الموضوع: تجربتي الشخصية مع خدمة فالفولين لتغيير الزيت أمام المنزل

المشاركة الأصلية كتبت بواسطة azakareya

كنت قررت اني هاغير زيت و فلتر بس في صيانة ال-60000 دي عشان أوماترا غيروا بقية الحاجات في الصيانة اللي فاتت .. انهاردة رحت أوماترا اشتري الفلتر لقيته ب 32 جنيه فا انشكحت أوي قمت سألت على حلية الجنط اللي عليها علامة FIAT عشان طايرة من عندي طلعت ب-168 جنيه .. المهم و أنا راجع كلمت خط الخدمة بتاع فالفولين عشان احجز معاد، و الحقيقة التعامل كان محترم جدا و رد على أسئلتي بخصوص نوع الزيت المناسب لعربيتي و الفرق بينه و بين نوع تاني، و اتفقنا على المعاد و على الزيت: SynPower MST 5W-30

في المعاد تمام كان المندوب واقف قدام البيت بعربية ميكروباص عليها علامة فالفولين فيها العدة و كراتين زيت و جهاز الشفط و كوريك و الحصيرة أم عجل دي عشان ينزل تحت العربية براحته .. المهم، فتح الكبوت و شفط الزيت القديم و كله تمام في أقل من 10 دقايق، بعدين جه دور فلتر الزيت .. و هنا كانت المفجأة: الفلتر مش باين له أثر في الموتور .. الراجل رفع العربية و نزل تحتها خمس مرات و بص في الموتور و كلم المركز و سأل الناس و برضو ما حدش عارف أين يقع الفلتر! .. و طبعاً نمرة أوماترا مشغولة من قبل ما تجمع أصلاً حوالي نص ساعة لحد ما ردوا عليا:

- "ألو عايز أعرف من فضلك مكان فلتر الزيت في برافو T-Jet 150 حصان؟"
- "ما ينفعش حضرتك عشان دا لازم له أدوات مخصوصة"
- "يا سيدي ماشي بس أنا عايز أعرف مكانه!"
- "حضرتك لو غيرته بنفسك كده تخرج من الضمان"
- "من فضلك ممكن ترد على سؤالي: فين مكان فلتر الزيت؟" *نبرة غيظ و صوت مرتفع*

في الأخر عرفت اني لازم أفك غطا الموتور و بعدين في صفيحة صغيرة جنب التربو تحتها بقى موجود الفلتر .. خلاصة الموضوع، مندوب فالفولين طلع من القلة اللي مش بتحب تفتي و قال لي أنه مش هايعرف يغيره و كلم المركز تاني .. صراحة الناس اعتذروا لي عن الموقف ده و عن الوقت اللي ضاع و قالوا لي أن دي أول مرة يحصل الموقف ده .. أنا قلت لهم رأيي أن طالما العميل بيحجز معاد مسبق و بيحدد نوع عربيته يبقى المفروض المندوب اللي طالع الشغلانة دي يبقى عنده كل المعلومات اللي تساعده.

الخلاصة:
1- باستثناء الموقف اللي هو حالة فردية، الناس دول تعاملهم معايا على التليفون أو حتى المندوب اللي جه كان محترم جداً .. لو بعد تجربة الزيت حسيت فعلاً بفرق و طلع زيت كويس يبقى إن شاء الله هأكمل تعامل معاهم.
2- لازم لازم لازم نلاقي حد تاني بيفهم في عربياتنا غير أوماترا.

اتمنى ان تسمحولى بالمشاركة، و احب اعرفكو بنفسى انا سامر ايوب - مهندس كهرباء بس قضيت عمرى العملى كله فى مجال الحلول الميكانيكية و بالاخص تحليل الزيوت من اجل الصيانة التنبؤية و مدير فالفولين فى مصر.

اولاً اشكر تقديرك لخدماتنا يا بشمهندس احمد و اختيارك لزيت فالفولين و ثانياً اعتذر عن سوء التنسيق الحصل فى موضوع فك الفلتر، و المفروض ان كان يتم التأكد عن طريقنا من مكان الفلتر قبل الذهاب و عشان كدة احنا بنمبسط دايماً لما نعرف اراء عملاءنا علشان دايماً نقيم اداءنا و نجوده عشان نضمن افضل اداء للخدمة لعملاءنا.

العربية دى دخلت ال Database عندنا و بننبه اى عميل يتصل عنده نفس العربية بموضوع الفلتر ده و جارى تجهيز العدة المناسبة لتغييره و التأكد من اجراءات الوصول له داخل العربية و تفعيل النظام ده على كل العربيات الممكن تقابلنا اول مرة

اعتقد بل متأكد ان الزيت هيعجبك و هتحس بفرق فى اداء العربية.

اشكرك مرة اخرى، سامر