجمعه واخدين بالكم ؟
الاتنين اللي بعديه كنت حر طليق مره اخرى

ليه بقى ؟
اكتشفت ان اي كلمه اقولهالها تقولها لامها
تغير بنسبه 180 درجه في السلوك للسيطره عليا وعلى الاسره
( يعني عايزين كلمتهم هي اللي تمشي )
اتصل بيا ابوها وانا في الشغل يقولي هات اي غساله تعجبك
اقوله نعم ؟!!!
غساله ايه ؟
مال الغسالات دلوقتي هو احنا نزلنا نجيب حاجه اصلا ؟
المهم هو مفهمش وانا مفهمتش ولما رجعت البيت اكتشفت ان خالتي عايزه غساله الهدوم تكون صنع في وكاله ناسا للفضاء
وامي غلطت غلطه عمرها وقالتلها لما ييجي وقت الحاجات دي نتكلم
وهوووووبااااااا
خالتي دخلت فيها شمال
ماما خدتها بكعب رجلها وشاطت شوطه عاليه مباشره
قفشوا في بعض
وماما قاتلها كلمه السر ...
( البنات على قفا من يشيل )
:)
وقفلت السكه
ونادتني وقالتلي البنت دي مش عايزنها
اكسر كلمه امي يعني ؟
قلت طيب
بغض النظر عن القرابه وان البنت متتعوضش والمميزات اللي فيها كلها ...طظ
وتاني يوم مكالمات من خالتي وبنتها وابوها وطوب الارض ... وبرضو
بعتها واشتريت راحه امي وخدت فوق الشروه راحه دماغي

بعد الرغي ده اللي بعتذر عنه احب اقول كام نصيحه :-

1 دايما اشتري نفسك
2 مش معنى انك بتتعامل كويس انهم حيعاملوك كويس
3 امك ثم امك ثم امك
4 عارفين المثل بتاع يا بخت من نام مظلوم ومنمش ظالم ؟؟؟ غلط مليون في الميه
لانك لو مظلوم مش حيجيلك نوم اساسا

و انت برنس

المشاركة الأصلية كتبت بواسطة icehearted girl

هونا ف نايلي موتورز ولا فلمدينة الفاضلة؟؟؟

معقول كل اللي هنا مظلومين ؟؟؟ والمفتري ديما النص التاني؟؟


بصراحة انا مش شايفة مبرر ان اتنين انفصلوا يتكلموا علي بعض بطريقة مش كويسة

اياكانت دي الحقيقة او وسيلة لكسب تعاطف الناس

اهي حدوتة وخلصت وفيها اللي فيها

توتة توتة...علي رأي السقا..زي حدوتة الحب اللي ديما ولازم تنتهي بــ (مينفعش )

عندك حق اكيد مش كل الناس مظلومة
بس ليه دايما ولازم ( مينفعش ) مفيش بينفع خااااااالص

المشاركة الأصلية كتبت بواسطة shnory

لما الخناقه تشتغل ابعتولي اي عسل صغير يناديني من علي القهوه

ههههههههههههههههههههههه
اى عضو مبتدىء هههههههههههههههه
بمناسبه الموضوع...ابن خالتى كان خاطب بنت محترمه جدا بس للاسف اكتشفنا انها بتشرب حشيش
ايو حشييييييييييييييييييييش
وكان موضوع قالب القاهره الكبرى وضواحيها والمقيمين خارجها مراعاه فروق التوقيت

المشاركة الأصلية كتبت بواسطة ahmed_nubira

ههههههههههههههههههههههه
اى عضو مبتدىء هههههههههههههههه
بمناسبه الموضوع...ابن خالتى كان خاطب بنت محترمه جدا بس للاسف اكتشفنا انها بتشرب حشيش
ايو حشييييييييييييييييييييش
وكان موضوع قالب القاهره الكبرى وضواحيها والمقيمين خارجها مراعاه فروق التوقيت

ايه ده نعم !!!!!! وحياتك احكي اكتشفتو ازاي خلينا ناخد خبره في الحوارات دي

المشاركة الأصلية كتبت بواسطة crash_baskota

ايه ده نعم !!!!!! وحياتك احكي اكتشفتو ازاي خلينا ناخد خبره في الحوارات دي

بنوته محترمه مؤدبه عرفها وراح اتكلم معاها...اتعرفوا ببعض وخطبها ومع الوقت اكتشف ان هيا بتخرج مع اصدقئها اللى كانت فى الكليا معاهم وعرف من صاحبتها انها كانت بتعمل كذا وكذا وكذا وهيا اعترفت بعد كده ...اللى كان غايظنى انها تيجى تكلمك عنيها فى الارض من الكسوف والاحترام سبحااااان الله
على فكره البنت من اسكندريه :)
عموما هو متجوز دلوقتى الحمد لله
بس نصيحه ...محدش يدخل بيت او يناسب حد غير ما يكون متأكد 100 فى 100 ان البنت تستاهل والعكس طبعا