كرايسلر نيون 1997 من السيارات الممتازة في مصر، و قطع غيارها موجودة من غير أي نقص (خاصة موديل 1997 - 1998 - 1999 ) و أسعارها عادية جدا، يعني تقدر تقول زي فورد اسكورت كدة مثلا، و لو هي أغلي حاجة بسيطة من الكوري، دة لأنها بتعيش أكتر بكتير من قطع غيار الكوري و حتي الياباني.
بالنسبة لضريبتها، فهي بتعمل حوالي 300 (ثلاثمئة جنيه) في السنة، و بنزينها ممتاز بالنسبة لسيارة 2000 سي سي، يعني نص التانك بيستهلك حوالي 300 كم بس خللي بالك، لازم تحط بنزين لما المؤشر يصل للنص و دة علشان تحافظ علي ترومبة البنزين اللي ممكن يوصل سعرها ل 1000 ج (موتور الترومبة ب 300 ج).
عيوبها :
- واطية عن الأرض (و دة عيب البلد اللي احنا عايشين فيها مش عيب العربية لأن السيارة ماشاء الله ثابتة جدا علي الطريق)
- قواعد الموتور بتتغير في فترات قليلة، و دة لأن الموتور ماشاءالله كبيرو علي 3 قواعد بس، و طبعا المفروض يبقي علي 4 قواعد، و دة اللي عملته كرايسلر من أول موديل 2000، و لكن اطمن يعني، أسعار قواعد موديل 1997 - 98 - 99 رخيصة (طقم الاستيراد يعني 3 بحوالي 300 ج و الله أعلم).
- شكل التابلوه بتاع 1997 قديم شوية، ف لو لقيت 1999 يبقي تمام قوي.
و في الاخر، لازم برضه تعرف انك راكب عربية جامدة و اسم كبير، يعني لو هتقارنه بالكوري، يبقي دور في الكوري أفضل.
المفضلات