عايز دكتور اسنان اطفال في مدينة نصر

**shaddadfalcon1** · 02-10-2011 11:45 AM

الف شكر ان شاء الله اروحله النهارده بالليل

**mohamed_selim** · 02-10-2011 12:48 PM

عيادة د. كريم البطوطى ... دكتورة الاطفال هناك اسمها د. نورا .. نمرة العياده - 26905783
بالنسبه للأسعار اسألهم فى التليفون على الكشف و لو فى حشو عصب و لو هتعمل طربوش لسنة الولد
بيشتغلو الصبح فممكن تكلمهم دلوقتى
المكان لو هتيجى من عباس العقاد لحد تقاطع الاوتوستراد هتلف يوترن و ترجع تخش فى الشارع اللى فى وش عباس العقاد (كأنك كملت طوالى فى عباس العقاد بعد ما تعدى الاوتوستراد) هتلاقى العقاد مول و مركاتو ماركت على شمالك ... تكمل طوالى (هتلاقى يمينك عمارات و شمالك جيش طول مانتا ماشى و شوارع جايه من يمينك و انت طوالى و بعدين هتعدى تقاطع و برضه عمارات يمينك و شمالك ملاعب و بعدين عمارات) اخر الشارع ده يا تخش يمين يا شمال ... هتخش يمين فى اول شمال )على ناصيته صيدلية نبيل صادق) و هتلاقى كنيسه على شمالك ... الشارع ده فى اخره (بعد 300 متر) برضه يا يمين يا شمال ... العياده فى العماره اللى فى الوش ... بعد الكنيسه لو لقيت ركنه اركن على طول

**shaddadfalcon1** · 02-10-2011 02:11 PM

فين تقاطع الاوتوستراد دي؟
انا اعرف من عند زاكر حسين بعدها النحاس بعدها النصر وبعد كده شارع النزهه

**mohamed_selim** · 02-10-2011 02:50 PM

النصر هو الاوتوستراد ... بعد النزهه فى شارع ضيق يمين و بعديه شارع اوسع شويه على ناصيته مركاتو ... هتخش فى التانى ده و تكمل طوالى لحد الشارع ميكملش تخش يمين فى اول شمال العياده فى العماره اللى فى الوش ...
كلمهم بس شوف المواعيد و الاسعار (لو قالتلك مفيش مواعيد النهارده او بكره اشرحلها الحاله و ان الولد تعبان و هى هتتصرف)

**shaddadfalcon1** · 06-10-2011 10:09 PM

انا رحت من شويه لدكتوره في شارع الطيران بعد مصطفي النحاس عند الشارع اللي علي قمته كنتاكي جنب مستشفي النصر
العياده اسمها الزرقاني

رحت والدكتوره فضلت تلاعبه لحد ماخلته قعد علي كرسي الكشف وبصت علي سنانه واستعملت الشنيور بتاعهم ده بس من غير الابره اللي فيه كانت بترش مياه بس عشان تخليه يتعود يفتج بقه وتشتغل علي سنانه

في 5 ضروس رايحين في داهيه منهم 2 هيحتاجو حشو عصب والأتنين التانين حشو عادي وهيبقي جلستين في الأسبوع

الكشف ب 50 وحشو العصب الضرس ب 200 والعادي ب 100 يعني اجمالي 700

هل كده غالي ولا ده العادي في الأطفال عشان انا لسه حاشي عصب ب 160 والدكتور عمل 5 جلسات

**korkor** · 06-10-2011 11:45 PM

ربنا يشفيه , انا مريت بالفيلم ده لاولادى الاتنين هى بتبقى مرحله صعبه بس بتعدى بالنسبه للاسعار مش غاليه اوى انا كنت بعمل جذور من اول 150 ووصلت 220 مع بعض الدكاتره اهم حاجه بس انك تبقى عارف ان فى السن ده حشو العصب ده حاجه مؤقته للحفاظ على السن او الضرس فى مكانه اطول فتره ممكنه لحين الوصول للسن اللى ممكن يتخلع فيه من غير مشاكل مستقبليه سواء من الاحتياج لقطع حفظ مسافه او تقويم .
بالنسبه للجلسات الاطفال تقريبا حشو العصب بياخد تقريبا جلستين الحشو العادى جلسه وم بينفع يتفتح فى كل الضروس مره واحده يعنى قدامك مش اقل من شهرين كده لان مرتين فى الاسبوع دى صعبه على الشخص الكبير

**shaddadfalcon1** · 07-10-2011 12:04 AM

ماهي المشكله انه لازم يخلص الليله كلها في ال 3 اسابيع اللي جايين عشان ممكن ارجع الاسكندريه بعد ال 3 اسابيع دوول ومش هينفع اعمل شويه عند دكتور وشويه عند دكتور تاني

انا سالتها هل هينفع نخصل الموضوع في اقل من شهر قالتلي ان شاء الله وانها ممكن تخلص ضرسين حشو عادي في مره واحده

النهارده انا دفعت 50 جنيه كشف وهي يادوب بصت وكانت بتعود الواد علي قاعدة الكرسي والبتاع اللي بيشتغلو بيه ده

**shaddadfalcon1** · 07-10-2011 04:52 PM

حد يعرف حاجه عن مركز التيسير الطبي الي جنب موقف العاشر؟
واحد صاحبي لسه قايلي عليه وبيقول رخيص ونظيف

اصلي بصراحه مستغلي الدكتوره دي قوي وحاسسها بتعمل شغل

**Khaled_Nowaihy** · 07-10-2011 04:58 PM

آه ... كويس جداً وأسعاره معقولة
ومتعاقد مع معظم النقابات

**shaddadfalcon1** · 07-10-2011 09:06 PM

المشاركة الأصلية كتبت بواسطة khaled_nowaihy

آه ... كويس جداً وأسعاره معقولة
ومتعاقد مع معظم النقابات

جزاك الله كل خير يااستاذ خالد
هو علي الشارع الرئيسي علي طول بعد الموقف ولا هلف كتيير عشان الاقيه.

بفكر اطنش للدكتوره دي وفي داهيه ال 50 جنيه اللي دفعتها علي الفاضي واروح اشوف النظام ايه هناك

بس ياتري عندهم اطفال ولا كبار بس؟