أول امبارح كنت في فرع المنصورة ...
كنت اتأخرت على معادي تقريبا ساعة فاتصلت بيهم قالولي مافيش مشاكل تعالى في أي وقت ..
على شباك العرض نزلي مهندس سلم عليا و اتكلم معايا بيسألني عن مشاكل العربية معايا ..
قولتله ( الباور سيء جدا جدا جدا و مافيش أي بومه سوقتها كان الباور بتاعها تقيل كده ) .. خد مني المفتاح و دور العربية و جرب .. و قالي لا لا الباور ده ممتاز مافيهوش أي مشاكل ... قولتله يا عم اسمعني أنا سوقت بومه كتير غير دي الباور بتاعهم أحسن من دي بكتير .. قالي لا ماتقلقش ..
قولتله كمان صوت العربية علي من بعد حكه جامده على مطب فانا شاكك إن علبة الشكمان اللي في وسط العربية دي متحركة أو محكوكة أو مخرومه .. و قولتله كمان عايز أشيك على العفشة ..
و قولتله كمان بالمرة عايز أكشف على الشاسيه كمبيوتر هل فيه أي إزاحات أو مشاكل ولا لأ لإن العربية كانت مخبوطه من 6 شهور في الجنب اليمين و خايف يكون فيه حاجة في الشاسيه .. لاقيته بيقولي .. بس ده هياخد وقت طويل أوي و موال .. ده عايز يوم لوحده و إحنا هنا هنقفل كمان ساعة .. قولته ماشي شوف اللي تقدر عليه اعمله .
خد العربية و بعد تلت ساعة تقريبا رجعلي بالتقرير ، بس اللي قرأ عليا التقرير هي بنت شغاله هناك ، المشكلة إنها ماكانتش عارفه تقراه خالص .. فقالتلي بص هو ده اللي المطلوب و ادتني التقرير أوقع عليه و أقراه بنفسي للإنها مش عارفه تقراه ... التقرير بيقول :
العقشة بتاعتي كلها بايظة !!
أيون ( تغيير طقم مساعد أمامي و خلفي ، تغيير بلي عجل أمامي ، تغيير بارة طرف دريكسيون ، مسامير ميزان أمامي ) يا جماعة أنا لسه مشيك على العفشة و مربط عليها ، و لسه مغير طقم مساعدين أمامي من 5 شهور والله زيرو أصلي ياباني .....
و كمان المفروض أغير زيت الباور .. و ماتنساش إنه قالي بارة طرف دريكسيون ... كويس أوي .. يعني أخيرا اقتنع المهندس إني عندي مشكله في الباور
طيب الشاكمان ... مافيش عيوب .. طيب و الصوت ده .. ده طبيعي ...
الأجمل من كده .. المساعد عندكم بكام ... 1080 جنيه .. في حين إنه بره بـ 320 جنيه
و إحنا قاعدين دخلت عربية لانسر شارك .. عايز يعمل فحص زيي كده .. البنت اللي شغاله هناك خدت منه المفتاح .. أولا ماكانتش عارفه الزرار اللي بيوقف الإنزار بتاع العربية فين .. ثانيا ماكانتش عارفه تدخلها في الحته الضيقة المخصصة للصيانه ، و برضه مش عارفه تقرأ التقرير بتاع الصيانة ..
تقيمي لمراكز صيانة ميتسوبيشي حتى الآن ... 4 من 10 و كويس أوي إنهم خدو 4 ... لإن أي مركز صيانة غيرهم بيكون فيه أجهزة أحسن من كده و مهندسين بتفهم أكتر من كده .. و قطع غيار أرخص من كده.
المفضلات