لوجان 2011 ومصر للتأمين

**baset** · 28-09-2011 06:36 PM

السلام عليكم ورحمة الله وبركاته

دي إستشارة يا جماعة مش شكوى

أنا إشتريت لوجان آخر السنة اللي فاتت وأمنت عليها تبع مصر للتأمين

دلوقتي مدة التأمين (سنة) قربت تخلص وجاي ميعاد تجديد البوليصة - أنا (الحمد لله) ماعنديش خبطات كبيرة ولا حاجة مهمة تتعمل في العربية بس القصة إن السنة قربت تخلص وأنا ماستفدتش من قيمة التأمين - كمان عندي مجموعة خرابيش بسيطة وشوية نقرات برضه بس مش كبيرة فعايز أعرف أعمل إيه

أتصل بمندوب التأمين وأقوله على الحاجات البسيطة دي وأطلب إنها تتعمل على حسابهم وهل هيرضى ولا هيرفض ويعتبرها كلام فارغ

برضه أنا سألت وعرفت إني لما آجي أجدد بوليصة التأمين على العربية بيبعته مندوب يعاينها وعرفت إنها بهذه الحالة مش هتتقيم كويس بمعنى إن المندوب هيكتب في تقرييره كل هذه الخربشات والنقرات ودة هيقلل في تقييم سعر السيارة

بصراحة محتار ومش عارف أعمل إيه - ياريت حد يشور عليا

**ayman1204** · 29-09-2011 12:18 AM

صلحها على حسابهم وشوفهم هيقولوا اية ...........

**wassim_nasser** · 29-09-2011 02:59 AM

الاستفادة الحقيقية من التأمين بتكون ف حالات الحريق او السرقه او الحوادث الجامدة لا قدر الله طبعا عشان الخسارة بتكون جامدة والتوكيل مابيرحمش .. اما بالنسبه للحاجات البسيطه زي الخدوش و الحكات فهى حاجات سهله بتتعمل ف اي ورشه .. لكن ف كل الحالات من حقك تطلب من التأمين يصلحهالك .. اول حاجه تطلع ع الفرع اللي انت مأمن فيه وتطلب مهندس يعاين الخدوش و يصورها عشان يتأكد ان فيه حاجه هاتتصلح وبعد كده هاتطلع ع التوكيل و هايروح معاك او يروح لوحده عشان يشوف التكاليف و يفاصل مع الناس ال ف التوكيل واما يتفقوا يبتدوا يصلحوا العربية وانت تحاسب وتاخد الفواتير وترجع للتأمين عشان يطلعولك شيك بقيمتهم .. اما لو هاتصلحها ف ورشه مش هايقولك حاجه بس هايطلب منك تصلح براحتك وبرضه ترجعله بالفواتير عشان يطلعلك شيك بقيمتهم .. حاول بس ماتطلعش الغلطه غلطتك عشان مايقولكش سوء استعمال ومالناش دعوة وكده .. بالنسبه للسنة الجاية قيمه القسط هاتزيد بس حاجه بسيطه عشان عملت حاجه ع حسابهم لكن لو مش عايز تجدد براحتك

**Abdm** · 29-09-2011 12:17 PM

حضرتك مقولتش دة تأمين أجبارى علشان أنت مقسط ولا دة تأمين بمزاجك .

لو تأمين علشان أنت مقسط يعنى تأمين غصب عنك ولسة التقسيط ما خلصش يبقى سيب العربية ذى ما هية ومع الوقت ممكن تعمل كذا حاجة مع بعضها
أمل لو ما فيش تقسيط أو خلص أحسنلك ألغى التأمين وأنت أولى بالفرق المبلغ اللى بتدفعة للتأمين وهينفعك لو حبيت تعمل أى حاجة فى العربية بعد كدة

أخيرا لا يفضل أنك تدهن العربية طالما حاجات بسيطة وسيبها ببوية الفبريكة علشان ما يتقلش بعد كدة أنك رشتها نظافة .... خلى كل حاجة ذى ما هية دلوقتى وما تلعبش فى حاجة أفضل ..
والله الموفق والمستعان

**baset** · 29-09-2011 03:31 PM

المشاركة الأصلية كتبت بواسطة wassim_nasser

الاستفادة الحقيقية من التأمين بتكون ف حالات الحريق او السرقه او الحوادث الجامدة لا قدر الله طبعا عشان الخسارة بتكون جامدة والتوكيل مابيرحمش .. اما بالنسبه للحاجات البسيطه زي الخدوش و الحكات فهى حاجات سهله بتتعمل ف اي ورشه .. لكن ف كل الحالات من حقك تطلب من التأمين يصلحهالك .. اول حاجه تطلع ع الفرع اللي انت مأمن فيه وتطلب مهندس يعاين الخدوش و يصورها عشان يتأكد ان فيه حاجه هاتتصلح وبعد كده هاتطلع ع التوكيل و هايروح معاك او يروح لوحده عشان يشوف التكاليف و يفاصل مع الناس ال ف التوكيل واما يتفقوا يبتدوا يصلحوا العربية وانت تحاسب وتاخد الفواتير وترجع للتأمين عشان يطلعولك شيك بقيمتهم .. اما لو هاتصلحها ف ورشه مش هايقولك حاجه بس هايطلب منك تصلح براحتك وبرضه ترجعله بالفواتير عشان يطلعلك شيك بقيمتهم .. حاول بس ماتطلعش الغلطه غلطتك عشان مايقولكش سوء استعمال ومالناش دعوة وكده .. بالنسبه للسنة الجاية قيمه القسط هاتزيد بس حاجه بسيطه عشان عملت حاجه ع حسابهم لكن لو مش عايز تجدد براحتك

أولاً: شكراً لحضرتك على الرد بس ليا شوية أسئلة:

- المهندس اللي هيعاين هيرضى إنها تتعمل ولا هيقولي لأ عشان ماتستاهلشي
- لو صلحتها في التوكيل مثلا هسيب العربية كذا يوم ولا عشان دي حاجات صغيرة هاخدها في نفس اليوم
- لما أحاسب الأول وأرجع لشركة التأمين هاخد كل اللي دفعته ولا هينقص منه حاجة مع العلم إن البوليصة بتاعتي شاملة نسبة ال 10% زيادة للتصليح تبع التوكيل
- إيه الفرق بين التصليح في التوكيل وأي ورشة برة
- يعني إيه سوء إستعمال مني مش المفروض هما ملزمين بأي ضرر يصيب السيارة
- في التجديد السنة اللي جاية هيقيمه سعر السيارة بكام

آسف على الإطالة

**baset** · 29-09-2011 04:27 PM

المشاركة الأصلية كتبت بواسطة abdm

حضرتك مقولتش دة تأمين أجبارى علشان أنت مقسط ولا دة تأمين بمزاجك .

لو تأمين علشان أنت مقسط يعنى تأمين غصب عنك ولسة التقسيط ما خلصش يبقى سيب العربية ذى ما هية ومع الوقت ممكن تعمل كذا حاجة مع بعضها
أمل لو ما فيش تقسيط أو خلص أحسنلك ألغى التأمين وأنت أولى بالفرق المبلغ اللى بتدفعة للتأمين وهينفعك لو حبيت تعمل أى حاجة فى العربية بعد كدة

أخيرا لا يفضل أنك تدهن العربية طالما حاجات بسيطة وسيبها ببوية الفبريكة علشان ما يتقلش بعد كدة أنك رشتها نظافة .... خلى كل حاجة ذى ما هية دلوقتى وما تلعبش فى حاجة أفضل ..
والله الموفق والمستعان

شكراً لرد حضرتك

- أنا مأمن إختياري لأن العربية ولله الحمد جبتها كاش بتحويشة العمر

- أنا فكرت كتير ألغي التأمين بس والله خفت - فعلاً السنة دي ماستفدتش بكل اللي دفعته بس إفرض لا قدر الله السنة اللي جاية حصل حاجة وأنا معنديش قدرة إني أشتري عربية تانية أو أجدد عربية بمبلغ كبير حصلها حاجة

- طيب أنا لو سيبت العربية ببوية الفابريكة يبقى كدة أنا ماستفدتش بالتأمين وبرضه دة بيتهيألي هيأثر لما آجي أأمن تاني

شكراً

**e_amrawad** · 29-09-2011 05:40 PM

سيادتك لو هتأمن في نفس الشركة مش هيبقي فية معاينة ودة طبيعي عشان هو هيفضل مسئول عن الحوادث في السنتين.
تقريباً المبلغ التأميني (سعر السيارة) بيقل في أول سنة من 10 الي 20% من قيمة العربية يعني لو انت مأمن السنة اللي فاتت علي العربية ب 70 ألف, السنة دي هتقل 10% يعني 63 ألف.

ولكن لو هتأمن في شركة تانية هتعمل معاينة وغالباً في المعاينة مبتفرقش الخدوش البسيطة.

**wassim_nasser** · 29-09-2011 05:54 PM

هارد عليك بإختصار .. معظم أسئلتك اجاباتها نسبية وبتبقى حسب الظروف يعنى المهندس يقول تتصلح أو لأ دي حاجه هو بيقررها لما يشوف الخدوش .. كمان موضوع تقعد ف التوكيل يوم أو عشرة ده علي حسب ظروف شغلهم هناك .. كل اللي اقدر اقولهولك ان التأمين بيدقق ف الحوادث الجامدة اللي بتحتاج محاضر شرطه يعنى اتخبطت ف نقل او شجرة (لاقدر الله طبعا) لكن الخدوش والحكات بتتعمل عادي .. بالنسبه للشغل جوة التوكيل او ف ورشة ده يرجع لشطارة الصنايعي يعنى لو هو كويس وفاهم هايطلع شغل نضيف وياما ناس راحت التوكيل واشتكت من السمكرة .. و يستحسن الحاجات الصغيرة تبقى بره التوكيل لأنك هاتدفع بره تلت او ربع ال هاتدفعه ف التوكيل ده غير ان التأمين مش بيفاصل ف شغل الورش لكن بيفاصل التوكيل وده موال رذل .. يعنى من الاخر ماتروحش التوكيل ف سمكره الا وانت مبهدل العربية .. نيجي لحته الشيكات انت كده كده هاتحاسب الورشة أو التوكيل وبعدين تروح التامين بالفواتير ويطلعولك الشيكات وبيحملوك 10% اجباري من تمن التصليح ..

-

-

الموضوع: لوجان 2011 ومصر للتأمين

LinkBack

أدوات الموضوع

عرض

لوجان 2011 ومصر للتأمين - انشر الموضوع فى :

-

-

-

-

-

المواضيع المتشابهه

مصر للتأمين و لوجان 20111

استلمت لوجان 2011 فيرانى يوم الاربعاء 2011 .

لوجان 2011 ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لوجان 2011

لوجان 2011

الكلمات الدلالية لهذا الموضوع

المفضلات

المفضلات

ضوابط المشاركة